1, 2. Ñucanchicunaca ¿ima bendiciondata charipanchi?

 JEHOVÁ Diostaca imashinata ricupangui nishpa tapujpica ¿imatata nipanguiman? Talvezpashmi “Jehová Diosca ñucapa amigo, ñucapa taita, ñucapa Dios” can nishpami contestapanguiman. Pero Jehová Diosmanda parlashpaca ¿imatata ashtahuan parlapanguiman?

² Por ejemplo rey Davidca, shuj persona paipa amigota huasiman invitashpaca ali ali tratashpa chasquin cashcatami parlarca. Cai personashnallatami Jehová Diospash paipa sirvijcunataca shuj alipacha amigotashna tratan nishpami parlarca. Rey Davidca: “Mandaj Dioslla, ¿pita cambaj jatun carpapica causagringa? ¿Pita cambajlla urcupica causagringa?” nishpami tapurca (Sal. 15:1). Cai shimicunaca, Jehová Diospa invitadocuna o paipa amigo caita ushashcatami yachachijun. Jehová Dioshuan ali amigo canaca shuj jatun bendicionmi can.

JEHOVÁ DIOSCA PAIPA INVITADOCUNA CACHUNMI MUNAN

3. Jehová Diospaca ¿pita primer invitado carca? Shinallata Jehová y Jesuspash ¿imashinata sintirirca?

³ Callaripica Jehová Diosca paipa churi Jesustami rurarca. Paimi Jehová Diospa primer invitado carca. Y de seguromi Jehová Diosca Jesús paipa primer invitado cashcamandaca cushillapacha sintirishcanga. Bibliapica Jehová Diosca Jesusmanda ninanda ‘cushijun’ cashcatami parlan. Shinallata Jehovapa  ñaupapi Jesús cushillapacha sintirishcatami parlan (Prov. 8:30).

4. Jehová Diosca paipa amigo tucuchunga ¿picunatata invitai callarirca?

⁴ Tiempohuanga, Jehová Diosca shuj angelcunatapashmi rurarca. Paicunapashmi Jehová Diospa invitadocuna tucurca. Bibliapica angelcunataca “Taita Diospaj churicuna” ninmi. Shinallata cai angelcunaca Jehová Diospa ladopi cai ushashcamanda cushillapacha cashcatami Bibliapica parlan (Job 38:7; Dan. 7:10). Ashtaca ashtaca huatacunatami Jehová Diosca jahua cielopi paihuan causajcunahuanlla amigo carca. Jipamanga huaquin gentecunataca Jehová Diosca paipa amigo tucuchunmi invitai callarirca. Por ejemplo, cai bendiciondaca Enoc, Noé, Abrahán y Job runagucunami charirca. Bibliapi paicunamanda parlashpaca Jehová Diospa amigomi carca nin. Shinallata ‘Taita Dioshuanmi purishpa catirca’ ninmi (Gén. 5:24; 6:9; Job 29:4; Is. 41:8).

5. Ezequiel 37:​26, 27​pi parlashca profeciaca ¿imatata yachachin?

⁵ Ashtaca ashtaca huatacunatami, Jehová Diosca paipa sirvijcunataca paihuan ali amigo cashpa catichun invitajushca. Chaitaca Ezequiel 37:​26, 27​pimi ricuita ushapangui (cai textota liipangui). Cai textopi parlashca profeciaca Jehová Dios paipa sirvijcuna paihuan ali amigo cachun munashcatami yachachin. Jehová Diosca, “casilla aliguta causangapajmi” cangunahuanga shuj pactota rurasha nishpami paipa sirvijcunataca prometirca. Cai promesaca, ungidocuna y cai alpapi causana esperanzata charij gentecunapash ‘shujlla corralshna tucushpami’ Jehová Diosta sirvinga (Juan 10:16). Y cai promesaca cunan punllacunapimi pactarijupan.

MAIPI CAJPIPASH, JEHOVÁ DIOSMI ÑUCANCHITACA CUIDANGA

6. Jehovapa carpa huasiguman ¿ima horata yaicupanchi? Y Jehová Diospa carpa huasica ¿shuj pushtupillachu can?

⁶ Punda tiempopi telahuan rurashca shuj carpa huasiguca samangapaj, shinallata imamanda cashpapash pacajungapami carca. Y pipash cai carpa huasiguman yaicuchun invitajpica aliguman chasquinataca seguromi carca. Ñucanchicunapash Jehová Diostalla sirvisha nishpa, prometishpa y bautizarishpaca Jehovapa ‘jatun carpa’ huasiguman yaicunshnami paipa amigo tucupanchi (Sal. 61:4). Jehová Diospa carpa huasica ¿shuj pushtupillachu can? Na. Porque Jehová Diosca mundo enteropi caj huauquipanicunatami cuidajun. Y espiritualmente ali cangapaj ashtaca ayudacunatami caramujun. Chaimandami paipa carpa huasiguca mundo enteropimi can nipanchi.  Y shuj llactaman rishpaca Jehová Diospa amigocunata o huauquipanicunata rijsishpami mundo enteropi Jehová Diospa carpa huasigu cashcata cuenta japipanchi (Apoc. 21:3).

