1. 1 Pedro 5:2​pi nishcashnaca Jehová Diosca ¿ima responsabilidadtata ancianocunamanga mingashca?

 JEHOVÁ DIOSCA ancianocunamanga paita sirvijcunata llamagucunatashna cuidachunmi mingashca. Chaimandami Diosta ali sirvij ancianocunaca huauquipanicunata cuidachun Jehová Dios saquishcamandaca ninanda agradicin. Shinallata huauquipanicunata cuidashpa ali michijcunashna cangapami esforzarin (Jer. 23:4; 1 Pedro 5:2​ta liipangui). Congregaciongunapi chashna huauquicunata charishcamandaca ninandami cushijupanchi.

2. Huaquin ancianocunaca ¿ima cosascunahuanda chimbapurana tucun?

² Anciano huauquicunaca paicunapa responsabilidadta pactachingapaca ashtaca cosascunahuanmi chimbapurana tucun. Por ejemplo, congregacionmanda tucui huauquipanicunata cuidangapaca ancianocunaca ninandami esforzarin. Estados Unidos llactamanda Tony shuti anciano huauquiguta ima pasashcata ricupashun. Cai huauquiguca huaquin responsabilidadcunata na chasqui ushashcatami cuenda japirca. Paica ninmi: “COVID-19 ungui shamujpica reuniongunata charingapaj, predicaciongunata rurangapaca ashtaca cosascunatami segurana ricurirca. Chaimandami ñucaca imata rurana cajpipash tucuita rurangapaj ari nijurcanilla. Ima responsabilidadta pactachingapaj esforzarijujpipash ruranacunaca shuj shujcunami ricurinajurcalla. Chaimandami tiempohuanga Bibliata liinata, estudio personalta ruranata, Jehová Diosta mañanataca asha asha descuidai callarircani”. Cutin Kosovo llactamanda Ilir shuti anciano huauquiguca guerra tiaj pushtupi causashcamandami Jehová Diospa organización cushca instrucciongunata cazunaca paipaca difícil ricurirca. Huauquiguca ninmi: “Betelmanda huauquicunaca peligroso pushtupi causaj huauquipanicunata ayudachunmi mañahuarca. Y chaita pactachinaca ñucapaca dificilmi carca. Manllajurcanimi. Shinallata sucursalmanda cushca instrucciongunapash ñucapa ricuipica na ashta alishnami ricurijurca”. Shinallata Asia llactamanda Tim shuti shuj misionero huauquigupaca tucui responsabilidadcunata pactachinaca dificilmi tucujurca. Huauquiguca: “Huaquinbica tucuipimi shaijushca sintirin cariani” ninmi. Shinaca anciano huauquicunaca cashna situaciongunata charishpaca ¿imatata ruraita ushan?

3. ¿Imatata tucuicunallata Gedeonmandaca yachajuita ushapanchi?

 ³ Huauqui ancianocunaca Gedeonmandaca ashtacatami yachajuita ushan (Heb. 6:12; 11:32). Gedeonga Taita Diospa llactataca cuidashpami ñaupaman pushajurca (Juec. 2:16; 1 Crón. 17:6). Cunan punllacunapi ancianocunapash Gedeón runagushnallatami Jehová Diosta sirvijcunata shinlli punllacunapi cuidana responsabilidadta charin (Hech. 20:28; 2 Tim. 3:1). Gedeonga ima cosascunatalla na rurai ushashcataca alimi yacharca. Shinallata humilde y Jehová Diosta cazuj runagumi carca. Paimandaca ashtacatami yachajui ushapanchi. Gedeonga Jehová Dios cushca responsabilidadta pactachingapaca ashtaca jarcaicunata, llaquicunatami aguantana tucurca. Ancianocuna cashpa o na cashpapash tucuicunallatami ancianocunapa trabajotaca valichishpa apoyana capanchi. Paicunaca cai responsabilidadta pactachingapaca shinllitami trabajan (Heb. 13:17).

4. Gedeón humilde cashcataca ¿imashinata ricuchirca?

⁴ Gedeonga humildemi carca. b Gedeondaca shuj angelmi “Jehová Diosca madianita gentecunamanda israelitacunata salvangapaca candami agllashca” nirca. Shina nijpica humildadta ricuchishpami: “Ricui, ñuca familiacunaca, Manasespaj aillu purapica, imagutapash na charijcunamari. Ñuca taitapaj huasi ucu purapica, ñucami tucuicunapaj jipa capani” nirca (Juec. 6:15). Chashna nishpaca paica chai responsabilidadtaca napacha pactachi ushashachu yajurcami. Shinapash Jehová Diosca Gedeón chaita pactachi ushashcataca alimi yacharca. Y paipa ayudahuanga Gedeonga chai responsabilidadtaca alimi pactachi usharca.

