TUCUICUNALLATAMI cushilla cangapaj munanchi. Shinapash cai ‘tucurimui punllacunapica jatun llaquicunami tian’ (2 Tim. 3:1). Ashtaca gentecunaca yangata llaquichijpi, salud nali cajpi, trabajota na charishpa, o huaquinbica familia ucupi pipash huañujpimi na cushilla causan. Taita Diosta sirvijcunapashmi desanimarishpa asha asha cushilla caitapash ñana ushan. Ñucanchipash shinallata sintirijushpaca ¿imatata rurana capanchi?

Chai tapuita nara tigrachishpallatami, cushilla cana ima cashcata ali intindina capanchi. Huaquingunaca problemacunata charishpapash cushilla cashpa catishcatami yachajupashun. Shinallata cushilla cashpa catingapaj imata ruranatapashmi yachajupashun.

Cushilla canaca, tucui shunguhuan cushijunahuanga na igual canllu. Chaipaca shuj ejemplota ricupashun. Pipash tragota ufiashpaca cushillami sintirin. Shinapash cayandi punllaca paicuna charishca problemacunapash na tucurishcatami cuenta japin. Paicunapa cushijuica ashapallami can. Tucui shunguhuan cushijuitaca na charircachu (Prov. 14:13).

Tucui shunguhuan cushilla canaca shujpachami can. Cai cushijuica imatapash charishpa, imapash alita shuyajushpa cushilla canatami ricuchin. Tucui shunguhuan cushilla canaca llaqui punllacunapipash cushilla canatami ricuchin (1 Tes. 1:6). Huaquingunaca llaquicunata charishpapash cushillami sintirin. Por ejemplo, apostolcunataca Jesusmanda villachijpimi macarca. Shinapash Bibliapica nin, “Mandaj puracunalla tandanajushca ñaupajmanda paicuna Ilujshishpaca, Jesuspaj Shutimanda llaquita apachun Dios saquishcamandami, ninanda cushijunajurca” nishpa (Hech. 5:41). Apostolcunaca paicunata macashcamandaca na cushijunajuriangachu. Ashtahuangarin Taita Diosta tucui shunguhuan sirvijuimandami cushilla sintiririanga.

Tucui shunguahuan cushijuita charichunga ¿imata ayudanga? Chaita charichunga Taita Diospa espiritu santomi ayudanga. Taita Diospa espiritu santomi ‘mushuj causaita’ charichun ayudan. Chaimi tucui shunguhuan cushilla caitapash ushanchi (Efes. 4:24; Gál. 5:22, NM). Tucui shunguhuan cushilla cashpaca ima problemacunata charishpapash imashina chimbapuranatami yachajushun.

Jehová Dios cai alpata rurashpaca tucuicuna ali causachunmi rurarca. Cunanbishna causachunga na munarcachu. Gentecuna nalicunata rurajta ricushpapash, Jehová Diosca tucui shunguhuan cushilla canataca na saquishcachu. Chaimi Bibliapica nin: “tucui ushaipash, cushijuipashmi tian” nishpa (1 Crón. 16:27). Taita Diosca paita sirvijcuna alita rurajta ricushpaca tucui shunguhuanmi cushijun (Prov. 27:11).

¿Imashinata Jehová Diospa ejemplota cati ushapanchi? Ñucanchi munashcashna imapash na llujshijpi na yapata preocuparishpa. Tucui shunguhuan cushilla canata saquinapa randica imata alita rurashcatami yarina capanchi. Ashtahuanbash problemacuna  arreglarichunga pacienciahuanmi shuyana capanchi. *

