1. Jehová Diospa punllapi salvaringapaca ¿imatata rurana capanchi?

 Bibliapica Jehová Dios paipa contracunata tucuchishpa, paipa pueblota salvana punllatami Diospa punlla nin. Ñaupa punllacunapica Jehová Diosca huaquin llactacunamanda, nali gentecunatami castigarca (Is. 13:1, 6; Ezeq. 13:5; Sof. 1:8). ‘Jehová Diospa punllaca’ ñallami chayamugrin. Y chai punllaca Importante Babilonia Llactata atacajpi callarishpami Armagedón shamujpi tucuringa. Y chai punllapi salvaringapaca cunanmandallatami prepararina capanchi. Chaimandami Jesusca ‘ninan manllanai llaqui tiempopaca’ “siempremi listo cana canguichi” nirca (Mat. 24:21; Luc. 12:40).

2. 1 Tesalonicenses cartamanda yachajunaca ¿imamandata ali can?

² 1 Tesalonicenses cartapica, apóstol Pabloca Jehová Diospa punllataca huaquin cosascunahuanmi compararca. Jehovapa punllapa cristianocuna listo cachunmi, chai comparaciongunata utilizashpa yachachirca. Pabloca, Jehová Diospa punlla chayamuchunga ashtaca tiempo todavía faltashcataca alimi yacharca (2 Tes. 2:1-3). Shinapash Jehová Diospa punlla ña caya chayamunatashna pensashpa shuyachunmi consejarca. Ñucanchicunapashmi chai consejota catita ushapanchi. Cunanga Jehová Diospa punlla imashina chayamunata, chai punllapi picunalla na salvarina cashcata y chai punllapa listo cangapaj imata rurana cashcatami ricupashun.

3. ¿Imamandata Bibliapica Jehovapa punllaca “tutapi shua shamunshnami chayamunga” nin? (Dibujota ricupangui).

³ “Tutapi shua shamunshnami chayamunga” (1 Tes. 5:2). Callaripica apóstol Pabloca “Jehová Diospa punllaca shuj shua shamunshnami shamunga” nircami. Shuacunaca ashtahuanbachaca tutacunami ñapash yaicushpa, pipash na ricujta shuashpa rin. Shina cuendami Jehová Diospa punllaca cungashcapi ñapash chayamunga. Chai punlla ñapash chayamushcamandami cristianocunapash talvez manllaringa. Shinapash, chai punllapica nali gentecunallami tucuchi tucunga.

4. ¿Imamandata Bibliapica Jehovapa punllataca ‘vijsayu huarmigupa huahuata unguna nanaicunashnami chayamunga’ nin?

 ⁴ ‘Vijsayu huarmigupa huahuata unguna nanaicunashnami na yashcapi chayamunga’ (1 Tes. 5:3). Vijsayu huarmigucunaca ima horapacha huahuata nacinataca na yachanllu. Shinapash shuj punlla huahuata ungunataca seguromi can. Y parto nanai ñapash cungashcapi chayamunataca vijsayu huarmiguca alimi yachan. Shina cuendallatami Jehová Diospa punlla ima hora, ima punlla chayamunata na yachashpapash, chai punlla chayamuna cashcataca seguro capanchi. Shinallata chai punllapi Jehová Dios nali gentecunata cungashcapi tucuchina cashcata y nali gentecuna na salvari ushana cashcatami yachapanchi.

5. ¿Imamandata Bibliapica ninan manllanai llaqui tiempoca, cungashcapi punllayanshna chayamunga nin?