5. ¿Ima pasajpita ancianocunapaca humilde cashcata ricuchinaca difícil caita ushan?

⁵ Ancianocunaca siempremi humilde cangapaj esforzarin (Miq. 6:8; Hech. 20:18, 19). Paicunaca imatapash ali rurai ushashcamandaca na jariyanllu. Shinallata imapi pandarishpa o imapash nali llujshijpica paicunamandallata na yapata imapapash na sirvinichu yashpaca na pensanllu. Huaquinbica imapash pasajpimi humilde cashcata ricuchinaca shinlli caita ushan. Por ejemplo, shuj ancianoca ashtaca responsabilidadcunata chasquishca jiparami na tucuita pactachi ushashcata cuenda japita ushan. Talvez huaquinbica paipa responsabilidadta imashina pactachishcamandami nalicachi tucunga. O chai responsabilidadta ali pactachishcamandami ninanda felicitai tucunga. Cashna situaciongunapi cajpica Gedeonba ejemploca ancianocunataca ¿imashinata ayudanga?

6. Ancianocunaca ¿imashinata Gedeón runagushna humilde caita ushan? (Fotota ricupangui).

⁶ Ayudata mañapaichi. Shuj humilde personaca  tucuita na pailla rurai ushashcatami ali yachan. Gedeón runaguca humilde caimandami shujcuna paita ayudachun mañarca (Juec. 6:27, 35; 7:24). Imagutapash ali ricushpa ruraj ancianocunaca Gedeonba ejemplotami catin. Párrafo 2​pi parlashca Tony huauquiguca cashnami nin: “Ñucata imashina viñachishcamandami na pactachi ushajushpapash ashtahuan cosascunata rurachun mañajpica ñapash ari ninlla cariani. Chaimandami familiahuan Bibliata yachajunapi humilde canamanda parlanata decidircani. Chaipimi ñuca huarmigu imata pensashcata ñucaman parlachun mañaparcani. Shinallata jw.org paginapimi Jesuspa ejemplota catishpa shujcunata yachachishpa paicunapi confiapashunchi nishca videota cutin ricuparcani”. Tony huauquiguca shujcunatami ayudata mañai callarirca chaimanda ima pasashcatami villan: “Cunanga congregacionbica tucui responsabilidadcunami ali pactarijun. Shinallata ñucaca Jehovamanda yachajushpa paihuan ashtahuan ali amigo tucungapami tiempoguta charini”.

7. Ancianocunata nalicachishpa rimajpica ¿imashinata paicunaca Gedeonba ejemplota catita ushan? (Santiago 3:13).

⁷ Nalicachishpa rimajpica ama ñapash culirapaichichu. Shuj ancianopaca pipash nalicachishpa rimajpica humilde cashcata ricuchinaca dificilmi caita ushan. Shina pasajpica Gedeonba ejemplollatami ayudaita ushan. Paica juchayu cashcata imapipash pandarijlla cashcataca alimi yacharca. Chaimandami Efraín gentecunamanda paita nalicachishpa rimajpica, paica na culirarcachu (Juec. 8:1-3). Chaipa randica humilde caimandami paicunata aliguta uyarca, shinallata aliguman parlashpami paicuna tranquilo sintirichunbash ayudarca. Aliguta yuyashpa imatapash ruraj ancianocunaca Gedeonshnallatami pipash paicunata nalicachishpa rimajpica aliguta uyashpa aliguman tigrachin (Santiago 3:13​ta liipangui). Shinami congregacionbi tucuicunallata ali llevarichun ayudan.

