1, 2. Salmo 25:14​pi nishcashnaca Jehová Dioshuan ali amigo cangapaca ¿imatata rurana capanchi?

 SHUJ ali amigo cangapaca ¿imashinata cana capanchi? Ali amigocunaca juyaita charimandami randimanda ayudarin. Pero shuj ali amigo cangapaca manllaita charinami minishtirishca can nishpaca na nipanguimanllu. Shinapash cai temapa textopi nishcashnaca Jehová Dioshuan ali amigocuna cangapaca paita manllanami capanchi (Salmo 25:14​ta liipangui).

² Mashna tiempota Jehová Diosta sirvijushpapash, paitaca manllashpami catina capanchi. Taita Diosta manllana nishpaca ¿imatata ningapaj munan? Paita manllachunga ¿imata ayudanga? Shinallata Abdías runagupa sumo sacerdote Jehoiadapa y rey Jehoaspa ejemplocunaca Jehová Diosta manllanamandaca ¿imatata yachachin?

3. Manllaita sintinaca ¿imashinata ayudan?

³ Imapash o pipash ñucanchita llaquichinapi pensarishpaca manllaitami sintipanchi. Chaica normalmi can. Chashna manllaita sintinaca alimi can. Porque imatapash aliguta yuyashpa rurachunmi ayudan. Por ejemplo, shuj jaca ladopi cashpaca urmanata manllaimandami filo pata ladomanga na yapa quimirishun. Shinallata llaqui apanata manllaimandami peligroso cosascunamandaca caruyashun. Shuj ali amigohuan fiñanajushpa ñana ali llevarinata manllaimandami imapash nali cosascunataca na rurashun o na nishun.

4. Diabloca Jehová Diosta ¿imashina ricuchunda munan?

⁴ Diabloca gentecuna Jehová Diosta na ali Diostashna ricushpa  ninanda manllachunmi munan. Shinallata Jehová shuj millai Dios cashcata crichun, ñucanchita castigangapaj siempre munashcata y imata rurashpapash paita na cushichi ushashcatapash crichunmi munan (Job 4:18, 19). Diabloca, Jehová Dios shuj millai nali Dios cashcata crishpa ninanda manllaimanda paita sirvinata saquichunmi munan. Diablo ñucanchita ama shina umachichunga Bibliapi yachachishcashnami Jehová Diostaca manllana capanchi.

5. Taita Diosta manllana nishpaca ¿imatata ningapaj munan?

⁵ Jehová Diosta manllaj gentecunaca paita juyaimandami paihuan ali amigo cangapaj ninanda esforzarin. ‘Taita Diosta manllashpa’ causanamandaca Jesusca shuj alipacha ejemplomi can (Heb. 5:7). Jesusca Jehová Diostaca nali Diostashnaca na manllanllu carca (Is. 11:2, 3). Chaipa randica Jesusca Jehová Diosta tucui shunguhuan juyaimandami paita tucuipi cazungapaj munarca (Juan 14:21, 31). Ñucanchicunapashmi Jehová Diostaca ninanda respetapanchi. Shinallata Jehová Dios juyaj, ali yachaita charij, justo cashcamanda y ashtaca poderta charishcamandami paitaca tucui shungu sirvipanchi. Ashtahuanbash Jehová Dios ñucanchita ninanda juyashcata y ñucanchicuna imatapash rurajpi, pai cushilla o llaquilla sintiri ushashcatami ali yachapanchi. Chaimandami paita cazushpaca cushichita o na cazushpaca llaquichita ushapanchi (Sal. 78:41; Prov. 27:11).

