Segunda Guerra Mundial jipallami ñuca taitacunaca Estonia llactamanda llujshishpa Alemania llactaman causangapaj rirca. Chaipimi ñucaca nacirircani. Chai jipallami Canadapi causangapaj rircanchi. Ñucanchica Ottawa llacta ladogupimi causai callarircanchi. Chaipica atalpacunata charij, yurata pintashca huasigupimi causarcanchi. Pobre pobregucunami caparcanchi. Pero desayunangapaj lulungutaca chariparcanchimi.

Shuj punllaca testigo de Jehovacunami ñuca mamitamanga Apocalipsis 21:3 y 4​ta liishpa uyachishcarca. Chai textogu shunguman chayajpimi mamitaca huacai callarirca. Bibliapa yachachishcacuna shungupi sapiyajpimi ñuca mamitapash, ñuca papitopash bautizarirca.

Ñuca taitacunaca inglesta ashagutalla yachashpapash Bibliamanda yachajushcagutaca ninandami alicachirca. Chaimi ñuca papitoca Sudbury llactapi paipa trabajopi tuta entero metalcunata fundishpa pacarishca cashpapash sábado punllataca ñucatapash, ñuca pani Sylviatapash predicangapaj pushan carca. Shinallata tucui semanacunami Villajun revistata yachajungapaj tandanajun carcanchi. Ñuca mamita y papitopash Jehová Diosta juyanata yachachijpimi 10 añosguta charishpa 1956​pi bautizariparcani. Ñuca taitacuna Jehová Diosta ninanda juyajta ricushpami ñucapash chaitallata catipashcani.

Ñucaca colegiota tucuchishca jipallami, “espiritual cosascunaca na ashta importantechu can” nishpa pensajurcani. Chaimi, “precursor tucushpaca asha culquita charimandaca ñuca munashcashna avionbi viajashpa mundo enterota rijsitaca na ushashachu” yarcani. Estación de radiopi discocunata churashpami trabajai callarircani. Chai trabajotaca ninandami gushtarcani. Chai trabajopica chishi trabajaimandami tandanajuicunamanga na rin carcani. Shinallata Jehová Diosta na sirvij gentecunahuanmi ashtaca tiempota yalin carcani. Jipamanga ñuca concienciapi nali sintirishpami cambiocunata rurana tucurcani.

Oshawa llactapimi causangapaj rircani. Chaipica Ray Norman huauquita, paipa pani Leslita y shuj precursorcunatapashmi rijsircani. Tucuicunami ñucataca ali chasquihuarca. Paicuna cushi cushi cajta ricushpami ñucapash paicunashna cangapaj munarcani. Paicunami precursoradota japichun animahuarca. Chaimi septiembre de 1966​pica precursor tucurcani. Chaica cushillapachami carcani. Shinapash ñuca causaipica huaquin cambiocunami tiana carca.

Ñucaca colegiopi cashpallatami Toronto (Canadá) llactapa Betelpi trabajangapami solicitudta cacharcani. Jipamanga precursor shina sirvijujpimi Betelpi chuscu huatata sirvichun invitahuarca. Shinapash ñucaca Leslita munaimandami, “chai invitacionda chasquishpaca paitaca cutinga na ricushachu” yashpa llaquirircani. Shinapash Jehová Diosta cutin cutin mañashpami chai invitacionda  aceptashpa llaquinayajpipash Leslihuanga despidirina tucurcani.

Betelpi cashpaca lavanderiapi y jipamanga secretario shinami trabajarcani. Cutin Leslitaca Gatineau (Quebec) llactapi precursora especial shina sirvichunmi nombrarca. Cutin ñucaca: “Betelpi sirvinataca ¿alichu decidircani imashi?” yashpami Lesli imata shinajushcapi pensarijunlla carcani. Na yashcapimi Leslipa turi Rayta Betelman invitarca. Paihuanmi ñuca cuartotaca compartircani. Shinami Leslihuanga cutin parlai callarircanchi. Betelpi chuscu huatata ña sirvishpa tucuchijushpami 27 de febrero de 1971​pi Leslihuan cazararcani.

Chai jipaca Quebec llactapi francesta parlaj congregacionmanmi ñucanchitaca asignarca. Huaquin huatacuna jipallami superintendente de circuito shina sirvichun invitahuarca. Chai horasca 28 huatacunatalla charimandami, “yapa jovenrami cani. Ima experienciatapash na charinichu” yashpa manllajurcani. Pero Jeremías 1:7 y 8​pi shimicunami ninanda animahuarca. Leslica carropi tauca viajemi accidenteta charishcarca. Chaimi paica puñuitaca na ushan carca. Shinaca “¿superintendente de circuito shina sirvi ushashacha?” yashpami preocuparircani. Chaimi Leslica: “Jehová imagutapash rurachun mingajpica ¿nachu rurana canchi?” nihuarca. Jipamanga chai asignacionda chasquishpami 17 huatacunata superintendente viajante shina sirviparcanchi.

