1. Abrahanmanga Jehová Diosca ¿imatata intindichirca?

 CUNANGA Jehová, Abrahanman ima nishcata ricupashun. Jehová Diosca angelta utilizashpami Abrahanmanga Sodoma y Gomorra llactata tucuchinata villarca. Abrahán runagu Jehová Diospi tucui shunguhuan confiashpapash imamanda chaita decidishcata na fácil intindi ushaimandami Jehová Diostaca: ‘¿Ciertopachachu alita ruraj gentecunataca nali gentecunahuan igual tucuchigringui? […] cai mundo enteropa Juezmi capangui. Shinaca ¿nacha alitaca rurapanguiman?’ nishpami tapurca. Shina tapujpimi Jehová Diosca alita ruraj gentecunata nunca na tucuchina cashcata Abrahanmanga pacienciahuan aliguman intindichirca. Jehová Dios shina cashcata yachaimandami tranquilo sintiripanchi (Gén. 18:​23, 33).

2. Jehová Diosca ¿imata ricushpata juzganga?

² Jehová Diosca justo y llaquij cashcata ricuchishpami gentecunataca juzganga. Chaitaca gentecunapa “shunguta ricuimandami” shina ruran (1 Sam 16:7). Jehová Diosca ‘tucuilla runacunapaj shungutaca ali alimi rijsin’ (1 Rey. 8:39; 1 Crón. 28:9). Jehová Dios ashtaca ali yachaita charimandami pai imashina juzgan cashcataca na fácil intindi ushapanchi. Chaimandallatami apóstol Pabloca Jehová Dios: “Imashina juzgajtaca pipash na cabalta intindi ushanllu” nircami (Rom. 11:33).

3, 4. ¿Imatata talvez pensaripanchiman? Cai temapica ¿imatata yachajupashun? (Juan 5:​28, 29).

³ Huaquinbica Abrahán runagushnallatami pensarita ushapanchi. Por ejemplo: “¿Sodoma y Gomorra llactapi huaquin tucuchi tucushca gentecuna causaringacha? Cai gentecunaca ¿‘nalita’ rurajcunapurapichu causaringa?” nishpami pensarita ushapanchiman (Hech. 24:15).

⁴ Cunanga huañushca gentecuna causachi tucunamandami  yachajupashun. ‘Para siempre causangapaj causarijcunata’ y ‘juzgai tucungapaj causarijcunahuan’ ima pasanataca mushuj entendimientocunatami yachajupashcanchi (Juan 5:​28, 29​ta liipangui). a Cutin cai temapi y cati temapipashmi mushuj entendimientocunata ashtahuan yachajupashun. Shinallata Jehová Dios gentecunata imashina juzgajtaca ¿imatata intindina capanchi? Cutin imata ña intindishcatapashmi ricupashun.

¿IMATATA INTINDINA CAPANCHI?

5. Pundaca Sodoma y Gomorra llactapi huañushca gentecunamandaca ¿imatata intindiparcanchi?

⁵ Jehová Diosca Sodoma y Gomorra llactapi nalita ruraj gentecunatami tucuchirca. Cashna nalita ruraj gentecunahuanga ¿imashi pasanga? Pundaca cashna nalita ruraj gentecunaca ñana causaringachu nishpami intindiparcanchi. Pero ‘aliguta cazushpa, aliguta pensarishpa sirvij esclavoca’ cai temamanda ali ali estudiashpa y Jehová Diosta cutin cutin mañashpami nali gentecunaca na causaringachu nishpa aseguraita na ushashcata cuenda japirca. Imamanda chaita na asegurai ushashcata ricupashun.