8. Ancianocunata felicitajpica paicunaca ¿imatata rurana can? Shuj ejemplomanda parlapai.

⁸ Imatapash aliguta rurai ushashcamanda Jehová Diosta alabapaichi. Madianita gentecunata mishashcamanda israelitacuna Gedeón runaguta ninanda alicachishpa alabanajujpica paica Jehová Diospa ayudahuan mishai ushashcatami ricuchirca (Juec. 8:22, 23). Ancianocunaca ¿imashinata Gedeonba ejemplota catita ushan? Paicunaca imaguta ali rurai ushashpapash Jehová Diospa ayudahuan rurai ushashcamandami Jehová Diosta alabaita ushan (1 Cor. 4:6, 7). Por ejemplo, shuj anciano aliguta yachachishcamanda felicitajpica cai ancianoca: “Tucui yachachishcacunaca Bibliamandami shamun. Jehová Diospa organización tucuicunatallata ali yachachishcamandami ali yachajupanchi” nitami ushan. Ancianocunaca: “Ñuca yachachijushpaca ¿Jehová Diosta alabashcatachu ricuchijuni? ¿O ñuca ali yachachij cashcata ricuchunllachu munani?” nishpami pensarita ushan. Timothy huauquiguhuan ima pasashcata ricupashun. Anciano shina sirvichun nombrajpica paica Bibliamanda discursocunata cunataca ninandami gushtan carca. Paica ninmi: “Discursocunapa prepararijushpaca ali ali ejemplocunata churangapami esforzarin carcani. Chaimandami huauquipanicunaca, ñucataca ninandami felicitan carian. Chashna rurashpaca ñuca ali yachachij cashcatallami ricuchijurcani. Chai yachachishcacuna Jehovamanda o Bibliamanda shamushcata huauquipanicuna ricuchunga na ayudajurcanichu”. Ama chashna pasachunga Timothy huauquiguca cambiocunata rurana cashcatami cuenda japirca (Prov. 27:21). Cambiocunata rurangapaj esforzarishcamandaca huauquiguca: “Cunanga huauquipanicunaca ñuca discursocuna llaquicunata aguantangapaj, Jehová Diospa ashtahuan ali amigo tucungapaj ayudashcatami ñucaman parlan. Pundacunaca huauquipanicunaca ñucapa discursocunamandaca ñucatami felicitahuan carian. Shinapash cunanga ñucapa discursocuna paicunata ayudashcata uyanami ñucataca ashtahuan cushichihuan” ninmi.

9. Gedeonga Jehová Diosta tucuipi cazushcata, na manllashcataca ¿imashinata ricuchirca? (Callari paginapi dibujota ricupangui).

⁹ Jehová Dios Gedeonda juez tucuchun nombrashca jipaca Gedeonga Jehová Diosta cazuj, na manllaj cashcatami ricuchina tucurca. Jehová Diosca  Gedeondaca paipa taita rurashca altarta tucuchichunmi mandarca. Chaita ruranaca peligrosomi carca (Juec. 6:25, 26). Shuj viajeca Gedeonga guerraman ringapami ashtaca soldadocunata tandachirca. Shinapash Jehová Diosca “soldadocunataca bajanami cangui” nircami. Chaitaca ishcai viajecamanmi mandarca (Juec. 7:2-7). Y shinallata contracunata atacangapapash tutami richun Jehová Diosca mandarca. Chai tucui cosascunata pactachishpami Jehová Diosta tucuipi cazushcata, na manllashcata ricuchirca (Juec. 7:9-11).

10. Shuj anciano tucuipi cazungapaj dispuesto cashcataca ¿ima situaciongunapita ricuchina can?

¹⁰ Ancianocunaca imagutapash cazungapami listo cana can (Sant. 3:17). Imagutapash cazungapaj dispuesto caj ancianoca Bibliapa consejocunata Jehovapa organizacionbi cushca instrucciongunataca cushijushpami cazun. Shinami shujcunamanbash ali ejemplota cun. Shinapash paicunapaca na siemprechu tucuipi cazunaca fácil caita ushan. Huaquinbica Jehová Diospa organizacionbi llujshishca cada instrucciongunata pendiente canaca ancianocunapaca na siemprechu fácil caita ushan. Huaquinbica shuj instruccionda catina o na catina ¿alicha can? nishpami pensarita ushan. O na cashpaca shuj instruccionda catishcamandami carcelman rina peligropi caita ushan. Y chashna situaciongunapica ancianocunaca ¿imashinata Gedeonba ejemplota catishpa tucuipi cazushcata ricuchita ushan?

11. Ancianocuna, Jehovata cazungapaca ¿imata rurana capanguichi?

¹¹ Jehová Dios cushca instrucciongunata aliguta uyashpa cazupaichi. Jehová Diosca Gedeondaca paipa Taitapa altarta imashina tucuchinata, Jehová Diospa altarta maipi shayachinata, ima animalta huañuchishpa caranatapashmi villarca. Gedeonga Jehová Diospi confiashpami pai cushca tucui instrucciongunataca ali ali pactachirca. Cunan punllacunapica ancianocunaca Jehová Diospa instrucciongunataca cartacunapi, anunciocunapimi chasquin. Chai instrucciongunaca ñucanchita tucuipi cuidangapami ayudan. Ancianocuna Jehová Diospa organizacionba instrucciongunata tucuipi cazushcamandami paicunataca ninanda juyapanchi. Paicuna cazushcamandami congregacionbi huauquipanicunaca tucuicunallata beneficiarin (Sal. 119:112).

