1, 2. a) Noepa, Danielpa, Jobpa ejemplocunaca ¿imamandata ñucanchitaca animan? b) Cai temapa textotaca ¿imashina tiempopita Ezequielca escribirca?

QUIQUINGA shuj ungüita charimanda, culquigu faltalla causajuimanda, pipash catiriashpa llaquichimanda o shuj problemacunamanda llaquillachari causajupangui. Shinallata Jehová Diosmanda villachijushpapash nachari cushilla capangui. Shina sintirijushpaca Noé, Daniel, Jobpa ejemplomanda yachajunami quiquindaca animanga. Paicunaca ñucanchishnallatami problemacunata, llaquicunata charirca. Huaquingunacarin paicunapa causaitami peligropi churarca. Shina causanajushpapash paicunaca tucui shunguhuanmi Jehová Diosta cazurca. Chaimandami Jehová Diosca nirca paicunapa fe, paicunapa cazushcapash alipacha ejemplomi can nishpa (Ezequiel 14:12-14, liingui).

² Jesús cai Alpaman nara shamushca huata 612​pimi, Babilonia llactapi cashpa Ezequielca cai temapa textopa shimicunata escribirca.  * Jerusalén llactata 607 huatapi tucuchishca jipallami shina  tucurca (Ezeq. 1:1; 8:1). Noé, Daniel, Job paicunapa ali cualidadcunataca huaquingunallami charirca. Paicunami salvarigrinajurca (Ezeq. 9:1-5). Paicuna purapica Jeremías, Baruc, Ébed-mélec, recabitas nishcacunapashmi carca.

3. Cai temapica ¿imatata yachajupashun?

³ Cai nali mundo tucurijpica Jehová Diosca Noé, Daniel, Job runacunatashnami imatapash cashcatapacha rurajcunataca salvanga (Apoc. 7:9, 14). Taita Diosca chai jaricunataca imatapash cashcatapacha rurajcuna nishpami parlarca. Shinaca, Taita Dios imamanda shina nishcata yachajupashun. Pundapica chai jaricuna ima llaquicunata chimbapurashcatami yachajupashun. Jipaca paicuna charishca feta, paicuna cazushcatapash imashina catinatami ricupashun.

4, 5. a) Noeca ¿ima problemacunatata chimbapurana tucurca? b) Noé runagumandaca ¿imatata yachajui ushapanchi?

⁴ Problemacunata chimbapurarca. Enocca Noepa bisabuelomi carca. Enocpa punllacunapi gentecunaca Taita Diosmanda caruyashcami causanajurca. Chai gentecunaca Jehová Diosmandaca ‘shimi cacharishcatami’ parlanajurca (Jud. 14, 15). Nali ruraicunaca ashtahuanmi mirashpa catijurca. Shinallata Noepa punllacunapipashmi, “cai pachapica, ninandapacha llaquichinahuanlla junda causanajurca”. Chai punllacunapica cielomanda nali angelcuna gentecunashna aichayu, tulluyu tucushpa cai alpaman shamushpami, cai alpapi huarmicunahuan cazarashpa millai millai huahuacunata charirca (Gén. 6:2-4, 11, 12). Shina punllacunapi causajushpapash Noeca chai gentecunashnaca na carcachu. Bibliapica cashnami nin: ‘Noeca, Mandaj Diospa ñaupajpica alimi ricurirca’, paica ‘paihuan mirai purapica imatapash cashcatapacha rurajmi’ can. ‘Noeca, Taita Dioshuanga aligutami purijurca’ nishpa (Gén. 6:8, 9).