⁵ Cungashcapi punllayanshnami chayamunga. Pabloca cutinmi tutapi shuangapaj shamuj shuacunamanda parlan. Shinapash cai viajeca Jehová Diospa punllataca cungashcapi punllayanahuanmi comparan yarin (1 Tes. 5:4). Shuacunaca shuanajushcamandami tiempo yalijta na sintishpa punllayajtapash talvez na cuenta japinga. Chaimandami gentecunaca paicuna shuanajujta cuenta japinga. Ninan manllanai llaqui tiempopipash shinallatami pasanga. Ashtaca gentecunaca tutapi shuacunashnami nali cosascunataca pacalla ruranajun. Shinapash paicuna imata ruranajushcataca tucuicunami yachaj chayanga. Ñucanchicunaca chai gentecunashnaca na capanchichu. Chaipa randica, Jehová Dios munashcashna causashpa y ‘tucuipi ali shungu cashpa, alita rurashpa y aliguta causashpami’ Jehová Diospa punllapa listo cashcata ricuchipanchi (Efes. 5:8-12). Pabloca Jehová Diospa punllapi na salvarina gentecuna imashina cana cashcata ricuchingapapashmi ishcai comparaciongunata utilizarca.

6. ¿Imashpata gentecunaca espiritualmente puñunajun nipanchi? (1 Tesalonicenses 5:6, 7).

⁶ ‘Puñujcuna’ (1 Tesalonicenses 5:6, 7​ta liipangui). Apóstol Pabloca, Jehovapa punllapi na  salvarina gentecunaca puñunajuj gentecunashnami can nircami. Shuj puñujuj personaca ima pasajujta o mashna tiempo yalijujtaca na cuenta japinllu. Shinallata ima importante cosascuna pasajujtapash na cuenta japimandami imata ruranatapash na atinan. Shina cuendallatami gentecunahuanbash pasajun. Ashtaca gentecunami espiritualmente puñunajun (Rom. 11:8). Paicunaca, último punllacunapi causanajushcata y ninan manllanai tiempo ñalla chayamuna cashcataca na cuenta japinllu. Shinapash huaquingunaca cai mundopi ashtaca cambiocuna tiajta ricushpami, Jehová Diospa Gobiernomanda ashaguta yachajuna munaita chari callarishca. Shinapash asha tiempo jipaca yachajuna munaita saquishpami cutin puñungapaj tigrashcashna quidan. Shinallata huaquin gentecunaca Taita Diospa punlla chayamunapi crishpapash, chai punllapaca ashtaca tiempo faltanranmi yanmi (2 Ped. 3:3, 4). Shinapash ñucanchicunaca cada punlla rijchariashna cana, importantepacha cashcatami yachapanchi.

7. ¿Imashpata Jehová Diospa punllapi na salvarigrijcunaca machashcacunashnami can nipanchi?

⁷ “Machanata yachajcuna”. Apóstol Pabloca Jehovapa punllapi na salvarigrijcunaca machashca gentecunashnami can nircami. Machashcacunaca ima pasajpipash na imatapash uchalla ruraita ushanllu. Shinallata ali decisiongunataca na japita ushanllu. Shina cuendallatami nalita ruraj gentecunaca Taita Diospa consejota na cazushpa paicunapa munaitalla rurashpa causan. Chaimandami tucuchi tucunga. Shinapash apóstol Pabloca cristianocunamanga aliguta pensarishpami catina canguichi. Y machashca gentecunashnaca na canachu canguichi nishpami consejan (1 Tes. 5:6). Bibliata alipacha yachajushca shuj runaca: “Na machashcacunaca tranquilo aliguta pensarishpami imata ruranatapash ali yachan. Chaimandami ali decisiongunata japita ushan” ninmi. Shinaca ¿imamandata tranquilo aliguta pensarishpa imatapash ruranaca minishtirishca can? Porque cai mundopa politicacunapi chapurinaca facilmi can. Ashtahuanbash Jehovapa punlla ñapacha chayamujuimandami cai mundopa política cosascunapi chapurichunmi gentecunaca ashtahuan atichinga. Shinapash na preocuparinachu capanchi Jehová Diospa espiritumi tranquilo, aliguta pensarishpa contestachun ayudanga. Shinallata ali decisiongunatapash japichunmi ayudanga (Luc. 12:11, 12).

