1. ¿Imamandata mayor huauquipanicunamandaca ashtacata yachajuita ushapanchi?

 TUCUICUNALLATAMI ñucanchi causaipi ali decidingapaca consejocunata minishtipanchi. Chaipaca huauqui ancianocuna y experienciata charij huauquipanicunapashmi ayudaita ushan. Paicuna mayor cashcamandalla chai consejocunaca na ayudangachu nishpaca na pensanachu capanchi. Jehová Diosca mayor huauquipanicunapa experienciamanda yachajuchunmi munan. Mayor huauquipanicunaca ñucanchimanda ashtahuan tiempota causaimandami ashtahuan experienciata charin. Paicunaca imagutapash ali intindinatami yachajushca y imagutapash ali yuyashpami ruran (Job 12:12).

2. Cai temapica ¿imatata ricugripanchi?

² Punda tiempopica Jehová Diosca paita sirvij mayor jaricunahuanmi paipa llactataca animarca y consejocunata curca. Por ejemplo Moisespi, Davidpi y apóstol Juanbi pensaripashunchi. Paicunaca diferente tiempocunapimi causarca y diferente causaitapashmi charirca. Paicunaca ña huañugrinajushpaca joven gentecunamanga alipacha consejocunatami cushpa saquirca. Moisespash, Davidpash y apóstol Juanbash Jehová Diosta cazuna importante cashcatami ricuchirca. Jehová Diosca chai jaricuna cushca consejocunataca Bibliapimi escribichishpa saquirca. Chai consejocunamandaca joven cashpa o mayor cashpapash tucuicunallatami beneficiarita ushapanchi (Rom. 15:4; 2 Tim. 3:16). Cai temapica chai quimsa jaricuna ña huañugrinajushpa imata nishcata y chai nishcacunamanda imata yachajui ushashcatami ricugripanchi.

‘UNAI CAUSAITAMI CHARINGUICHI’

3. Jehová Diosca ¿imacunatalla rurachunda Moisestaca utilizarca?

³ Moisesca paipa tucui causaipimi Jehová Diosta sirvirca. Moisesca profeta, juez y comandantemi carca. Shinallata israelitacunahuan  ima pasashcatapashmi escribirca. Moisesca ashtaca experienciatami charirca. Moisesca israelitacuna Egiptomanda llujshijpimi paicunataca dirigirca. Jehová Dios milagrocunata rurajtapashmi ricurca. Taita Diosca Moisestami Bibliapa primer 5 librocunata escribichirca. Shinallata Salmo 90 y talvez Salmo 91​tapashmi escribichishcanga. Job librotapashmi Moisesca escribishcanga.

4. ¿Moisesca picunatata animangapaj aprovecharca? ¿Imamandata shina rurarca?

⁴ Moisesca ña huañugrijushpa 120 huatacunata charishpami tucuilla israelitacunata tandachirca. Paicunataca ima cosascunata ricushcata, ima cosascuna pasashcata yarichingapami tandachirca. Huaquin israelitacunaca joven cashpaca Jehová Dios ima milagrocunata rurashcata y egipciocunata imashna llaquichishcatami ricushcarca (Éx. 7:​3, 4). Shinallata paicunaca mar Rojopa yacucuna pascarijpimi purishpa yalishcarca. Y faraonba soldadocunata Jehová Dios imashna vincishcatapashmi ricushcarca (Éx. 14:​29-31). Desiertopi cajpipash Jehová Dios paicunata imashna cuidajtami ricushcarca (Deut. 8:​3, 4). Jehová Dios carasha nishca alpacunaman israelitacuna ña yaicugrijujpimi Moisesca paicunata animangapaj aprovecharca. a

5. ¿Israelitacuna ima laya causaita chasquinatata Moisesca ricuchirca? (Deuteronomio 30:​19, 20).

