1, 2. Bibliapica Israel llactapa huaquin reycunamandaca ¿imatata parlan?

 BIBLIAPICA 40 yali jaricuna Israel llactapi reycuna cashcatami ricuchin. a Y paicunapa causaimandaca na llullashpami parlan. Por ejemplo, ali reycunapash nali cosascunata rurashcatami parlan. Davidca ali reymi carca. Chaimandami Jehová Diosca: “Tucui shungu cazushpa ñuca ñaupajpi alitalla rurashpa causajurca” nirca (1 Rey. 14:8). Chashna ali rey cashpapash shuj cazarashca huarmihuanmi huainayana juchapi urmarca. Chai jahuapash chai huarmipa cusata shuj guerrapi huañuchichunmi mandarca (2 Sam 11:​4, 14, 15).

² Shinallata huaquin nali reycunapash ali cosascunatami rurarca. Por ejemplo, Rehoboamga Jehová Diospa ñaupapica nali reymi carca. Chaimandami paimanda parlashpaca Jehová Diosca ‘nalitami rurarca’ nirca (2 Crón. 12:14). Rey Rehoboam nali rey cashpapash, Jehová Diostami huaquinbica cazurca. Por ejemplo, “israelitacunapa jatun familiahuan na macanajunachu cangui” nishcatami cazurca. Shinallata “paicunapa propio reyta agllachunmi saquina cangui” nishcatapashmi cazurca. Ashtahuanbash contracuna Jehová Diospa sirvijcunata ama llaquichichunmi ashtaca pueblocunapi jatun pircacunata, torrecunata rurachirca (1 Rey. 12:​21-24; 2 Crón. 11:​5-12).

3. ¿Ima tapuita yachajunata Jehová Diospa ñaupapi ali ricurichun ayudanga? Cai temapica ¿imatata yachajupashun?

³ Tucui reycuna ali cosascunata y nali cosascunata rurashca cajpipash  ¿imamandata huaquingunaca Jehová Diospa ñaupapica ali ricurirca y cutin huaquingunaca nali ricurirca? Cai tapuita yachajunami Jehová Diospa ñaupapi ali ricuringapaj imata rurana cashcata yachachun ayudanga. Cai temapica Israel llactapa reycunata juzgangapaca Jehová Diosca quimsa cosascunata yaipi charishcatami ricupashun: Jehová Diosca paita tucui shunguhuan juyajta, pecadocunamanda ciertopacha arripintirijta y paita ali adorajtami ricun carca.

JEHOVÁ DIOSTACA TUCUI SHUNGUHUANMI JUYAN CARCA

4. Jehová Diosta cazuj reycunahuan y na cazuj reycunahuanga ¿imapita diferente carca?

⁴ Jehová Diospa ñaupapi ali ricurij reycunaca Jehová Diostaca tucui shungumi juyarca. b Jehosafatca ali rey caimandami ‘tucui shunguhuan Mandaj Diosta mascarca’ (2 Crón. 22:9). Shinallata Bibliapica Josiasmanda parlashpaca: “Tucui shunguhuan [...] Mandaj Diospajman tigrarijca, maijan jatun mandajpash, paipaj pundaca na tiarcachu” ninmi (2 Rey. 23:25). Cutin rey Salomonga pai mandajuj último huatacunapica Jehová Diostaca “na tucui shunguhuan cazujurcachu” (1 Rey. 11:4). Shinallata Bibliapica rey Abiyammanda parlashpaca: ‘Paipaj shungupash, Mandaj Taita Diospaj ñaupajpica, na ali carcachu’ ninmi (1 Rey. 15:3).

5. Jehová Diosta tucui shunguhuan sirvina nishpaca ¿imatata ningapaj munan?

⁵ Jehová Diosta tucui shunguhuan sirvina nishpaca ¿imatata ningapaj munan? Jehová Diosta tucui shungu sirvina nishpaca obligacionmandalla o ali cashcamandalla paita adoranataca na ningapaj munanllu. Chaipa randica, juyaimanda y tucui shungu adorana cashcatami ningapaj munan. Shinallata Jehová Diosta para siempre juyashpa y respetashpa catina cashcatami ningapaj munan.

6. ¿Imashinata Jehová Diostaca tucui shunguhuan juyaita ushapanchi? (Proverbios 4:23; Mateo 5:​29, 30).