6. Bibliapi nishcashnaca Jehová Diosca ¿picunatata tucuchirca? Shinallata ¿imatata na aseguraita ushapanchi?

⁶ Bibliapica nalita rurajcunata Jehová Dios imashina tucuchishcatami parlan. Por ejemplo, Ninan Manllanai Tamiapica Jehová Diosca tucui nalita ruraj gentecunatami tucuchirca. Chai punllamandaca Noé y paipa familiallami salvarirca. Jipamanga Jehová Diosca israelitacunaman carasha nishca alpagupi causanajuj siete pueblocunata tucuchichunmi israelitacunataca mandarca. Cutin shuj viajeca 185 mil asirio soldadocunata shuj tutapilla huañuchichunmi shuj angelta cacharca (Gén. 7:23; Deut. 7:​1-3; Is. 37:​36, 37). Bibliapi Jehová Dios nali gentecunata tucuchishcata parlashpaca cai gentecuna nunca más na causaringachu nishpaca na aseguranllu. Caimanda ashtahuan yachajushpa catipashun.

7. Ninan Manllanai Tamiapi y Canaán llactapi huañushca nali gentecunamandaca ¿imatata na yachapanchi? (Fototapash ricupangui).

⁷ Chai gentecunata Jehová Dios imashina ricun cashcataca na yachapanchichu. Shinallata Jehová Diosta rijsishpa arripintirina oportunidadta charishcatapash na yachapanchichu. Ninan Manllanai Tamia Punllamanda parlashpaca, Bibliapica Noé runaguca “ima ali cajta predicaj” runagumi carca ninmi (2 Ped. 2:5). Pero Bibliapica arcata rurashpandi tucui tucui gentecunaman predicajushcataca na parlanllu. Shinallata Canaán llactapi nalita ruraj gentecuna Jehová Diosta rijsishpa, cambiocunata rurana oportunidadta charishcatapash na yachapanchichu.

8. Sodoma y Gomorra gentecunamandaca ¿imatata na nita ushapanchi?

⁸ Sodoma y Gomorra llactapi nalita ruraj gentecunapa chaupipica Lot runagumi causarca. Paica chai tucui nali gentecunaman, predicashcataca na yachapanchichu. Pero cai gentecunaca ¿ima ali cajta, ima nali cajtaca cuenda japinllu carca? Na. Porque Sodoma llactamanda gentecuna ‘ashtahuan jovenmanda callarishpa ashtahuan mayor gentecunacamanmi’, Lot runagupa invitadocunataca violangapaj munarca (Gén. 19:4; 2 Ped. 2:7). ¿Jehová Dios llaquij Dios cashpapash chai nalita ruraj gentecunata causachinata decidingacha? Sodoma y Gomorra llactamanda gentecunamanda parlashpaca Jehová Diosca Abrahán runagumanga alita ruraj 10 gentecunallapash na tianllu nircami (Gén. 18:32). Nalita rurashpalla causaj gentecuna cashcamandami Jehová Diosca justo Dios cashcata ricuchishpa cai gentecunata tucuchirca. Shina cashpapash cai gentecuna nunca na causarina cashcataca na aseguraita ushapanchichu.

9. Rey Salomonmandaca ¿imatata na yachapanchi?

 ⁹ Bibliapica alita rurashpa causan cashpata, nalita rurashpa causai callarishca gentecunamandami parlan. Por ejemplo, rey Salomonga Jehová Diostaca ali alimi rijsin carca. Imasha paita adoranatapash ali alimi yachan carca. Shinallata ashtaca bendiciongunatapashmi chasquirca. Pero tiempohuanga yanga dioscunatami adorai callarirca. Chaimandami Jehová Diosca ninanda culirarca. Salomón runapa culpamandami ashtaca huatacunata israelitacunaca llaquicunata charirca. Bibliapica Salomondaca ‘paipaj ñaupa taita’ Davidta pambashca pushtupimi pambarca nijunmi (1 Rey. 11:​5-9, 43; 2 Rey. 23:13). ¿Salomonda paipa ñaupa taitacunahuan pambai tucushca cashcamandalla causaringami nita ushapanchichu? Bibliapica chaitaca na imatapash ninllu. Romanos 6:7​pica: “Pipash huañushpaca, ñami paipa pecadocunamandaca libre quidan” ninmi. Chaimandami huaquingunaca talvez Salomón runaca cutin causaringami nishpa pensaita ushanga. Pero cai textopica huañuimandalla tucuicuna causarina derechota charishcataca na nijunllu. Jehová Diosca gentecunata juyaimanda y paita para siempre sirvishpa causachun munaimandami huañushca gentecunata causachingapaj munan. Chaica shuj valishca regaloshnami can (Job 14:​13, 14; Juan 6:44). Jehová Diosca ¿Salomón runagutaca causachingacha? Chaitaca Jehová Diosllami yachan. Imata cashpapash justo cashcata ricuchishpa Jehová Dios ruranataca alimi yachapanchi.

