1, 2. Cunanbipash ¿imata pasaita ushan?

 JESUSCA shuj comparacionmandami parlarca. Paica shuj viuda huarmigu shuj juezta cutin cutin ayudahuai nishpa mañangapaj rishcatami parlarca. Chai comparacionda uyashpaca Jesuspa discipulocunaca chai viuda huarmigu imashna sintirishcataca alimi intindishcanga. Porque chai punllacunapica ashtaca gentecunami shujcuna llaquichijpi sufrishpa causan carca (Luc. 18:​1-5). Ñucanchitapashmi imahorapash pipash llaquichishcanga. Chaimandami chai viuda huarmigu imashna sintirishcataca ali intindita ushapanchi.

² Cunanbi gentecunaca na tucuicunatachu igual tratan. Shujcunata llaquichishpami causan. Chaimandami ñucanchitapash llaquichita ushan (Ecl. 5:8). Huaquinbica congregacionmanda shuj huauqui o shuj panimi ñucanchitaca nali trataita ushan. Paicunaca na ñucanchipa contracunachu can. Pero imperfectocuna caimandami huaquinbica shina trataita ushanman. Nali gentecuna ñucanchita llaquichijpica aguantashpami catinchi. Shinaca con más razonmi huauquipanicuna ñucanchita llaquichijpica paicunata ali tratangapaj esforzarina capanchi. Nali gentecuna llaquichijpi Jesús imata rurashcamandaca ashtacatami yachajuita ushapanchi. Ñucanchi huauqui, pani o pipash ñucanchita llaquichijpica ¿imashinashi Jehová Diosca sintirin? ¿Talvez ñucanchimanda preocuparinlla?

3. Jehová Diosca ñucanchimanda preocuparijtaca ¿imashinata yachapanchi?

³ Jehová ‘Diosca alita ruranatami juyan’. Chaimandami paipa sirvijcunata shujcuna nali tratajpica ninanda preocuparin (Sal. 37:28). Taita Dios paipa sirvijcunata paicuna minishtijuj tiempopi ‘uchalla ayudan’ cashcatami Jesusca nirca (Luc. 18:​7, 8). Ñallami  Taita Diosca tucui llaquicunata tucuchinga. Y shujcunapash ñucanchita llaquichichunga na saquingachu (Sal. 72:​1, 2).

4. Jehová Diosca ñucanchitaca ¿imashina ayudan?

⁴ Llaquicuna y nali gentecuna tucurina tiempo chayangacamanga Jehová Diosca shujcuna ñucanchita nali tratajpi imata rurana cashcatami yachachin (2 Ped. 3:13). Por ejemplo shujcuna ñucanchita llaquichijpi imata na rurana cashcata yachachunmi alipacha consejocunata y Jesuspa ejemplotapash Bibliapi escribichishpa saquishca.

ÑUCANCHITA LLAQUICHIJPICA ¿IMATATA NA RURANA CAPANCHI?

5. ¿Imata ama rurangapata cuidadota charina capanchi?

⁵ Shujcuna ñucanchita nali tratajpica talvezpashmi llaqui llaqui, preocupado sintiripashun (Ecl. 7:7). Jehová Diosta ali sirvij Job y Habacucpashmi shinallata sintirirca (Job 6:​2, 3; Hab. 1:​1-3). Shina sintirinaca normalmi can. Pero na aliguta pensarishpa ama nalita rurangapami cuidadota charina capanchi.

6. Absalón rurashcamandaca ¿imatata yachajupanchi? (Dibujota ricupangui).

⁶ Ñucanchita o shujcunata nali tratajpica talvezpashmi ñucanchillata justiciata rurangapaj munashun. Pero shina rurashpaca chai problemata arreglanapa randica ashtahuanmi empeorachita ushanchiman. Rey Davidpa churi Absalonhuan ima pasashcata ricupashunchi. Absalonga paipa huauqui Amnón paipa pani Tamarta violashcata yachaj chayashpaca ninandami culirarca. Moisesman Cushca Leypi nishcashnaca Amnón shina rurashcamandaca huañunami carca (Lev. 20:​17, TNM-S). Absalonga razonhuanmi culirarca. Pero paillata justiciata rurana derechotaca na charircachu (2 Sam 13:​20-23, 28, 29).