⁶ Jehová Diospa ñaupapi ali ricurij reycuna cuendaca ¿imashinata Jehová Diostaca tucui shungu juyaita ushapanchi? Chaipaca Jehová Diosmanda caruyachij cosascunamandami cuidadota charina capanchi. Por ejemplo, nali entretenimientocunamanda, ashtaca culquita o cosascunata charina munaimanda, nali cumbacunamandami cuidadota charina capanchi. Jehová Diosmanda caruyajushcata cuenta japishpaca uchallami cambiocunata rurangapaj esforzarina capanchi. Shina rurashpami Jehová Diosta juyashpa catita ushapashun (Proverbios 4:23; Mateo 5:​29, 30​ta liipangui).

7. ¿Imamandata nali cosascunahuanga cuidadota charina capanchi?

⁷ Jehová Diosmanda imapash caruyachichunga na saquinachu capanchi. Jehová Diosta sirvishpa ocupado yalijuimandaca, “nali cosascunaca Jehová Diosmandaca na caruyachingachu” nishpa pensarinamandaca cuidadota charinami capanchi. Caita ashtahuan aliguta intindingapaca caipi pensaripashunchi. Por ejemplo, huairajuj, chiri punllapi cashpaca huasi ucumanmi cunungapaj yaicunchiman. Y cunungapaj munashpaca pungutaca na pascaria saquinchimanllu. Shinaca Jehová Diosman quimiringapaca espiritual cosascunata ruranalla na suficiente cashcatami yachajupanchi. Imashinami huasi ucuman huaira ama yaicuchunga punguta vichanchi, chashnallatami cai mundopa ruraicuna ñucanchi shungupi ama yaicuchun y Jehová Diosmanda ama caruyachichun cuidadota charina capanchi (Efes. 2:2).

PECADOCUNAMANDACA CIERTOPACHAMI ARRIPINTIRIRCA

8, 9. David y Ezequiasca paicunata corregijpica ¿imashinata humilde cashcata ricuchirca? (Callari paginapa dibujota ricupangui).

⁸ Imashinami callari parrafopi ricuparcanchi Davidca shuj jatun pecadota rurarca. Shinapash Natán runa Davidhuan parlangapaj rijpica Davidca humilde cashcata, tucui shunguhuan  arripintirishcatami ricuchirca (2 Sam 12:13). Salmo 51​pi shimicunaca David ciertopacha arripintirishca cashcatami ricuchin. Natanba ñaupapi ali ricuringapalla y paita ama llaquichichunllaca pai arripintirishcataca na ricuchircachu (Sal. 51:​3, 4, 17, callari shimicuna).

⁹ Rey Ezequiaspashmi Jehová Diospa ñaupapica nalita rurarca. Ezequiasca paipa shungupica jariyashcami tucurca. Chaimandami Bibliapica: “Taita Diosca paihuambash, Judá llactapi causajcunahuambash, Jerusalenbi causajcunahuambash, ninanda fiñarirca” nin (2 Crón. 32:25). ¿Imamandata Ezequiasca paipa shungupica jariyashca tucurca? Talvez ashtaca cosascunata charishcamanda, asiriocunata mishashcamanda o shuj millai unguimanda Jehová Dios jambishcamandami jariyashca tucushcanga. Ezequiasca orgulloso caimandami paipa charishca cosascunataca jariyashpa babiloniocunamanga ricuchishcanga. Chaimandami Jehová Diosca profeta Isaiasta utilizashpa paitaca corregirca (2 Rey. 20:​12-18). David shinami Ezequiaspash humilde, tucui shunguhuan arripintirishcata ricuchirca (2 Crón. 32:26). Jehová Diosca Ezequiaspa causaita ricushpaca shuj ali rey cashcatami ricurca. Chaimi Bibliapica: ‘Mandaj Diospaj ñaupajpica, tucuita alitallami rurajurca’ nin (2 Rey. 18:3).

10. Jehová Dios corregijpica ¿imatata rey Amasiasca rurarca?

¹⁰ Judá llactamanda rey Amasiasca alita rurashpapash, ‘na tucui shunguhuan rurarcachu’ (2 Crón. 25:2). Amasiasca ¿imapita pandarirca? Jehová Dios edomitacunata mishachun ayudashca jipami Amasiasca chai llactamanda dioscunata adorai callarirca. c Chaimi Jehová Diosca shuj profetata utilizashpa Amasiastaca corregirca. Shinapash paica shinlli shungu tucushpami, chai profeta nishcataca nimamanda na uyangapaj munarca (2 Crón. 25:​14-16).

11. 2 Corintios 7:​9, 11​pi nishcashnaca Jehová Dios perdonachunga ¿imatata rurana capanchi? (Fotocunata ricupangui).