8. 1 Tesalonicenses 5:8​pi nishcashnaca, aliguta pensarishpa rijchariashna cangapaca ¿imatata rurana capanchi? (Dibujota ricupangui).

⁸ ‘Jirru chalecota, […] cascota churajupashunchi’. Apóstol Pabloca ñucanchicunataca macanajungapaj listo, ali churajushca soldadocunahuanmi compararca (1 Tesalonicenses 5:8​ta liipangui). Guerra tiempopi cashpaca shuj soldadoca macanajungapaca siempremi listo can. Ñucanchicunapash Jehová Diospa punllapa siempre listo cashcatami ricuchina capanchi. Chaipaca tucui shunguhuan crishpa causanata y juyanatami jirru chalecota churajunshna churajuna capanchi. Shinallata ñucanchi salvacionda shuyanataca cascota churajunshnami churajuna capanchi. Chaita ruranaca ñucanchitaca ninandami ayudapanga.

9. Feta charinaca ¿imashinata ñucanchitaca ayudan?

⁹ Jirru chalecoca, shuj soldadopash shunguta imapash ama chugrichichunmi jarcan carca. Shinallatami shinlli feta charina, juyaita charinaca ñucanchicuna ali shungu gentecuna cashpa catichun, shinallata Jehová Diosta sirvishpa catichun y Jesuspa ejemplota catichunbashmi ayudan. Shinallata feta charishpaca Jehová Diosta tucui shunguhuan sirvingapaj munajcunata pai bendiciajtaca seguromi capanchi (Heb. 11:6). Shinallata feta charinaca llaquicunata charishpapash Jesuspa ejemplota na saquishpa catichunmi ayudan. Ñucanchi feta shinlliyachingapaj y llaquicunata aguantangapaca huauquipanicunata catiriashpa llaquichijpi o culqui faltalla causashpapash Jehová Diosta imashina sirvishpa catishcatami ricuna capanchi. Shinallata cai mundopilla charijyana munaita ama charingapaca minishtirishca cosasgucunahuanlla causashpa, Jehová Diospa Gobiernota primero  churaj huauquipanicunapa ejemplotami catingapaj esforzarina capanchi. b

10. Jehová Diosta y shuj gentecunata juyanaca ¿imata rurachunda ayudan?

¹⁰ Aliguta pensarishpa rijchariashna cangapaca juyaita charinami minishtirin (Mat. 22:37-39). Por ejemplo, predicashcamanda imapash llaquicunata charishpapash, Jehová Diosta juyanami predicashpa catichun ayudanga (2 Tim. 1:7, 8). Shinallata tucui gentecunata juyaimandami paicunaman predicangapaca ninanda esforzaripanchi. Cartacunata escribina o telefonopi cayana cashpapashmi predicashpa catipanchi. Chaita rurashpaca gentecuna cambiashpa ali cosascunata rurai callarichun munashcatami ricuchipanchi (Ezeq. 18:27, 28).