Superintendente caimandaca ocupado ocupadomi yalin carcani. Chaimi ñuca huarmiguhuan yalingapaca na siempre tiempoguta charin carcani. Shinapash ñuca huarmiguhuan yalingapaj tiempota llujchina importante cashcatami yachajurcani. Shuj lunes tutamandaca ñucanchi huasipica timbrajtami uyarcanchi. Punguta pascajpica pipash illashcami carca. Chaipica shuj canastagullami tiajushcarca. Chai canastapica mezapi churana shuj mantelgu, frutagu, quesogu, tandagu, vinopash, vinota ufiangapaj copagucunapashmi tiajushca carca. Y canastapi, shuj notagupica: “Quiquinba huarmiguhuan micungapaj llujshichi” nishpami escribishpa saquishca carca. Chai punllaca gushtumi indijurca. Shinapash discursocunata preparana caimandami ñuca huarmigutaca: “Micungapaca na llujshita ushagrinchichu” nircani. Ñuca huarmigu intindishpapash llaquillami quidarca. Chaimandami discursocunata preparai callarishpaca ashata nali sintiri callarircani. Chaipimi Efesios 5:25, 28​ta yarircani. Chaimandami, “¿Jehová Dioscha ñucataca ñuca huarmigu imashina sintirishcata intindichun, tiempoguta llujchichun animahuajun?” yashpa pensarircani. Chaimi Jehová Diosta mañashca jipaca ñuca huarmigu Leslitaca: “Jacu, micungapaj llujshishun” nircani. Shina nijpica ninandami cushijurca. Chaimi carrota japishpaca shuj juyailla pushtuguman rircanchi. Chaipimi micungapaj tiarishpa, ishcandilla tiempoguta yalishpaca cushilla yalircanchi. Chaita rurashca jipapash discursocunata preparangapaca suficiente tiempotami charircani.

Ñucanchicunaca Columbia Britanicamanda Terranovacamanga ashtaca congregaciongunatami visitarcanchi. Chai congregaciongunata visitashpaca cushillami yalircanchi. Ñucaca viajanataca ninandami gushtan cariani. Chaimandami congregaciongunata visitajushpaca cushilla yalijurcani. Escuela de Galaadman rinata pensashca cashpapash shuj llactaman rishpa misionero shina sirvingapaca na munarcanichu. “Shuj misionero huauquipanicunashna ali sirvitaca na ushashachu” yarcanimi. “Misionero tucujpica África llactamanda unguicuna,  guerracuna tiaj pushtumanmi cachahuanga” yashpami manllan cariani. Chaimandami “caipica ali, cushillami sirvijuni” yashpa pensarcani.

1992 huatapica Unión Sovieticapi cashca huaquin llactacunapica ñucanchi obrata rurachunga ñana jarcanajurcahu.Chaimandami ñucanchicunataca: “Estonia llactapica ¿misionero shina sirvita ushanguichimanlla?” nishpa tapurca. Chai llactapi sirvichun invitanataca yaitapash na yashcarcanchichu. Chaimandami Jehovata mañarcanchi. Shinallata “Jehová Dios chaita rurachun invitajujpica ¿nachu chasquina canchi?” yarcanchimi. Chai invitacionda chasquishpaca África llactaman na rina cashcamandami tranquilo sintirircani.

Uchallami chai llactamanda estonio shimita yachajui callarircanchi. Chai llactapi huaquin quillacunata cajpica cutinmi superintendente shina sirvichun invitahuarca. Chai viajeca países bálticos quimsa llactacunapi, Kaliningrado llactapipashmi 46 congregaciongunata, grupocunata visitagrijurcanchi. Chaimandami chai llactacunapa letón, lituano y ruso idiomacunataca ashatallapash yachajuna tucurcanchi. Chai idiomacunata yachajunaca shinllimi carca. Shinapash huauquipanicunami ninandaca ayudarca. 1999 huatapica Estonia llactapimi shuj sucursal tiai callarirca. Chaipimi Toomas Edur, Lembit Reile y Tommi Kauko huauquicunahuan Comité de Sucursalpi sirvichun nombrahuarca.

Shuj llactamanda Siberia llactaman llujchishpa cachashca ashtaca huauquipanicunatami rijsircanchi. Cai huauquipanicunaca familiamanda separai tucushca cashpa, carcelcunapi churai tucushca cashpapash nunca na pihuanbash risintirishca cashcataca ricuchircachu. Paicunaca siempremi cushilla Jehovamanda villachishpa catinajurca. Caicunata ricunaca llaquicunata charishpapash aguantashpa, cushilla Jehovata sirvishpa cati ushashcatami cuenta japiparcanchi.