¹¹ ¿Imatata cai reycunapa ejemplocunamandaca yachajupanchi? Ñucanchi pecadocunamanda tucui shungu arripintirina cashcata y chai juchacunata cutin ama rurangapaj esforzarina cashcatami yachajupanchi. Ancianocuna uchilla cosascunamanda corregijpica “Jehová Diospa aprobaciondaca ya na charinichu” o “ancianocunaca na juyahuanllu” nishpaca na pensarinachu capanchi. Israel llactapa ali reycunapashmi paicunata consejachun y corregichun minishtirca (Heb. 12:6). Shinaca corregijpica ¿imatata rurana capanchi? 1) Humildemi cana capanchi. 2) Cambiocunatami rurana capanchi. 3) Jehová Diostami tucui shunguhuan sirvishpa catina capanchi. Shungumanda ñucanchi pecadocunamanda arripintirijpica Jehová Diosca perdonangami (2 Corintios 7:​9, 11​ta liipangui).

JEHOVÁ DIOSTACA ALIMI ADORARCA

12. Jehová Diospa ñaupapi ali ricurij reycunahuan y nali ricurij reycunahuanga ¿imapita diferente carca?

¹² Jehová Diospa ñaupapi ali ricurij reycunaca Jehovata ali adorashpami shujcunapash chaitallata rurachun animan carca. Paicunaca huaquinbi pandarishpapash Jehová Diostalla adorangapami esforzarin carca. Shinallata paicunapa llactapi yanga dioscunata tucuchingapami tucui shungu esforzarin carca. d

13. ¿Imamandata rey Acabca Jehová Diospa ñaupapica nali ricurirca?

¹³ Jehová Diospa ñaupapi nali ricurij reycunaca nali cosascunatallaca na rurarcachu. Por ejemplo, nali rey Acabca ashagutallapash humilde cashcatami ricuchirca. Shinallata paipa culpamanda  Nabot runagu huañuchi tucushcata yachaj chayashpaca nalimi sintirirca (1 Rey. 21:​27-29). Ashtahuangarin huaquin pueblocunatami shayachirca. Israelpa contracunatapashmi misharca (1 Rey. 20:​21, 29; 22:39). Shinapash rey Acabca paipa huarmi atichijpimi israelitacuna yanga dioscunata adorachun animarca. Y chaita rurashcamandaca nunca na arripintirircachu (1 Rey. 21:​25, 26).

14. a) ¿Imamandata Rehoboamga Jehová Diospa ñaupapica nali ricurirca? b) Jehovapa ñaupapi nali ricurij cazi tucui nali reycunaca ¿imatata rurarca?

¹⁴ Cunanga nalita ruraj rey Rehoboammanda parlapashunchi. Párrafo 2​pi ricushcashnaca ashtaca ali cosascunatami rurarca. Shinapash shinlli rey tucushpaca Jehová Diospa mandashcacunata saquishpami yanga dioscunata adorai callarirca (2 Crón. 12:1). Shinlli rey tucushcamandapachami huaquinbica Jehová Diosta, cutin huaquinbica yanga dioscunata adoran carca (1 Rey. 14:​21-24). Rehoboam, Acab y Jehovapa ñaupapi nali ricurij cazi tucui nali reycunami shujcunapash yanga dioscunata adorachun animarca. Shinaca shuj rey Jehová Diospa ñaupapi ali ricuringapaj munashpaca paitaca alimi adorana carca.

15. Jehová Diosca ¿imamandata cunanbipash paita ali adorachun munan?

¹⁵ Jehová Diosca ¿imamandata reycunapa tiempopi paita ali adorachun munarca? Callaripica, reycunami paicunapa llactapi causaj gentecunataca Jehová Diosta ali adorachun ayudana responsabilidadta charirca. Catipica, reycuna yanga dioscunata adorai callarishpaca gentecunata nali tratashpa shuj jatun pecadocunatapashmi ruran carca (Os. 4:​1, 2). Israelmanda reycuna y chaishuj israelitacunapashmi Jehová Diostalla sirvingapaj agllashca llactapi nacirishcacuna carca. Chaimandami Bibliapi nishcashnaca yanga dioscunata adorashpaca huainayana juchata  rurajunshna carca (Jer. 3:​8, 9). Pipash huainayana juchata rurashpaca paipa cusata, paipa huarmitami ashtahuanbachaca llaquichin. Shina cuendallatami pipash Jehová Diostalla sirvisha nishpa, bautizarishca jipa panda religionhuan chapurishpaca Jehová Diostaca ninanda llaquichin (Deut. 4:​23, 24). e

