1, 2. a) Shuj asambleapica pipash bautizarijpica ¿imashinata tucuicuna sintirin? b) Cai temapica ¿imatata ricugripanchi?

 SHUJ asambleapi bautizarigrijcunataca ¿ricupashcanguichu? Discursota cuj huauquiguca bautizarigrijcunamanga ishcai tapuicunatami ruran. Paicunaca tucui shunguhuan ari nishpami contestan. Paicunapa familiarcunapash, amigocunapash ninandami cushijun. Ña bautizarishpa yacumanda llujshishca jipaca paicunapashmi cushillapacha sintirin. Asambleapi cajcunapash paicunamandaca ninandami cushijun. Cada semanami Jehová Diostalla sirvingapaj ashtaca ashtaca gentecuna bautizarishpa testigo de Jehová tucun.

² Quiquin bautizaringapaj munajushpaca ‘Taita Diosta mascajushcata’ y cai mundopi gentecunamanda diferente cashcatami ricuchijupangui (Sal. 14:1, 2). Joven o mayorlla cashpapash cai temaca quiquindaca ayudapangami. Cai temapica Jehová Diosta sirvij callaringapaca quimsa yuyaicunatami ricugripanchi. Cutin ña bautizarishca cajpica Jehová Diosta para siempre sirvina munaita charichunmi cai temaca ayudapanga.

3. Jehová Diosta sirvijcunaca ¿imamandata cabal yachachishcacunata y alita ruranataca juyana capanchi? (Salmo 119:128, 163).

³ Jehová Diosca paipa sirvijcunamanga “imatapash cashcatapacha ruranata […] juyashpa causaichi” nishpami mandarca (Zac. 8:19). Jesusca alita rurana munaita charinaca minishtirishca cashcatami ricuchirca (Mat. 5:6). Cai textocunapi nishcashnaca Jehová Dios munashcashnami ali, limpio cosascunata tucui shunguhuan rurana munaita charina capanchi. Quiquinbash de seguromi cabal yachachishcacunata, alita ruranatapash juyapangui. Chaimandami llullashpa parlanata, nalita ruranatapash na ricunayachipangui (Salmo 119:128, 163​ta liipangui). Llullashpa parlajcunaca cai mundota mandaj Diabloshnallatami can (Juan 8:44; 12:31). Diabloca Jehová Diostaca nalipi quidachingapami munan. Paica jardín de Edenbi Jehová Diosta ñana cazushcamandapachami, Jehová Diosmandaca  llullacunata nijushca. Diabloca Jehová Dios nali, llulla mandaj cashcata, gentecunaman ali cosascunata na carangapaj munashcatami crichingapaj munarca (Gén. 3:1, 4, 5). Diablo shina llullashcamandami gentecunaca Jehová Dios nali Dios cashcata pensan. Gentecuna cabal yachachishcacunata na juyajpica, Diabloca paicunataca nali cosascunatami rurachita ushan (Rom. 1:25-31).

4. Jehová Dios ‘na llullaj Dios’ cashcataca ¿imashinata ricuchishca? (Dibujotapash ricupangui).

⁴ Jehová Diosca ‘na llullaj Diosmi’ can. Chaimandami paita juyajcunamanga tucuita cabalta yachachin (Sal. 31:5). Shina rurashpami Jehová Diosca Diablopa llullacunapi ama urmachun ayudan. Ashtahuangarin Jehová Diosca paita sirvijcunataca honrado cachun y alita rurashpa causachunmi yachachin. Chaimandami Jehová Diosta sirvijcunaca pai yachachishcashna causashpa tranquilo sintirin (Prov. 13:5, 6). Quiquinbashchu Bibliata yachajui callarishpaca ¿cashna tranquilo causaiguta chari callaripashcangui? Quiquinga Jehová Diospa yachachishcacunalla quiquinda, tucui gentecunatapash ayudai ushashcatami yachajupashcangui (Sal. 77:13). Chaimandami quiquinga Jehovapa mandashcacunata cazushpa causangapaj munapangui (Mat. 6:33). Shinallata Jehová Diospa cabal yachachishcacunatami gentecunaman rijsichingapaj munapangui. Chashna rurashpaca Jehová Diosmanda Diablo parlashca cosascuna llullaj cashcatami ricuchingapaj munapangui. Shinapash ¿imashinata chaitaca ricuchi ushapangui?