⁵ Shinaca chai shimicuna alita ruraj Noé runagumanda imata nijta yachajupashun. Cunanga, Jatun Manllanayai Tamia nali gentecunata nara tucuchijpi, mashna huatacunata Noé Taita Diosta tucui shunguhuan sirvishcata pensaripashunchi. Chai tiempopi gentecunaca cunanbishna 70 ó 80 huatacunatallaca na causanllu carca. Noeca casi 600 huatacunatami Jehovata sirvishpa causarca (Gén. 7:11). Noeca ñucanchishna huauquipanicunata espiritualmente paita animachunga na charircachu. Paipa propio familiapash na apoyashcangachu. *

6. Noeca ¿imamandata na manllaita charirca?

⁶ Noé runaguca ali ali cashpallaca na quedarcachu. Paica Jehová Diospi feta charishcatami na manllashpa gentecunaman villachirca. Chaimi Bibliapica Noemandaca cashna nin: ‘Imatapash cashcatapacha villaj’ can nishpa (2 Ped. 2:5). Apóstol Pablopash nircami: “Noeca alipacha crij cashpami, cai pachapi causajcunataca nalicachishca” nishpa (Heb. 11:7, MTQI). Gentecuna burlarijta, contracuna llaquichijta, huañuchingapaj munaj gentecunatapashmi Noeca aguantana tucurca. Shinapash Noeca ‘runata manllana lazupica’ na urmarcachu (Prov. 29:25). Ashtahuangarin Noé, Jehová Diosta tucui shunguhuan sirvijpimi paitaca cuidarca.

7. Arcata rurajushpaca Noeca ¿imatata chimbapurana carca?

⁷ Noé 500 yali huatacunata Diosta sirvishpa causajujpimi Diosca Noetaca cashna mandarca,  gentecuna, animalcunapash salvarichun shuj arcata rurai nishpa (Gén. 5:32; 6:14). Noepaca cai jatun jatun arcata ruranaca dificilmi ricurishcanga. Shinallata gentecuna paimanda ashtahuan burlarinata, contracuna ashtahuan llaquichinataca Noeca alimi yacharca. Shina cajpipash Noeca Taita Diospi feta charishpami, cazushpa catirca. Chaimi Noeca “Taita Dios imashna mandashcashnallata tucuita rurarca” (Gén. 6:22).

8. Noeca ¿imashinata paimanbash, paipa familiamanbash Taita Dios ima minishtirishcata cunapi confiarca?

⁸ Noepaca paipa huarmiguta, paipa churicunata mantininaca shinllimi cashcanga. Jatun Manllanayai Tamia nara shamujpica gentecunaca alpata tarpungapaca shinllitami trabajana carca. Noepash shinallatami rurana carca (Gén. 5:28, 29). Shina trabajana cajpipash Noepaca Taita Diosta sirvinami ashtahuan importante carca. Arcataca 40 ó 50 huatacunapimi rurashcanga. Shina rurajushpapash, espiritual cosascunataca na saquircachu. Jatun Manllanayai Tamia yalishca jipapash 350 huatacunatami shina rurashpa catirca (Gén. 9:28). Noé feta charishcamanda, Taita Diosta cazushcamandaca ñucanchipaca shuj alipacha ejemplomi can.

9, 10. a) Noé shina feta charishcata, Taita Diosta cazushcataca ¿imashinata ricuchi ushapanchi? b) Jehovapa mandashcacunata cazujpica ¿imashinata ñucanchita ayudanga?

⁹ Noé charishca feta, Taita Diosta cazushcatapash catipashunchi. Diablopa ruraicunata apoyanapa randica, Jehová Diospa justiciata difindishpa, paipa Reinota pundapi churashpami Noepa ejemplota catishun (Mat. 6:33; Juan 15:19). Cai mundomanda gentecunaca ñucanchitaca na ricunayachinllu. Por ejemplo cazaranamanda, nara cazarashpallata shuj jarihuan, shuj huarmihuan igual puñunamanda Biblia ima nijtaca alimi yachanchi. Chaimi Jehová Diospa mandashcacunata cazunchi. Jehová Diospa mandashcacunata cazushpa causajpimi, shuj gentecunaca ñucanchitaca radiopi, telepipash nalicachishpa parlan (Malaquías 3:17, 18, liingui). Shina rimajpipash Noé cuendami gentecunata na manllashpa, Taita Diosta tucui shuguhuan cazushpa catinchi. Jehová Dioslla, para siempre causaita caranataca alimi yachanchi (Luc. 12:4, 5, NM).

