Boazpa “familia runaca” ¿imamandata Ruthuan cazarashpaca “ñuca charishcacunaca chingangami” nirca? (Rut 4:1, 6).

Bibliapa tiempopica shuj cazarashca jari, huahuacunata nara charishpallata huañujpica, paipa alpacunahuanga ¿imata pasana carca? Huañushca personapa shutica ¿chingaitapachachu chingana carca? Moisespa Leypimi chai casocunapi imata rurana cashcata ricuchijurca.

Chai tiempopica huañujpi o minishtimanda paipa alpata jatushca cajpica paipa huauqui o shuj familiarmi chai alpacunata cutin tigrashpa randina derechotaca charirca. Shinami alpacunaca familiapurallapita quidana carca (Lev. 25:23-28; Núm. 27:8-11).

Huañushca personapa shuti ama chingarichunga huarmica cusapa huauquihuanllatami cazarana carca. Shinami shuj jari huahuaguta charishpa, huañushca cusapa shuti na chingarijpi chai huahuaguca huañushca cusapa herenciataca japina carca. Rutpash chai costumbreta catishpami matrimonio de levirato o matrimonio de cuñado nishcata rurarca. Jehová Dios chashna leyta churashcamandami viuda huarmiguca na yangata jichushca quedarca (Deut. 25:5-7; Mat. 22:23-28).

Noemí huarmigupi pensaripashunchi. Paica Elimélec runahuanmi cazarashca carca. Pero Elimélec paipa ishcai churicuna huañujpica paita pi mantininapash na tiarcachu (Rut 1:1-5). Noemí huarmigu Judá llactaman tigrashpaca paipa jachun Rut huarmigutaca, Elimélec runagupa familia Boaz runaguta alpacunata randihuai nigri nircami (Rut 2:1, 19, 20; 3:1-4). Shinapash Boazca Noemipa, Rutpa alpacunata randingapaca shuj familiar ashtahuan cercano tiashcatami yacharca. Chai ashtahuan cercano familiami alpata randina derechotaca ashtahuan charirca. Bibliapica cai familiarpa shutitaca na villanllu (Rut 3:9, 12, 13).

Chai familiar cercanoca callaripica chai alpacuna valishca cajpipash, Noemí mayorllagu caimanda shuj huahuata ñana chari ushanata yachashpapashmi chai alpacunata randingapaca dispuesto carca (Rut 4:1-4). Callaripica paipa ricuipica chai alpacunata randinaca alimi ricurijurca.

Shinapash chai familiar cercanoca alpacunata randishpaca Rut huarmihuanbash cazarana cashcata cuenta japishpami chai alpacunata ñana randinata decidirca. Paica: “Na randi ushapanichu, ñuca charishcacunaca chingangami” nircami (Rut 4:5, 6). Shinaca ¿imashpata Ruthuan cazaranata yachaj chayashpaca alpacunata randinataca desanimarirca?

Chai pariente cercano o maijan pariente cashpapash, Rut huarmiguhuan cazarajpi pai shuj churiguta charijpica chai churigumi tucui herenciata japina derechotaca charirca. Shinaca chai pariente cercanopaca paipa charishca alpacunaca ¿imashinata perdirina ricurijurca? Bibliapica paipa charishca alpacuna imamandapacha perdirina cashcataca na villanllu. Shinapash huaquin yuyaicunatami charipanchi.

• Primeroca talvez Elimelecpa alpacunaca, Rutpa primero churipami quidanga yashpami culquitaca yangami gashtajuringa yashcanga.

• Catipica Noemitapash, Ruttapashmi mantinina tucunga yashcangami.

• Quimsa yuyaipica, Ruthuan cazarashpa pai huahuacunata charishpaca chai huahuacunaman y pai punda charishca huahuacunamanbashmi pai charishca alpacunataca partina canga yashcangami.

• Shinaca cai pariente cercano huahuacunata na charishca cajpica Ruthuan cazarajpi, Rutpa charishca huahuacunami Elimelecpa alpacunahuan y cai parientepa alpacunahuanbash quidana carca. Shina rurajpica, Elimelecpa shuti alzarishpami cai parientepa shutica chingarina carca. Chaimandami chai familiar cercanoca Noemita y Ruttaca ñana ayudangapaj munarca. Chaipa randica chai responsabilidadtaca Boaz runagumanmi saquirca. Boaz runaguca Elimelecpa shuti alzarishpa catichun munaimandami chai responsabilidadtaca chasquircalla (Rut 4:10).

Imashinami ricupanchi cai parientepaca paipa shuti, paipa herenciami ashtahuan importante carca. Chaimandami Rutta, Noemita ayudangapaca na munarca. Paipa shuti ricurishpa catichun munaimanda na ayudashpapash a la finalca paipa shutica chingarircallatami. Shinallata paipa familiamanda Jesús nacirina bendiciondapashmi chingachirca. Chai bendiciondaca Boazmi chasquirca. Shinaca chai familiar cercanoca na ayudaimandami tucuita perdishpa llujshirca (Mat. 1:5; Luc. 3:23, 32).