11. Huauquipanicunata juyanaca ¿imata rurachunda ayudan? (1 Tesalonicenses 5:11).

¹¹ Huauquipanicunahuan randimanda animarishpa, ayudarishpami paicunata juyashcata ricuchipanchi (1 Tesalonicenses 5:11​ta liipangui). Guerrapi macanajuj soldadocunaca randimandami ayudarin. Guerrapi macanajujushpaca shuj soldadoca talvez paipa cumbatallatami chugrichita ushanman. Pero chugrichina munaihuanga na shina ruranllu. Shina cuendallatami ñucanchi huauquipanicunataca yadredeca na llaquichinchiman. Shinallata shuj huauqui o shuj pani ñucanchita llaquichijpipash na desquitaripanchimanllu (1 Tes. 5:13, 15). Shinallata, ancianocunata respetashpami congregacionbi huauquipanicunata juyashcata ricuchipanchi (1 Tes. 5:12). Apóstol Pablo 1 Tesalonicenses cartata escribishca horasca, Tesalónica llactapi congregación tiai callarishcamandaca ni shuj huatallapash na yalishcarcachu. Shinaca, chai congregacionbi ancianocunaca ashalla experienciata charimandami huaquin cosascunapi pandarin carianga. Shinapash, huauquipanicunaca paicunata respetanami carca. Ninan manllanai llaqui tiempo ña chayamujushcamandami ancianocunapi ashtahuan confianata yachajuna capanchi. Chai tiempopica, Jatun Betelmanda y Sucursalcunamanda instrucciongunataca talvez na chasquita usharipangachu. Chaimandami ñucanchi congregacionmanda ancianocunata, cunanmandallata juyana, respetana capanchi. Shinaca ima pasajpipash ancianocunapa pandarishcacunatalla ricujunapa randica ñucanchi ruraicunahuan aliguta yuyashcata ricuchipashunchi. Shinallata cai huauquigucunata ñaupaman  pushangapaj Jehová Dios Jesusta utilizashcata yaripashunchi.

12. Jehová Dios carasha nishca promesacunapi crinaca ¿imashinata ñucanchi ali pensamientocunata charichun ayudan?

¹² Cascoca shuj soldadopa umata imapash ama chugrichichunmi jarcan carca. Shinallatami Jehová Dios carasha nishca promesacunapi tucui shunguhuan crinaca ñucanchi yuyaicunata cuidashpa, ali pensamientocunata charichun ayudan. Chai promesapi crimandami cai mundopi cosascuna nimapa na sirvi cashcata cuenta japipanchi (Filip. 3:8). Shinallata Jehová Dios cushca esperanzapi crinaca tranquilo sintirichun, imatapash aliguta yuyashpa rurachunmi ayudan. África llactapi sirvij Wallace y Laurinda cusahuarmica chai shimicuna cierto cashcatami ricurca. Quimsa semanapillami huauquipa taita y panigupa mamapash huañurca. COVID-19 unguimandami paicunapash llactaman tigrashpa familiahuan caitaca na usharca. Huauquiguca cashna nishpami escribirca: “Huañushcacunata cutin ricuna esperanzata charinami ninanda ayudahuarca. Ñuca taita y ñuca suedra ña huañugrijushpa sufrishcata pensanapa randica paraíso alpagupi causarishpa ninanda cushijunatami pensaripani. Chai esperanzata charishcamandami tranquilo sintirini. Paicuna huañushcamanda llaquilla sintirijpipash ñaupamanmi catita ushapani” ninmi.

13. Jehová Dios paipa espíritu santota ñucanchiman carachunga ¿imatata rurana capanchi?

¹³ Ñucanchipi caj ninashna ‘Taita Diospa espíritu santotaca na apaganachu canchi’ (1 Tes. 5:19). Apóstol Pabloca Taita Diospa espíritu santotaca ñucanchipi rupajuj ninashnami can nircami. Shinaca ñucanchicunaca chai espíritu santota charimandami ali cosascunata rurangapaj, Jehová Diosta cushijushpa tucui shungu sirvingapapash fuerzata charipanchi (Rom. 12:11). Shinaca Jehová Dios paipa espíritu santota ñucanchiman carachunga ¿imatata rurana capanchi? Chaipaca Jehovata mañana, Bibliata estudiana y paipa organizacionbimi tandanajushca cana capanchi. Shina rurashpaca ‘Taita Diospa espíritu santo’ ayudajpimi, Jehová Dios munashcashna ali cualidadcunata chari ushapashun (Gál. 5:22, 23).