¹⁰ Chaimandami cada uno cashna tapurina capanchi: “¿Gentecuna ñucamanda burlarijpi, rimajpipash tucui shunguhuanllu Jehovata sirvishpa catigrini? ¿Ima minishtirishcaguta Jehová caranapichu tucui shunguhuan confiani?” nishpa. Noepa ejemplota catishpa Taita Diospi feta charijpi, paita cazujpica Jehová Diosca quiquindapashmi cuidanga (Filip. 4:6, 7).

11. Babilonia llactapica Danielpash, paipa quimsa cumbacunapash ¿ima problemacunatata charirca? (Callari dibujota ricupangui).

¹¹ Problemacunata chimbapurarca. Daniel runaguca Babilonia llactapimi prezo causajurca. Chai llactapi gentecunaca yanga dioscunata adorashpa, espiritismo nishcata rurashpami causanajurca. Shinallata babiloniocunaca judiocunataca na ricunayachinllu carca. Chaimi judiocunamanda, Jehová Diosmandapash burlarin carca (Sal. 137:1, 3). Diosta tucui shunguhuan sirvij Danielpash, chaita uyashpaca ninandami llaquirishcanga. Hananías, Misael, Azarías, Danieltaca Babilonio gentecunaca reypa sirvij cachunmi yachachinajurca. Ashtahuangarin paicunataca imata micuna cashcatami mandan carca. ‘Danielca paipa shungupica jatun mandajpa micunahuan, vinohuan mapayangapaca’ napacha munarcachu (Dan. 1:5-8, 14-17).

12. a) ¿Danielca ima ali cualidadcunatata charirca? b) Danielmandaca ¿imatata Jehová Diosca pensarca?

 ¹² Danielca imatapash ali ali rurai ushaimandami alipacha privilegiocunata chasquirca (Dan. 1:19, 20). Shina imatapash ali ali ruraimandaca Danielca jariyashca caita ushanmanmi carca. Shinapash paica na shinachu carca. Humildemi carca. Shinallata Danielca imata rurashpapash siempremi Jehová Dios ayudashcata yarin carca (Dan. 2:30). Daniel joven cajpipash Jehovapaca Noeshna, Jobshna alita rurajmi carca. Chaica ricuchinmi Jehová Diosca Danielpi confiashcata. Danielca paipa tucui causaipimi feta ricuchirca, Jehová Diostapash siempremi cazurca. Ashtahuanbash shuj punllaca casi 100 huatacunata charijpimi shuj angelca paimanga cashna nirca, ‘ninanda juyai tucushcami’ cangui nishpa (Dan. 10:11).

13. Danielca ¿imamandata judiocunataca ayudai usharca?

¹³ Danielca Jehová Dios ayudajpimi Babiloniapi jatun mandajpa cati mandajpura tucurca. Jipamanga Medopersia llactapipashmi jatun mandajpa cati mandajpura tucurca (Dan. 1:21; 6:1, 2). Jehová Diosca paipa llactata Daniel ayudachunmi shina rurashcanga. Shinallata Egipto llactapi paipa llactata ayudachunga Jehová Diosca Josetami utilizarca. Jipa punllacunapipashmi reina Esterta, Mardoqueota utilizashpa Persia llactapi Jehová Diosta sirvijcunata ayudarca (Dan. 2:48). * Chaita ricushpaca Ezequielca cushillami sintiririanga. Shinallata caishuj Judiocunapash Jehová ayudajushcata ricushpaca ninandami cushijurianga.

14, 15. a) Danielpa causaica ¿imapita ñucanchi causaihuan igual can? b) Danielpa taitamamacunamandaca ¿imatata taitamamacunaca yachajui ushapanguichi?

