Ima ali, ima nali cashcata decidingapaca: Quiquinllatami ricuna capangui
Ñucanchipa decisiongunaca llaquilla o cushilla causaiman apaita ushan. Jehová Diosca chaita yachaimandami paipa consejocunata cazushpa causachun munan.
Jehová Diosca ñucanchicuna tranquilo, cushilla causaiguta charichunmi munan.
“Ñucami, cangunata Mandaj Taita Dios cani. Ñucami, cangunapaj ali cachun cangunata yachachini. Canguna maijan ñanda rinatapash, ñucami ricuchishpa pushani. ¡Ñuca mandashcacunata canguna cazushca cajpica, jatun yacushnamari casilla aliguta causanaca, na tucurinman carca! Imatapash cashcatapacha ruranapash, mama cucha yacu caiman chaiman cuyurinshnami canman carca” (Isaías 48:17, 18).
Jehová Diosca ñucanchita rurashcamandami. Ñucanchipa ima ali o ima nali cashcataca ali yachan. Chaimandami paipa consejocunata catichunmi munan. Paipa consejocunata cazushpaca siempremi ali decisiongunata japishun. Shinami tranquilo cushilla causaita ushapashun.
Jehová Diosca pactachi ushanalla consejocunatami cun.
“Cai mandashcacunata pactachinajuchun cunan ñuca mandashcacunaca, na yapa shinllichu, carupipash na canllu” (Deuteronomio 30:11).
Jehová Diospa mandashcacunata pactachishpa causangapaca ñucanchi pensamientocunata ñucanchi ruraicunata talvez cambianami tucunga. Pero Jehová Diosca na pactachi ushana cosascunataca na mandanllu. Ashtahuangarin pai ñucanchita rurashcamandami ñucanchicuna imatalla rurai ushashcataca ali yachan. Jehovata ashtahuan rijsishpami paipa ‘mandamientocuna pactachinalla na yapa difícil cashcata’ intindipanchi (1 Juan 5:3).
Jehová Diosca paita cazujcunataca ayudashami ninmi.
“Cangunata Mandaj Taita Dios ñucami, cangunapaj ali lado maquimanda pushaj cani. Ñucami cangunataca: ‘Na manllanachu canguichi, ñucami ayudasha’ nini” (Isaías 41:13).
Jehovapa ayudahuanga paipa mandashcacunata cazushpa causaita ushapanchimi. Paica ñucanchita animangapaj, shuj esperanzata charichun ayudangapaca Bibliatami utilizan.
Mundo enteromanda ashtaca ashtaca gentecunami Bibliapa consejocunata catina paicunapa causaita mejorachun ayudashcata ricushca. ¿Quiquinga Bibliapa ali consejocunamanda ashtahuan yachajungapaj munapanguimanllu? Chaipaca Cushilla causapashunchi nishca folletohuanmi yachajui callarita ushapangui. Cai folletoca gratismi can. Shinallata jw.org paginapimi descargaita ushapangui. Y cai 3 lecciongunatami charin:
-
Quiquindaca ¿imashinata Bibliaca ayudaita ushan?
-
Bibliapica ali causaigu tianatami yachachin
-
¿Bibliapa nishcacunapi confiai ushapanchichu?
Bibliata ashtahuan yachajushpaca ‘chai mandashcacunataca, causaita causaicamanmi, shinllipacha cachun churashca’ cashcatami ricupangui (Salmo 111:8). Bibliapi mandashcashna causanami ashtahuan ali causaita charichun ayudan. Shinapash Taita Diosca pitapash pai munashcashna causachunga na obliganllu (Deuteronomio 30:19, 20; Josué 24:15). Pai mandashcashna causanata o na causanatapash cada unomi decidita ushapanchi.