6. Jehová Diosta manllachunga ¿imata ayudanga? (Salmo 34:11).

⁶ Bibliapi yachachishcashnami Jehová Diostaca manllanata yachajuna capanchi (Salmo 34:11​ta liipangui). Chaita yachajungapaca Jehová Diospa rurashcacunatami ricuna capanchi. Taita Dios imacunatalla rurashcata ricushpami Jehová Dios ali yachaita charishcata, ashtaca poderta charishcata y ñucanchita ninanda juyashcata cuenda japishpa, paita ashtahuan juyashpa ninanda respetapanchi (Rom. 1:20). Adrienne shuti paniguca ninmi: “Jehová Diospa rurashcacunata ricushpami Jehová Dios ali yachaita charishcata cuenta japipani. Chaimandami paitaca respetohuan ricupani, shinallata ñucapa ima ali cashcata, pai ali yachashcatapashmi cuenta japipani. Caicunapi pensarishpaca ñucaman causaita carashca Jehová Diosmanda caruyangapaca na munapanichu”. ¿Quiquinbash Jehová Diospa rurashcacunata ricushpa, pensaringapaj cai semanapi tiempota llujchita ushapanguimanllu? Chaita ruranaca Jehová Diosta ashtahuan juyachun, respetachunmi ayudapanga (Sal. 111:2, 3).

7. Jehovata mañanaca ¿imashinata Bibliapi yachachishcashna paita manllachunga ayudan?

⁷ Bibliapi yachachishcashna Jehová Diosta manllangapaca paita mañana costumbreta charinami ayudanga. Paita mañanami pai ciertopacha tiashcata ashtahuan ñucanchicuna crichun ayudanga. Por ejemplo, llaquicunata aguantangapaj fuerzata mañashpaca pai ashtaca poderta charishcapimi pensaripanchi. O paipa churita ñucanchimanda huañuchun cachamushcamanda paita agradicishpaca ñucanchita ninanda juyashcatami yaripanchi. Shinallata imapash problemata chimbapurangapaj paipa consejota mañashpaca Jehová Dios ali yachaita charishcatami tucui shungu cripanchi. Jehová Diosta shina mañanami paita ashtahuan respetachun y paipa ali amigo cashpa catingapaj imapash nali cosascunamanda jarcarichun ayudan.

8. Bibliapi yachachishcashna Jehová Diosta manllashpa catingapaca ¿imatata rurana capanchi?

⁸ Bibliapi yachachishcashna Jehová Diosta manllashpa catingapaca Bibliatami yachajuna capanchi. Y Bibliapi ali o na ali ejemplocunata tarishpapash, chaicunamanda yachajungapami esforzarina capanchi. Rey Acabpa huasipi sirvij Abdiasmanda, shinallata sumo sacerdote Jehoiadamandapash yachajupashun. Paicunaca Diosta ali sirvijcunami carca. Judá llactamanda rey Jehoasca Jehová Diosta ali sirvijushpapash jipamanga Jehová Diosmanda caruyashcatami yachajupashun.

9. Jehová Diosta manllanaca ¿imashinata Abdiastaca ayudarca? (1 Reyes 18:3, 12).

⁹ Primera vez Bibliapi Abdiasmanda b parlashpaca: ‘Abdías runaguca, Mandaj Diosta ninanda manllaj runagumi carca’ ninmi (1 Reyes 18:3, 12​ta liipangui). Diosta manllanaca Abdiastaca ¿imashinata ayudarca? Abdías runagu Jehová Diosta manllashcamandaca honradomi carca. Shinallata paipica shujcunapashmi confiai usharca. Chaimandami reyca paipa huasita cuidachun Abdías runataca mingarca (Nehemías 7:2​huan chimbapurashpa ricupangui). Shinallata Diosta manllaimandami nalicunata rurashpa causanajuj tiempopipash nali gentecunata na manllashpa Taita Dios munashcashna causarca. Paica rey Acabpa tiempopimi causarca. Rey Acabca “Diospaj ñaupajpica, paipaj punda mandanajushca tucui mandajcunata ashtahuan yali nalitami rurajurca” (1 Rey. 16:30). Acabca Jezabelhuanmi cazarashca carca. Jezabel huarmica, Baal yanga diosta adorajmi carca. Jehová Diostapash odiaitami odian carca. Chaimandami Israel llactapica Jehová Diosta adorajcunataca tucuchingapaj munarca. Jezabelca Jehová Diospa ashtaca profetacunatapashmi huañuchirca (1 Rey. 18:4). Chai tiempopi Jehová Diosta sirvinaca dificilmi carca.

