1, 2. a) Jehová Diosca paita sirvijcunamanga ¿imatata carasha nishca? b) Jehová Dios carasha nishcata japingapaca ¿imata ayudanga? (Callari dibujota ricupangui).

APÓSTOL Pablo, shuj ungidocunapash ‘jahua pachapi aliguta carajpi japigrinatami’ charin (Filip. 3:14). Paicunaca Diospa Reinopi Jesushuan mandashpa gentecuna jucha illaj tucuchunmi ayudangapaj munan (Apoc. 20:6). Jehová Diosca alipacha esperanzatami paicunamanga carashca. Cutin shuj llamagucuna nishcacunaca cai alpapi para siempre causanatami tucui shunguhuan cushijushca shuyanajun (2 Ped. 3:13).

² Ungido huauquicuna Jehovatalla sirvishpa, Jehová carasha nishcata japichunmi apóstol Pabloca paicunataca cashna nirca: “Jahua pachapi tiajtalla yarishpa causana canguichi” nishpa (Col. 3:2). Ungido huauquicunaca jahua cielopi causagrinataca yariami causana carca (Col. 1:4, 5). Shinaca cielopi causana esperanzata charishpa o cai alpapi causana esperanzata charishpapash, tucuicunallatami Jehová Dios carasha nishca bendiciongunapi yaria causana capanchi (1 Cor. 9:24).

3. Apóstol Pabloca ¿ima jarcaicunamandallata parlarca?

 ³ Jehová carasha nishcata ungidocuna japichunmi apóstol Pabloca shuj shuj jarcaicunamanda cuidarichun animarca. Chaimandami Colosas llactapi congregacionman escribishpa cashna cacharca. Jesusta catinchi nij tucushcacunaca Moisesman cushca Leyta pactachishpami Diospa ñaupajpi ali ricuringapaj munanajurca. Shinapash paicunaca Jesuspi fetaca na charircachu nirca (Col. 2:16-18). Shinallata nali munaicunamanda, congregacionbi pihuanbash problemacunata charinamanda, familia ucupi imapash llaquicuna tianamandapashmi parlarca. Shina jarcaicunaca cunanbipashmi tian. Chaimandami apóstol Pablo parlashca consejocunaca ñucanchitapash ayudan. Cunanga apóstol Pablo Colosas llactapi congregacionman parlashca huaquin jarcaicunamanda yachajupashunchi.

4. Nali munaicuna mishachunga ¿imamandata na saquina capanchi?

⁴ Chai huauquicunaman Jehová Dios carasha nishcata yarichishca jipaca apóstol Pabloca cashnami escribirca: “Cai pachapajta rurachun yarichijuj munaicunataca, tucuitami huañuchinshna saquina canguichi: Huainayanata, Diospaj ñaupajpi mapayanata, nalita rurana yuyaicunata, nali munaicunata, charijyanataca na munanachu canguichi” nishpa (Col. 3:5). Shuj jarihuan shuj huarmihuan cana munaicunaca Jehovamanda, Jehová carasha nishcamandapashmi caruyachi ushan. Por ejemplo nali munaicuna mishajpimi shuj huauquica shuj huarmihuan faltapi urmarca. Tiempo yalijpi congregacionman tigrashpami paica cashna nirca, nali munaicuna mishajpimi na jarcari usharcani. Jipamanrami jatun nalita rurashcata cuenta japircani nishpa.

5. Imapash juchacunapi ama urmangapaca ¿imata rurana capanchi?

⁵ Imapash nali munaicuna mishachun saquishpaca Jehovapa mandashcacunata cazuitaca na ushashunllu. Chaimandami imapash nali munaicunamandaca cuidarina capanchi. Por ejemplo, callarimandapachami shuj jari shuj huarmi cazarangapaj puri callarijushpaca, ugllarinamanda, mucharinamanda, pipash na cumbajpi ishcandilla canamandapash parlarina can (Prov. 22:3). Cazarashca o solterocuna cashpapash Jehovata sirvijcunaca trabajopi o negociocunahuan maimanbash rishpaca shuj jarihuan o shuj huarmihuan canamandaca cuidarinami can (Prov. 2:10-12, 16). Nali munaicuna ama mishachunga uchallami testigo de Jehovami cani nina capanchi. Shinallata, shuj jarihuan o shuj huarmihuan yapata asirijushpaca ima llaquicunata japinatami yarina capanchi. Ashtahuangarin huacashpa llaqui llaqui, solalla, sololla sintirijushpami ashtahuan cuidadota charina capanchi. Shina caimandami pipash ñucanchimanda preocuparichun, juyaita ricuchichun munaringa. Chaimi pipash ali tratajpica na Testigo cajpipash paicunahuan ashtahuan cangapaj munashun. Chai munaicunamanda jarcaringapaca Jehovatami ayudahuai nishpa mañana capanchi. Shinallata huauquipanicunatapashmi ayudahuai nina capanchi. Shina rurashpami Jehová Dios carasha nishcatapash japi ushapashun (Salmo 34:18; Proverbios 13:20, liingui).

