1, 2. Lotpa punllacunahuan, ñucanchi punllacunahuanga ¿imapita igual can?

 CUNAN punllapi gentecuna nalicunata rurashpa causajta ricushpaca Lot runagushnami sintiripanchi. Lot runaguca gentecuna nalita rurachun Jehová Dios na munashcataca alimi yacharca. Chaimandami Lotca gentecuna “nimata na pinganayachijta ricushpami ninanda pinarishca carca” (2 Ped. 2:7, 8). Lot runaguca Jehová Diosta juyaimanda, respetaimandami paipa ladolla causaj gentecuna pinganai, nali cosascunata rurajta ricushpaca nimamanda na ricunayachin carian. Cunan punllacunapipashmi Jehová Diospa mandashcacunata na cazuj, nalicunata rurashpa causaj gentecunapa chaupipi causapanchi. Chashna gentecunapa chaupipi causashpapash Jehová Diosta manllashpaca pai munashcashnami tucuipi ali, limpio causaiguta charipashun (Prov. 14:2).

² Limpio causaiguta chari ushachunga Jehová Diosca Proverbios libropi consejocunata cushpami ayudan. Tucui cristianocunallatami Proverbios libropi tiashca consejocunamandaca ninanda beneficiarita ushapanchi.

3. Proverbios 17:3​pi nishcashnaca ñucanchi shungupi nali munaicunata ama charingapaca ¿imamandata cuidarina capanchi? (Fotocunata ricupangui).

³ Jehová Diosca ñucanchi shungupi imata sintishcata, imata munashcataca tucuita ali alimi yachan. Paica gentecuna na ricui ushashcatami ricui ushan. Chaimandami ñucanchi shungupi nali munaicunata ama charingapaca cuidarina capanchi (Proverbios 17:3​ta liipangui). Jehová Diosca ñucanchicuna paipa consejocunata tucui shunguhuan cazungapaj munashcata ricushpaca ñucanchitaca juyangami. Chai consejocunata tucui shunguhuan pactachishpaca llullacunataca na nishunllu. Shinallata Diabloshna y cai mundopi gentecunashnaca pinganai, nali cosascunataca na rurashunllu (Juan 4:14;  1 Juan 5:18, 19). Shinallata Jehová Diosman ashtahuan quimirishpaca paita ashtahuan juyashun y ashtahuanmi respetapashun. Ashtahuanbash juchata rurashpa paita llaquichingapaca nimamanda na munapashunllu. Y juchata rurana tentacionguna ricurijpica “Jehová Dios ñucata ninanda juyajpi, ñucamanda ashtaca cosascunata rurashca cajpipashchu ¿juchapi urmashpa paita llaquichingapaj munani?” nishpa pensarita ushapanchi (1 Juan 4:9, 10).

4. Jehová Diosta manllanaca ¿imashinata shuj panigutaca ayudarca?

⁴ Croacia llactamanda Marta b shuti paniguca huainayana juchapi urmana tentaciondami charirca. Paica: “Aliguta pensaritaca na usharcanichu. Chaimandami nalita rurana munaita mishanapash difícil cahuarca. Shinapash Jehová Diosta manllanami cai juchapi ama urmachun ayudahuarca” nishpami escribirca. Shinaca Jehová Diosta manllanaca ¿imashinata panigutaca ayudarca? Marta paniguca juchapi urmashpa jipaman llaquicunata charinatami cuenta japirca. Shinaca nalita rurana tentacionguna ricurimujpica ñucanchicunapashmi panigushnallata ruraita ushapanchi. Juchata rurashpaca Jehová Diosta llaquichinata y para siempre paita adoranatapash na ushanatami siempre yarina capanchi (Gén. 6:5, 6).