10. Abdías runaguca nali gentecunata na manllashcataca ¿imashinata ricuchirca?

¹⁰ Abdías runaguca nali gentecunata na manllashcataca ¿imashinata ricuchirca? Jezabel huarmica Jehovapa profetacunata huañuchingapami paicunataca catiriai callarirca. Shinapimi Abdiasca Jehovapa 100 profetacunataca cuevacunapi pacajuchun ayudarca. Chaipaca ‘[50 profetacunataca] shuj jatun utujupi, caishuj [50 profetacunataca] caishuj jatun utujupimi pacarca’. Shinallata paicunaman ‘tandata, yacuta carashpami charirca’ (1 Rey. 18:13, 14). Jezabel huarmi Abdías runagu chaita rurajujta yachaj chayashpaca paitaca huañuchinmanmi carca. Abdiasca tucuicunashnallata huañungapaca na munarcachu. Shinapash Jehová Diosta juyaimanda y paipa sirvijcunatapash juyaimandami paipa causaitapash peligropi churana cashpapash paicunataca ayudarca.

11. Cunan punllapi Jehovata sirvijcunaca ¿imashinata Abdiaspa ejemplota catinajun? (Fotota ricupangui).

¹¹ Cunan punllacunapica ashtaca Jehovata sirvijcunami ñucanchipa obrata prohibishca pushtucunapi  causan. Paicunaca Abdías runagushnami autoridadcunata respetashpapash Jehová Diosta adorashpa catin (Mat. 22:21). Chai huauquipanigucunaca gentecunata cazunapa randi Jehová Diosta cazushpami paita manllashcata ricuchin (Hech. 5:29). Chaimandami tandanajuicunaman o villachinacunaman pacalla rina cashpapash chaicunata rurashpa catin (Mat. 10:16, 28). Shinallata huauquipanicuna Bibliata, publicaciongunata charichunmi ayudan. Henri huauquigupa ejemplota ricupashunchi. África llactamanda shuj pushtupica ñucanchi obraca prohibishcami carca. Huauquiguca chaipimi causan. Paica cashna nishpami escribirca: “Gentecunahuan parlanataca manllanimi. Shinapash na manllashpa Jehovapa obrata pactachichunga paita respetanami ñucataca ninanda ayudahuashcata sintini”. Ñucanchicunapash Henri huauquigushna Jehová Diosta tucui shunguhuan respetashpaca imatapash na manllashpami paipa obrataca pactachita ushapashun.

12. Jehoiadá y paipa huarmigupash ¿imashinata Jehová Diosta tucuipi cazushcata ricuchirca?

¹² Sumo sacerdote Jehoiadaca Jehová Diosta manllaj runagumi carca. Chaimandami Jehová Diosta tucuipi cazushpa shujcunapash Jehová Diosta adorachun ayudarca. Jezabelpa ushi Atalía huarmi Judá llactapi a la fuerza reina tucujpica Jehoiadá runaguca Jehová Diosta tucuipi cazushpami Diosta manllashcata ricuchirca. Ataliaca nalitapacha ruraj huarmimi carca. Shina caimadami reina tucungapaca paipa propio nietocunatallata tucuillata huañuchingapaj munarca (2 Crón. 22:10, 11). Shinapash Jehoiadapa huarmiguca Ataliapa shuj nieto Jehoás shuti shuj huahuagutami salvarca. Jehoiadá y paipa huarmi Jehosabeatca chai huahuaguta pacashpami cuidarca. Shinami Davidpa familiamanda shamuj reycuna tiashpa catichun ayudarca. Jehoiadá runaguca Atalía huarmita na manllashpami Jehová Diostaca tucuipi cazurca (Prov. 29:25).