IMATA ÑA INTINDIPASHCANCHI

10. Nali gentecunata tucuchijushpaca Jehová Diosca ¿imashinata sintirin? (Ezequiel 33:11) (Fototapash ricupangui).

¹⁰ (Ezequiel 33:11​ta liipangui). Bibliapica Jehová Dios gentecunata juzgajushpa imashina sintirishcatami ricuchin. Jehová Dios ayudajpimi apóstol Pedroca: “Jehová Diosca” […] ‘shujllapash na tucuchi tucuchun munanllu’ nishpa escribirca (2 Ped. 3:9). Cai shimicunaca Profeta Ezequiel escribishcacunahuanga parecidomi can. Jehová Diosca na yangamanda gentecunataca para siempre tucuchinllu. Chaita yachanami tranquilo ali sintirichun ayudan. Jehová Dios llaquij Dios cashcataca siempremi ricuchishca.

11. ¿Picunata na causaringa? ¿Imamandata chaitaca yachapanchi?

¹¹ Bibliapi parlashca huaquin gentecuna na causarinataca alimi yachapanchi. b Por ejemplo, Jesusca Judas Iscarioteca na causaringachu nircami (Mar. 14:21; Juan 17:12​pa español Bibliapi nota de estudiota ricupangui). Judasca Jesusta traicionashpaca Jehová Diospapash contra tucushcata ali alimi yacharca (Marcos 3:29​pa nota de estudiota ricupangui). Shinallata Jesusca chai tiempopi religionda ñaupaman pushajcuna paipa contra tucushpa shayarishcamandaca causarina oportunidadtaca na charinllu nircami (Mat. 23:33; Juan 19:11​pa español Bibliapi “del hombre” nishca nota de estudiota ricupangui). Shinallata apóstol Pablopashmi, apóstata gentecuna na arripintirishpaca na causaringachu nishpami advertirca (Heb. 6:​4-8; 10:29).

12. Jehová Dios llaquij Dios cashcataca ¿imashinata yachapanchi? Huaquin ejemplocunamanda parlapai.

¹² Jehová Diosca llaquij Diosmi cashcataca ¿imashinata yachapanchi? Paica ‘shujllatapash na tucuchingapaj’ munanllu. Jehová Diosca jatun juchata rurashca gentecunataca ¿imashinata llaquishcata ricuchirca? Rey Davidca huainayana juchapi urmarca y shuj personatapashmi huañuchirca. Shinapash chai jatun juchacunamanda tucui shungu arripintirijpimi Jehová Diosca paita llaquishpa perdonarca (2 Sam 12:​1-13). Rey Manasespashmi jatun juchacunata rurarca. Chashna jatun juchacunata  rurashca cajpipashmi rey Manasés tucui shungu arripintirijpica Jehová Diosca llaquishpa perdonarca (2 Crón. 33:​9-16). Cai ejemplocunaca ciertopacha tucui shungu arripintirishcata ricuchijpi Jehová Dios perdonaj cashcatami ricuchin. Por ejemplo, David y Manasesca nalita rurashcata cuenda japishpami tucui shungu arripintirirca. Chaimandami paicunaca causachi tucunga.

13. a) Ninivemanda gentecunataca Jehová Diosca ¿imashinata tratarca? b) Y chai gentecunamandaca Jesusca ¿imatata nirca?