7. ¿Imamandata Jehovata tucui shunguhuan sirvishpa huañushcacunaca paipa amigocuna cashpami catin nipanchi? (Fotota ricupangui).

⁷ ¿Jehovata tucui shunguhuan sirvishpa huañushca gentecunaca, Jehovapa amigo cashpachu catin? Ari. ¿Imamandata shina nipanchi? Porque Bibliapica huañushca gentecunataca Jehová Diospaca causajmi cashpa catin nishpami yachachin. Jesusca: “Ninashna rupajuj yuramanda parlopica, huañushcacuna causarinamandami Moisespash parlarca. Paica, Jehová Diosca ‘Abrahanba, Isaacpa y Jacobpa Taita Diosmi can’ nircami. Taita Diosca huañushcacunapa Taita Diosca na canllu. Sino causajcunapa Taita Diosmi can. Paipaca tucuicunami causanajun” nishpami explicarca (Luc. 20:​37, 38).

JEHOVAPA AMIGO CASHCAMANDACA ¿IMA BENEFICIOCUNATATA CHARIPANCHI?

8. Jehová Diospa carpa huasigupi cana o paipa amigo canaca ¿imashinata ayudan?

⁸ Shuj carpa huasiguca ninan huairamanda pacajuchun y samai ushachun ayudan. Shina cuendallatami Jehovapa carpa huasigupi cana o paihuan ali amigo canaca Jehová Diosmanda ama caruyachun ayudan. Ashtahuanbash shamuj punllacunapi ali causaigu tiana esperanzata charichunbashmi ayudan. Shinami Diabloca ñucanchita na llaquichita ushanga (Sal. 31:23; 1 Juan 3:8). Shinallata paraíso alpagupica Jehová Diosca paipa amigocunataca espiritualmente ali cashpa catichun ayudanga. Y huañuitapash tucuchishpami ayudanga (Apoc. 21:4).

9. Jehová Diospa amigocunaca ¿imashinata comportarina can?

⁹ Jehová Diosca, ñucanchicuna paipa ali amigo cachun saquishcamandaca ninandami cushijupanchi. Pero Jehová Diospa amigo cashpa catingapaca ¿imashinata comportarina capanchi? Por ejemplo, pipash quiquinda paipa huasiman invitajpica, imata ruranata yachangapami munapanguiman. Talvezpashmi huasiyuca zapatota llujchishpa huasiman yaicuchun munapanga. Chaita yachashpaca uchallami rurapanguiman. Shina cuendallatami Jehová Diospa amigocunaca pai imata rurachun munashcata yachangapaj munapanchi. Jehová Diosta tucui shunguhuan juyaimandami paipa ñaupapi ali ricuringapaj y ali comportaringapaj esforzarina capanchi (Col. 1:10). Jehová Dios ñucanchipa alipacha amigo cashpapash, ñucanchi taitapashmi can. Chaimandami paitaca ninanda respetana capanchi (Sal. 25:14). Jehová Diosta juyaimandami paita ama llaquichingapaj, imapash nali ruraicunamanda jarcarichun ayudan. Ñucanchicunaca “na jariyashpa”, Jehová Diosta siempre cazushpa causangapami munapanchi (Miq. 6:8).

JEHOVÁ DIOSCA ISRAELITACUNATACA IGUALMI TRATARCA

10, 11. Jehová Dios tucuicunatallata igual tratan cashcataca ¿imashinata yachapanchi?

¹⁰ Jehová Diosca siempremi paipa tucui sirvijcunataca igual tratan (Rom. 2:11). Por ejemplo, desierto Sinaí nishcapi Jehová Dios israelitacunata imashina tratashcata ricupashun.

¹¹ Por ejemplo, israelitacunata Egipto llactamanda llujchishca jipaca, tabernáculo carpa huasipi sirvichunmi huaquin jaricunata sacerdotecuna cachun nombrarca. Ashtahuanbash tabernáculo carpa huasipi shuj shuj cosascunata rurachunga levitacunatami churarca. Shinaca ¿tabernáculo carpa huasi ladollapi causashcamanda o tabernáculo carpa huasi ucupi sirvinajushcamandalla ashtahuan alichu Jehová Diosca cuidajurca? Na, Jehová Diosca tucui israelitacunatallatami igual cuidajurca.