¹⁴ Daniel charishca feta, Taita Diosta cazushcatapash catipashunchi. Cai mundopi causaj gentecunaca nalicunatalla rurashpa, Babilonia shuti jatun pueblopa panda yachachishcacunata rurashpami causan. Bibliapica, Babilonia shuti jatun pueblo nishpaca, tucuilla panda religiongunamandami parlajun. Ashtahuanbash chai pueblotaca “ayacuna, tucui nali espiritucuna causana huasi” ninmi (Apoc. 18:2). Shinapash ñucanchicunaca caru llactamanda mingarishca gentecunashnallami capanchi. Cai mundomanda gentecunashna na cajpimi, gentecunaca ñucanchimanda burlarin  (Mar. 13:13). Shinaca Danielpa ejemplota catishpa Jehová Diosman quimiripashunchi. Jehová Diospi confiajpi, paita cazujpi, humilde cajpica, Danieltashnami ñucanchitapash ninanda juyai tucushca cangui ninga (Ageo 2:7, NM).

¹⁵ Cunan punllapi taitamamacunapaca Danielpa taitamamacunaca alipacha ejemplomi can. ¿Imamandata shina nipanchi? Judá llactapimi Danielca huahuamandapacha nali gentecunapa chaupipi causarca. Shina causashpapash Danielca tucui shunguhuanmi Jehová Diosta juyarca. Danielca paipa taitamamacuna yachachijpimi chashna juyaitaca charirca (Prov. 22:6). Ashtahuanbash Daniel shutica “Diosmi ñucapa Juez” nisha ninmi. Chaica ricuchinmi, Danielpa taitamamacunaca Jehová Diosta tucui shunguhuan juyashcata. Shinaca taitamamacuna na culirashpa huahuacunaman Jehová Diosmanda yachachipaichi. Yachachinataca ama saquipaichichu (Efes. 6:4, NM). Paicunahuan Jehová Diosta mañashpa, paicunamandapash mañapaichi. Huahuacunapa shungupi Jehovapa mandashcacunata charichun ayudapaichi. Shina rurashpaca ashtaca bendiciongunatami chasquipanguichi (Sal. 37:5).

16, 17. Jobca ¿ima llaquicunatalla charirca?

¹⁶ Problemacunata chimbapurarca. Jobpa causaica ninandami cambiarca. Jobca ‘indi Ilujshimuj ladopi causajpuramanda tucuita yali charijmi carca’ (Job 1:3). Paica charijmi carca. Paitaca tucuicunami rijsin carca. Jobtaca tucui gentecunami respetan carca (Job 29:7-16). Shina cashpapash Jobca shujcunata yalica na sintirircachu. Taita Diostapash na minishtinichu nishpaca na yuyarcachu. Ashtahuangarin Jehová Diosca nircami, “ñucata servij”, ‘ima pandatapash na ruraj, aligutalla ruraj, Taita Diostapash manllaj, nalita ruranamanda anchurishcami’ can nishpa (Job 1:8).

¹⁷ Shinapash paipa causaica na yashcapimi cambiarca. Shuj punllaca nima illajmi quedarca. Paica llaqui llaqui caimandami huañungapaj munarca. Shinapash Jobta, Diablo llaquichishcataca alimi yachanchi. Imatapash carajpillami Jobca Jehovata sirvijun nishpa Diabloca juchachirca (Job 1:9, 10, liingui). Jehová Diosca Jobta yangamanda juchachijujtaca alimi yacharca. Chaimi tucui shunguhuan, ciertopacha paita juyashcata Job ricuchichun Jehová Diosca saquirca.

18. a) Jobmandaca ¿imatata ashtahuan yachajupangui? b) Job runaguta Jehová imashina tratashcata ricushpaca ¿imatata Jehová Diosmandaca yachajupanchi?

¹⁸ Diabloca ashtaca llaquicunatami Jobmanga cachamurca. Taita Dios shina llaquicunata cachamujujta pensachunmi Diabloca munarca (Job 1:13-21). Jipamanga Job runagupa quimsa cumba nishcacunami cushichingapaj nishpa shamurca. Paicunaca cushichinapa randica caitami nirca, can imatapash nalita ruraimandami Taita Dios castigajun nishpa (Job 2:11; 22:1, 5-10). Shina ninajujpipash Jobca Taita Diosta tucui shunguhuanmi sirvishpa catirca. Huaquinbica Jobca na pensarishpa yangata ninllami carca. Job sufrijujtaca Jehová Diosca alimi intindirca (Job 6:1-3). Diablo Jobmanda llullacunata nishpa, cutin cutin macashpa cuenda ninanda llaquichijpipash Jobca Jehová Diosta sirvinataca nunca na saquircachu. Job llaqui llaqui cajtaca Jehová Diosca alimi yacharca. Chai llaquicunata chimbapurashca jipaca Jobmanga punda charishcamandapash ashtahuan yalimi Jehová Diosca bendiciarca. Shinallata 140 huatacunata ashtahuan causachunmi curca (Sant. 5:11). Jobca tucui shunguhuanmi Jehová Diosta sirvishpa  catirca. Shina sirvishpa catishcataca ¿imashinata yachai ushapanchi? Cai temapa textota Ezequiel escribijpica ashtaca ashtaca huatacunatami Jobca ña huañushca carca.

