1983 huatapimi nacirircani. Huahuagu cashpaca sanogumi carcani. Shinapash ña 10 huatacunata charijpica cuerpo enteromi nanai callarihuarca. Ishcai huatacuna jipamanga na yashcapimi ñuca cuerpotaca ñana cuyuchi usharcanichu. Chaquicunata cuyuchingapaj munashpapash ñuca chaquigucunaca fuerza illajmi carca. Chai punllamandami ñana puri ushani. Shinallata shuj ungüita charishcamandaca ñana viñarcanichu. Chaimi ñucaca shuj uchilla huahuagushna quidarcani.

Huaquin quillacuna jipamanga ashtahuanmi irquiyarcani. Chaimi huasipi vicharishca causajurcani. Chaipimi ishcai Testigo señoracuna huasiman shamurca. Pipash huasiman shamujpica ñucaca na llujshinllu carcani. Shinapash chai viajeca chai Testigocunahuanmi parlarcani. Paraisomanda parlanajujpimi ñuca 5 huatacunata charijpi Jethro shuti misionero shamun cashcata yarircani. Chai misioneroca Surinam llactamandami shamun carca. Paica cada quillami ñuca taitata Bibliamanda yachachingapaj shamun caraca. Jethroca ali alimi tratahuan carca. Chaimi paihuanga ali ali llevarin carcani. Shinallata ñuca abuelitocunaca ñuca uchillagu cajpica Testigocunapa tandanajuicunamanmi apahuan carca. Chaimi ñucata visitaj Florence shuti señora Bibliamanda yachajungapaj munanguimanllu nijpica ari nircani.

Florence paniguca paipa cusa Justus shutihuanmi ñucata Bibliamanda yachachingapaj shamurca. Paicunaca ñuca liinata na ushajta ricushpami liinatapash yachachihuarca. Tiempohuanga liinata usharcanimi. Shuj punllaca Surinam llactaman villachingapaj cachajun nishpami villahuarca. Orealla comunidadpica pipash Bibliamanda yachachihuachunga na tiarcachu. Pero Jehová Diosca ñucataca na cungahuarcachu.

Chai jipallami Floyd shuti precursorca Orealla comunidadman shamurca. Shuj punllaca choza huasigucunapi villachijushpami ñucata visitahuarca. Shina visitashpami Bibliamanda yachajungapaj munanguichu nishpa tapuhuarca. Shina tapujpimi asitara asircani. Chaimi imamandata asingui nishpa tapuhuarca. Shina tapujpimi ñucaca ¿Qué exige Dios de nosotros? nishca folletotaca ñami yachajurcani. Cunanga El conocimiento que lleva a vida eterna * librotami yachajujuni nircani. Shinallata imamanda Bibliata yachajunatapash saquishcatami paimanga villarcani. Chaimi Floyd shuti precursorca Conocimiento nishca librohuanmi yachachihuarca. Pero jipamanga paitapashmi shuj ladoman villachichun cacharca. Chaimi cutin pipash Bibliamanda yachachihuachunga na tiarca.

 Huata 2004​pica Orealla comunidadmanga Granville y Joshua shuti precursor especialcunami villachingapaj shamurca. Paicunaca choza huasigucunapi villachinajushpami ñucata visitahuarca. Bibliamanda yachajungapaj munanguichu nijpimi cutin asitara asircani. Pero cai viajeca Conocimiento librohuan callarimanda yachachichunmi mañarcani. Caishuj precursorcuna cabalta yachachishcata yachangapaj munaimandami paicunahuan yachajungapaj munarcani. Granville shuti precursorca Orealla comunidadpi tandanajuicuna tiajtami villahuarca. Casi 10 huatacunatami huasimandaca na llujshishpa causajurcani. Shinapash Granville shuti precursorca huasimanda ñucata apangapami shamurca. Shinami silla de ruedaspi Tandanajui Huasiman pushahuarca.

Tiempohuanga Granville shuti precursorca Bibliamanda Yachachingapaj Escuelapi anotarichunmi animahuarca. Shinallata nihuarcami: “Ciertomi na purita ushangui. Pero parlaitaca ushanguimi. Shuj punllaca Bibliamanda discursota cunguimi” nihuarca. Chai shimicunata uyashpaca ninandami animarircani.

Jipamanga chai precursorhuanmi villachingapaj llujshircani. Shinapash ñuca causajuj comunidadpica ñangunapash nalipacha cajpimi silla de ruedaspica na rita ushan carcani. Chaimi huauqui Granvilletaca mejor shuj carretillapi apahuai nishpa mañarcani. Abril de 2005 huatapimi bautizarircani. Jipamanga publicaciongunapi, sonidopipash ayudachunmi huauqui ancianocunaca mañahuarca.

2007 huatapica shuj llaquitami charircani. Chai huatapica mar yacuta shuj lanchapi rijushpa shuj accidenteta charishpami ñuca taitaca huañuparca. Ñuca familiaca llaquillapachami carca. Chaimi huauqui Granvilleca Jehová Diosta ñucanchihuan mañashpa, Bibliamanda huaquin textocunata liishpami ñucanchitaca consolachirca. Shinapash ishcai huatacuna jipamanga paipashmi shinallata huañurca.

Ñucanchi congregacionga ancianocuna illajmi quedarca. Shuj siervo ministerialhuanllami quedarcanchi. Huauqui Granville huañujpica ñucaca ninandami llaquirircani. Paica ñucapaca shuj alipacha amigomi carca. Paimi ñucataca Jehová Diosta sirvishpa catichun, ñuca ima minishtishcatapash ricushpami ayudahuan carca. Pai huañushca jipaca Tandanajui huasipi Villajun revistata liina tucurcani. Shinapash ishcai parrafocunata liishpallami ninanda llaquinayajpi huacai callarircani. Chaimi liita ñana ushashpa mejor plataformamanda uriajurcani.

Shuj shuj huauquipanicuna Orealla congregacionda apoyangapaj shamujta ricushpaca ninandami cushijurcani. Shinallata Betelmandapashmi shuj precursor especialta cachamurca. Paica Kojo shuti huauquimi carca. Chai jipaca ñuca mama, ñuca huauqui Bibliamanda yachajushpa, bautizarijta ricushpaca ninandami cushijurcani. Marzo 2015 huatapica siervo ministerial cachunmi ñucataca nihuarca. Tiempohuanga Bibliamanda discursotapashmi primera vez curcani. Chaimi chai discursota cujushpaca huauqui Granville: “Shuj punllaca Bibliamanda discursota cunguimi” nishcata yarircani.

JW Broadcasting^® programa tiashcamandaca ninandami cushijupani. Chai programapi shuj huauquipanicunapash ñucashnalla llaquicunahuan cajta ricushpaca ninandami animarircani. Shina llaquicunahuan cashpapash chai huauquipanicunaca Jehovata sirvishpa, cushilla cajtami ricuparcani. Chaimi ñucapash imagutapash ruraita ushanimari yashpa, precursorado regularta japircani. Shinallata na yashcapimi septiembre 2019 huatapica congregacionbi anciano shina ayudachun nihuarca. Chaipica 40 publicadorcunami tian.

Huauquipanicuna ñucata Jehovamanda yachachishcamanda, Jehovata sirvichun yachachishcamandaca paicunataca ninandami agradicipani. Ashtahuanbachaca Jehová Dios ñucata na cungashcamandaca ninandami cushijupani.