5. Alita rurashpa causangapaj y cabal yachachishcacunata difindingapaca ¿imatata rurai ushapangui?

⁵ Quiquinba ruraicunahuanmi Diablo llulla cashcata y Bibliamanda cabal yachachishcacunata difindingapaj munashcataca ricuchi ushapangui. Shinallata Jehová Dios quiquinda ñaupaman pushachun munashcata y paipa mandashcacunata cazungapaj munashcatapashmi ricuchi ushapangui. Chaita pactachingapaca Jehová Diostaca candallami para siempre sirvisha nishpami mañana capangui. Chai jipaca Jehová Diostalla sirvisha nishpa mañashcata tucuicuna ricuchunmi bautizarina capangui. Shinaca cabal yachachishcacunata y alita ruranata juyashpaca bautizaringapami munapangui.

6. Salmo 45:4​pi nishcashnaca ¿ima razongunata tian Jesusta juyangapaj?

⁶ Jesustaca ¿imamandata juyapangui? Salmo 45:4​pimi Jesusta juyangapaj huaquin razongunata tari ushapanchi (chai textota liipangui). Jesusca cabal yachachishcacunatami difindin, shinallata humilde y alita rurajmi can. Shinaca  alita rurashpa y cabal yachachishcacunata juyashpaca Jesustapashmi juyapangui. Jesusca cabal yachachishcacunata y alita ruranataca na manllashpami difindirca (Juan 18:37). Pero Jesusca humilde cashcataca ¿imashinata ricuchin?

7. Jesusmandaca ¿imatata ashtahuan gushtapangui?

⁷ Jesusca paipa nishcacunahuan, ruraicunahuanmi humilde cashcata ricuchin. Por ejemplo, Jesusca paita alicachichunga na munanllu. Jehová Diosta alicachichunmi imatapash ruran (Mar. 10:17, 18; Juan 5:19). Jesús humilde cashcamandami paipa ejemplota catingapaj munapanchi. Pero ¿imamandata Jesusca humilde can? Jehová Dios humilde cashcamandami paipash humilde can. Y Jesusca, Jehová Diosta juyaimandami paishnalla cangapaj munashpa paipa ejemplota catin (Sal. 18:35; Heb. 1:3). ¿Nachu chaita yachashpaca Jesusman ashtahuan quimiringapaj munapangui?

8. ¿Imamandata Jesús ñucanchi Rey cachun munapanchi?

⁸ Jesús shuj ali gobierno cashcamandami ñucanchicunaca pai ñucanchita mandachun munapanchi. Jesustaca Jehová Diosllatami yachachishpa Rey cachun nombrarca (Is. 50:4, 5). Shinallata Jesusca tucui ñucanchicunata juyashcatami ricuchishca. Pero chaita rurashcamanda paiman imatapash rurashpa tigrachichunga na shuyanllu (Juan 13:1). Jesús ñucanchi Rey cashcamandami paitaca juyapanchi. Caimanda parlashpami Jesusca ñucapa amigocunaca ñucata juyashcata ricuchingapaca ñuca mandashcacunatami cazuna can nirca (Juan 14:15; 15:14, 15). Jesuspa amigo canaca shuj jatun bendicionmi can.

9. Jesuspa bautismohuan, paipa catijcunapa bautismohuanga ¿imapita igual can?

⁹ Jesusca paipa catijcuna bautizarichunmi mandarca (Mat. 28:19, 20). Callaripica Jesús bautizarishpami ali ejemplota churarca. Jesuspa bautismohuan, paipa discipulocunapa bautismohuan diferente cashpapash ¿imapita igual can? (“ Jesuspa bautismohuan, paipa catijcunapa bautismohuanga ¿imapita diferente can?” nishca recuadrota ricupangui). Por ejemplo Jesusca paipa Taitapa voluntadta rurangapami bautizarirca (Heb. 10:7). Cunanbipash Jesusta catijcunaca Jehová Diospa voluntadta rurangapami bautizarin. Bautizarishca punllamandami Jehová Diospa voluntadta ruranaca paicunapa causaipica ashtahuan importante cashcata ricuchin. Shina rurashpami Jesuspa ejemplota catinajushcata ricuchin.

10. ¿Imata yachaimandata Jesustaca juyapangui? Y Jesusta juyashcamandaca ¿imatata rurangapaj munapangui?

¹⁰ Quiquinga Jesús, Jehová Diospa shujlla Churi cashcata, Jehová Diosllata Jesusta Rey shina mandachun agllashcataca ñami yachajupashcangui. Shinallata Jesús humilde cashcata y paipa Taitapa ejemplota tucuipi catijtapashmi yachajupashcangui. Y ashtaca gentecunaman micunaguta carashcata, llaquilla caj gentecunata ayudashcata y ungushca gentecunata jambishcatapashmi yachajupashcangui (Mat. 14:14-21). Cunan punllacunapi congregaciongunata Jesús ñaupaman pushajushcataca quiquinga ñami cuenta japipashcangui (Mat. 23:10). Shinallata Diospa gobiernopi Rey shina mandajushpa ali cosascunahuan bendicianatapashmi yachajupashcangui. Shinaca Jesusta juyashcata ricuchingapaca paipa ejemplotami catina capangui (Juan 14:21). Jesusta juyashcamandami Jehová Diostalla sirvishpa causasha nishpa bautizarina capangui.

