1. Testigo taitacunaca paicunapa huahuacunataca ¿imapita ayudangapaj munan?

 TAITAMAMACUNA, quiquingunapa huahuacuna Jehová Diosta rijsichun, paita juyachun ayudangapaj munashcataca alimi yachapanchi. Shinapash Jehová Diosta na ricui ushashpapash quiquingunapa huahuacuna Jehová Dios ciertopacha tiashcata crichun, paihuan shuj ali amigo tucuchunga ¿imatata rurai ushapanguichi? (Sant. 4:8).

2. Jehová Diosmanda y Jehová Dios imashina cashcataca taitacunaca paicunapa huahuacunamanga ¿imashinata yachachita ushan?

² Taitacunaca paicunapa huahuacunahuan Bibliata igual estudiashpami, paicunapa huahuacunataca Jehová Diosman ashtahuan quimirichun ayudaita ushan (2 Tim. 3:14-17). Shinallata Bibliapica jovenguna Jehová Diosmanda ashtahuan yachajungapaj imata ashtahuan rurai ushashcatami ricuchin. Proverbios libropica shuj taita paipa churiguhuan parlajtami ricuchin. Chai taitaca paipa churitaca Jehová Diospa rurashcacunata ricushpa Jehová imashina cashcata ricuchunmi animan (Prov. 3:19-21). Cunanga Jehová Dios imashina cashcata huahuacunaman yachachingapaj taitacuna imashina Jehová Diospa rurashcacunata utilizai ushashcatami ricugripanchi.

3. Taitacunaca paicunapa huahuacunataca ¿imapita ayudana can?

³ Bibliapica “Taita Diosta na ricui ushashpapash, cai mundota imashina rurashcata yachajushpami paita rijsita ushashcanchi” ninmi (Rom. 1:20). Taitacunaca paicunapa huahuacunahuan maigumanbash puringapaj llujshishpa tiempota yalinataca ninandami gushtan. Taitacuna, quiquingunapa huahuacunahuan tiempota yalishpaca Taita Diospa ‘ rurashcacuna’ paimanda imata yachachijta ricuchunmi  ayudana capanguichi. Cunanga taitamamacuna paicunapa huahuacunata yachachingapaj Jesuspa ejemplota imashina cati ushashcata ricupashunchi.

4. Jesús paipa discipulocunaman yachachingapaca ¿imacunatata utilizarca? (Lucas 12:24, 27-30).

⁴ Jehová Diospa rurashcacunata utilizashpa Jesús imashina yachachishcata ricupashunchi. Shuj viajeca Jesusca paipa discipulocunataca lirios sisacunata, cuervo pajarocunata ricuichi nircami (Lucas 12:24, 27-30​ta liipangui). Jesusca paipa discipulocunamanga maijan animalta o maijan sisata cashpapash ricuichi nita ushanmanmi carca. Shinapash paipa discipulocuna lirios sisata, cuervo pajarocunata ali rijsishcamandami chaicunata ricuchun animarca. Chai tiempopica Jesuspa discipulocunaca cuervo pajarocuna volanajujta, lirios sisacuna campopi tiajtaca ricushcangami. Y Jesusca seguromi chai animalgucunata ricuchishpandi, sisacunata ricuchishpandi imatapash yachachishcanga. Cai ejemplocunahuanga Jesusca paipa discipulocunamanga ¿imatata yachachirca? Jesusca paipa discipulocunamanga Jehová Dios na mitsaj, llaquij y juyaj Dios cashcatami yachachirca. Jehová Diosca animalgucunata, sisagucunata cuidanshnallatami paipa sirvijcunatapash cuidanga.

5. Taitamamacunaca ¿imacunata utilizashpata huahuacunamanga Jehová Diosmanda ashtahuan yachachita ushan?

⁵ Taitacunaca ¿imashinata Jesuspa ejemplota catishpa huahuacunamanga yachachita ushapan? Por ejemplo, huahuacunamanga quiquingunapa gushtashca animalgumanda o plantagumandami parlaita ushapanguichi. Shinallata chai plantagupi o chai animalgupi Jehová Diosmanda imata yachajui ushashcata huahuacunaman intindichipanguichi. Chai jipaca quiquinba huahuacunataca, “¿ima animalguta o ima plantaguta ashtahuan gushtangui?” nishpami tapuita ushapanguichi. Jehová Diosmanda yachachingapaj paicuna gushtashca cosasgucunamanda parlajpica paicunaca seguromi ashtahuan uyangapaj munanga.