⁵ Moisesca ¿imatata israelitacunamanga nirca? (Deuteronomio 30:​19, 20​ta liipangui). Israelitacunaca ali causaitami chasquigrinajurca. Jehová Dios bendiciajpimi paicunaca chai alpacunapica ashtaca tiempota causai ushagrinajurca. Chai alpacunaca juyaillami carca. Y tucuimi chaipica viñan carca. Moisesca chai alpacunamanda parlashpami cashna nirca: “Canguna na rurashca juyailla jatun pueblocunapimi causanguichi. Huasicunapash, canguna na jundachishca juyailla charishcacunahuan jundami. Yacuta tandachina jatun utujucunapash, na canguna allashcachu. Olivos quirucunapash, uvas yuracunapash, na canguna tarpushcachu” can nircami (Deut. 6:​10, 11).

6. Taita Diosca ¿imamandata shuj llactacuna israelitacunata vincichun saquirca?

⁶ Shinapash israelitacunataca Jehová Dios carashca alpacunapi causashpa catingapaj munashpaca Jehová Diostami cazushpa catina canguichi nishpami Moisesca advirtirca. Chaimi Moisesca israelitacunataca “causaita agllaichiyari” Jehová Diosta uyashpa ‘paita cazuichiyari’ nircami. Pero israelitacunaca Jehová Diostaca na cazurcachu. Chaimandami Jehová Diosca israelitacunata asirio gentecuna vincichun saquirca. Shinallata jipamanga babilonio gentecuna israelitacunata vincishpa paicunata prezo apachun saquirca (2 Rey. 17:​6-8, 13, 14; 2 Crón. 36:​15-17, 20).

7. Moisés cushca advertenciamandaca ¿imatata yachajupanchi? (Fotocunatapash ricupangui).

⁷ Moisés cushca advertenciamandaca ¿imatata yachajupanchi? Jehová Diosta cazushpaca para siempre causaitami chasquishun. Israelitacunashnallatami ñucanchipash Jehová Dios carasha nishca alpamanga ñalla yaicugrinchi. Chaipica cai alpa shuj paraíso tucujtami ricushun (Is. 35:1; Luc. 23:43). Diablopash, demoniocunapash ñana tiangachu (Apoc. 20:​2, 3). Panda religiongunapash ñana tiangachu. Chaimi gentecunaca Jehová Diosmandaca na caruyanga (Apoc. 17:16). Cai alpamanda gobiernocunapashmi tucuringa. Chaimandami gentecunaca ali causaita ushanga (Apoc. 19:​19, 20). Cai paraíso alpapica na cazungapaj munaj gentecunapashmi tucuringa (Sal. 37:​10, 11). Tucui gentecunami Jehová Diospa mandashcacunata cazunga. Chaimi tucuilla gentecunaca juyarishpa, tranquilo ali causanga (Is. 11:9). Chai punlla ucha chayamuchunmi munapanchi. Shinaca Jehová Diosta cazushpaca cai paraíso alpagupica para siempremi causaita ushashun (Sal. 37:29; Juan 3:16).

8. Para siempre causana promesapi pensarinaca ¿imashinata shuj misionero huauquitaca ayudarca? (Judas 20, 21).

 ⁸ Taita Diosca para siempre causaiguta carasha nishpami prometishca. Chai promesata siempre yaria causashpaca ima llaquicunata charishpapash Taita Diostaca cazushpami catishun (Judas 20, 21​ta liipangui). Shinallata chai promesapi pensarishpami shuj tentación ricurijpipash chai tentacionbi ama urmangapaj esforzarishun. Shuj huauquiguca ashtaca tiempotami África llactapi misionero cashca. Paica ashtaca tiempotami shuj tentacionbi ama urmangapaj ninanda esforzarina tucurca. Chai huauquica cashnami nirca: “Chai tentacionbi urmashpaca para siempre causana oportunidadta chingachi ushashcatami cuenta japircani. Chaimi chai tentacionbi ama urmangapaj ninanda esforzarircani. Y Jehová Diospa ayudatapashmi mañarcani. Jehová Dios ayudajpimi concienciapipash tranquilo sintirishpa Jehová Diosta ali sirvishpa cati usharcani” nircami.