16. Jehová Diospa ñaupapica ali gentecunahuan, nali gentecunahuanga ¿imapita diferente can?

¹⁶ Caimandaca ¿imatata yachajupanchi? Panda religionhuan nimamanda na chapurina cashcatami yachajupanchi. Ashtahuanbash Jehovata ali adorashpa, paipa mandashcacunata rurashpami ocupado yalina capanchi. Profeta Malaquiasca Jehová Diospa ñaupapi picuna ali cajta, picuna na ali cajta cuenta japinalla cashcatami nirca. Chaimandami: “Ñucapajman tigrarishpami, imatapash cashcatapacha ruranahuan, nalita ruranahuanga diferente cajta, shinallata Taita Diosta servishpa causanahuan, na servishpa causanahuambash diferente cajta yachanguichi” nirca (Mal. 3:18). Jehová Diosta sirvinata saquinaca shuj jatun pecadomi can. Chaimi ñucanchi pandarishcacuna, ñucanchi nali rurashcacuna o imapash yapata desanimachishpa Jehová Diosmanda caruyachichunga na saquina capanchi.

17. ¿Imamandata cusata o huarmita aliguta pensarishpa agllana capanchi?

¹⁷ Cazarangapaj munajujpica Malaquiaspa shimicunami ali cusata o ali huarmita agllachun ayudaita ushanga. Caipi pensaripai: Shuj persona ali cualidadcunata charishpapash Jehová Diosta na sirvijushpaca ¿Jehová Diospa ñaupapi ali ricuringacha? (2 Cor. 6:14). Jehová Diosta na sirvij jarihuan o huarmihuan cazarajpica ¿Jehová Diosta ali sirvichun ayudaita ushangacha? Yaripashunchi: Shuj llactacunamanda Salomonba huarmicunaca talvez ali cualidadcunatami charishcanga. Shinapash Jehová Diosta na sirvishcamandami  Salomondaca yanga dioscunata adorachunga asha asha pandachirca (1 Rey. 11:​1, 4).

18. Taitacunaca ¿imatata huahuacunamanga yachachina can?

¹⁸ Taitacuna, quiquinba huahuacunataca reycunapa ejemplomanda yachachishpami Jehová Diosta sirvina munaita charichun ayudaita ushapanguichi. Shinallata quiquingunapa huahuacunamanga huaquin reycunaca Jehová Diosta ali sirvishcamanda, shujcunatapash Jehová Diosta sirvichun ayudashcamanda Jehová Diospa ñaupapi ali ricurishcatami intindichina capanguichi. Taitacuna, Bibliata liishpa, reuniongunaman rishpa, predicashpami Jehovata sirvina ñucanchi causaipi ashtahuan importante cashcata ricuchina capanguichi (Mat. 6:33). Chaita na rurajpica quiquinba huahuacunaca quiquinguna Jehová Diosta sirvijushcamandalla paicunapash testigo de Jehová cana cashcatami yuyanga. Shina rurashpaca tiempohuanga Jehovata sirvina na ashta importante cajta yuyashpami Jehovata sirvinatapash saquita ushanman.

19. Jehová Diosta sirvinata saquishcacunaca ¿cutin Jehová Diospa amigo caita ushanllu? (“ Cutinmi Jehová Diospa amigo caita ushapangui” nishca recuadrota ricupangui).

¹⁹ Jehová Diosta sirvinata saquishcacunaca ¿cutin Jehová Diospa amigo caita ushanllu? Paicuna arripintirishpaca cutinmi Jehová Diospa amigo caita ushan. Chaipaca humilde cashcata ricuchishpami ancianocuna paicunata ayudachun saquina can (Sant. 5:14). Cutin Jehová Diospa amigo tucunamanda imatapash ruranaca alipachami can.

20. Ali reycunapa ejemplota catishpaca ¿imashinata Jehovapa ñaupapica ricurishun?

²⁰ Israel llactapa reycunamandaca ¿imatata yachajupashcanchi? Jehová Diospa ñaupapi ali ricurij reycunashna cangapaca Jehová Diostaca tucui shunguhuanmi juyana capanchi. Ñucanchi pandarishcacunamanda arripintirishpami cambiocunata rurangapaj esforzarina capanchi. Shinallata Jehová Diostalla adorana importantepacha cashcatami siempre yarina capanchi. Jehová Diosta tucuipi cazushpaca paipa ñaupapica alimi ricurishun.