5. Leo huauquipa causaimandaca ¿imatata yachajupangui?

⁵ Jehovata manllajcunaca nalita ruraj amigocunata ama charingapami cuidarin. República Democrática del Congo llactamanda Leo huauquipa ejemplota ricupashunchi. Paica bautizarishcamanda chuscu huata jipallami nali amigocunata chari callarirca. Paica: “Nali amigocunata charishpapash ñucapacha juchata na rurashpaca Jehová Diospa ñaupapi ali ricurishpami catisha” nishpami pensarca. Shinapash asha tiempo jipallami paipa nali amigocunashnallata yapata ufiai callarirca. Shinallata huainayana juchatapashmi rurai callarirca. Shinapimi Leoca paipa Testigo taitacuna imata yachachishcata, imashina cushilla causan cashcatapash yarirca. Leoca nalita rurajushcatami cuenta japirca. Chaimandami ancianocunapa ayudata mañashpa  Jehová Diosta cutin sirvi callarirca. Cunanbica Leo huauquiguca anciano y precursor especial shina sirvishpami cushilla causan.

6. Cai temapica Proverbios libropi parlashca ishcai huarmicunamandaca ¿imatata yachajugripanchi?

⁶ Cati parrafocunapica Proverbios capítulo 9​mandami yachajugripanchi. Chaipica ishcai huarmicunamandami parlan. Shuj huarmica ali yachaita charinatami ricuchin. Cutin caishuj huarmica juizu illa canatami ricuchin (Romanos 5:14​huan chimbapurashpa ricupangui; Gálatas 4:24). Cati parrafocunata yachajujushpaca Satanás mandajuj cai mundopi gentecuna huainayana juchata ruranamanda, pornografiamanda parlashpa causan cashcata y chaicunata rurashpa causan cashcata yaipi charipangui (Efes. 4:19). Chaimandami Jehová Diosta manllanata yachajushpa catina capanchi. Shinallata nali cosascunata ruranamandapashmi caruyana capanchi (Prov. 16:6). Jari cashpa, huarmi cashpapash tucuicunallatami Proverbios capítulo 9​manda yachajushpaca ninanda beneficiarita ushapanchi. Cai capitulopi parlashca ishcai huarmicunallatami ‘nara yachajushcacunahuan’ parlan. Shina parlashpaca paicunapa huasiman mishquilla micunata micungapaj invitajuj cuendami can (Prov. 9:1, 5, 6, 13, 16, 17). Shinapash cada huarmipa invitacionda chasquishcacunahuanga ¿imata pasanga? Chaitami yachajugripanchi.

7. Proverbios 9:13-18​pi nishcashnaca ‘juizu illaj huarmipa’ invitacionda chasquishcacunahuanga ¿imata pasashca? (Dibujota ricupangui).

⁷ Callaripica ‘juizu illaj huarmipa’ invitacionmanda ricupashun (Proverbios 9:13-18​ta liipangui). Paica na pinganayachishpami na yachajushcacunataca: “Caiman shamui” nishpa caparin. Shina nishpaca nara yachajushcacunataca paipa huasipi “ñucahuan ali yalishun” nishpami invitajun. Shinapash chai invitacionda chasquishcacunahuanga ¿imata pasashca? Paicunaca tucuicunami ‘huañushca’. Proverbios libropa shuj capitulocunapipashmi chashna huarmimandaca parlan. Por ejemplo, capítulo 2​pica huainayashpa causaj huarmimandami parlan. Chai huarmimanda parlashpaca: ‘Chai huarmipa huasica huañuimanmi apajun’ ninmi (Prov. 2:11-19). Proverbios 5:3-10​pipashmi nalita rurashpa causaj shuj huarmimandapash cuidarinami canguichi nishpa consejan. Cai huarmimandapash parlashpami: “Huañuimanmi urai rijun” nin.

8. ‘Juizu illaj huarmi’ invitajpica ¿imatata tucuicunallata decidina can?

⁸ ‘Juizu illaj huarmi’ invitajpica tucuicunallatami cai invitacionda chasquinata o na chasquinata decidina can. Por ejemplo, huainayana juchata rurana tentación ricurijpi o na yashcapi pornografía nishcata ricuchij fotocuna ricurijpimi cai invitacionda chasquijushcata o na chasquijushcata ricuchina tucunga. Shina tentacionguna ricurijpica ¿imatata decidishun?

9, 10. Huainayana juchapi ama urmangapaca ¿imamandata cuidarina capanchi?

