1, 2. a) Jesusca ¿ima advertenciata curca? b) ¿Ima tentacionbita discipulocunaca urmarca? (Dibujocunata ricupangui).

 “NA LLULLASHPAMI nini, gentecunaca alita rurangapami munan. Shinapash paicunapa cuerpoca alita ruraitaca na ushanllu” ninmi (Mat. 26:41b). Cai shimicunahuanga Jesusca tucui gentecuna imperfecto y pandarijllacuna cashcataca alimi yacharca. Chaimi Jesusca ñucanchipillata ama yapata confiarichun advertirca. Jesusca chai shimicunata nara nishpaca paipa discipulocunaca candaca nunca na saquishunllu nishpami paicunapillata yapata confiarirca (Mat. 26:35). Apostolcunaca paicunapa yuyaipica alita rurangapami munarca. Shinapash imapash llaquicuna ricurijpi Jesusta saquishpa rinataca na cuenta japircachu. Chaimandami Jesusca: “Rijchariami cana canguichi. Pecadopi ama urmangapaca Taita Diostami mañashpa catina canguichi” nirca (Mat. 26:41a).

² Jesusta carcelman apajpica ¿imatata discipulocunaca rurarca? Na rijchariashna cashcamandami discipulocunaca tentacionbi urmarca. Jesusta na saquishun nishca cashpapash saquishpami rirca (Mat. 26:56).

3. a) Jehová Diospa ñaupapi ali ricuringapaca ¿imashpata na ñucanchipillata confiarina capanchi? b) Cai temapica ¿imatata yachajupashun?

³ Ñucanchicunapash na ñucanchipillata confiarinachu capanchi. Jehová Diosmanda imapash caruyachichunga na saquinachu capanchi. Shinapash imperfectocuna cashcamandami huaquinbica nali munaicunaca ñapash shamuita  ushan (Rom. 5:12; 7:​21-23). Shinapash na yashcapimi shinlli tentacionguna ricurita ushan. Pero Jehová Dioshuan y Jesushuan ali cangapaca rijchariashna cana capanchi. Cai temapimi imata ruranata yachajupashun. Primero, imacunapilla ninanda cuidarinata ricupashun. Jipaca, tentacionguna ricurijpi imasha cuidarinata yachajupashun. Ultimopica, espiritualmente rijcharia cangapaj imata ruranata ricupashun.

RIJCHARIASHNA CAUSAPASHUNCHI

4, 5. Huaquin pecadocuna na yapa nali ricurijpipash ¿imamandata cuidarina capanchi?

⁴ Huaquin pecadocuna na yapa nali ricurishpapash Jehová Dioshuan ali canatami huaglichin. Shinallata ashtahuan jatun juchacunata rurachunmi apaita ushan.

⁵ Tucuicunapallatami tentaciongunaca ricurita ushan. Shinapash cada uno diferente cashcamandami diferente tentaciongunata chimbapurana tucupanchi. Por ejemplo huaquingunaca huainayana jatun juchapi ama urmangapami esforzarinajun. Cutin shujcunaca pornografiata ricunata, masturbarina o paicunapa partecunata tacarijunatami saquingapaj esforzarinajun. Y cutin shujcunaca orgulloso canata, gentecunata manllanata o ñapash culiranata saquingapami esforzarinajun. Chaimandallata Santiagoca “cada unomi paicunapa propio munaicunata ninanda alicachimanda o munaimanda tentai tucun” nircami (Sant. 1:14).

6. ¿Imatata yaria cana capanchi?

⁶ Imapash tentacionguna ricurijpica ñuca cai tentacionbi na urmashachu nishpaca na pensanachu capanchi (1 Juan 1:8). Chaimi apóstol Pablopash ‘Taita Diospa espíritu santo pushajpi causanajujcunaca’ tentacionbi ama urmangapaca cada uno ninanda cuidarina canguichi nircami (Gál. 6:1). Shinaca cada unomi imapash tentacionguna ricurijpi urmanalla cashcataca yaria cana capanchi (2 Cor. 13:5).