6. Nali peliculacunata, musicacunata, videocunata ricugrijushpaca ¿imatata yarina capanchi?

⁶ Nali munaicunamanda caruyangapaca nali musicacunata, videocunata, peliculacunatapash na ricunachu capanchi. Cunanbi peliculacuna, musicacuna, videocunapash Sodoma y Gomorra llactacuna imashina cashcatami yarichin (Jud. 7). Chaicunata llujchij gentecunaca shuj jarihuan o shuj huarmihuan canaca normalmi  can, ima llaquitapash na charishunllu nishpa yuyachunmi munan. Chaimandami ñucanchicunaca chai videocunata, musicacunata, peliculacunata alicachishpaca na ricujunachu capanchi. Imapash nalicunata ricushpa, nalicunata uyashpaca Jehová Dios carasha nishcataca na japi ushashunllu (Prov. 4:23).

7. ¿Ima problemacunata huauquipanicunahuanga tiai ushan?

⁷ Jehová Diospa congregacionbi canaca shuj jatun bendicionmi can. Tandanajuicunapi Diospa Shimita yachajuna, huauquipanicunahuan juyaita ricuchina, llaquishpa randimanda ayudarinami Jehová carasha nishcata japinapi yaria causachun ayudanga. Shinapash huaquinbica imatapash na ali uyaimanda, na ali intindimandami huauquipanicunahuanga problemacunata chari ushanchi. Chai problemacunata na uchalla arreglashpaca huauquipanicunahuanmi risintiri ushanchi (1 Pedro 3:8, 9, liingui).

8, 9. a) Jehová Dios carasha nishcata japingapaca ¿ima cualidadcunatata charina capanchi? b) Shuj huauqui o shuj pani imatapash nishpa o rurashpa nali sintichijpica ¿imatata rurana capanchi?

⁸ Risintirishca cashpaca Jehová Dios carasha nishcatapash na japi ushashunllu. Chaimi apóstol Pabloca Colosas llactapi congregacionmanga cashna nirca: “Taita Diospa agllashcacuna, juyashcacuna cashcamandami, shujcunata tucui shunguhuan llaquingapaj, paicunahuan ali cangapaj, humilde cangapaj, llambu shungu cangapaj, pacienciata charingapaj mushujta churajunata churajunshna churajuna capanguichi. Caishujmanda chaishujmanda aguantarishpa, llaquichirishca cashpapash randimandami perdonarina capanguichi. Imashinami Jehová Dios cangunata perdonarca, shinallatami cangunapurapash perdonarina capanguichi. Ashtahuanbachaca juyaita charinatami mushuj churajunata churajunshna churajuna capanguichi. Juyaita charinami shujllashna alipacha causachun ayudan” nishpa (Col. 3:12-14, NM).

⁹ Huauquipanicunata llaquina, juyanami perdonarishpa causachunga ayudanga. Por ejemplo, shuj huauqui o shuj pani imatapash nishpa o rurashpa ñucanchita nali sintichijpica, ñucanchicunapash shuj huauquita o shuj panita nali sintichishcatami yarina capanchi. Chaita yarinami ñucanchita llaquishpa perdonashca huauquita o panita agradicichun ayudanga (Eclesiastés 7:21, 22, liingui). Ashtahuanbachaca Jehovata ali sirvichun shujllashna tandachishcamandami Jesustaca ninanda agradicipanchi (Col. 3:15). Tucui Testigocunallatami Jehovata adoranchi, chaitallata villachinchi, chai llaquicunatallata huaquinbicarin charinchi. Ñucanchi huauquipanicunata llaquishpa juyaimandami perdonarishpa causanchi. Shinami huauquipanicuna shujllashna tandanajushca cachun, Jehová carasha nishcata japichunbash yaria causachun ayudanchi.