13. Jehoiadaca, Jehová Diosta tucuipi cazushcataca ¿imashinata cutin ricuchirca?

¹³ Jehoás ña siete huatacunata charijpimi Jehoiadaca Jehová Diosta tucuipi cazushcata cutin ricuchirca. Jehoasca rey Davidpa familiamanda shamushcamandami rey tucuna derechota charirca. Chaimandami Jehoiadaca, Jehoás rey tucuchunga Israel llactapi familiacunata mandajcunapa y levitacunapa ayudata mascanata decidirca. Paicunapa ayudahuanga Jehoiadaca, Jehoás rey tucuchunmi ayudarca. Chai jipami Atalía huarmitaca huañuchichun mandarca. Paipa causai peligropi cajpipashmi Jehoiadaca chaita ruranata decidirca. Jehovapa ayudahuanga tucuimi ali llujshirca (2 Crón. 23:1-5, 11, 12, 15; 24:1). Chai jipaca Jehoiadaca ‘jatun mandajtapash, gentecunatapash, Mandaj Dioshuan imatalla rurashpa pactachinajuchun, Mandaj Diospajlla causanajuchunmi ari nichirca’ (2 Rey. 11:17). Shinallata “Mandaj Diospaj huasiman yaicuna pungucunapipashmi cuidajcunata churarca. Imapash nalicunata rurashpa mapayashcacuna maijan ñandapash ama yaicuchunmi cuidachun churarca” (2 Crón. 23:19).

14. Jehoiadá runagu Jehová Diosta alicachishcamandaca ¿ima bendiciondata chasquirca?

¹⁴ Jehová Diosca ashtaca tiempo huashamanllatami “ñucata alicachijcunatami alicachisha” nishcarca. Jehoiadá runagupa causaipimi chai shimicunaca pactarirca (1 Sam. 2:30). Por ejemplo, Jehová Diosca ñucanchicuna yachajuchunmi Jehoiadá runagu ima ali cosascunata rurashcata Bibliapi escribichishpa saquirca (Rom. 15:4). Shinallata Jehoiadá huañushpaca ‘Davidpaj pueblopi jatun mandajcunata pambashca ladopi pambai’ tucuna bendiciondami chasquirca. “Paitaca, israelcunamambash, Taita Diosmambash, Diospaj huasipipash alita rurashcamandami, chaipi pambarca” nijunmi (2 Crón. 24:15, 16).

15. Jehoiadapa ejemplomandaca ¿imatata yachajupanchi? (Fotocunatapash ricupangui).

¹⁵ Jehoiadá runagupa ejemploca ñucanchicunatapash Bibliapi yachachishcashna Jehová Diosta manllachunmi ayudan. Anciano huauquicunaca  huauquipanicunata cuidangapaj, ima minishtirishcagupi ayudangapaca Jehoiadapa ejemplotami catita ushan (Hech. 20:28). Cutin mayorlla huauquipanigucunaca Jehová Diosta manllajpi, paita tucuipi cazujpica paipa voluntadta pactachingapaj paicunatapash utilizai ushashcatami yachajuita ushan. Shinallata joven huauquipanigucunaca Jehová Dios Jehoiadá runaguta imashina tratashcatami ricuita ushan. Shinami paicunapash mayorlla huauquipanigucunataca respetohuan tratanata yachajuita ushan. Ashtahuanbachaca ashtaca huatacunata Jehová Diosta sirvishca huauquipanicunata aliguta tratanatami yachajunga (Prov. 16:31). Y tucuicunallatami Israel llactapi familiacunata mandajcunamanda, levitacunapa ejemplocunamanda yachajuita ushapanchi. Paicunashnallatami Jehová Diospa organizacionbi ñaupaman pushajcunata apoyana y cazuna capanchi (Heb. 13:17).