6. Christopher huauquigupa mamamandaca ¿imatata yachajupanchi?

⁶ Taitamamacuna huahuacunaman animalgucunamanda o plantagucunamanda yachachingapaca ashtaca tiempota investigashpa yalijunaca na minishtirinllu. Jesusca animalcunamanda, lirio sisacunamanda parlashpaca facillla shimicunahuanmi yachachirca. Huaquinbica huahuacunaca plantacunamanda, animalcunamandaca ashtaca ashtaca cosascunata yachangapami munan. Shinapash taitamamacunaca ashalla shimicunahuan o shuj tapuita rurashpami Jehová Diosmanda yachachita ushapan. Christopher huauquiguca: “Ñuca mamitaca Jehová Diospa rurashcacunata valorachunga ashalla shimicunahuanmi yachachihuan carca. Por ejemplo, shuj jatun urcu ladocunapi cashpaca: ‘Urcuca jatunbachami. Jehová Diosmi shina rurashca’ ninmi carca. Shinallata mar yacu ladocunapi cashpa olacuna ninanda jatarijta ricushpaca: ‘Ricui, cashna olacunahuanga Jehová Diosca ashtaca poderta charishcatami ricuchin’ ninmi carca. Ñuca mamita ashalla shimicunapi imata nishpapash pensarishpa quidajtami yachachin carca” ninmi.

7. Huahuacuna Jehová Diospa rurashcacunapi paicunallata pensarichunga taitacunaca ¿imatata rurana can?

⁷ Huahuacuna ña viñashpa catijujpica paicunallata Jehová Diospa rurashcacunapi pensarichunmi yachachina capanguichi. Shinami huahuacunaca Jehová Dios imashina cashcata paicunallata yachajuita ushan. Huahuacunamanga Jehová Dios rurashcacunamanda shujlla cosasta utilizashpallatami: “Caihuanga ¿imatata Jehová Diosmandaca yachajui ushanchi?” nishpami tapuita ushapanguichi. Paicuna imata pensajta uyashpaca talvez ninandami cushijupanguichi (Mat. 21:16).

8. Israelita taitamamacuna ‘ñanbi purinajushpaca’ ¿imatata rurangapaj aprovechan carca?

⁸ Jehová Diosca israelitacunamanga “ñambi purinajushpapash” paipa mandashcacunata huahuacunaman yachachichunmi mandarca (Deut. 11:19). Israelitacunapa campocunapica  ñangunapica ashtaca animalcuna, shuj shuj laya sisagucunami tiarca. Israelita taitamamacunaca paicunapa huahuacuna Jehovapa rurashcacunamanda yachajuna munaita charichunga chaicunatami aprovechan carca. Cunanbipash taitamamacunaca chaitallatami ruraita ushan. Huaquin taitacuna imata rurashcata ricupashunchi.

9. Punitha y Katya panigucunamandaca ¿imatata yachajupanchi?

⁹ Punitha shuti paniguca India llactamanda shuj jatun ciudadpimi causan. Paica ninmi: “Ñucanchi familiata campoman visitangapaj rishpaca Jehová Diospa rurashcacunamanda ñucanchi huahuacunaman yachachingapami aprovechanchi. Campopi cashpami Jehová Diospa rurashcacuna imata yachachishcataca huahuacunaca ashtahuan fácil intindin” ninmi. Taitamamacuna, huahuacunahuan Jehová Diospa rurashcacunata ricungapaj tiempota llujchishcataca paicunaca talvez nunca na cungangachu. Moldavia llactamanda Katya shuti paniguca cashnami nin: “Huahua cashpa ñuca taitacunahuan campopi tiempota yalishcataca nunca na cunganichu. Cainalla cashcatashnami yarini. Ñuca taitacuna huahuamanda Jehová Diospa rurashcacunata aliguta ricushpa Jehová Dios imashina cashcata yachajuchun ayudashcamandaca ninandami agradicini” ninmi.

10. Taitamamacuna, huahuacunahuan na campoman llujshita ushashpaca ¿imatata rurana capanguichi? (“ Taitamamacunapa ayudacuna” nishca recuadrota ricupangui).