⁹ Huainayana juchapi urmanamanda cuidarinaca  importantepachami can. Bibliapica propio cusahuan, propio huarmihuan puñunataca ali sintichij, limpio yacucunahuanmi comparan (Prov. 5:15-18). Shinallata cazado cusahuarmicunataca igual puñushpa cushilla, ali sintirichunmi Jehová Diosca saquishca. Shinapash Proverbios libropica ‘juizu illaj huarmi’: “Shuhuashca yacuca mishquimari” can nishcatami ricuchin. ‘Shuhuashca yacu’ nishpaca ¿imatata ningapaj munan? Chai “shuhuashca yacuca” nara cazarashpallata o cazarashca jahua shuj jarihuan, shuj huarmihuan igual puñunatami talvez ricuchin. Pipash shina rurashpaca Diospa mandashcacunata na cazujushcatami ricuchin. Shuacunaca imatapash pacallami shuan. Shinallatami huainayana juchata rurajcunaca nalicunataca pacalla ruran. Paicuna nalita ruranajushcata pipash na cuenta japijpica “‘shuhuashca yacuca’ mishquimi can” nij cuendallatami, “pacalla huainayashpa causanaca alimi cashca” nishpa pensarita ushan. Shinapash pandaitami pandanajun. Jehová Diospa ñaupapica na imatapash pacalla ruraita ushanllu. Paica tucuitami ricujun. Shinapash Jehová Diospa ñaupapi nali ricurinaca mishqui yacushna, imapash alica na canllu. Jatun llaquimi can (1 Cor. 6:9, 10). Shinapash huainayana juchata rurajcunahuanga ¿imata ashtahuan pasanga?

¹⁰ Huainayana juchata rurajcunaca pinganayachishpa, imapapash na valinichu yashpami causanata yachan. Shinallata vijsayu quidanata o familiatapash ninanda llaquichishpami separanata yachan. Shinaca ‘juizu illaj huarmipa’ invitacionda na chasquishpami alita yuyashpa imatapash rurashcata ricuchita ushapanchi. Huainayana juchata ashtaca rurajcunaca Jehová Diospa amigo canata saquishca jahuapash imapash unguicunata japishpami huañuita ushan (Prov. 7:23, 26). Verso 18​ca capítulo 9​pa último versomi can. Chai versoca: ‘Pai cayashcacunaca Seol ucu ucupimi can’. O chai huarmipa invitacionda chasquijcunaca huañushcamandaca pambashcami can ninmi. Shinaca chai huarmipa invitación huañuiman apajpipash ¿imashpata ashtaca gentecunaca chai invitacionda chasquin? (Prov. 9:13-18).

11. Pornografiata ricunaca ¿imamandata nalipacha can?

¹¹ Cunanbica pornografiaca tucui ladocunapimi ricurin. Chaimandami chaita ama ricungapaca ninanda cuidarina capanchi. Huaquingunaca pornografiata ricunaca imapash nalica na canllu ninmi. Shinapash chaica na ciertochu can. Pornografiata ricunata yachajcunaca paicuna imata sintishcata, imata yuyashcatami mapayachin. Shinallata paicunallatapash na respetarishpa, shujcunatapash na respetashpami ricun. Paicunapaca pornografiata ricunata saquinaca shinllipachami can. Videocunapi, fotocunapi shuj gentecuna pinganai, mapa cosascunata ruranajujta ricushpaca na fácil cungaita usharinllu. Ashtahuanbash pornografiata ricunaca nali munaicunata mishachunga na ayudanllu. Chaipa randica chai nali munaicunataca ashtahuanmi mirachin (Col. 3:5; Sant. 1:14, 15). Shinallata pornografiata ricuj ashtaca gentecunaca huainayana juchapipashmi urmanata yachan.