7. Ñucanchicuna ¿imacunapillata cuidarina capanchi? Shuj ejemplomanda parlapai.

⁷ Imapash tentacionguna shinlli cajta cuenta japishpaca ¿imatata rurana capanchi? Espiritualmente shinlli canami ayudanga. Caipi pensapashunchi: Punda tiempopica shuj ciudadta protegingapaca pircacunahuanmi muyuchishca carca. Shinapash pungutaca fácil yaicunallami carca. Chaimi pungutaca ashtahuan yali cuidana carca. Shina cuendallatami imapash tentaciongunapi ashtahuan débil cashcata yachashpaca ninanda  cuidaringapami esforzarina capanchi (1 Cor. 9:27).

PECADOPI AMA URMANGAPACA ¿IMASHINATA CUIDARITA USHAPANCHI?

8, 9. Proverbios capítulo 7​manda parlashca jovenga jatun juchapi ama urmangapaca ¿imatata rurana carca? (Proverbios 7:​8, 9, 13, 14, 21).

⁸ Tentaciongunamandaca ¿imashinata cuidarita ushapanchi? Proverbios capítulo 7​pi imata yachachijtami ricupashun. Chaipica shuj joven nali huarmihuan huainayana juchapi urmashcatami ricuchin. Cutin versículo 22​pica paica chai huarmita “ñapash” catishpa rircalla ninmi. Chai jovenga asha asha nali cosascunata ruraimanda jatun juchapi urmashcatami ricuchin.

⁹ ¿Imashpata cai jovenga jatun pecadopi urmarca? Porque primero chai jovenga tuta horasmi chai huarmipa huasi esquina ladota rijurca. Chaipa jipaca chai huarmipa huasiman rina ñandami rirca (Proverbios 7:​8, 9​ta liipangui). Shinallata chai huarmita ricushpa caruyanapa randica, chai huarmi paita muchachunmi saquirca. Chai huarmica Diospa ñaupapi ali ricuringapaj sacrificiota rurarcanimi nircami. Chashna nishpaca chai huarmi ali persona cashcata ricuchingapami munarca (Proverbios 7:​13, 14, 21​ta liipangui). Shinaca chai joven cai nali cosascunata na rurashpaca na cai jatun pecadopi urmanmanllu carca.

10. Proverbios libropi parlashca jovenshna ¿imashinata ñucanchicunaca juchapi urmaita ushapanchi?

¹⁰ Chai jovenshnami tucui Diosta sirvijcuna cashna pecadopi urmaita ushapanchi. Chashna grave pecadopi urmashca jiparami “no sé imachari jaicatami pasarcani” nita ushapanchi. Shinapash jipaca alipacha yarishpa chai pecadopi asha asha urmajushcata cuenta japi ushapanguiman. Talvez nali amigocunahuan llevarishpa, nali diversiongunata agllashpa, internetpi nali cosascunata ricushpa o nali pushtucunaman rishpami, shinallata Jehová Diosta mañanata saquishpa, Bibliata liinata saquishpa, reuniongunaman, predicacionman na rishpami Proverbiospi parlashca jovenshna jatun juchapi urmaita ushapanchi.

11. Pecadopi ama urmangapaca ¿imatata ruraita ushapanchi?

¹¹ Cai ejemplomandaca ¿imatata yachajupanchi? Na solo pecadopi urmanamandallachu caruyana capanchi. Sino nali cosascunaman apaj ruraicunamandapashmi caruyana capanchi. Chaitami Salomonga chai jovenmanda y juchata ruraj huarmimanda parlashpaca intindichingapaj munarca. Chaimi Salomonga: “Chai huarmi purina ñangunata catishpa, na pandanachu cangui” nircami (Prov. 7:25). Shinallata cashna consejarca: “Chai huarmimandaca anchurinami cangui. Paipaj huasi pungumanllapash na chayanachu cangui” nircami (Prov. 5:​3, 8). Shinaca pecadoman apaj cosascunamandaca caruyanami capanchi. a Talvez huaquin huauquipanicunapaca huaquin ruraicunaca alishnallami ricurita ushanman. Shinapash chai ruraicunaca ñucanchicunataca pecadopimi urmachita ushan (Mat. 5:​29, 30).