‘IMATA RURASHPAPASH TUCUIMI ALI LLUJSHINGA’

9. Davidca ¿ima llaquicunatallata charirca?

⁹ Davidca shuj alipacha reymi carca. Paica musicata tocanata yachaj, poeta, alipacha soldado y profetami carca. Paica ashtaca llaquicunatami charirca. Davidca ashtaca huatacunatami envidioso rey Saulmanda pacajushpa causarca. Davidca ña rey cashpapashmi paipa churi Absalón ama huañuchichun pacajushpa rina tucurca. Pero ashtaca llaquicunata charishpapash y jatun pecadocunata rurashca cashpapash Davidca huañungacamanmi Jehová Diostaca cazushpa causarca. Chaimandami Jehová Diosca “Davidca ñuca munaitami ruranata yachan” nirca. Chai razonmandami cunanbi Davidpa consejocunata uyanaca ali can (Hech. 13:22; 1 Rey. 15:5).

10. David ¿imamandata paipa churi Salomondaca consejarca?

¹⁰ David paipa churi Salomonman ima nishcata ricupashunchi. Salomonga Davidpa jipami rey tucugrijurca. Jehová Diosca paita ali adorashpa catichun israelitacunata ayudachun y templo huasita construichunga Salomondami agllashcarca (1 Crón. 22:5). Salomonga shuj shuj llaquicunatami charigrijurca. Rey David Salomonda imata consejashcata ricupashunchi.

11. Davidca ¿imatata Salomonmanga nirca? Salomonhuanga ¿imata pasarca? (1 Reyes 2:​2, 3; fotocunatapash ricupangui).

¹¹ Davidca ¿imatata Salomonmanga nirca? (1 Reyes 2:​2, 3​ta liipangui). Davidca Salomondaca Jehová Diosta cazujpica tucuimi ali llujshinga nircami. Y ashtaca huatacunatami Jehová Diosca Salomondaca ayudarca y bendiciarca (1 Crón. 29:​23-25). Salomonga Taita Diospa templo huasitami construirca. Bibliapa huaquin librocunatami escribirca. Y Bibliapa shuj librocunatapash escribichunmi ayudarca. Salomonga ali yachaita charimanda y charij charij cashcamandami rijsishca tucurca (1 Rey. 4:34). David nishcashnaca Salomonga imata rurashpapash tucui ali llujshichun munashpaca Jehová Diostami cazuna carca. Shinapash Salomonga ña mayoriashpaca yanga dioscunatami adorai callarirca. Chaimandami  Jehová Diosca Salomondaca ñana bendiciashpa catircachu. Shinami Salomonga ali gobernashpa catingapaca ñana ali yachaita charirca (1 Rey. 11:​9, 10; 12:4).

12. David cushca consejomandaca ¿imatata yachajupanchi?

¹² David cushca consejomandaca ¿imatata yachajupanchi? Jehová Diosta cazushpaca ñucanchi imata rurajpipash alimi llujshinga (Sal. 1:​1-3). Jehová Diosca ñucanchicuna Salomón cuenda charij charij tucuchun y rijsishca tucuchunbash na ayudangachu. Pero paita cazujpica ali decisiongunata japichunmi ayudanga (Prov. 2:​6, 7; Sant. 1:5). Jehová Dios cushca consejocunaca trabajopi, escuelapi ali decidichunmi ayudan. Shinallata ali diversiongunata agllachun, culquitapash ali utilizanata yachachunmi ayudan. Jehová Diospa consejocunata cazushpaca paipa amigo cashpami catita ushashun y para siempremi causaita ushashun (Prov. 2:​10, 11). Ashtahuanbash ali amigocunatami charishun y familia ucupipash cushillami causaita ushashun.