10, 11. a) Envidiashpa ricujunaca ¿imamandata na ali can? b) Envidiashpa ricujuimanda Jehová Dios carasha nishcataca ¿japi ushashunllu?

¹⁰ Pitapash envidiashpa ricujushpaca Jehová carasha nishcataca na japi ushashunllu. Bibliapica envidiana nali cashcata ricuchunmi huaquin ejemplocunamanda parlan. Por ejemplo, Cainga envidiashpa ricujuimandami paipa huauqui Abeltaca huañuchirca. Shinallata Coré, Datán, Abiram runacunapashmi Moisesta envidiashpa paipa contra tucurca. Ashtahuanbash rey Saulca David tucuita alipacha rurajujta ricushpami huañuchingapaj munarca. Chaimi Bibliapica cashna nin: ‘Ninandapacha fiñanajushpa, imatapash paipajlla ali cachun ruranajushpa, jatun nalita ruranapashmi tian’ nishpa (Sant. 3:16).

 ¹¹ Shungumanda juyashpa, llaquishpaca pitapash na envidiashpa ricushunllu. Bibliapica ninmi: ‘Juyaita charishpaca llaquita apanllami, shujcuna imata charijtapash ñucapa cashcanman yashpaca na ricunllu’ nishpa (1 Cor. 13:4). Envidiana munai ñucanchi shungupi ama mirachunga, Jehová Dios pensashcashnami ñucanchipash pensangapaj esforzarina capanchi. Shinallata tucui huauquipanicunahuan congregacionbi shujllashna cashcatami ali intindina capanchi. Chaita intindinami shujcuna imashina sintirishcatapash intindichun ayudanga. Bibliapica ninmi: “Shinallata shuj alicachi tucujpica, tucuillami paihuan cushijun” nishpa (1 Cor. 12:16-18, 26). Shujcuna privilegiocunata chasquijpica na envidiashpa ricujunachu capanchi. Rey Saulpa churi Jonatanda yaripashunchi. Jonatanba randi Davidta rey cachun Jehová Dios agllajpipash, Jonatanga Davidtaca na envidiarcachu. Envidianapa randica, Jonatanga Davidta juyaihuan llaquishpa animashpa catirca (1 Sam. 23:16-18). ¿Jonatanba ejemplota cati ushapanchichu?

12. Jehová carasha nishcata familiacuna japichunga ¿imata ayudanga?

¹² Bibliapa consejocunata ñucanchi causaipi pactachinaca, familia ucupi cushilla ali causachun, Jehová carasha nishcata japichunbashmi ayudanga. Apóstol Pabloca ¿ima consejocunatallata Colosenses libropica familiacunaman curca? Paica nircami: ‘Huarmicuna, cangunapa cusataca, Jesusta crij cashcamandami aliguta cazuna canguichi. Cusacunapash, cangunapa huarmitaca juyanami canguichi. Paicunahuanga, na millaicuna canachu canguichi. Huahuacunapash, taitamama mandashcata tucuipi cazuichi. Shina cazuchunmi Jesuspash munan. Taitamamacunapash, cangunapa huahuacunataca na yapata llaquichishpa fiñachinachu canguichi’ nishpa (Col. 3:18-21). Chai consejocunaca cunanbipashmi cusacunata, huarmicunata, huahuacunatapash ninanda ayudan.

13. Shuj paniguca paipa cusa na Testigotaca ¿imashinata Jehovata sirvichun ayudai ushan?

 ¹³ Caipi pensaripashunchi. Na Testigo cusata charij paniguca pensanbashchari, ñuca cusaca nalimi tratahuan nishpa. Shinaca paipa cusata cutin cutin alimi tratana cahuangui nijunaca ¿alichu canman? Huarmi nijujpilla paipa munaita cusa rurashpapash ¿Jehová Diosta sirvina munaita charichun ayudangacha? Na ayudai ushangachu. Shinapash paipa cusa familiata mandana derechota charishcamandami cusataca respetohuan tratangapaj munanga. Cusata respetashpa tratajpimi familia ucupi casilla ali causachun ayudashpa, Jehová Diostapash alabaita ushanga. Ashtahuanbash paipa cusa Jehovata sirvichunbashmi ayudaita ushanga. Shina rurashpaca ishcandillatami Jehová Dios carasha nishcata japinga (1 Pedro 3:1, 2, liingui).

