Cazi tucui ladocunapimi gentecunaca huaquin cosascuna ali cashcata y shuj cosascuna nali cashcataca ali yachan. Tucui gentecunallatami huañuchina, huarmigucunata, huahuagucunata abusashpa violana nalipacha cashcata ali yachan. Cutin mayoría gentecunallatami ali cana, shujcunamanda preocuparina, shinallata alita rurana ali cashcataca ali yachan. Shinapash relaciones sexualesmanda, imashina huahuacunata viñachinamandaca ¿imatata pensan? Ashtacacunaca caicunamandaca shuj shuj yuyaicunatami charin. Y “maijan yuyaita catinapash alimi can” yashpami pensan. Chaimandami ashtaca gentecunaca paicunapa ricuipilla ali cashcata ricushpa o na cashpaca shujcuna imatapash alimi can nijpilla chaita catishpa ruran. Shinapash cashna pensashpa imatapash ruranaca ¿alichu can?

Ñucanchicunaca normalmenteca ñucanchi concienciapi confiashpami imapash decisiongunataca agllapanchi. Ñucanchi concienciami siempre ima ali cashcata, ima nali cashcata cuenta japichun ayudan (Romanos 2:​14, 15). Huahuacunapashmi ima ali, ima nali cashcata cuenta japita ushan. Chaimandami pandarishpaca nali o culpable sintirin. Ima familiapi viñajpi, ima amigocunahuan llevarijpi, maijan llactapi causajpi, ima culturata y religionda charijpipash ñucanchi concienciaca asha ashami cashnallata tucushpa catin. Shinaca chai yachajushcacunata catishpami imapash decisiongunata japishpa concienciapi ali o nali sintirinchi.

Ñucanchi concienciaca shujcunamanda ciertopacha preocuparichun, agradecido cachun, alita ruranata gushtachun, shujcunata llaquij cachunmi ayudaita ushan. Shinallata ñucanchi juyashca personacunata ama imatapash nishpa o rurashpa llaquichichun, ñucanchicunallatapash ama nalita rurashpa pingai tucuchunmi ayudan.

Ñucanchi ricuipilla imapash alimi can yashpalla imatapash ruranaca ¿alichu can? Garrick huauquiguca joven cashpaca pai munashcashna causanatami decidirca. Tiempohuanga chashna causana imapash alita rurachun na ayudashcatami cuenta japirca. Paipa causaimanda parlashpaca paica: “Llaquillapachami carcani. Porque huainayashpa, drogacunata chupashpa, machashpa y millai millai gentecunahuan llevarishpami causarcani” ninmi.

Ashtaca viajecunataca, “shujcunaca ¿imatashi yuyanga?” nishpami imatapash ruranchi. Chashna ruranaca huaquinbica ñucanchitallatami benefician. Shinallata familiacunapa, amigocunapa, ñucanchi causajuj pushtupi gentecunapa ñaupapi ali ricurij cosascunata rurashpaca paicunapa respetotami ganaita ushapanchi.

Shujcuna alimi can nijpilla imatapash ruranaca ¿alichu can? Priscilaca joven cashpaca paipa amigocunata catishpami nara cazarashpallata relaciones sexualesta charishpa causarca. Shinapash shujcunapa ñaupapi ali ricurij cosascunata rurashpa causana paita na cushilla sintirichun ayudajtami cuenta japirca. Paica ninmi: “Tucuicunallata ruranajun cosascunata rurashpaca nali sintirircanichu. Cai cosascunaca nali, peligroso cosascunata rurachunmi apahuarca”.

Ima ali cashcata decidingapaca ñucanchipa ricuipi alimi can yashpa pensashcacunata y shujcunaca ¿imatashi yuyanga? yashpa pensashcacunata yaipi charinallaca na suficientechu can. Porque chaicunapilla pensashpa shuj decisionda japinaca na siemprechu ñucanchitaca ayudanga. Huaquinbica ñucanchipa decisionguna ñucanchita o shujcunata llaquichinamandaca na jarcaita ushapanchichu (Proverbios 14:12). Ashtahuanbash, “alita ruranata yachajushpami viñashcani, alita ruraj personacunahuanmi llevarini” yajushpapash, ñucanchipa ruraicunaca talvezpashmi na tucuipi ali caita ushan. Gentecunapaca imapash alimi can o nalichu can yashpa pensashca cosascunaca tiempohuanga cambiarinllami. Pundacunapica huaquin ruraicunata ruranaca gentecunapaca nalipachami carca. Shinapash cunangunapica chai ruraicunallatami gentecunaca normalmi can nishpa ricun. Shinallata gentecunapa huaquin comportamientocunataca pundacunaca normalmi can yashpami ricun carca. Shinapash cunanbica chai comportamientocunatallatami nalipachami can nishpa ricun.

Shinapash imapacha ali o imapacha nali cashcata yachachunga ¿imata ayudaita ushan? ¿Ñucanchi causaipi siempre shuj ali decisionda japichun y jipacunaman ama arripintirichun ayudaj consejocuna tianllu?

Ari, tiapanmi. Cai ayudaca maipi causajpipash, imashina viñashca cajpipash siempremi ali decisiongunata japichun ayudapanga. Cati temapica ima ali o nali cashcata ali ricushpa decidichun maipi ali consejocunata tari ushashcatami yachajugripanchi.