1, 2. ¿Imamandata cada huata Conmemoracionman ripanchi?

 CASI 2 mil huatacuna huashamanmi Jesusca ñucanchimanda huañurca. Shina rurashcamandami ñucanchicunaca para siempre causana oportunidadta charinchi. Jesusca huañungapaj ashalla faltajujpimi paipa discipulocunahuanga shuj reunionguta rurarca. Chaipaca tandata y vinotami utilizarca. Shinallata paipa discipulocunamanga chai tandanajuita rurashpa catichunmi mandarca. Shinami paicunaca Jesús paicunamanda huañushcata yari ushana carca (1 Cor. 11:23-26).

² Jesusta catijcunaca Jesusta juyaimandami paipa mandashcataca pactachinchi (Juan 14:15). Conmemoracionda rurana punllacunapica Jesuspa sacrificiota valorashcata ricuchingapaca, Jehová Diosta mañangapaj, Jesús imamanda huañushcata pensaringapami tiempota llujchipanchi. Shinallata cai punllacunapica shuj gentecunapash Conmemoracionbi cachun munaimandami Conmemoracionman invitangapaj ashtahuan tiempota predicangapaj esforzaripanchi. Conmemoracionmanga nimamanda na faltangapaj munapanchichu.

3. Cai temapica ¿imatata ricugripanchi?

³ Jehovata sirvijcunaca Jesús huañushcata yaringapaca siempremi ashtacata esforzaripashcanchi. ¿Imamandata shina nipanchi? Cai temapimi quimsa yuyaicunata ricugripanchi: 1) Conmemoraciondaca Jesús mandashcashnami rurapanchi. 2) Shujcunapash Conmemoracionbi cachunmi invitapanchi. 3) Jarcaicuna tiajpipash Conmemoracionda rurangapami esforzaripanchi.

4. a) Conmemoracionbica ¿imatata yachachin? (Lucas 22:19, 20). b) Cai yachachishcacunata intindinaca ¿imamandata importante can?

⁴ Cada huatami Conmemoracionman rishpaca Bibliamanda shuj discursota uyanchi. Chai discursopimi huaquin tapuicunataca ali ali intindichin. Por ejemplo, imamanda Jesús huañuchun minishtirishca cashcata y shujlla runa huañushcamanda imashina ashtaca gentecunapa pecadocuna perdonai tucushcatapashmi yachajupanchi. Shinallata picunalla tandata micujta, vinota ufiajtapashmi yachachin. Y caicuna ima significajtapashmi intindichin (Lucas 22:19, 20​ta liipangui). Discursota uyanajushpaca cai alpapi causana esperanzata charijcuna ima bendiciongunatalla charinatami pensaripanchi (Is. 35:5, 6; 65:17, 21-23). Cai yachachishcacunata aliguta intindinaca importantepachami can. Pero ashtaca millón gentecunami cai yachachishcacunataca nali intindin. Shinallata Jesuspa sacrificiotapash na valorashpa ricunllu. Paicunaca Jesús yachachishcashnaca Jesús huañushcataca na yarinllu. Pero ¿imamandata shina pasan?

5. Casi tucui apostolcuna huañushca jipaca Jesús huañushca punllataca ¿imashinata yari callarirca?

⁵ Casi tucui apostolcuna huañushca jipallami llullashpa yachachij jaricunaca congregacionbi mirai callarirca (Mat. 13:24-27, 37-39). Paicunaca llullashpami yachachinajurca. Shinallata “discipulocuna congregacionda saquishpa, paicunata catichunmi” munarca (Hech. 20:29, 30). Bibliapica “Cristopash ashtaca gentecunapa pecadocunata apangapami, shuj viajella paillata shuj sacrificioshna curirca” nijunmi. Shinapash paicunaca chaica na ciertochu can nishpami yachachinajurca. Ashtahuanbash Jesusca cutin cutin chai sacrificiota rurana cashcatami yachachirca (Heb. 9:27, 28). Y cunan punllacunapica ali shunguta charij gentecunaca cai panda yachachishcacunataca crinmi. Chaimi tucui semanacuna o tucui punllacuna el sacrificio de la misa nishcata yaringapaj iglesiaman rin. b Cutin huaquin religiongunaca huaquinbi huaquinbillami Jesús huañushca punllataca yarin. Pero chaita ruraj gentecunaca Jesús imamanda huañushcataca nali intindinllu. Talvez huaquingunaca: “¿Ciertopachachu Jesús huañushcamandaca ñuca pecadocunaca perdonashca quidan?” nishpami pensarita ushan. Jesuspa sacrificio ñucanchi pecadocunata na perdonai ushanllu nishpa crichishcamandami huaquingunaca shina pensarin. Pero ali cristianocunaca ¿imatata rurashca?