12. Job runaguca ¿ima ali decisiondata japirca? Y chai decisionda japinaca ¿imashinata ayudarca? (Job 31:1).

¹² Shuj pecadopi ama urmangapaj munashpaca Job runagupa ejemplotami catina capanchi. Jobca juchapi ama urmangapami shuj huarmicunata na ricungapaj decidirca. Chaimi cashna nirca: “Ñuca ñavihuanga, ima nalitapash ama ricungapajmi, ari nijurcani” (Job 31:1​ta liipangui). Chai shimicunata pactachinami huainayana juchapi ama  urmachun ayudarca. Ñucanchicunapash shuj jatun juchapi ama urmangapaca nali ruraicunata y nali munaicunatapashmi saquina capanchi.

13. ¿Imamandata ñucanchi pensamientocunapi cuidadota charina capanchi? (Fotocunata ricupangui).

¹³ Ñucanchi pensamientocunapipashmi cuidadota charina capanchi (Éx. 20:17). Huaquingunaca: “Nali pensamientota charinaca na malochu can. Ñucanchipacha rurajushpami malo canman” ninmi. Shina pensanaca nalichu can. Nali ruraicunapi cutin cutin pensarijuimandami jatun juchapi urmaita ushapanchi. Shina pasajpica ¿imatata ruraita ushapanchi? Nali pensamientocunata uchalla anchuchishpami ali pensamientocunata charina capanchi. Shina rurashpaca chai nali pensamientocunaca ñucanchicunata shuj jatun juchapi urmachichunga na saquishunllu (Filip. 4:8; Col. 3:2; Sant. 1:​13-15).

14. Juchapi ama urmangapaca rijchariashna causangapaca ¿imata ashtahuan ruraita ushapanchi?

¹⁴ Pecadopi ama urmangapaca ¿imashinata rijchariashna causana capanchi? Jehová Diospa consejocunata cazushpa ñucanchillata beneficiarijushcatami seguro cana capanchi. Shinapash huaquinbica Jehová Dios munashcashna pensarina y ruranaca dificilmi caita ushan. Pero paipa mandashcata pactachishpami ñucanchi causaipica tranquilo, ali causaita ushapashun.

15. Ali munaita charingapaca ¿imatata rurana capanchi?

¹⁵ Nali ruraicunata millanayachishpa y ali ruraicunata rurashpa causanatami yachajuna capanchi (Amós 5:15). Shina rurashpaca alitami decidipashcashun. Shinallata pecadoman apaj ruraicunamandapashmi caruyashun. Ashtahuanbash huaquinbica nali munaicuna o imapash nali cosascuna ricurijpica chai tentaciongunapica na jaicata urmashunllu.

16. Espiritual cosascunata ruranaca ¿imashinata ñucanchicunataca ayudan? (Fotocunata ricupangui).

¹⁶ Ali munaicunata charingapaca ¿imatata rurana capanchi? Espiritual cosascunata  siempre rurangapami esforzarina capanchi. Reuniongunapi o predicacionbi cashpaca Jehová Diosta ashtahuan cushichingapami munapashun. Shina rurashpaca tentacionguna ricurijpipash na fácil urmashunllu (Mat. 28:​19, 20; Heb. 10:​24, 25). Bibliata liina, liishcapi pensarinami nali ruraicunata millanayachichun y alita rurashpa catichunmi ayudanga (Jos. 1:8; Sal. 1:​2, 3; 119:​97, 101). Jesús cai consejota cushcata yaripashunchi: “Pecadopi ama urmangapaca Taita Diostami mañashpa catina canguichi” nirca (Mat. 26:41). Jehová Diosta mañangapaj tiempota llujchinami ñucanchicunataca ayudanga. Chashna rurashpami Jehová Diosta ashtahuan cushichingapaj munapashun (Sant. 4:8).