12. Nali munaicunata mirachij fotocuna o videocuna na yashcapi ricurijpica ¿imatata rurana capanchi?

¹² Computadorata, telefonota utilizajushpa cungashcapi pornografiata ricuchij shuj foto o video ricurijpica cristianocunaca ¿imatata rurana can? Shina pasajpica ñapashmi shuj ladoman ricushpa uchalla cambiana can. Chaita rurai ushachunga Jehová Dioshuan ali amigo cana ñucanchipa importantepacha cashcata yarinami ayudanga. Huaquin fotocuna, videocuna gentecunapa ñaupapi na pornografiapacha cashpapash nali munaicunatami mirachita ushan. Chashna cosascunatapash na ricungapaj munapanchichu. Shungu ucupillapash huainayana munaita na charingapaj munaimandami chaicunataca na ricungapaj munanchi (Mat. 5:28, 29). Tailandia llactamanda David shuti anciano huauquiguca: “Ñucaca cashnami pensaripani: ‘Cai fotocuna, videocuna na pornografiashnalla ricurijpipash caicunata ricushpa quidajpica Jehová Diosca ¿imashinata sintiringa?’ nishpa. Chashna pensarinami ali decisiongunata agllachun ayudahuashca” ninmi.

13. Ali decisiongunata agllachunga ¿imata ayudanga?

¹³ Jehová Diosta manllaimanda imapash nalicunata na rurangapaj munashpaca ali decisiongunataca ashtahuan facilmi agllaita ushashun. Chaimandami Proverbios 9:10​pica: “Alipacha yachajushpa callaringapaca, Mandaj Diostami manllashpa causana” canchi nin. Proverbios capítulo 9​pimi chaitaca  aliguta intindichin. Chaipica ‘ali yachaita’ ricuchij shuj huarmigumandami parlan.

14. Proverbios 9:1-6​pica ¿ima invitacionmandata parlan?

¹⁴ (Proverbios 9:1-6​ta liipangui). Proverbios capítulo 9​pa callari partepica ñucanchita ruraj, ali yachaita caraj Jehová Dios ñucanchita invitajushcatami ricuchin (Prov. 2:6; Rom. 16:27). Chaipica siete pilarcunahuan o columnacunahuan rurashca huasimandami parlan. Chai huasica Jehová Dios generoso cashcata, paipa ali consejocunata cazungapaj munaj gentecunata cushijushpa chasquin cashcatapashmi ricuchin.

15. Jehová Diosca ñucanchitaca ¿imapata invitajun?

¹⁵ Proverbios capítulo 9​pi parlashca ‘ali yachaita’ charij huarmipa ejemplohuanga Jehová Dios generoso, ñucanchiman ashtaca ali cosascunata caran cashcatami ricupanchi. Chai huarmica vinota y aichatapash alipachami preparashca. Shinami micuna mesapica tucuita ali segurashca (Prov. 9:2). Shinallata versículo 4 y 5​pica ‘ali yachaita’ charij huarmi nara yachajushcacunata: “Ñuca micunata micuj shamuichi” nishcatami ricuchin. Cai huarmipa invitaciondaca ¿imamandata chasquina capanchi? Jehová Diosca chai invitacionda chasquijcunaman ali yachaita carashpa cuidangapaj munashcatami ricuchin. Paica llaquicunata charishpa ñucanchicuna llaquilla causachunga na munanllu. Chaimandami paica “alita rurajcunamambash, na pandachij ali yachaita caramujun” (Prov. 2:7). Jehová Diosta manllashpaca paipa consejocunata catishpami paipa ñaupapi ali cosascunatalla rurangapaj munashun. Shina rurashpami ñucanchillata cushilla causaita ushapashun (Sant. 1:25).

16. Alain huauquigu Jehová Diosta manllashcamandaca ¿ima ali decisiondata agllarca? Shina rurashcamandaca ¿imata pasarca?