12. Jehová Diospa organizacionbi shuj cambio tiajpica ancianocunaca ¿imashinata Hebreos 13:17​pi consejotaca cazuita ushan?

¹² Ima cambiocuna tiajpipash chai cambiocunata chasquingapaj dispuesto capaichi. Jehová Diosca Gedeondaca guerraman ringapaj cazi tucui soldadocunata saquichunmi mandarca (Juec. 7:8). Jehová Dios chaita mandajpica paica talvezpashmi: “¿Imashpashi shina mandajun? Chai instrucciongunata catinaca ¿alicha canga?” yashpa pensashcanga. Imata pensajushca cashpapash Gedeonga Jehová Diostaca tucuipimi cazurca. Ancianocunaca Gedeonba ejemplotaca ¿imashinata catita ushan? Paicunaca Jehová Diospa organizacionbi ima cambiocuna tiajpipash chaicunata chasquishpami paipa ejemplota catita ushan (Hebreos 13:17​ta liipangui). Por ejemplo, 2014 huatapica Cuerpo Gobernantemanda huauquicunaca Salón del Reinocunata, Salón de Asambleascunata rurangapaca Jehovapa organización congregaciongunaman culquita ñana mañachichunmi decidirca (2 Cor. 8:12-14). Pundapica Salón del Reinocunata rurangapaca congregaciongunamanmi culquita mañachin carian. Y jipamanga congregaciongunallatami chai  culquitaca cutin tigrachin carian. Shinapash cunanbi minishtirishca pushtucunapi Salón del Reinocunata rurangapaca mundo enteromanda huauquipanicunapa cushca contribuciongunamanda llujchishpami utilizan. Chaimi shuj pushtupi ashalla contribucionda cujpipash huauquipanicunaca shuj Salón del Reinota charita ushan. José shuti anciano huauquiguca cai cambio tiashcata yachaj chayashpaca: “Cai cambiocunaca ¿maitashi ñucanchi llactapica funcionanga? Ricushami, ni shuj Salón del Reinopash na construiringachu” nircami. Shina pensajushpapash cai cambiocunataca apoyanatami decidirca. Paica: “Proverbios 3:5, 6​pi nishcacunatami yarircani. Chaipica Jehová Diospi confiachunmi yachachijun. Shina confiashcamandami ashtahuan Salón del Reinocunata rurapashcanchi. Shinallata minishtirishca pushtucunapi huauquipanicuna shuj Salón del Reinota charichun ñucanchicunapash contribuciongunata cushpa ayudanatami yachajupashcanchi” ninmi.

13. a) Gedeonga ¿imatata seguro carca? b) Gedeonba ejemplota catingapaca ancianocunaca ¿imatata ruraita ushan? (Fotota ricupangui).

¹³ Jehová Diospa voluntadta na manllashpa pactachipaichi. Huaquinbica Gedeonga Jehová Diospa voluntadta pactachingapaca peligroso cosascunatami rurana carca. Chaimandami Gedeonga huaquinbica manllarca. Shinapash Jehová Diostaca tucuipimi cazurca (Juec. 9:17). Jehová Diosca Gedeondaca candaca ayudashami nircami. Chaimandami Gedeonga israelitacunata cuidangapaj Jehová Dios paita ayudanataca seguro carca. Ñucanchi obrata prohibishca llactacunapi causaj anciano huauquicunaca Gedeonshnallatami can. Paicunaca na manllashpami reuniongunata, predicaciongunataca ñaupaman pushanajun. Chaicunata rurashcamanda carcelpi churai tucuna cashpapash, trabajocunamanda despidi tucuna cashpapash, maltratai tucuna cashpapashmi Jehovapa voluntadta rurashpa catinajushca. c Ninan manllanai llaqui punllacuna chayamujpica anciano huauquicunaca peligropi cana cashpapashmi Jehovapa organizacionbi cushca instrucciongunataca cazuna ricuringa. Chai instrucciongunata pactachingapaca talvezpashmi gentecunamanga nali villaicunata villachina tucunga. Chai villaicunataca Bibliapica jatun rumi runducunahuanmi comparan. O talvez chai instrucciongunaca Gog de Magog o ashtaca tandanajushca llactacuna atacajpi, ama huañungapaj imata rurana cashcataimanmi ricuchinga (Ezeq. 38:18; Apoc. 16:21).