6. 1872 huatapica Estudiantes de la Bibliaca ¿imatata intindirca?

⁶ 1870 huatacunapica Charles Russell huauquiguca Bibliamanda yachajungapaj shuj grupotami ñaupaman pushajurca. Chai grupoca Bibliata ali alimi estudiai callarirca. Paicunaca Jesús imamandapacha huañushcata y Jesús huañushcata imashinapacha yarina cashcatami ali intindingapaj munarca. Y 1872 huatapica Estudiantes de la Bibliaca, Bibliapa ayudahuanmi Jesús tucui gentecunamanda huañushcata intindirca. Caita ali intindishpaca tucui gentecuna yachachun munaimandami librocunapi, periodicocunapi, revistacunapipash cai informaciondaca llujchirca. Asha tiempo jipaca, apostolcunapa punllacunapi cristianocuna rurashcashnallatami Conmemoraciondaca huatapi shuj viajetalla rurai callarirca.

7. Estudiantes de la Biblia rurashca investigaciongunaca ¿imashinata ñucanchitaca benefician?

⁷ Estudiantes de la Biblia rurashca investigaciongunaca ¿imashinata ñucanchicunataca benefician? Bibliata ali intindingapaj esforzarishcamandami Jehová Diosca paicunata bendiciarca. Chaimandami ñucanchicunaca Jesús imamandapacha huañushcata y Jesús huañushcamanda ima bendiciongunatalla charinatapash intindipanchi (1 Juan 2:1, 2). Shinallata Bibliapica  Diosta cazujcunamanda huaquingunaca jahua cielopi causana esperanzata, cutin ashtaca millón gentecunaca cai alpapi para siempre causana esperanzata charishcatapashmi yachajupashcanchi. Y Jehová Dios ñucanchita ninanda juyajta y Jesuspa sacrificiomanda imashina beneficiarishcata pensarinami Jehovaman ashtahuan quimirichun ayudan (1 Ped. 3:18; 1 Juan 4:9). Chaimandami punda cristianocunashnallata Jesús mandashcata catishpa Conmemoracionda rurapanchi y shuj gentecunapash cai reunionman shamuchun invitapanchi.

8. Jehovata sirvijcunaca shujcunata Conmemoracionman invitangapaca ¿imatata rurashca? (Fotocunata ricupangui).

⁸ Jehovata sirvijcunaca tauca huatacunatami shuj gentecunata Conmemoracionman invitanajushcanchi. 1881 huatapica La Atalaya revistapica Estados Unidosmanda huauquipanicunataca Conmemoracionda rurachunmi invitajurca. Paicunataca Pensilvania llactamanda shuj huasipimi chai reunionda rurachun animarca. Chai jipaca cada congregacionmi Conmemoraciondaca rurai callarirca. Marzo de 1940​pica ashtahuan yachajungapaj munaj gentecunata Conmemoracionman invitachunbashmi publicadorcunataca animarca. Y 1960 huatapica Betelmandami por primera vez invitaciongunata imprimishpa congregaciongunamanga cacharca. Chai tiempomanda cunangamanga testigo de Jehovacunaca ashtaca millón invitaciongunatami saquishcanchi. ¿Imamandata shina rurangapaca ninanda esforzarishcanchi?

9, 10. Conmemoracionman shamuchun shujcunata invitangapaj esforzarishcamandaca ¿picunallata beneficiarin? (Juan 3:16).