14. Shuj huauquita paipa huarmi na respetajpica ¿imatata na rurana can?

¹⁴ Na Testigo huarmita charij shuj huauquipi pensaripashunchi. Chai huauquica pensarinmi ñuca huarmica ñucataca na respetahuanllu nishpa. Huasipi pi mandaj cashcata huarmi intindichunga ¿ani ani rimanachu minishtirin? Shina rimanaca na minishtirinllu. Jehová Diosca munanmi cusacuna Jesuspa ejemplota catishpa juyaihuan paipa huarmicunata tratachun (Efes. 5:23). Jesusca congregaciongunataca juyaihuan, pacienciahuanmi ricuriajun (Luc. 9:46-48). Cusa Jesuspa ejemplota catijpica, paipa huarmigupash tiempohuanga Jehovata sirvingapaj munangapashchari.

15. Jehovata sirvij cusaca ¿imashinata paipa huarmiguta juyashcata ricuchi ushan?

¹⁵ Cusacunataca Bibliapica cashnami mandan: ‘Cusacunapash, cangunapa huarmitaca juyanami canguichi. Paicunahuanga, na millaicuna canachu canguichi’ nishpa (Col. 3:19). Jehovata sirvij cusaca, paipa huarmiguta juyashpa ima nishcata ali uyashpami, alicachishcata ricuchin (1 Ped. 3:7). Paipa huarmigu ima nishcata na tucuita rurashpapash, paipa huarmiguta tapunami ali decisiongunata japichun cusataca ayudanga (Prov. 15:22). Cusacunaca paipa  huarmi paita respetachunga na obliganachu can. Chaipa randica cusa juyaihuan tratajpica paipa huarmica paipa munaimi cusataca respetanga. Jehovata sirvij cusa paipa huarmiguta, paipa huahuacunata juyashcata ricuchijpica, paicunapash cushijushpa Jehovata sirvishpami Jehová carasha nishcatapash japi ushanga.

16, 17. Jovenguna cangunapa taitamamacuna tacurijpica ¿imatata rurana canguichi?

¹⁶ Testigo familiapi viñashca joven cashpaca tal vez pensanguipashchari ñuca taitamamacunaca ñucataca na intindihuanllu, imata rurachunbash na saquihuanllu nishpa. Shina pensaimandami Jehovata sirvishpa causanaca nalishnalla ricuringa. Jehovata sirvinata saquishparami cuenta urmangui, congregacionbi huauquipanicuna, canba taitamamacunapash ashtahuan canda juyashcata.

¹⁷ Taitamamacuna huahuacunata disciplinanaca minishtirinmi. Quiquin nalita rurajpi taitamamacuna nimata na nijpica ¿juyaimandami na imatapash nihuan yanguimanllu? (Heb. 12:8). Paicuna imashina tacurijujta ricushpami na alicachishpa ricungui. Taitacunata nalicachijunapa randica, imamanda paicunata culirachishcata cuenta japingui. Chaipaca tranquilo, aliman imagutapash tigrachingapaj esforzarina cangui. Bibliapica ninmi, alipacha yachajushca, ali yuyaita charijca na ñapash culiranllu nishpa (Prov. 17:27). Pipash consejajpi aliman, na culirashpa, ali yuyashpa imatapash rurangapaj esforzaringui. Chaimi imata consejajpipash aliguman uyashpa, canllata ali sintiringui (Prov. 1:8). Jehovata tucui shunguhuan sirvij juyaj taitamamacunata charinaca alipachami can. Paicunaca Jehová carasha nishcata canbash japichunmi ayudanga.

18. Jehová Dios carasha nishcata japingapaca ¿imatata rurana capangui?

¹⁸ Tucuicunallatami Jehová Dios carasha nishcataca japi ushapanchi. Huaquingunaca jahua cielopi causanata, shujcunaca paraíso alpapi causanata. Chaitaca Tucuita Ruraj Jehová Diosmi shina carasha nishca. Paica ninmi: Paraisopi causajcunaca ‘Diosta rijsina yuyaihuan jundami canga’ nishpa (Is. 11:9). Shinaca cai alpapi causajcunataca Jehová Diosmi yachachinga. Chaimi ñucanchicunaca Jehová carasha nishcata japingapaca ninanda esforzarina capanchi. Shinaca Jehová carasha nishcata japinataca ama cungapashunchichu. Chai japinataca yariami causana capanchi.