14. Diospa espíritu santota charishpa catingapaca ¿imatata rurana capanchi? (Fotocunata ricupangui).

¹⁴ Jehová Diosca paipa espíritu santotami ñucanchimanga caran. Shinapash imapash nalita rurashpa “espíritu santopa ninashna cajta” ama apagangapaj  o Diospa espíritu santota ama chingachingapami cuidadota charina capanchi. Jehová Dios paipa espíritu santota carachunga ñucanchi ruraicuna y ñucanchi pensamientocunaca limpio, alimi cana can. Shinapash nali pensamientocuna ñucanchita mishachun saquishpaca Diospa espíritu santotaca ñana chari ushashunllu (1 Tes. 4:7, 8). Shinaca ¿imatata ashtahuan yaipi cana capanchi? Pabloca: “Taita Diospa profeciacunata sin respetoca na tratanachu capanguichi” nircami (1 Tes. 5:20). Cai textopi profeciacuna nishpaca Jehová Dios paipa espíritu santota utilizashpa villashcacunatami nijun. Por ejemplo, Jehová Diospa punllamanda y chai punlla ñalla chayamuna cashcamanda parlaj profeciacunaca, chai textopi parlashca profeciacunapurapimi can. Ñucanchicunaca, Jehová Diospa punllapaca ashtaca tiempo faltajtaca na pensapanchichu. Shinallata Armagedón punllataca na ricushunllu nishpapash na pensapanchichu. Chaipa randica, Jehová Diospa punlla ñalla chayamuna cashcatami yaria capanchi. Chaimandami cada punlla ali portaringapaj y ‘ñucanchi ruraicunahuan Taita Diosta tucui shunguhuan sirvishcata ricuchingapaj’ esforzaripanchi (2 Ped. 3:11, 12).

15. Ñucanchita pipash ama umachichunga ¿imatata rurana capanchi? (1 Tesalonicenses 5:21).

¹⁵ Diospa contracunaca ñallami “tranquilo ali, seguromi causanajunchi” ninga (1 Tes. 5:3). Chai tiempopica, cazi tucui gentecunami demoniocunamanda shamuj llulla villaicunata uyashpa umachi tucunga (Apoc. 16:13, 14). Cutin ñucanchicunaca “tucui cosascuna cabal cajta o na cabal cajtaca aligutami ricuna capanguichi” nishca consejota catina capanchi. Shinallami na umachi tucushun (1 Tesalonicenses 5:21​ta liipangui). Cai textopi “aligutami ricuna capanguichi” nishpaca, oro o plata ali o nali cashcata ricungapa griego idiomapi utilizashca shimitallatami apóstol Pabloca utilizarca. Ñucanchicunapash imata uyashpa, imata liishpapash cierto o na cierto cashcata yachangapami aliguta ricuna capanchi. Tesalónica llactamanda huauquipanicunapaca chaita ruranaca minishtirishcami carca. Ñucanchicunapapash Jehovapa punlla ña chayamujushcamandami chaita ruranaca ashtahuan minishtirishca ricurin. Ñucanchicunaca imata nijpipash na yangata cripanchillachu. Chaipa randica imata liishcata, imata uyashcataca Bibliahuan, Jehovapa organizacionbi yachachishcacunahuanmi chimbapurashpami ricupanchi. Shinami demoniocunamanda shamuj villaicuna ñucanchita umachichunga na saquishun (Prov. 14:15; 1 Tim. 4:1).

16. ¿Ima juyailla esperanzatata charipanchi? Y ¿imatata cunanmandallata rurana capanchi?

¹⁶ Ninan manllanai llaqui tiempopi Jehová Diospa llacta salvarinataca alimi yachapanchi, pero cada unohuan ima pasanataca na yachapanchichu (Sant. 4:14). Jatun manllanai llaqui tiempocunamanda salvarijpi o chai tiempopi huañujpipash, Jehová Diosca tucuipi cazushcamandami para siempre causana bendicionda caranga. Ungidocunaca Jesushuanmi jahua cielopi causanga. Cutin, shuj llamagucunaca paraíso alpagupimi causanga. Chai tiempo chayamungacaman Jehová Dios carasha nishca promesacunapi tucui shunguhuan cringapaj y Jehovapa punllapa listo cangapami esforzarina capanchi.