¹⁰ Quiquinba huahuacunahuan campoman na llujshita ushashpaca ¿imatata rurana capangui? India llactapi causaj Amol shuti huauquiguca: “Ñuca causajuj pushtupica taitacunaca ashtaca horascunatami trabajan. Caipica campoman llujshingapaca ashtaca culquimi minishtirin. Shinapash Jehovapa rurashcacunata ricungapaj, paipa cualidadcunamanda parlangapaca shuj parqueman o shuj huasi balconmanmi llujshita ushapanchi” ninmi. Taitamamacuna, quiquinba huahuacunaman Jehová Diosmanda yachachingapaca quiquinguna causajuj pushtullapitami shuj shuj cosasgucuna tianga (Sal. 104:24). Talvez pajarogucuna, imapash jurugucuna, plantagucuna, shuj shuj cosasgucunami tianga. Alemania llactamanda  Karina shuti paniguca: “Ñuca mamitaca sisagucunata ricunatami ninanda gushtan. Chaimandami ñuca uchillagu cajpica mamitahuan puringapaj rishpaca paica juyailla sisagucunata ñangunapi ricushpaca chaigucunata ricuchishpa parlahuan carca” ninmi. Taitamamacuna, Jehová Diospa organización rurashca videocunata, publicaciongunatapashmi utilizaita ushapanguichi. Maipi causashpapash Jehová Diospa rurashcacunata huahuacuna ricuchunga ayudaita ushapanguichimi. Cunanga Jehovapa ima cualidadcunata quiquinba huahuacunaman yachachinata ricupashunchi.

11. Taitamamacuna, huahuacuna Jehová Dios paicunata juyashcata ricuchunga ¿imatata rurana capanguichi?

¹¹ Quiquinba huahuacuna Jehová Dios paicunata juyashcata ricuchunga animalgucuna imashina juyaihuan paicunapa huahuagucunata cuidajta ricuchishpami parlaita ushapangui (Mat. 23:37). Shinallata ñucanchicuna cushilla causachun Jehová Dios shuj shuj cosascunata rurashcatapashmi parlaita ushapangui. Párrafo 10​pi parlashca Karina paniguca: “Ñuca mamitahuan puringapaj llujshijpica paica ñangunapi juyailla sisagucunata ricushpaca ashaguta shayarishpa, ‘cai sisagucunata ali ali ricui. Cada sisagucunami diferente can. Cai sisagucunaca Jehová Diospa juyaitami ricuchijun’ nihuanmi carca. Ashtaca huatacuna yalishca cajpipash cunangamanmi diferente clase sisagucuna shuj shuj colorgucuna cajtaca ricuni. Chaicunata ricunaca Jehová Dios ñucanchita juyashcatami yarichihuan” ninmi.

12. Taitamamacuna, huahuacuna Jehovapa ali yachaita intindichunga ¿imatata rurana capanguichi? (Salmo 139:14; fotocunata ricupangui).

¹² Taitamamacuna, quiquingunapa huahuacunamanga Jehová Dios ñucanchita yali ali yachaita charishcata yachachipaichi (Rom. 11:33). Por ejemplo, quiquinba huahuacunamanga yacu fuyuman tigrajta, shinallata fuyuca huairapi shuj ladocunaman yalijta ricuchishpa yachachipaichi (Job 38:36, 37). Shinallata ñucanchi cuerpo ali ali rurashca cashcatapashmi paicunamanga parlaita ushapanguichi (Salmo 139:14​ta liipangui). Vladimir shuti huauquigu imashna chaita rurashcata ricupashunchi. Paica ninmi: “Shuj punllaca ñuca huahuagumi bicicletamanda urmashpaca chugrirca. Pero huaquin punllacuna jipaca ali tucurcallami. Chaipimi ñuca huarmiguhuanga Jehová Diosca ñucanchi cuerpotaca paimandallata ali tucunalla cuerpotami rurashca. Cutin gentecuna rurashca cosascunaca na shina  canllu. Por ejemplo, shuj accidente tiajpica shuj carroca na paimandallataca arreglarinllu. Shina explicajpimi ñucanchi huahuaguca Jehová Diospa ali yachaitaca intindi usharca” ninmi.

13. Huahuacuna Jehovapa poderpi pensarichunga ¿imatata taitamacunaca ruraita ushan? (Isaías 40:26).

¹³ Jehová Diosca jahua cielota, estrellacunata ricushpa paipa ninan poderpi pensarichunmi munan (Isaías 40:26​ta liipangui). Quiquingunapashmi quiquingunapa huahuacunataca jahua cielota ricushpa chai ricushcacunapi pensarichun animaita ushapanguichi. Taiwán llactamanda Tingting shuti paniguca pai huahua cajpi ima pasashcatami yuyarin. Paica ninmi: “Shuj tuta ñuca mamitahuan campopi shuj carpapi puñungapaj rishpaca ciudadmanda carullapi caimandaca cielopica juyailla estrellacunatami ricuita usharcanchi. Chai tiempopica escuelamanda ñuca compañerocuna nalicunata rurachun atichinajushcamandami Jehová Diostaiman na cazuringa yashpa preocupado carcani. Chaipica ñuca mamitaca Jehová Dios ninan poderta charimanda chai estrellacunata rurashcata, shinallata Jehová Diosca paipa poderhuan ñucatapash paita cazushpa catichun ayudaita ushanapi pensarichunmi animahuarca. Chaipi ñuca mamitahuan cashpa Jehová Diospa rurashcacunata ricushca jipaca, masqui ima pasajpipash Jehová Diosta ashtahuan rijsingapaj, paita sirvishpa causangapami munarcani” ninmi.