Ñucanchicunaca cazi siempremi ocupado ocupado yalin carcanchi. Chaimandami ñuca huarmiguca ninanda shaijushca, nanaihuan sintiri callarirca. Chaimi Canadá llactaman tigranata decidinajurcanchi. Chai tiempopica ñuca huarmigu fibromialgia unguihuan cashcataca nara yacharcanchichu. Shinapimi Nueva York llactaman Patterson pushtupi Escuela para Miembros de Comités de Sucursal y sus Esposas nishcaman invitarca. “Chai invitaciondaca na chasqui ushashunllu” yanajurcanchimi. Shinapash Jehovata ninanda mañashpami chai invitacionda chasquircanchi. Chai decisionda agllashcamandaca Jehová Diosca ninandami bendiciarca. Chai escuelaman rishca tiempopimi ñuca huarmigu jambiri ushachun shuj tratamientota tari usharcanchi. Ñuca huarmigu jambirijpimi cutin Jehovata normalmente sirvishpa cati usharcanchi.

2008 huatapica Estonia llactapi sirvingapami ña tigrashca carcanchi. Chai llactapi cajpimi shuj tutaca Jatun Betelmanda huauquicunaca cayahuarca. Paicunaca: “Africamanda República Democrática del Congo llactapi sirvingapaca ¿rita ushanguimanlla?” nishpami invitahuarca. Chaita uyashpaca imata ninatapash na atinarcanichu. Y huauquicunaca cati punllapallata ushanata o na ushanata villachunmi nihuarca. Chai tutaca ñuca huarmigu ama preocuparishpa puñui ushachunmi na imatapash nircani. Africaman rina cashcamandami preocupado carcani. Chaimi Jehovaman imashina sintirishcata parlashpa tucui tuta cazi na puñushpa pacarircani.

Punllayajpica ñuca huarmigumanga: “Jehová Diosca ñucanchitaca Africapi sirvingapaj richunmi invitajun” nircanimi. Shinallata ñuca huarmigumanga: “Chai invitacionda  na chasquishpaca ¿imashinata Africapi sirvi o na sirvi ushashcataca yachai usharinga?” nircanimi. Estonia llactapi 16 huatacuna sirvishca jipami República Democrática del Congo llactapa Kinsasa nishca llactamanmi rircanchi. Chaipi sucursalca shuj juyailla jardinguhuan tranquilo tranquilo pushtugumi carca. Ñuca huarmiguca Canadá llactamandami shuj tarjetaguta apashpa shamushca carca. Chai tarjetagutaca ñucanchi cuartopimi churarca y chai tarjetagupica: “Maipi tarpujpipash fucushpa catingui” nijurcami. Huauquipanicunata rijsishpa, Bibliamanda gentecunaman yachachishpaca misionero shina sirvina alipacha cashcatami cuenta japircanchi. Tiempohuanga Africamanda 13 llactacunapi sucursalcunata visitana bendiciondami chasquircanchi. Cai visitacunapica chai llactamanda gentecuna imashinapacha cashcata, paicunapa culturatapashmi ashtahuan rijsi usharcanchi. Chaimandami Africapi canataca naña manllarcani. Ashtahuangarin Africaman sirvichun cachashcamandami Jehová Diostaca ninanda agradicircani.

Congo-Kinsasa llactapica huauquipanicuna shuj shuj laya jurugucunatami micun cashcarca. Chaimandami paicunaca ñucanchimanbash chai jurugucunata micuchun cararca. Ñucanchica cashna jurugucunata micunataca nunca na pensashcarcanchichu. Shinapash ñucanchi huauquipanicuna alicachishpa gushtuta micunajujta ricushpami ñucanchipash micurcanchi. Chashna rurashcamandaca nunca na arripintirishcanchichu.

Chai llactapa shuj pushtupimi guerrillacunaca atacashpa huarmicunata, huahuacunata llaquichinajushcarca. Chai pushtucunapi ñucanchi huauquipanicunata ayudangapami minishtirishca cosasgucunata carangapaj apai usharcanchi. Shinallata paicuna espiritualmente ali cachunbashmi ayudai usharcanchi. Chaipi causaj huauquipanicunaca ashalla cosasgucunata charishpapash, paicunaca tucui shungumi huañushcacuna causarinapica crirca. Shinallata paicunaca Jehová Diosta ninanda juyashcata, paipa organizacionda ninanda apoyashcatami ricuchirca. Chaicunata ricunaca ñucanchitaca ninandami animarca. Paicunapa ejemploca ñucanchicuna imamanda Jehovata sirvijushcapi pensarichun, Jehovapi ashtahuan confiachunbashmi ayudarca. Huaquin huauquipanicunaca huasicunata, paicunapa tarpushcacunatapashmi pirdirca. Chaicunata ricushpaca ñucanchi charishca cosascunaca ñapash tucurinalla cashcata, Jehovahuan ali amigo cana ashtahuan importante cashcata yarichunmi ayudahuarca. Cashna llaquicunahuan cashpapash huauquipanicunaca na quejarinajunllu carca. Chaita ricunaca ñucanchipa saludmanda problemacunata, shuj shuj llaquicunata aguantashpa catichunmi ayudarca.