Bibliapica ashtaca Jehovata sirvijcuna llaquicunata charishpapash, tucui shunguhuan cushilla catishcatami parlan. Por ejemplo, Abrahanga shujcunapa culpamandami problemacunata chimbapurana tucurca. Chaimi paipa causaitapash peligropi churarca (Gén. 12:10-20; 14:8-16; 16:4, 5; 20:1-18; 21:8, 9). Shina cashpapash tucui shunguhuan cushilla canataca na saquircachu. ¿Imata ayudarca? Jesús cai alpata mandajpi paraíso alpagupi causanata yaria causanami Abrahandaca tucui shunguhuan cushilla cachun ayudarca (Gén. 22:15-18; Heb. 11:10). Jesusca nircami: “Cangunapaj ñaupa taita Abrahamga, cai pachaman ñuca shamujpi, ricunata yachashpami cushijurca” nishpa (Juan 8:56). Ñucanchipashmi Abrahanba ejemplota catishpa shamuj punllacunapi tucui shunguhuan cushijushpa causanata pensarina capanchi (Rom. 8:21).

Abrahanba ejemplota catishpami apóstol Pablopash, paipa cumba Silas runagupash Taita Dios carana bendiciongunapi yaria causarca. Paicunaca shinlli feta charimandami ima llaquicuna ricurijpipash tucui shunguhuan cushilla cati usharca. Shuj viajeca caspicunahuan ushashcata macashpami carcelpi vicharca. Bibliapica ninmi, “chaupi tutaca Pablondi, Silas runagundimi, Taita Diosta mañashpa candanajurca” nishpa (Hech. 16:23-25). Paicunaca Taita Diospa nishcacunata yarishpapash, Jesuspa shutimanda sufrijushcata yarishpami tucui shunguhuan cushijushpa catirca. Paicunapa ejemplota catingapaca, Taita Diosta tucui shunguhuan sirvimanda cushilla causashcatami yarina capanchi (Filip. 1:12-14).

Cunan punllapi ashtaca huauquipanicuna problemacunata charishpapash tucui shunguhuan cushilla catishcatami yachajupanchi. Por ejemplo, noviembre de 2013 huatapi Filipinas llactapica, ninanda huairashpa tamiashpami ninanda llaquichirca. Shinallata mil yali Testigo familiacunapa huasicunatami tucuchirca. George shuti huauquica Tacloban llactamandami carca. Paica nircami: “Shina llaqui pasashpapash huauquicunaca cushillami carca. Imashinapacha sintirishcataca na parlai atinanichu” nishpa. Jehová Dios imatalla ñucanchimanda rurashcata pensarina, tucuimanda agradicinaca llaquicunata charishpapash tucui shunguhuan cushijushpa catichunmi ayudan. Cushilla catichunga ¿imatata Jehová Diosca ashtahuan rurashca?

Jehová Dioshuan ali amigo caimandami tucui shunguhuan cushilla caita ushanchi. Tucuita Ruraj Diostami rijsinchi. Paica ñucanchi Dios, ñucanchi Taita, Amigopashmi can (Sal. 71:17, 18).

¿Imamandata ashtahuan tucui shunguhuan cushilla caita ushapanchi? Ñucanchicunaca causaita charishcamandami cushilla caita ushapanchi (Ecl. 3:12, 13). Jehová Diosmi ñucanchitaca paimanda yachajuchun ayudashca. Chaimi paipa munai maijan cashcata yachajushcanchi (Col. 1:9, 10). Shinallata ñucanchi causaipi imata ruranatapashmi ali yachanchi. Cutin ashtaca gentecunaca paicunapa causaihuan imata ruranatapash na yachanllu. Apóstol Pabloca chai gentecunamanda parlashpaca caitami nirca: “‘Ricuitapash na ricushca, uyaitapash na uyashca, pipaj shungupipash na yarijushcatami. Taita Diosca paita ninanda juyajcunamanlla alichishca’. Ashtahuangarin Taita Diosca, ñucanchimanmi pipash na yachai ushashcataca, paipaj espirituhuan yachachimushca” nishpa (1 Cor. 2:9, 10). Jehová Diospa nishcacunata intindina, paipa munaita ali intindinami tucui shunguhuan cushilla cachun ayudanga.