11. ¿Ima shimicunata bautizarina cashcataca ricuchin?

¹¹ Jesusca: “Canba Taita Dios Jehovataca canba tucui shunguhuan, canba tucui causaihuan, canba tucui yuyaihuan, canba tucui ushaihuanmi juyana cangui” nircami (Mar. 12:30). Cai mandashca shimicunami imamanda bautizarina cashcataca ashtahuanbachaca ricuchin. ¿Jesús nishcashnachu Jehová Diostaca ninanda juyapangui?

12. ¿Imamandata Jehová Diostaca juyapangui? (Fotocunatapash ricupangui).

¹² Jehová Diosta juyangapaca ashtaca razongunami  tian. Quiquinga Jehová Dios “causaita cuj” Dios cashcatami yachajupashcangui. Shinallata Jehová Diosca ‘jahua cielomandaca alipacha regalocunatami caramujun. Y paipa carashcacunaca siempremi perfecto can’ (Sal. 36:9; Sant. 1:17). Quiquin charishca tucui ali cosascunaca Jehová Diosmandami shamun. Paica generoso caimanda, quiquinda juyaimandami tucuita caramujun.

13. ¿Imata rurashpata Jehová Diosca ñucanchimanga shuj alipacha regalota carashca?

¹³ Jehová Diosca paipa Churipa causaita ñucanchimanda cushpami, ñucanchimanga shuj alipacha regalota curca. ¿Imamandata shina nipanchi? Caipi pensaripashun: Jesushuan, Jehová Dioshuanga randimandami ninanda juyarin. Chaimandami Jesusca ‘ñuca Taitaca juyahuanmi’, shinallata ñucaca ‘ñuca Taitataca juyanimi’ nirca (Juan 10:17; 14:31). Jesusca paipa taitahuan ashtaca ashtaca huatacunata igual causaimandami alipacha amigocuna carca (Prov. 8:22, 23, 30). Chaimandami Jehová Diospaca paipa Churita sufrishpa huañuchun saquinaca shinllipacha cashcanga. Shinapash Jehová Diosca tucui gentecunata ninanda juyaimandami paipa Churita huañuchun saquirca. Chaimi tucuicunallata para siempre causana oportunidadta charipanchi (Juan 3:16; Gál. 2:20). Shinaca Jehová Dios chaita rurashcamandaca ¿manachu juyaita ricuchina capanchi?

14. Ñucanchi causaipica ¿ima alipacha decisiondata agllaita ushapanchi?

¹⁴ Jehová Diosmanda ashtahuan yachajushpami paitaca ashtahuan juyashpa catipashcangui. Seguromi quiquinga cunanbipash, shamuj  punllacunapipash para siempre Jehová Diospa amigo cangapaca munapangui. Quiquinba parlashcacunahuan y ruraicunahuanmi Jehová Diostaca cushichita ushapangui. Jehová Diosca quiquindaca juyaihuanmi chaita rurachunga animan (Prov. 23:15, 16). Quiquinba causaipi ima rurashcacunami Jehová Diosta ciertopacha juyashcataca ricuchinga (1 Juan 5:3). Ñucanchi causaipi Jehovata cazunata decidishpaca alipacha decisiondami agllanajupanchi.

15. ¿Imata rurashpata Jehovata juyashcata ricuchi ushapangui?

¹⁵ ¿Imata rurashpata Jehovata juyashcata ricuchi ushapangui? Callaripica candallami sirvisha nishpami Jehová Diostaca mañana capangui (Sal. 40:8). Catipica Jehová Diosta mañashcata tucuicuna yachachunmi bautizarina capangui. Imashinami ña ricuparcanchi, bautizarishpaca quiquinga ninandami cushijupangui. Bautizarishca punllamandaca mushuj causaitami callaripangui. Chai punllamandapachami Jehová Diospa voluntadta rurangapaj causapangui (Rom. 14:8; 1 Ped. 4:1, 2). Bautizarinaca shuj jatun decisionmi can. Shinapash bautizarishpaca ashtahuan ali causaigutami chari ushapangui. ¿Imamandata shina nipanchi?