⁹ Jehová Diospash, Jesuspash ñucanchimanda imacunatalla rurashcata yachachun munaimandami shujcunatapash Conmemoracionmanga  invitapanchi (Juan 3:16​ta liipangui). Chai reunionbi imata rurashcata ricushpa y chaipi yachachishcacunata uyashpaca Jehová Diosta ashtahuan rijsingapaj munachun y paita sirvichunmi munapanchi. Pero chai reunionman shamuchun shujcunata invitangapaj esforzarishcamandaca ¿picunapashta beneficiarin?

¹⁰ Conmemoracionda invitaciongunaca Jehová Diosta sirvinata saquishcacunapapashmi can. Jehová Dios paicunata juyashpa catishcata yarichunmi paicunataca Conmemoracionman invitapanchi. Cai huauquipanicuna Conmemoracionman cutin shamujta ricushpaca ninandami cushijupanchi. Conmemoracionbi cashpami cai huauquipanicunaca Jehová Diosta sirvishpa cushilla yalishcata yarita ushan. Panigu Monicapa experienciata ricupashunchi. c Paica pandemia tiempopica cutinmi predicai callarirca. Huata 2021​pi Conmemoracionman rishca jipaca caitami nirca: “Cai huatapa Conmemoraciondaca ninandami gushtarcani. 20 huatacuna jipami shuj gentecunaman predicashpa Conmemoracionmanga invitashcani. Jehová Diospash, Jesuspash ñucamanda imata rurashcata ninanda agradicimandami tucui shungu predicashpa gentecunataca invitarcani” ninmi (Sal. 103:1-4). Gentecuna ñucanchi invitaciongunata chasquijpi o na chasquijpipash paicunata invitangapaj esforzarishcamanda Jehová cushilla sintirinataca alimi yachapanchi.

11. Conmemoracionman shuj gentecunata invitangapaj esforzarishcamandaca ¿imashinata Jehová Diosca bendiciashca? (Ageo 2:7 TNM).

¹¹ Conmemoracionman shuj gentecunata invitangapaj esforzarishcamandaca Jehová Diosca ninandami bendiciashca. Por ejemplo, 2021 huatapica pandemia unguimanda shuj shuj jarcaicuna tiajpipash 21 millón 367 mil 603 gentecunami Conmemoraciondaca uyarca. Mundo enteropi tiaj tucuilla testigo de Jehovacunatapash yali ashtahuan gentecunami tandanajurca. Pero Jehová Diosca mashna gentecunalla tandanajushcataca na ricunllu, sino gentecuna beneficiarichunmi munan (Luc. 15:7; 1 Tim. 2:3, 4). Jehová Diosca Conmemoracionda y invitaciongunata utilizashpami ali shungu gentecunata tarichunga ayudan (Ageo 2:7​ta liipangui, TNM). d

12. ¿Imacunata Conmemoracionda rurachunga jarcaita ushan? (Fotota ricupangui).

¹² Jesusca último punllacunapica shuj shuj jarcaicunata charinatami nirca. Por ejemplo familiacuna jarcaicunata churanata, catiriashpa llaquichinata, guerracuna tianata, shuj shuj unguicuna tianatapashmi nirca (Mat. 10:36; Mar. 13:9; Luc. 21:10, 11). Cai cosascunami Conmemoracionda ama rurachun jarcaita ushan. Cai jarcaicunata charishpapash ñucanchi huauquipanicunaca ¿imatata rurashca? Y Jehová Diosca ¿imashinata ayudashca?

13. Carcelpi cashpapash huauquigu Artiom Conmemoracionda rurangapaj ninanda esforzarishcamandaca ¿imashinata Jehová Diosca bendiciarca?