13. Cushilla causangapaca panigu Carmenga ¿imatata rurarca?

¹³ Mozambique llactapi causaj Carmen paniguca cushilla causangapaca universidadta estudianami ali can yarcami. Chaimandami arquitecturata estudiangapaj universidadman rirca. Panigu Carmenga cashnami nin: “Universidadpi estudianataca ninandami gushtarcani. Pero ashtaca tiempota estudiajuimandami shaijushca sintirijurcani. Las 7 y media de la mañanamanda las 6 de la tardecamanmi estudiana carcani. Chaimi reuniongunaman rinaca difícil cahuarca. Y asha ashami Jehová Diosmanda caruyajurcani. Ñucaca ishcai amocunata sirvingapaj munajushcatami cuenta japircani” ninmi (Mat. 6:24). Panigu Carmenga Jehová Diosta mañashca jipami chai asuntomanda informacionda mascarca. Shina rurashcamandaca ¿imata pasarca? Paniguca ninmi: “Experienciata charij turiñañacunapa y ñuca mamapa consejocunata uyashca jipami universidadta saquishpa Jehová Diosta tiempo completopi sirvinata decidircani. Shina rurashcamandami ñuca causaipica ali decisiongunata japi usharcani. Chaimandami cunanga cushilla causani” ninmi.

14. Moisés y Davidca ¿ima consejocunatata curca?

¹⁴ Moisés y Davidca Jehová Diosta juyaimandami paita cazuna importantepacha cashcataca ali yacharca. Paicunaca ña huañugrinajushpaca paicunata uyajcunataca paicunapa ejemplota catichun y Jehová Diosta cazushpa catichunmi animarca. Pero Jehová Diosmanda caruyajpica Jehová Dios paicunata ñana bendiciashpa catingachu nishpami advirtirca. Moisés y David  cushca consejocunaca ñucanchitapashmi ninanda ayudaita ushan. Ashtaca huatacuna jipapashmi Jehová Diosta shuj sirvij runaguca Jehová Diosta cazuna importantepacha cashcata ricuchirca.

“NINANDAMI CUSHIJUNI”

15. Apóstol Juanga paipa causaipica ¿imacunatallata rurai usharca?

¹⁵ Apóstol Juandaca Jesusca ninandami juyarca (Mat. 10:2; Juan 19:26). Apóstol Juanga Jesustaca predicacionbimi cumbarca. Jesús milagrocunata rurajujpi y llaquita charijpipash chaipimi carca. Juanga Jesusta huañuchinajujta y Jesús causarishcatapashmi ricurca. Shinallata apóstol Juanga Jesusta catij congregación imashna mirashpa catijtapashmi ricurca. Ashtahuanbash paica ‘ali villaicuna mundo enteropi predicashcatapashmi’ ricui pactarca (Col. 1:23).

16. Apóstol Juan escribishca shimicunaca ¿picunatallata animashca?

¹⁶ Ña huañugrijushpami apóstol Juanga Bibliapa huaquin librocunata escribina bendicionda chasquirca. Paica ‘Jesucristo ricuchishca shimicunatami’ escribishpa saquirca (Apoc. 1:1). Paica Juan librota y quimsa cartacunatami Taita Diospa ayudahuan escribirca. Tercera carta de Juandaca Gayo shuti huauquimanmi escribirca. Apóstol Juanga huauqui Gayotaca shuj churitashnami juyarca (3 Juan 1). Chai tiempopica ashtaca huauquipanicunami apóstol Juanbaca churicunashna, ushicunashna cashcanga. Apóstol Juan escribishca shimicunaca cunan punllacunacamanmi Jesusta catijcunataca animashca.

17. 3 Juan 4​pi ricuchishcashnaca ¿imamandata ninanda cushijuita ushanchi?