ESPIRITUALMENTE SIEMPRE RIJCHARIASHNA CAUSAPASHUNCHI

17. Apóstol Pedroca ¿imatata mishana tucurca?

¹⁷ Talvez huaquin munaicunata mishanaca facilmi caita ushan. Shinapash shuj munaicunata mishanaca shinllimi caita ushan. Apóstol Pedroca gentecunata manllaimandami quimsa viajecaman Jesustaca na rijsinichu nishpa negarca (Mat. 26:​69-75). Tiempo jipaca Sanedrín ñaupapimi Jesusmanda villachirca. Shinami gentecunata ñana manllanshna ricurirca (Hech. 5:​27-29). Shinapash huaquin huatacuna jipaca “circuncisionda ruranata apoyajcunata manllaimandami” na judío cristianocunahuan pacta micungapaca na munarcachu (Gál. 2:​11, 12). Talvez apóstol Pedroca gentecunata manllanataca nunca na saquishcangachu.

18. Shuj huauquigutaca ¿ima pasarca?

¹⁸ Shinallata ñucanchipash imapash nali ruraicunata ña saquishca canchi yashpapash cutin chaitallata ruraita ushanchiman. Shuj huauquica ninmi: “Ñucaca 10 huatacunatami pornografiata ñana ricujurcani. Chaimi chai problemata ñana charishcata pensarcani. Shinapash chai nali munaica cutinmi nali ruraicunapi urmachingapaj munajurca” nircami. Antsicarin chai huauquiguca na pecadopi urmarcachu. Chai tentacionda mishangapaca siempre esforzarina cashcatami cuenta japirca. Paipa huarmigupash, huauqui ancianocunapash pornografiamanda caruyashpa catichunmi ninanda ayudanajushca.

19. Imapash nali munaita na mishai ushashpaca ¿imatata rurai ushapanchi?

 ¹⁹ Shuj nali munaita na mishai ushashpaca juchapi ama urmangapaca ¿imatata rurai ushapanchi? Jesuspa consejota catishpa ‘rijchariami cana capanchi’. Shinallata nali munaicunata mishashca cani yashpapash juchaman apaj nali cosascunamandaca caruyanami capanchi (1 Cor. 10:12). Chai nali munaicunata mishangapaj ima ayudashcata rurashpa catipai. Proverbios 28:14​pica: “Tucui causaipi Taita Diosta manllashpa causaj runaca, ninandami cushijun” ninmi (2 Ped. 3:14).

RIJCHARIASHNA CAUSANACA ¿IMASHINATA AYUDAN?

20, 21. a) Juchapi ama urmangapaj rijcharianshna causanaca ¿imamandata ali can? b) Jehová Diosca ¿imashinata ñucanchitaca ayudanga? (2 Corintios 4:7).

²⁰ Nali munaicunapi ama urmangapaj rijcharianshna causanaca alimi can. “Pecadota rurashpa causanaca asha tiempotallami cushichin”. Shinapash Jehová Diosta cazushpaca, para siempremi cushilla causaita ushapashun (Heb. 11:25; Sal. 19:8). Shinallata Jehová Diosca paita cazushpa causachunmi ñucanchitaca rurashca (Gén. 1:27). Shinallami ali concienciata charishpa para siempre causaitapash ushashun (1 Tim. 6:12; 2 Tim. 1:3; Jud. 20, 21).

²¹ Ciertomi can gentecunaca “alita ruraitaca na ushanllu”. Shinapash Jehová Diosca paipa munaita pactachingapami ayudaita ushan (2 Corintios 4:7​ta liipangui). Gentecuna na chari ushashca ushaita charichunmi Jehová Diosca ayudan. Shinapash ñucanchicunaca tentaciongunapi ama urmangapami imata rurai ushashcata rurangapaj cada punllami esforzarina capanchi. Ñucanchicuna cada punlla Jehová Diosta mañajpica, pai fuerzata carashpa ayudanataca seguromi capanchi (1 Cor. 10:13). Jehová Diospa ayudahuan rijcharianshna causashpaca tentaciongunapica na urmashunllu.