16. Salmo 41:12​pi nishcashnaca, Jehová Diosca paita sirvijcunataca ¿imashinata bendicianga?

¹⁶ Jehová Dioshna na mitsashpa carajca pipash na tianllu. Jehová Diosman imata carajpipash paica ashtahuan yalitami tigrachinga (Mar. 10:29, 30). Cai nali mundopi causajpipash Jehová Diosca quiquinmanga shuj cushilla ali causaitami caraita ushan. Shinapash bautizarishpaca na chaipillachu quidapangui. Jehová Diostaca para siempre sirvingapami esforzarita ushapangui. Shinami Jehová Diosca quiquindaca ashtahuan juyapanga. Y quiquinbashmi paitaca ashtahuan juyapangui. Shinallata paraíso alpagupi cashpaca Jehová Dioshnallatami quiquinbash para siempre causaita ushapangui (Salmo 41:12​ta liipangui).

17. Jehová Dios tucuita charijpipash ¿ima valishca regalotata paimanga caraita ushapangui?

¹⁷ Jehová Diostalla sirvisha nishpa mañashpa y bautizarishpaca, Jehová Diosmanga shuj valishca regalogutami carajupangui. Jehová Diosmandami imapash ali cosasgucunata charipanchi y cushilla causaitapash ushapanchi. Jehová Dios tucui cosascunata charijpipash, paita na saquishpa sirvinata decidishpami paimanga shuj alipacha regaloguta caranshna cuita ushapangui. Chaipaca  Jehová Diostallami tucui shunguhuan siempre sirvina capangui (Job 1:8; 41:11; Prov. 27:11). Jehová Diosta sirvinaca ashtahuan ali decisionmi can. Shinaca Jehová Diosta ciertopacha juyaimandami bautizarina capangui.

18. Bautizaringapaca ¿ima tapuicunapita pensarita ushapangui?

¹⁸ Cai temata yachajushca jipaca ¿bautizaringapaj munapanguichu? Chaitaca quiquinllami decidita ushapangui. “Bautizaringapaca ¿listochu cani?” nishpami pensarita ushapangui (Hech. 8:36). Cai temapica quimsa razongutami imamanda bautizarina cashcataca ricupashcanchi. Primeroca bautizaringapaca alita ruranata y cabal yachachishcacunatami juyana capangui. Cashna pensaripai: Ñucaca shuj punlla “¿tucui gentecuna cabalta parlachun y alitalla rurachunllu munapani?” nishpa. Catipica Jesustaca juyashcatami ricuchina capangui. Shinallata cashna pensaripai: Ñucaca “¿Jesús ñucapa Rey cachun paipa ejemplota catingapaj munanichu?” nishpa. Ultimopica Jehová Diostaca tucui shungumi juyana capangui. Chaimi tucuimandaca ashtahuan importante can. Shinallata cashna pensaripangui: “¿Jehová Diosta sirvishpa paita cushichingapachu munani?” nishpa. Cai parrafopi tapuicunata ari nishca cashpaca bautizaringapaca listomi capangui. Bautizarinataca imapash jarcachunga na saquinachu capangui (Hech. 16:33).

19. Bautizaringapaca ¿imamandata na shuyana capangui? Shuj ejemplomanda parlapai (Juan 4:34).

¹⁹ Bautizarinata o na bautizarinata nara decidishca cashpaca Jesús parlashca ejemplopi pensaripangui (Juan 4:34​ta liipangui). Jesusca Taita Diospa voluntadta ruranaca shuj micunagushnami can nircami. ¿Imamandata shina nirca? Micunaguca ñucanchipallata ali can. Jesusca Jehová Diospa mandashcacuna ñucanchipallata ali cashcataca alimi yacharca. Jehová Diosca ñucanchita imapash nali cosascunata rurachunga nunca na mañangachu. Ashtahuangarin Jehová Diosca quiquin bautizarichunmi munan (Hech. 2:38). Shinaca cai mandashcata pactachishpaca quiquinllatami beneficiaripangui. Pensaripai: Pipash shuj mishqui mishqui micunaguta carajpica ¿imatata rurapanguiman? ¿Nachu cushijushpa uchalla micupanguiman? Shina cuendallatami uchalla bautizaringapaj munana capangui.

20. Cati temapica ¿imatata yachajupashun?

²⁰ Huaquingunaca ¿imamandata nara bautizarin? Talvez paicunaca “bautizaringapaca nara listochu cani” nishpami pensaripanga. Ciertota parlashpaca Jehová Diosta candallami sirvisha nishpa mañana y bautizarinaca, ñucanchi causaipica ashtahuan importante decisionmi can. Chaimandami bautizaringapaca aliguta pensarina capangui. Y preparado cangapapashmi esforzarina capangui. Shinaca ¿bautizaringapaj munapanguichu? Bautizaringapaj preparado cachunga ¿imata ayudapanga? Chaitaca cati temapimi yachajupashun.