¹³ Nínive llactapi causaj gentecunata Jehová Dios llaquishpa tratashcatapashmi yachapanchi. Jehová Diosca Jonasmanga Nínive llactapi causaj gentecunaca “nalita ruranajujtami ricushcani” nircami. Pero cai llactamanda gentecuna ciertopacha arripintirijpimi Jehová Diosca paicunata llaquishpa perdonarca. Cai llactamanda gentecunata Jehová Dios llaquichisha nishcashna na llaquichijpica profeta Jonasca ninandami culirarca. Chaimandami Jehová Diosca cai llactamanda gentecuna “ima ali cajta ima nali cajtapash na yachanllu” nishpami Jonastaca intindichirca (Jon. 1:​1, 2; 3:10; 4:​9-11). Jipamanga Jehová Dios llaquij y justo Dios cashcata ricuchingapami Jesusca Nínive llactapi gentecuna tucui shungu arripintirijpi Jehová Dios imashina perdonashcata parlarca. Shinallata “Juicio Punllapica” cai llactamanda gentecunaca causaringami nircami (Mat. 12:41).

14. ‘Juzgai tucungapaj causarina’ punllapica ninivitacunahuanga ¿imashi pasanga?

¹⁴ ¿Maijan “Juicio” punllapishi Nínive llactamanda gentecunaca causaringa? Jesusca huaquin gentecunaca “juzgai tucungapami causaringa” nishpami parlarca (Juan 5:29). Shinapash cai juicioca ¿ima horashi canga? Cai juicio punllaca Jesús mil huatacunata mandajujpimi pactaringa. Chai tiempopimi ‘alita rurajcunata, nalita rurajcunatapash Taita Diosca causachinga’ (Hech. 24:15). ¿Imamandata nalita rurajcunaca ‘juzgai tucungapaj causaringa’? Jehová y Jesusca chai gentecuna Bibliamanda yachajushcata pactachinajujta o na pactachinajujtaca ali alimi ricunajunga, chaimanda juzgai tucungapami causaringa. Shuj ninivita causarishpapash Jehová Diosta adorangapaj na munashpa catijpica Jehová Diosca paitaca tucuchitapachami tucuchinata decidinga (Is. 65:20). Pero Jehová Diosta na saquishpa paitalla adoranata decidijpica Jehová  Diosca para siempre causana oportunidadtami cunga (Dan. 12:2).

15. a) ¿Imamandata Sodoma y Gomorramanda gentecunaca talvez causaringa? b) Judas 7​pi nishcacunaca ¿ima significadotata charin? (“ Judasca ¿imatata ningapaj munarca?” nishca recuadrota ricupangui).

¹⁵ Jesusca paita na cazushpa y paipa yachachishcacunata na cazujcunaca “Juicio Punllapica Sodoma y Gomorra shuti llactacunatapash yalimi” llaquichi tucunga nircami (Mat. 10:​14, 15; 11:​23, 24; Luc. 10:12). Jesús cashna nishpaca yapata exajerashpa nijushcashnallami uyarita ushan. Pero ciertopacha pasana cashcamandami shina nijurca. Imashinami ricupanchi Jesusca Sodoma y Gomorra llactamanda parlashpaca shuj ‘Juicio Punllamandapashmi’ parlarca. Y cai Juicio punllaca Nínive llactapa Juicio punllallatami can. Nínive, Sodoma y Gomorra llactamanda gentecunaca ashtaca nali cosascunatami rurashpa causan carca. Pero Nínive llactapi causaj gentecunaca arripintirina oportunidadtami charirca. Ashtahuanbash Jesusca “nalita rurashcacunaca juzgai tucungapami causaringa” nircami (Juan 5:29). Chaimandami Sodoma y Gomorra llactamanda huañushca gentecunapash causarina oportunidadta talvez charinga. Causarijpica Jehová Diosta y Jesusta rijsichun ayudana oportunidadta charipashun.