Hong Kong llactapa sucursalpi sirvichunga cungashcapimi invitarca. Chai llactaman rishpa causanataca nunca na pensashcachu carcanchi. Y cai viajeca Jehová shuj shuj asignaciongunapi imashina ayudashcata ricushca caimandaca paipi confiashpa tranquilomi chasquircanchi. Cai mushuj asignación imashina canata na yachashpapash África llactamanda huauquipanicunahuanga 2013 huatapimi ninanda llaquirishpa despedirircanchi.

Hong Kong llactapica ashtaca ashtaca gentecuna, shuj shuj llactamanda shamushca gentecunapashmi tian. Chai llactamanda chino cantonés shimita yachajunaca ñucanchipaca dificilmi ricurirca. Pero huauquipanicunaca cushijushpami chasquirca. Chai llactamanda micunatapash ninandami gushtarcanchi. Jehovapa organizacionga ñapashmi mirashpa catirca. Chai llactapica huasicuna, edificiocunaca valishcapachami carca. Chaimi Cuerpo Gobernantemanda huauquicunaca propiedadcunata jatushpa sucursalta shuj ladopi churanata decidirca. 2015 huatapica Corea del Sur llactamanmi rircanchi. Y chaipica cunangamanmi sirvishpa catinajupanchi. Shinallata cai llactapi idiomata yachajuna difícil cajpipash asha ashami yachajushpa catinajunchi. Huauquipanicunaca: “Coreano shimitaca ñami ashtahuan ali parlai ushanajunguichi” nishcami.

Shuj ladocunaman rishpa mushuj amigocunata charinaca na siemprechu fácil can. Shinapash ñucanchicunara shujcunata mingachina amigocunata charichun ayudashcatami cuenta japipashcanchi. Tucui huauquipanicunallatami imagupipash igual canchi. Jehová Diosca ñucanchicunata aliguta rurashcamandami shuj shuj huauquipanicunahuan amigo tucushpa juyaitapash ricuchita ushapanchi. (2 Cor. 6:11).

Jehová Dioshna gentecunata tratanata, Jehová ñucanchita juyashcapi y ñucanchita ñaupaman pushajushcapi confianatami yachajupashcanchi. Desanimarishca cashpa, o “huauquipanicunaca ñucanchihuan llevaringapaca na munanllu” yashpaca ñucanchita animangapaj ñucanchi amigocuna cachamushca tarjetacunata, cartacunatami liin carcanchi. Jehová Dios ñaupaman catingapaj fuerzata cujpi, ñucanchita juyashcata ricuchijpimi ñucanchi mañaicunata contestashcata ricupashcanchi.

Ñucanchicunaca cai tucui huatacunapica imata rurashpa ocupado yalinajushpapash ishcandigu imagutapash rurashpa yalingapaj tiempoguta llujchina importante cashcatami cuenta japipashcanchi. Shinallata shuj idiomata yachajujushpa pandarishpapash na yapata preocuparina cashcatami yachajushcanchi. Y cada tutami Jehová ñucanchiman tucui ali cosasgucunata carashcamanda ninanda agradicinchi.

Ñucaca misionero tucushpa shuj llactacunapi causai ushanataca yaitallapash na yashcarcanichu. Shinapash Jehovapa ayudahuan tucuita rurai usharin cashcata cuenta japishpami ninanda cushijupani. Profeta Jeremiashnami pensaripashcani. Profeta Jeremiasca: “Mandaj Dioslla, ñucataca umachihuashcanguimi” nircami (Jer. 20:7). Jehová Diosca ñucanchicunamanga na pensashca shuj shuj asignaciongunata, bendiciongunatami cushca. Avionbi viajana munaita pactachi ushachunbashmi Jehová Diosca ayudahuashca. Huahua cashpa ñuca pensashca llactacunata yali shuj llactacunaman avionbi viajachunmi Jehová Diosca ayudahuashca. Picha jatun llactacunapa sucursaltami visitai ushashcanchi. Y ñuca huarmigutaca ninandami agradicipani. Paica tucui asignaciongunapimi ñucataca tucui shungu ninanda apoyahuashca.

Imaguta ruranajushpapash Jehovata juyaimanda ruranajushcatami siempre yaripanchi. Cunan punllacunapi Jehová Dios cushca bendiciongunaca shamuj punllacunapi ñucanchita ashtahuan bendicianatami ricuchin (Sal. 145:16).