¹³ Carcelpi cashpa. Paicunapa crishcacunamanda carcelpi caj huauquipanicunaca Jesús huañushca punllata yaringapaca ninandami esforzarin. Artiom huauquigupa ejemplota ricupashunchi. 2020 huatapa Conmemoración punllacunapica huauquiguca 17 metros cuadradosta charij shuj celdapimi carca. Chai celdapica hasta 5 prezocunatami churan carca. Prezo cashpapash huauquiguca Conmemoracionda rurangapaj huaquin cosasgucunatami utilizai usharca. Shinallata paillata discursota cungapapashmi prepararirca. Solo que paipa compañerocunami fumanata yachan carca. Y nali shimicuna nishpami parlan carca. Huauquigu Artiomga ¿imatata rurarca? Huauquiguca paipa compañerocunataca más  que shuj horasgutallapash ama fumachun, ama nali shimicunatapash nichunmi mañarca. Shina mañajpica paipa compañerocunaca ari nircami. Huauquiguca: “Cangunamanga Conmemoracionda imashina rurana cashcatami explicai ushani” nircami. Callaripica chaimanda na yachangapaj munashpapash Conmemoracionda rurashca jipaca chai compañerocunaca ashtahuanmi yachajungapaj munarca.

14. COVID-19 pandemia tiajpipash ¿imashinata Jehovata sirvijcunaca Conmemoraciondaca rurarca?

¹⁴ COVID-19 ungui tiajpi. Pandemia tiashcamandami Jehovata sirvijcunaca Conmemoraciondaca presencialmenteca na chari usharcanchi. Shinapash Conmemoraciondaca rurai ushaparcanchimi. e Internetta charij congregaciongunaca internetpillatami Conmemoraciondaca uyaita usharca. Pero internetta na charij ashtaca huauquipanicunaca ¿imatata rurarca? Huaquin llactacunapica Conmemoracionba discursotaca telepi o radiopi yalichirca. Shinallata caru caru llactacunapi causaj huauquipanicunapash Conmemoracionda uyachunga, sucursalcunaca 500 yali idiomacunapimi cai discursotaca grabarca. Y huaquin huauquicunami chai grabaciongunata chayachingapaca encargarirca.

15. Sue huarmigumandaca ¿imatata yachajupanchi?

 ¹⁵ Familiacuna jarcajpi. Familiacuna jarcajpimi ashtacacunapaca Conmemoracionda rurana o Conmemoracionda uyanaca difícil cashca. Sue huarmigupa experienciata ricupashunchi. Paica shuj estudiante de la Bibliami can. 2021 huatapa Conmemoracionba shuj punlla faltajujpimi Sue huarmiguca paipa maestrataca: “Ñuca familia jarcajushcamandaca Conmemoraciondaca nali uyai ushashachu” nishpa villarca. Chaimi Sue huarmita yachachijuj paniguca Lucas 22:44​ta textota liirca. Paniguca problemacunahuan cashpaca Jesuspa ejemplota catina cashcata y Jehová Dios ayudanapi tucui shunguhuan confiashpa mañana cashcatami intindichirca. Y Conmemoración punllapica Sue huarmiguca tandata rurashpami vinotapash ña listo charirca. Shinallata jw.org paginapica Conmemoracionba Tutamanda Bibliata Yachajungapaj programatapashmi ricurca. Chishipica paipa cuartopi vicharishpami Conmemoraciondaca telefonopi uyarca. Chai jipaca paipa maestramanga cashnami escribirca: “Cainaca ninandami animahuarcangui. Conmemoracionda rurangapaj ninanda esforzarishcamandami Jehová Diosca ayudahuarca. Chaimandami cushilla y agradecida sintirini” nircami. Quiquinbash shinallata pasajushpaca ¿Jehová Dios quiquinda ayudanapi confiapanguichu?

16. Conmemoracionman ringapaj esforzarishcamanda Jehová Dios bendicianataca ¿imamandata seguro capanchi? (Romanos 8:31, 32).

¹⁶ Jesús huañushcata yaringapaj ñucanchicuna esforzarijpica Jehová Diosca ninandami cushijun. Jehová Dios ñucanchimanda imata rurashcata agradicingapaj esforzarijpica Jehová Dios ñucanchita bendicianataca seguromi cai ushapanchi (Romanos 8:31, 32​ta liipangui). Cai huatapa Conmemoracionmanga nimamanda na faltangapaj munapanchichu. Cai huatapa Conmemoración punllacunapi Jehová Diosta ashtahuan sirvingapaj esforzaripashunchi.