19, 20. a) ¿Imashinata Job runagupa ejemplota cati ushapanchi? b) ¿Imashinata Jehovapa ejemplota cati ushapanchi?

¹⁹ Job charishca feta, Taita Diosta cazushcatapash catipashunchi. Ñucanchipa causai imashina cajpipash Jehová Diosta sirvinataca nunca na saquinachu capanchi. Jehovapi siempre confiashpa, tucui shunguhuan paita cazushpa causapashunchi. Ñucanchicunacarin ashtahuanmi Jehová Diosta agradicishpa causana capanchi. Cunan punllacunapica Diablomandaca ashtahuanmi yachanchi. Pai imacunahuanlla llaquichijtapashmi ali yachanchi (2 Cor. 2:11). Jehová Dios imamanda llaquicuna tiachun saquishcataca Job libropimi yachajui ushapanchi. Shinallata Diospa Reino shuj gobierno cashcata, chaipi Jesús mandajushcatapash Danielpa profeciaca alimi intindinchi (Dan. 7:13, 14). Chai Reino llaquicunata ñallapacha tucuchinataca alimi yachanchi.

²⁰ Jobpa causaimanda yachajunaca ñucanchi huauquipanicuna sufrinajujta yachashpa paicunata juyaihuan tratachunmi ayudan. Job cuendami huaquin huauquipanicunaca llaquilla caimanda imatapash yangata ninlla (Ecl. 7:7). Paicunata nalicachishpa ricujunapa randica paicuna imashina sintirijta intindipashunchi. Shina rurashpaca ninanda juyaj, ninanda llaquij Jehová Diospa ejemplota catijushcatami ricuchishun (Sal. 103:8).

21. Noepa, Danielpa, Job runagupa causaimandaca ¿imatata 1 Pedro 5:10​pi shimicunaca yuyachin?

²¹ Noé, Daniel, Jobpash shuj shuj tiempopi, shuj shuj llaquicunahuan causashca cashpapash, aguantashpami catirca. Paicunapa causaimi apóstol Pedro escribishcata yarichun ayudan. Paica nircami: “Cunanbica ashacamanllami llaquitaca apanajunguichi”, “ninanda juyashpa imagutapash caraj Taita Diosca” [...] “cangunata juyailla alichishpa, shinlliyachishpa, ninan ushaitapash” caranga nishpa (1 Ped. 5:10, MTQI).

22. Cati temapica ¿imatata yachajupashun?

²² Cunan punllacunapi Jehová Diosta sirvijcunapashmi 1 Pedro 5:10​pa shimicuna pactarijujta ricun. Jehová Diosca nishcami, paita sirvijcunataca aguantashpa catichunmi ayudasha nishpa. Tucuicunallatami Jehová Dios ayudajpi, paita tucui shunguhuan sirvishpa catingapaj munapanchi. Noé, Daniel, Job runagupash feta charishcatami ricuchirca. Paicunaca tucuipimi Taita Diosta cazurca. Chaimi paicunapa ejemplota catingapaj munapanchi. Paicunaca Jehová Diosta ali rijsimandami tucui shunguhuan sirvirca. Chaitaca cati temapimi yachajupashun. Noé, Daniel, Job paicunaca alimi yacharca Jehová Dios imata rurachun munashcata (Prov. 28:5). Ñucanchipash shinallatami rurashpa catina capanchi.