16. Jehoasca ¿ima laya persona cashcatata ricuchirca?

¹⁶ Jehoasca joven cashpaca Jehoiadá ayudajpimi Jehovapa ñaupapi alita rurangapaj esforzarirca (2 Rey. 12:2). Shinapash Jehoiadá huañushca jipaca Judá llactamanda mandajcunapa consejota catishpami “Asera shuti huarmi diosman rijchajcunata, labrashpa rurashca imamambash rijchaj dioscunatara” sirvi callarirca. Israelitacunapashmi paita catishpa chashnallata rurai callarirca (2 Crón. 24:4, 17, 18). Jehová Dios paicuna chashna rurashcamanda llaquilla sintirishpapash ‘paipajman tigrachun nishpa villanajuchunmi, pai ima nishcata villajcunata cacharca’. Shinapash “paicunaca, na uyanayachircachu”. Shinallata Zacarías runagu profeta, sacerdote, Jehoiadapa churi y Jehoaspa primo cajpipash paitapash na uyarcachu. Jehoiadá runagu Jehoaspa causaita  salvashca cajpipash, Jehoasca Jehoiadapa churi Zacariasta huañuchichunmi mandarca. Shina rurashpaca ninan malagradecido cashcatami ricuchirca (2 Crón. 22:11; 24:19-22).

17. Jehoás runahuanga ¿imata pasarca?

¹⁷ Jehoasca Jehová Diosta manllanata saquishpaca ashtaca llaquicunapimi urmarca. Paipa causaipica “ñucata yangapi churajcunataca yangapimi churasha” nishca shimicunami pactarirca (1 Sam. 2:30). Asha tiempo jipaca sirio ‘soldadocuna ashallacuna cashpapash’ Jehoaspa ‘ashtaca soldadocunatami’ macanajushpa misharca. Chaimandami Jehoasca ‘ninanda chugrishca, huañunalla’ quidarca. Sirio soldadocuna rishca jipaca Jehoasta sirvijcunallatami Zacariasta huañuchishcamanda paitapash huañuchirca. Y Jehoás nali cosascunata rurashpa causashcamandami pai huañujpica ‘jatun mandajcunata pambashca utujupica, na pambarca’ (2 Crón. 24:23-25; Mateo 23:35​manda “hijo de Baraquías” nishca nota de estudiota español shimipi ricupangui).

18. Jeremías 17:7, 8​pi nishcashnaca Jehoás runashna ama cangapaca ¿imatata rurana capanchi?

¹⁸ Jehoaspa causaimandaca ¿imatata yachajupanchi? Jehoasca na shinlli feta charishcatami ricuchirca. Paica Jehovata sirvingapaca Jehoiadapa ayudatami minishtirca. Por ejemplo shuj quiruca na shinlli sapita charishpaca shinlli huaira shamujpica urmanllami. Shina cuendami Jehoastaca pasarca. Jehoiadá huañujpica shuj gentecuna Jehová Diosmanda caruyajta ricushpaca paipashmi Jehová Diosmanda caruyarca. Caimandaca ¿imatata yachajupanchi? Jehová Diostaca ñucanchi familiacuna, huauquipanicuna ñucanchita ayudashcamandallaca na sirvinachu capanchi. Jehová Diosta aliguta sirvishpa catingapaca ñucanchillatami paita ashtahuan juyangapaj, ashtahuan respetangapaj esforzarina capanchi. Chaipaca Bibliata yachajuna, imata liishcapi pensarina, shinallata Jehová Diostaca cutin cutinmi mañana capanchi (Jeremías 17:7, 8​ta liipangui; Col. 2:6, 7).

19. Jehová Diosca ñucanchicuna ¿imata rurachunda munan?

¹⁹ Jehová Diosca ñucanchicunataca na rurai ushana cosascunata rurachunga na mañanllu. Pai imata rurachun munashcataca Eclesiastés 12:13​pimi ricuita ushapanchi. Chaipica: “Taita Diosta manllangui, pai mandashcacunatapash pactachingui. Runacunapaca, chaita ruranami tucuita yali ashtahuan ali” nijunmi. Jehová Diosta manllanami imapash llaquicunata, jarcaicunata mishashpa Abdías y Jehoiadá shina Jehová Diosta sirvishpa catichun ayudanga. Shinami ñucanchicunaca Jehová Dioshuan para siempre amigo cashpa catita ushapashun.