¹⁶ Jehová Diosta manllanaca ali decisiongunata japichunmi ayudan. Alain shuti anciano huauquigupa ejemplota ricupashun. Paica shuj escuelapimi profesor shina trabajan. Huauquiguca: “Ñuca trabajopi compañerocunaca: ‘Pornografiata ricuchij peliculacunaca ñucanchillata yachajungapami ali can’ nishpami crin” ninmi. Shinapash Alain huauquiguca chaica na cierto cashcataca alimi yachan. Shinallata huauquiguca imata rurashcatapashmi parlan. Paica: “‘Jehová Diosta manllaimandami ñucaca chai peliculacunataca napacha ricushachu’ nircani. Shinallata chai peliculacunata imamanda na ricungapaj munashcatapashmi caishuj profesorcunaman intindichircani” ninmi. Huauquigu shina rurashpaca “ali yuyaihuan purina ñambi purichi” nishca consejota pactachishpami ‘ali yachaita’ charishcata ricuchirca (Prov. 9:6). Paipa trabajopi compañerocunaca huauquigu nali cosascunata napacha rurangapaj munashcata ricushpami Bibliata estudiai callarirca. Reuniongunamanbashmi ri callarirca.

17, 18. ‘Ali yachaita’ charij huarmipa invitacionda chasquijcunaca cunanbi y shamuj punllapipash ¿ima bendiciongunatata chasquinga? (Dibujota ricupangui).

¹⁷ Cai ishcai huarmicunapa ejemplocunahuanmi Jehová Diosca shamuj punllacunapi cushilla causangapaj  imata rurana cashcata yachachin. ‘Juizu illaj huarmipa’ invitacionda chasquijcunaca huainayana juchata rurashpa causangapaj munashcatami ricuchin. Paicunaca cunan tiempopi ali yalinapillami pensan. Shamuj punllacunapi llaquicunata charinataca na pensarinllu. Shinapash paicunaca “Seol ucu ucupi” o huañuimandami pambai tucunga (Prov. 9:13, 17, 18).

¹⁸ Cutin ‘ali yachaita’ charij huarmipa invitacionda chasquijcunaca Jehová Diosta aliguta sirvishpa catingapami tucui minishtirishca cosascunata charin. Chaimandami paicunaca ninanda cushijun (Is. 65:13). Jehová Diosca profeta Isaiasta utilizashpami: “Ñuca rimashcata aliguta uyahuaichi: ‘Ali micunaguta micuichi. Chaita micushpaca racuyashpami, tucui shunguhuan cushijunguichi’” nirca (Is. 55:1, 2). Cai shimicuna nishcashnallatami Jehová Dios millanayachishca cosascunata millanayachinata y pai juyashca cosascunata juyanata yachajunajupanchi (Sal. 97:10). Shinallata shujcunapash cai ali yachaita charichun invitai ushashcamandami cushilla sintiripanchi. Shinaca Proverbios capítulo 9​pi nishcashnami ñucanchicunapash ‘pueblo muyundi ashtahuan jahuamanda caparishpa maijan nara yachajushcacunataca: “Caiman shamuichi” nijunshna’ gentecunaman ali yachaita yachachingapaj munapanchi. Ñucanchicunapash y cai invitacionda chasquijcunapash cunanbillatami ashtaca bendiciongunata chasquipanchi. Shamuj punllacunapicarin ashtahuan bendiciongunatami chasquishun. Chai punllacaman ‘ali yuyaihuan purina ñambi purishpaca’ para siempremi causaita ushapashun (Prov. 9:3, 4, 6).

19. Eclesiastés 12:13, 14​pi nishcashnaca ¿imatata rurana capanchi? (“ Jehová Diosta manllanaca ¿imapata ayudan?” nishca recuadrota ricupangui).

¹⁹ (Eclesiastés 12:13, 14​ta liipangui). Último punllacunapi causajuimandami nalita ruraj gentecunapa chaupipi causapanchi. Shinapash ñucanchicunaca Jehová Diosta manllaimandami alita rurashpa catingapaj munapanchi. Shinami ñucanchi shungupi nali munaicunata charinamanda jarcarishun. Shinallata pinganai, mapa cosascunata na rurashpami Jehová Diospa ali amigo cashpa catipashun. Shinaca Jehová Diosta tucui shunguhuan juyaimanda y ninanda respetaimandami gentecuna ‘ali yachaita’ charichun ñucanchi tucui usharishcata rurashpa invitangapaj munapanchi. Shinami gentecunaca ali causaiguta charita ushanga.