14. Jehovapa rurashcacunahuanga ¿imashinata taitacunaca Jehová Dios cushi Dios cashcataca huahuacunamanga yachachita ushan?

¹⁴ Jehová Diospa rurashcacunaca, Jehová Dios cushilla Dios cashcatami ricuchin. Cientificocunaca casi tucui animalgucunallata pugllanata yachajtami ricushca. “Urpicunapash, pescadocunapashmi pugllan” ninmi (Job 40:20). Quiquinba huahuacunaca misigucuna, alcugucunapash paicunapurallata pugllajtaca ricushcangami. Shina pugllajujta ricushpaca huahuacunaca ninandami cushijushcanga. Cutinba shina animalgucuna pugllanajujpi huahuacuna cushilla cajta ricushpaca Jehová Dios cushi Dios cashcatami yarichita ushapangui (1 Tim. 1:11).

15. Huahuacuna imata pensajta taitamamacuna yachachunga ¿imata ayudapanga? (Proverbios 20:5; fotota ricupangui).

¹⁵ Huaquinbica huahuacunaca paicunapa taitamamamanga ima problemacunata charishcataca  na parlanllachu. Shina pasajujpica quiquingunapa huahuacuna imata pensajta yachachunga ¿imata ayudapanga? (Proverbios 20:5​ta liipangui). Jehovapa rurashcacunata ricushpandi huahuacunapa problemacunamanda parlanami huaquin taitamamacunataca ayudashca. ¿Imamandata shina nipanchi? Porque Jehovapa rurashcacunata ricushpandi parlashpaca huahuacunapash, taitacunapash na shuj cosascunapira pensarinajunllu. Taiwán llactamanda Masahiko huauquica: “Ñucanchi huahuacunahuan montañapi o playapi cajpica paicunaca ashtahuan tranquilomi sintirin. Chaimandami paicunahuan parlana, paicuna imata pensajta y imata sintijta yachanaca ashtahuan fácil can” ninmi. Párrafo 9​pi parlashca Katya shuti paniguca: “Escuelamanda llujshishca jipaca ñuca mamitaca shuj juyailla parquegumanmi pushahuan carca. Chaipi cashpaca tranquilomi sintirin carcani. Chaimandami escuelapi ima problemacunata charishcata o imamanda preocupado cashcata ñuca mamitaman parlanaca ashtahuan fácil carca” ninmi.

16. Jehovapa rurashcacunata ricushpaca ¿imashinata familiacunaca cushijuita ushan?

¹⁶ Jehovapa rurashcacunata ricunaca familiacuna cushilla, tranquilo, ashtahuan unido cachunmi ayudan. Bibliapica “asingapajpash”, “bailangapajpash” shuj tiempo tiashcatami nin. (Ecl. 3:1, 4). Ñucanchi gushtashca cosascunata rurachunga Jehová Diosca juyailla pushtucunatami rurashca. Ashtaca familiacunaca campoman, montañaman o playaman rinatami gushtan. Shinallata huaquin huahuacunaca shuj parquepi pugllashpa, animalgucunata ricushpa o shuj riopi, shuj lagunapi o mar yacupi nadashpami ninanda cushijun. Shinaca imashinami ricupashcanchi Jehovapa tucui rurashcacunahuan cushijuita ushapanchi.

17. Jehovapa rurashcacunata ricushpa cushijuchunga ¿imamandata taitamamacunaca paicunapa huahuacunata ayudana can?

¹⁷ Paraíso alpagupica taitamamacunapash, huahuacunapash Jehovapa rurashcacunahuanga ashtahuanmi cushijunga. Chaipica animalcunataca ni pipash ñana manllashunllu. Animalcunapash ñucanchitaca ñana manllangachu (Is. 11:6-9). Jehovapa rurashcacunata ricushpa cushijungapaca ashtaca tiempotami charipashun (Sal. 22:26). Shinapash taitamamacuna, cunanmandallatami quiquingunapa huahuacuna Jehovapa rurashcacunata ricuchun y chaicunamanda yachajuchun ayudana capanguichi. Cunanmandallata huahuacunata yachachingapaj Jehovapa rurashcacunata utilizajpica huahuacunaca rey Davidshnallatami sintiripanga. Paica: “Canshnalla Diosca pipash na tianllu. Can rurashcacunashnaca, ima rurashcacunapash na tianllu” nircami (Sal. 86:8).