16. Pitapash causachigrijushpaca Jehová Diosca ¿imatata yaipi charin? (Jeremías 17:10).

¹⁶ (Jeremías 17:10​ta liipangui). Cai textopica Jehová Dios imashina juzgan cashcatami ricuchin. Chaipica Jehová Diosca tucuicunapa ‘shunguta’ y “yuyaitapash” ali alimi rijsin ninmi. Jehová Dios picunatalla causachinata decidishpaca ‘imashna causashcata, imatalla rurashcata’ ricushpami juzganga. Jehová Dios justo, llaquij Dios cashcata ricuchishpami juzganga. Shinaca Bibliapi na imatapash nijujpita cai o chai personaca nunca na causachi tucungachu nishpaca na nijunachu capanchi.

‘MUNDO ENTEROPA JUEZCA SIEMPRE ALITA RURAPANGA’

17. Huañushca gentecunahuanga ¿imashi pasanga?

¹⁷ Adán y Eva Diablopa lado tucushcamandaca ashtaca ashtaca gentecunami huañushca. Ñucanchipa ‘contra huañuica’ ashtaca ashtaca gentecunapa causaitami tucuchishca (1 Cor. 15:26). Cai tucui huañushca gentecunahuanga ¿imashi pasanga? Por ejemplo, 144 mil cristianocunaca jahua cieloman ringapaj causarishpami nunca na huañushpa causana oportunidadta  charinga (Apoc. 14:1). Ashtaca ashtaca Jehová Diosta tucui shungu sirvijcunaca ‘alita rurajcunata causachina’ horaspimi causachi tucunga. Paicuna Jesús mil huatacuna tucuringacaman Jehová Diosta na saquishpa cazushpa y último pruebatapash mishashpaca para siempre cai alpapi causana oportunidadtami charipanga (Dan. 12:13; Heb. 12:1). Chai mil huatacunapimi Jehová Diosta nunca na sirvishcacuna o ‘nalita rurashcacunapash’ cambiocunata rurashpa Jehová Diosta adorana oportunidadta charipanga (Luc. 23:​42, 43). Shinapash huaquin gentecunaca nalipacha nali gentecunami carca. Shinallata Jehová Diospa contra shayarishcacunami carca. Paicunataca Jehová Diosca na causachinatami decidishca (Luc. 12:​4, 5).

18, 19. a) ¿Imamandata Jehovapa decisiongunapica confiaita ushapanchi? (Isaías 55:​8, 9). b) Cati temapica ¿imatata yachajupashun?

¹⁸ ¿Gentecunata Jehová Dios juzgajushpaca justo Dios cashcata ricuchishpa siempre juzgan cashcataca segurochu capanchi? Ari, Abrahán runagushnallatami “cai mundo enteropa Juez” Jehová Diosca perfecto, llaquij y ashtaca ali yachaita charishcata seguro capanchi. Jehová Diosca gentecunata juzgana responsabilidadtaca Jesusmanmi curca. Y cai responsabilidadta imashina pactachina cashcatapashmi yachachirca (Juan 5:22). Jehová y Jesuspashmi gentecunapa shungu imashinapacha cashcata yachaita ushan (Mat. 9:4). Shinaca gentecunata juzganajushpaca justo cashcata ricuchishpami juzganga.

¹⁹ Jehová Dios ali decisiongunata agllanata yachajpimi tucui shungu confiana capanchi. Porque Jehová Diosca siempremi ali juzganata yachan (Isaías 55:​8, 9​ta liipangui). Jehová y Jesús justo cashcata ricuchishpa juzgan cashcamandami paicunapica tucui shungu confiapanchi. Shinallata Jesusca, Jehová Diospa ejemplota catishpa justo, llaquij cashcatami ricuchin (Is. 11:​3, 4). Cati temapica Ninan Manllanai Llaqui Tiempopi Jehová y Jesús imashinapacha gentecunata juzgana cashcatami yachajupashun.