7. Nalicunatalla ricushpaca ¿imatata salmista runahuanga pasarca?

⁷ Nali gentecuna nalita rurajpipash paicunahuan imapash na pasajta ricushpaca talvezpashmi ñucaca yangami alita rurangapaj esforzarijuni nishpa pensaita ushanchiman. Salmista runapi pensaripashunchi. Paica nali gentecuna ali gentecunata llaquichijpipash ali causajtami ricurca. Chaimi paica cashna nirca: ‘Ricui, Diosta na manllaj caicunaca, cai pachapi ima llaquitapash na japinllu’ nircami (Sal. 73:12). Chai salmista runaca nali cosascunalla pasajujta ricujuimandami cashna nirca: ‘Caita yachangapaj ñuca yarijujpica, ñucapaca ninan shinllimi carca’ nircami. Paica Jehová Diosta sirvina ali cashcataca asha ashami cungajurca (Sal. 73:​14, 16). Paica caitapashmi nirca: “Ñuca chaquipash ashamandami na llucharca. Ñuca purijushpaca, ashamandallami na llucharcani” nircami (Sal. 73:2).  Chai salmista runatashnallatami Alberto a huauquihuanga pasarca. Chai huauquihuan ima pasashcata ricupashunchi.

8. Huauqui Albertohuanga ¿imata pasarca?

⁸ Huauqui Albertotaca congregacionba contribución culquimanda shuhuashca nishpami juchachirca. Pero paica na shuhuarcachu. Shinapash paitaca anciano cana privilegiotami quichurca. Shinallata chai problemamanda yachaj huauquipanicunaca paitaca ñana respetohuan ricunllu carca. Shina pasashcamandami huauqui Albertoca: “Culira, resentido, imata ruraitapash na atinashcami sintirircani” ninmi. Huauqui Albertoca shina nali sintirishpa catimandami Jehová Diosmanda caruyarca. Paica 5 huatacunatami congregacionmanda caruyashca carca. Caimandaca ¿imatata yachajupanchi? Pipash ñucanchita llaquichijpi o nali tratajpica ñucanchi sentimientocunata controlana cashcatami yachajupanchi.

JESUSPA EJEMPLOTA CATIPASHUNCHI

9. Jesusca ¿ima llaquicunatata aguantarca? (Dibujocunata ricupangui).

⁹ Ashtaca gentecunami Jesustaca nali tratarca. Por ejemplo, Jesuspa huaquin familiacunaca pai Mesías cashcataca na crinllu carca. Shinallata juizu illami tucushca ninmi carca. Cutin religiongunata ñaupaman pushajcunaca Jesusca demoniocunapa ayudahuanmi imatapash ruran nishpa juchachin carca. Ashtahuanbash romano soldadocunaca Jesustaca burlarishpa, maltratashpami  huañuchirca (Mar. 3:​21, 22; 14:55; 15:​16-20, 35-37). Jesusta chashnapacha llaquichijpipash paica aguantashpami na vengarirca. Jesuspa ejemplomandaca ¿imatata yachajupanchi?

10. Shujcuna llaquichijpipash Jesusca ¿imatata rurarca? (1 Pedro 2:​21-23).

¹⁰ (1 Pedro 2:​21-23​ta liipangui). b Jesusmandaca shujcuna llaquichijpipash imata rurana cashcatami yachajupanchi. Jesusca ima hora parlanata y ima hora upalla quidanataca alimi yacharca (Mat. 26:​62-64). Por ejemplo, Jesusmanda gentecuna llullacunata nijpica huaquinbica imatapash na ninatami Jesusca decidin carca (Mat. 11:19). Pero parlanata decidishpaca ali shimicunahuanmi parlan carca. Y paipa contracunataca na amenazanllu carca. Jesusca “aliguta ricushpa juzgaj Juezpa maquipimi” tucuita saquin carca. Chaimi paipa sentimientocunata controlaitaca ushan carca. Jesusca pai sufrijujta Jehová Dios ricujujtaca alimi yacharca. Chaimandami Jehová Dios paita ayudanataca seguro carca.

11. ¿Imatata Jesushna rurana capanchi? (Fotocunatapash ricupangui).

¹¹ Shinaca pipash ñucanchita nali tratajpica Jesushnami ima ninata controlarina capanchi. Pipash ñucanchita nali tratajpi pero aguantai ushashpaca mejor cungaitami cungana capanchi. O chai problemata ama ashtahuan empeorangapaca talvez upalla quidanatami decidinchiman (Ecl. 3:7; Sant. 1:​19, 20). Shinapash ñucanchi crishcacunata difindina cashpa o pipash nali tratai tucujujpica parlanami capanchi (Hech. 6:​1, 2). Pero parlana tucushpaca respetohuan, aligumanmi parlana capanchi (1 Ped. 3:15). c

12. ¿Imashinata Jehová Diospi confiashcataca ricuchipanchi?