14. Gedeonbaca ¿imamandata aguantanaca difícil carca?

¹⁴ Gedeonga juez tucushpa Israel llactata ñaupaman pushangapaca shinllita trabajashpa esforzarinami tucurca. Shuj guerrapi Gedeón macanajushpa mishajpica madianita gentecunaca pacajushpami calparca. Y paicunataca Gedeonga Jezreel pushtumandaca río Jordangamanmi catishpa rirca. Y chai horasca tutarami carca. Shinallata ñangunapash sacha sacha, jihua jundashca, cashacunahuanmi cashcanga (Juec. 7:22). Y Gedeonga paipa 300 soldadocunahuanga cashna ñangunata rina cashpa, shaijushca cashpapash riota yalishpami japingacaman catirca. Shina rurashpami paicunataca misharca (Juec. 8:4-12).

15. Ancianocunapaca ¿imamandata aguantanaca shinlli caita ushan?

¹⁵ Ancianocuna congregacionbi huauquipanicunata, paicunapa familiacunata cuidana cashcamandami huaquinbica shaijushca sintirita ushan. Shina sintirinajushpaca ¿imashinata Gedeonba ejemplota catita ushan?

16, 17. a) Aguantai ushachunga Gedeondaca ¿imata ayudarca? b) Ancianocunaca ¿imapita confiaita ushan? (Isaías 40:28-31; fotota ricupangui).

¹⁶ Jehová Dios fuerzata cushpa ayudanapi confiapaichi. Gedeón runaguca Jehová Diospimi confiarca. Chaimandami Jehová Diosca paitaca ayudarca (Juec. 6:14, 34). Shuj viajeca Gedeón y paipa soldadocunapashmi Madián llactamanda ishcai reycunata chaquilla catinajurca. Chai reycunaca camellocunapimi calpashpa rinajushca yarin (Juec. 8:12, 21). Shinapash Jehová Dios ayudajpimi paicunaca japingacaman catishpa paicunataca misharca. Cunan punllapi anciano huauquicunapash Jehová Diospimi confiaita ushan. Paica na ushai illashna tucunllu, na shaijunllu. Paimi ancianocunamanga fuerzata minishtijpica caranga (Isaías 40:28-31​ta liipangui).

¹⁷ Matthew huauquigupa experienciamanda yachajupashunchi. Paica Comité de Enlace con los Hospitalespimi sirvin. Cai huauquiguca aguantai ushangapaj ima ayudashcatami parlan. Paica: “Filipenses 4:13​pi shimicuna ñuca causaipi pactarishcatami ricupashcani. Ñucaca ashtaca viajecunatami shaijushca sintirishcani. Shina sintirishpaca imatapash na rurai ushanshnami sintirishcani. Shina pasajpica, ‘huauquipanicunata ayudai ushangapaca fuerzasta carahuai’ nishpami Jehová Diostaca ninanda mañani. Shina mañashpami Jehová Dios ayudajpi cutin fuerzata japishpa, aguantashpa ñaupaman catita ushapani” ninmi. Gedeón runagushnallatami jarcaicuna tiajpipash ancianocunaca huauquipanicunata cuidangapaca ninanda esforzarin. Shinapash paicuna munashcashna na tucuita rurai ushashcata cuenta japingapaca humildecunami cana can. Ancianocunaca Jehová Dios paicunapa mañashcacunata uyanata y aguantashpa catingapaj paicunaman fuerzasta caranataca tucui shungumi confian (Sal. 116:1; Filip. 2:13).

18. Cai temapi yachajushcashnaca ancianocunaca ¿imashinata Gedeonba ejemplota catita ushan?

¹⁸ Anciano huauquicunaca Gedeonba ejemplomandaca ashtacatami yachajuita ushan. Ashtahuan responsabilidadcunata pactachichun mañajpi, felicitajpi o nalicachishpa rimajpipash ancianocuna humildecuna cana cashcatami ricuparcanchi. Ashtahuanbachaca último punllacunapi causanajushcamandami ancianocunaca Jehová Diosta cazujcuna, na manllajcuna cana can. Shinallata ima pasajpipash Jehová Dios paicuna aguantachun fuerzata cunapimi confiana can. Ancianocuna ninanda esforzarishcamandami paicunataca ninanda juyapanchi (Filip. 2:29).