¿CADA SEMANA Bibliata estudianaca quiquinbaca dificilchu can? ¿Bibliata estudianaca aburridochu ricuripan? Bibliata cada semana estudianaca ashtacacunapaca dificilmi ricurishca. Pero caipi pensarishunchi. Cada semana shuj shuj cosascunata rurangapaca tiempo y esfuerzomi minishtirin. Por ejemplo armangapaca tiempotami minishtinchi. Pero armashca jipaca limpio, alimi sintirinchi. Shina cuendami Bibliata estudiashpaca ‘yacuhuan armanshna’ ali sintirinchi (Efes. 5:26). Cai cati consejocunami cada semana Bibliata estudiachun ayudanga.

• Shuj horariota rurapangui. Tucui cristianocunami Bibliata estudiangapaca tiempota llujchina capanchi. Chaita ruranami “ashtahuan importante” can (Filip. 1:10). Chai horariota ama cungashpa catingapaca chai horariotaca shuj ricunalla pushtupimi saquita ushapangui. Por ejemplo refrigeradorapimi chai horariotaca pegashpa saquita ushapangui. Na cashpaca celularpimi shuj alarmata churaita ushapangui.

• Quiquinba ima mejor cashcata ricupangui. Huaquingunaca yapalla tiempota estudiashpapash alimi concentrarita ushan. Pero shujcunaca na ashta concentrari ushaimandami asha asha estudianata decidin. Shinaca quiquinba horariopi imashina estudianata escribipangui. Bibliata estudiana horas chayajpi pero na ashta estudiangapaj munajushpaca masqui 10 minutogutallapash estudiangapaj esforzaripangui. Asha tiempo cashpapash masqui ashaguta estudianami ali can. Shina rurashpaca talvezpashmi ashtahuan tiempota estudiangapaj munapangui (Filip. 2:13).

• Ima temacunata estudianata agllashcalla charipangui. Bibliata estudiana horaspipacha ima temacunata estudianata agllajushpaca ‘tiempotaca aliguta aprovechanajushcataca’ na ricuchishunllu (Efes. 5:16). Shinaca ima temacunata estudiangapaj munashcataca shuj listagupi anotapangui. Bibliamanda shuj tapuiguta charishpaca chai listagupi anotapangui. Shinallata ña estudiajushpa imagutapash ashtahuan intindingapaj munashpaca chai listagupi anotashpa saquipangui.

• Minishtirishca cambiocunata rurapangui. Minishtirijpica ima punlla, ima horas, mashna tiempota y imacunatalla estudianataca aliguta ricushpa cambianallami capanchi. Pero na cunganachu capanchi, cada semanami Bibliata estudiangapaj esforzarina capanchi.

Cada semana Bibliata estudiangapaj esforzarishpaca Jehová Diosmanmi ashtahuan quimirishun, ali decisiongunata japishun y alimi sintirishun (Jos. 1:8).