¹⁷ Apóstol Juanga ¿imatata escribirca? (3 Juan 4​ta liipangui). Juanga Taita Diosta cazuna ninanda cushichin cashcatami escribirca. Apóstol Juan tercera carta de Juanda escribijujpica huaquingunaca pandacunatami yachachinajurca. Shinallata huaquingunaca congregaciondami separachinajurca. Shinapash huaquingunaca ‘Taita Dios mandashcashna cabal yachachishcacunata catishpami causanajurca’. Paicunaca Jehová Diospa ‘mandamientocunata cazushpami’ causanajurca (2 Juan 4, 6). Cai huauquipanicuna cazushpa causanajujta ricushpaca Juanbash, Jehová Diospash ninandami cushijushcanga (Prov. 27:11).

18. Apóstol Juan escribishca shimicunamandaca ¿imatata yachajupanchi?

¹⁸ Apóstol Juan escribishca shimicunamandaca ¿imatata yachajupanchi? Jehová Diosta cazushpaca cushillami causashun (1 Juan 5:3). Jehová Diosta cushichishcata yachashpaca ninandami cushijunchi. Cai mundopa tentaciongunata rechazashpa paita cazujpica Jehová Diosca ninandami cushijun (Prov. 23:15). Jehová Diosta cazujpica cielopi angelcunapashmi cushijun (Luc. 15:10). Shuj huauquipanicuna llaquicunata charishpapash o tentaciongunata charishpapash  Jehová Diosta tucuipi cazungapaj esforzarijta ricushpaca ñucanchicunapashmi ninanda cushijupanchi (2 Tes. 1:4). Shinaca Satanás mandajushca cai nali mundo tucurijpica ñucanchicunaca Jehová Diosta tucuipi cazushcamandami cushilla sintirishun.

19. Jehová Diosmanda shujcunaman yachachinamandaca ¿imatata shuj paniguca nirca? (Fotocunatapash ricupangui).

¹⁹ Shinallata Jehová Diosmanda shujcunaman yachachinapashmi ninanda cushichin. República Dominicana llactamanda Rachel shuti paniguca Taita Diosmanda shujcunaman yachachinaca shuj jatun bendición cashcatami nin. Chai bendicionga imahuanbash na igualanllu ninmi. Paniguca pai Bibliamanda yachachishca huauquipanicunamanda parlashpami cashna nin: “Ñuca estudiantecuna Jehová Diosta juyajta ricuna, Jehovapi confiai callarijta ricuna y paicunapa causaipi cambiocunata rurajta ricunaca ninandapachami cushichihuan. Paicunata ayudangapaj imapash sacrificiocunata rurashcamandaca ninandami cushijuni” ninmi.

CAI QUIMSA JARICUNAPA NISHCACUNATACA AMA CUNGAPASHUNCHICHU

20. Moiseshuan, Davidhuan y Juanhuanbash ¿imapita igual capanchi?

²⁰ Moisés, David y Juanbash diferente tiempocunapi causashca cajpipash ashtaca cosascunapimi paicunahuanga igual capanchi. Por ejemplo paicunashnami ñucanchipash Jehová Diosta sirvipanchi. Shinallata ñucanchipashmi Jehová Diosta mañanchi, paipi confianchi y paipa ayudata mascanchi. Y chai jaricunashnallatami Jehová Dios paita cazujcunata bendiciajtaca seguro capanchi.

21. Moisés, David y Juanbash cushca consejocunata cazushpaca ¿ima bendiciongunatata chasquishun?

²¹ Shinaca Moisespash, Davidpash y Juanbash ña huañugrinajushpa imata nishcataca na cunganachu capanchi. Jehová Diospa mandashcacunatapash cazunami capanchi. Shina rurashpallami ñucanchi imata rurajpipash ali llujshinga. Shinallata Jehová Diosta cazushpaca para siempre causaitami chasquishun (Deut. 30:20). Ashtahuanbash Jehová Diosta cazushpaca cushillami causashun. Porque Jehová Diosca pai imata prometishcataca cumplingami. Jehová Diosca shamuj punllacunapica ñucanchitaca ashtacatami bendicianga (Efes. 3:20).