12. Jehová Diosca israelitacunata igual tratashcataca ¿imashinata ricuchirca? (Éxodo 40:38; dibujota ricupangui).

 ¹² Jehová Diospa carpa huasigupi sirvishca cashpa o na sirvishpa cashpa o ladolla o na ladolla causashca cashpapash, tucui israelitacunallatami Jehová Dioshuanga ali amigo cana oportunidadta charirca. Por ejemplo, Jehová Diosca tucui israelitacunallata tabernáculo carpa jahuapi fuyu columnata ricui ushachunmi ayudarca (Éxodo 40:38​ta liipangui). Shina ricui ushaimandami tabernáculo carpa jahuapi cai fuyu cuyuri callarijpica tucui israelitacunallata paicunapa cosascunata tandachishpa fuyu columnata cati ushan carca (Núm. 9:​15-23). Ashtahuanbash ishcai trompeta de plata nishcahuan tocajta uyashpami fuyu columnata cati callarina cashcataca tucuicunallata cuenta japin carca (Núm. 10:2). Shinaca tabernáculo carpa huasi ladolla cashcamandalla Jehová Diospa ashtahuan ali amigo cashcataca na ricuchijurcachu. Ashtahuangarin tucui israelitacunallatami Jehová Diospa amigo caita usharca. Shinallata Jehová Dios ayudashpa cuidanataca seguromi caita usharca. Cunanbipash Jehová Diosca ñucanchita juyaimandami ñucanchicuna maipi causajpipash ayudashpa y cuidashpa catin.

CUNANBIPASH JEHOVÁ DIOSCA TUCUICUNATA IGUALMI TRATAN

13. Cunan punllacunapipash Jehová Diosca ¿imashinata tucuicunatallata igual tratashcata ricuchijushca?

¹³ Huaquin huauquipanicunaca Jatun Betelpi o shuj sucursal ladollapimi causan. Cutin huaquingunaca cai Jatun Betelpi o shuj sucursalpimi causan. Shinaca imasha cashpapash Jehová Diostami sirvinajun. Ashtahuanbash cai pushtucunapi ñaupaman pushaj huauquicunahuanbashmi trabajana oportunidadta charishca. Cutin shujcunaca superintendentes de circuito shinami sirvinajun. Y shujcunaca tiempo completopi participanajun. Pero ashtacacunaca Jehovata cashna sirvina bendiciondaca na charipanllu. Jehovata cashna sirvina bendicionda na charishpaca, Jehová Dios quiquinda  juyajta, paipa amigo caita ushashcata y Jehová Dios siempre cuidanataca seguromi caita ushapangui (1 Ped. 5:7). Jehová Diosca tucui paipa amigocunatallatami espiritualmente ali cachun ayudashpa catinga. Shinalla instrucciongunata cushpapashmi ayudanga.

14. ¿Imata ashtahuan rurashpata Jehová Diosca tucuicunata igual tratashcata ricuchishca?

¹⁴ Ashtahuanbash Jehová Dios tucuicunatallata igual tratashcata ricuchingapaca tucui gentecunallata Bibliata charichunmi ayudashca. Bibliataca hebreo, arameo y griego shimipimi escribichirca. Shinaca Bibliata hebreo, arameo y griego shimicunapi liijcunaca ¿Jehová Diospa ashtahuan alipacha amigomi can nita ushapanchichu? Na (Mat. 11:25).

15. Jehová Dios tucuicunata igual tratashcataca ¿imapita ashtahuan ricupanchi? (fotocunata ricupangui).

¹⁵ Jehová Diospa ñaupapi ali ricuringapaca ali estudiashca cana o bibliapa hebreo, arameo y griego shimita ali intindinaca na minishtirinllu. Jehová Diosca ali estudiashca gentecunamanllaca paipa ali yachaitaca na caranllu. Ashtahuanbachaca tucui gentecunamanmi paipa ali yachaitaca caran. Jehová Diosca Bibliataca ashtaca ashtaca idiomacunapi traducichunmi ayudashca. Shina ayudashcamandami mundo enteromanda tucui gentecuna Bibliamanda yachajushpa, Jehová Diospa ali amigo caita ushashca (2 Tim. 3:​16, 17).

JEHOVÁ DIOSPA ÑAUPAPI ALI RICURISHPA CATIPASHUNCHI

16. Jehová Diosca paipa carpa huasigupi ¿picunatalla chasquin? (Hechos 10:​34, 35).

¹⁶ Jehová Diospa carpa huasigupi cana o paipa amigo canaca shuj jatun bendicionmi can. Ñucanchi Jehová Dioshna juyaj, llaquij Dioshnaca na tianllu. Jehová Diosca maimanda cajpi, shuj culturata charijpi, ima edadta charijpi, estudiashca o na estudiashca cajpi, jari o huarmi cajpipash tucuicunatallatami igual tratan. Pero Jehová Diospa amigo cashpa catingapaca paipa mandashcacunatallami cazuna capanchi (Hechos 10:​34, 35​ta liipangui).

17. Cati temapica ¿imatata yachajupashun?

¹⁷ Rey Davidca Salmo 15:1​pica Jehová Diostaca cashnami tapurca: “Mandaj Dioslla, ¿pita cambaj jatun carpapica causagringa? ¿Pita cambajlla urcupica causagringa?” nishpa. Cati temapica Jehová Diospa amigo cashpa catingapaj ima requisitocunata pactachina cashcatami yachajupashun.