Bibliapica chaitaca na ninllu. Shinapash imamanda chaipi quidanata decidishcata yachai ushachunga huaquin cosascunatami parlan.

Shuj ángel, María huarmiguman vijsayu quidashpa shuj huahuatami charingui nishpa villajpica Mariaca Nazaret llactapimi causajurca. Chai llactaca Galilea pushtupimi carca. Josepashmi chaipillata causajurca (Luc. 1:26-31; 2:4). Tiempohuanga Egipto llactamanda llujshishpami, Nazaret llactamanllata tigrarca. Jesús Nazaret llactapi viñashcamandami paitaca nazareno nishpa rijsin carca (Mat. 2:19-23). Chaimandami José, María y Jesusmanda parlashpaca talvez Nazaret llactata yaripanchi.

Mariaca Judá llactapimi shuj familiata charirca. Chai familiaca sacerdote Zacariaspa huarmi Elisabet shuti huarmigumi carca. Elizabeth huarmigumi Juan Bautistapa mama tucugrijurca (Luc. 1:5, 9, 13, 36). Mariaca Elisabetta visitangapaj rishpami quimsa quillacunata pararca. Chai jipami Nazaret llactamanga tigrarca (Luc. 1:39, 40, 56). Chaimandami Mariaca Judá llactacunataca ashagutallapash ña rijsishcarca.

Tiempohuanga tucuilla gentecuna paicuna nacirishca llactapillata paicunapa shutita anotarina nishca shuj leymi llujshirca. Chai leyta cazungapaca Joseca Nazaret llactamanda, ‘David nacirishca pueblo’ Belenmanmi rina tucurca. Profeciacunaca Jesús Belén llactapi nacirina cashcatami nishcarca (Luc. 2:3, 4; 1 Sam. 17:15; 20:6; Miq. 5:2). Y Jesusca chaipimi nacirirca. Nazaret llactaman rinaca largo viajemi carca. Shinaca Jesús chairalla nacirishca caimandami José y Mariapash Nazaret llactapi paicunapa huasimanga cutin tigraitaca na usharca. Belén llactaca Jerusalenmanda más o menos 9 kilometrocunata carupimi carca. Chaimandami paicunaca Belén llactapillata quidarca. Moisesman Cushca Leypi nishcashnami María huarmiguca chairalla huahuaguta ungushca caimandami Jerusalenba templopi shuj sacrificiota cuita usharca. Chaimandami Belén lado llactapillata quidanaca paicunapaca alipacha carca (Lev. 12:2, 6-8; Luc. 2:22-24).

Diospa angelca Jesusmanda parlashpami Mariamanga: “Jehová Diosmi paimanga […] Davidpa mandashpa tiajunata cunga” nishcarca. Shinallata Jesús Rey tucuna cashcatapashmi nishcarca. Shinaca José y Mariaca Jesús Davidpa pueblopi nacirina importante cashcatami talvez pensashcanga (Luc. 1:32, 33; 2:11, 17). Chaimandami paicunaca Belenbi quidashpa Jehová Dios imata rurana cashcata ningacaman chaipi shuyana ali cashcata pensashcanga.

Estrellacunata ricushpa adivinaj runacuna paicunata visitaj horasca José, María y Jesús mashna tiempota Belenbi ña causajushcataca na yachapanchichu. Shinapash Jesusca ñana llullu huahuaguchu carca. Paica ña jatunlla huahuami carca. Shinallata paicunaca ñami shuj huasigupi causanajurca (Mat. 2:11). Shinaca paicuna Nazaret llactaman tigranapa randica, Belenbi causangapami shuj tiempoguta quidashcanga.

Rey Herodesca ‘Belén pueblopi ishcai huatata nara charij tucuilla jari huahuacunata huañuchingapaj richi’ nishpami mandarca (Mat. 2:16). Shuj angelca, “Jesusca peligropimi can” nishpami Josemanga villarca. Chaimandami paipash, Mariapash Jesusta apashpa Egiptopi pacajungapaj rirca. Paicunaca rey Herodes huañungacamanmi Egipto llactapi quidarca. Chai jipami Nazaret llactaman tigranata decidirca. Shinapash ¿imamandata Belén llactamanga na rirca? Chai tiempopica Herodespa churi Arquelao shuti millai runami Judea llactapica mandajurca. Shinallata shuj angelpash chai llactaman rina peligroso cashcata villajpimi Joseca paipa familiahuan Nazaret llactaman rirca. Nazaret llactapimi Jesusca tranquilo, Jehová Diosta ali sirvishpa viñaita usharca (Mat. 2:19-22; 13:55; Luc. 2:39, 52).

Jesús huañushcamanda huaquin gentecuna jahua cieloman rina oportunidadta nara charijpillatami José runaguca talvez huañushcanga. Shina pasashca cajpica Joseca cai alpapimi causaringa. Chaipimi paita rijsishpa, Jesús nacirishca jipa imamanda Belén llactapi quidanata decidishcata paihuan parlashpa tucuita yachaita ushapashun.