Cunanga Jehová Dios paipa llactamanda imata rurashcata ricupashun. Jehová Diosca ñucanchi juchacunatami perdonashca (1 Juan 2:12). Shina llaquij Dios caimandami paraíso alpagupi causana oportunidadta cushca. Chai punllaca ñallapachami chayamunga (Rom. 12:12). Shinallata cunanbica huauquipanicunahuanmi Jehová Diosta adorai ushapanchi (Sal. 133:1). Ashtahuangarin Bibliapica ricuchinmi Diablomanda, paipa demoniocunamandashpa Jehová Dios ñucanchita cuidajujta (Sal. 91:11). Jehová Diospa cushcacunapi pensarishpaca tucui shunguhuanmi cushilla caita ushapashun (Filip. 4:4).

¿Tucui shunguhuan cushilla cashpa catita ushapanchichu? Jesusca nircami: “Cai shimicunataca, canguna ñucahuan cushijuchunmi villajuni. Chashna cashpami, cangunaca ninandapacha cushijushpa causanguichi” nishpa (Juan 15:11). Cai shimicunaca tucui shunguhuan cushijushpa causai ushashcatami ricuchin. Tucui shunguhuan cushilla canaca nina cuendami can. Nina ashtahuan rupachunga yamdatami catichina capanchi. Shinallata tucui shunguhuan cushilla causashpa catichunga Taita Diospa espíritu santomi ayudanga. Chaimandami Diospa espíritu santota mañashpa, Bibliapa nishcacunapipash pensarina capanchi. Bibliataca Taita Diospa espíritu santo yarichijpimi escribirca (Sal. 1:1, 2; Luc. 11:13).

Jehová Diospa munaita pactachingapaj esforzarinami cushilla catichun ayudanga (Sal. 35:27; 112:1). ¿Imamandata shina nipanchi? Jehová Diosca paipa munaita pactachishpa causachunmi ñucanchitaca rurashca. Bibliapica ninmi: “Taita Diosta manllangui, pai mandashcacunatapash pactachingui. Runacunapaca, chaita ruranami tucuita yali ashtahuan ali” can nishpa (Ecl. 12:13). Shinaca Jehovata sirvishpallami tucui shunguhuan cushilla causaita ushashun. *

Cushilla causanaca ñucanchillata ali sintirichunmi ayudan. Llaquicunata charishpapash tucui shunguhuan cushilla Jehovata sirvishpaca, paipa ñaupajpimi ali ricurishun (Deut. 16:15; 1 Tes. 5:16-18). Tucui shunguhuan cushilla canaca charijyana munaicunata saquishpa, Diospa Reinotara pundapi churachunmi ayudanga (Mat. 13:44). Shina rurashpaca ashtahuan cushillami causai ushashun, ñucanchillata alimi sintirishun. Ashtahuanbachaca shuj gentecuna cushilla causachunmi ayudashun (Hech. 20:35; Filip. 1:3-5).

Cushilla causanaca ñucanchi saludpallatami ali can. Bibliapica ninmi: “Cushilla shunguhuan causanaca, cuerpopajpash ali jambigumi” can nishpa (Prov. 17:22). Bibliapa shimicuna cierto cashcata ricuchingapami, Nebraska (Estados Unidos) llactamanda Universidadpi trabajaj shuj investigadorca nirca: “Cunanbillata cushilla ali causashpaca shamuj punllacunapica ali saludtami chari ushapangui” nishpa.

Imashinami ña ricupashcanchi, cai nali punllacunapi causajushpapash tucui shunguhuan cushilla causaita ushapanchimi. Chaipaca espíritu santotami charina capanchi. Taita Diospa espíritu santota charingapaca Diosta mañana, Bibliata yachajuna, imata yachajushcapi pensarinami ayudanga. Ashtahuanbash ñucanchimanda Jehová Dios imatalla rurashcata pensarina, shinlli feta charij Jehovata sirvijcunapa ejemplota catina, Diospa munaita pactachingapaj esforzarinami tucui shunguhuan cushilla catichun ayudanga. Shina rurashpaca Salmo 64:10​pi shimicuna ñucanchi causaipi pactarijtami ricupashun. Chai textopica ninmi: “Imatapash cashcatapacha ruraj runaca, Mandaj Dioshuan cushijushpami, paita yariashpa causajunga” nishpa.