 ¹² Shinallata pipash ñucanchita nali tratajpica Jesús cuendami “aliguta ricushpa juzgaj” Jehová Diospa maquipi saquina capanchi. Chaipaca pipash ñucanchimanda pandacunata yuyajpi o nali tratajpica Jehová Dios tucuita ricujujtami confiana capanchi. Shina confiashpallami pipash nali tratajpica aguantashpa catishun. Y Jehová Dios chai problemata ima horapash solucionanataca seguro cashun. Tucuita Jehovapa maquipi saquishpallami resentido o culirapash na quidashun. Culira o resentido quidashpaca ñucanchillatami llaquilla causashun. Y Jehová Dioshuan ali amigo canatapashmi saquishun (Sal. 37:8).

13. Pipash llaquichijpica ¿imatata yarina capanchi?

¹³ Ciertomi Jesuspa ejemplota tucuipi ali catitaca na ushapanchichu. Huaquinbica talvez imatapash nishpa o rurashpami pandarita ushanchiman (Sant. 3:2). Pipash ñucanchita llaquichijpimi talvez ñucanchica emocionalmente y fisicamente afectado quidaita ushanchi. Y paraíso chayangacamanmi talvez shina causana tucushun. Pero shina pasajpica Jehová Diosca quiquinda ima pasajushcata tucuita ricujujta yaripangui. Jesuspashmi ashtacata sufrirca. Chaimandami quiquin imashina sintirijtaca ali yachan (Heb. 4:​15, 16). Pipash ñucanchita llaquichijpi imata rurana cashcata yachachunmi Jehová Diosca Jesuspa ejemplota Bibliapi escribichishpa saquishca. Shinallata alipacha consejocunatapashmi escribichishpa saquishca. Cunanga Romanos libropa ishcai textocunata ricupashunchi.

‘TAITA DIOS CULIRASHCATA RICUCHICHUNMI SAQUINA CAPANGUICHI’

14. Apóstol Pabloca ‘Taita Dios culirashcata ricuchichunmi saquina capanguichi’ nishpaca ¿imatata ningapaj munarca? (Romanos 12:19).

¹⁴ (Romanos 12:19​ta liipangui). Apóstol Pabloca cristianocunataca ‘Taita Dios culirashcata ricuchichunmi saquina capanguichi’ nishpaca ¿imatata ningapaj munarca? Cai textopica tucuita Jehová Diospa maquipi saquina cashcatami ricuchin. Jehová Dios agllashca tiempopi llaquicunata tucuchichun shuyashpami tucuita Jehová Diospa maquipi saquijushcata ricuchipanchi. John huauquica shuj huauqui paita nali tratajpimi chai asuntotaca Jehovapa maquipi saquirca. John huauquica cashnami nirca: “Culirami carcani. Pero na fácil cajpipash ama nalita rurangapami controlarina tucurcani. Y Jehová Diospi confiachun, pacienciata ricuchichunmi Romanos 12:19 textoca ayudahuarca” nircami.

15. ¿Imamandata Jehová Dios ayudachun saquina capanchi?

¹⁵ Imapash problemata charishpaca Jehová Dios ayudachun shuyanami ashtahuan ali can. Shina shuyashpallami shuj problemata charishpapash ñucanchillata chai problemata arreglangapaj munaimanda na yapata preocuparishun ni estresarishun. Porque Jehová Diosllatami ayudasha nishpa prometishca. Y paica tucuicunamanda yalimi aliguta ayudaita ushan. Jehová Diosca “tucuita ñuca maquipi saquijpica ñucami chaitaca arreglasha” nijuj cuendami can. Shinaca Jehová Dios ayudanapi confiashpaca culira cashpapash controlaritaca ushashunmi. Jehová Dios ayudanapi confianami John huauquitaca ayudarca. Paica ninmi: “Ñuca problemata Jehovapa maquipi saquijpica ñuca pensashcatapash yalimi ashtahuan mejorta paica arreglaita ushan” ninmi.

‘NALI RURAICUNATACA ALI RURAICUNAHUANMI MISHAI USHANGUICHI’

16, 17. Shujcuna ñucanchita llaquichijpipash ¿imashinata Jehová Diosta mañanaca ayudan? (Romanos 12:21).

¹⁶ (Romanos 12:21​ta liipangui). Apóstol Pabloca ‘nali ruraicunataca ali ruraicunahuanmi mishai ushanguichi’ nircami. Jesuspashmi Sermón del Montepica cashna nirca: “Cangunapa contracunataca juyashpami catina capanguichi.  Cangunata llaquichijcunamandapashmi Taita Diostaca mañana capanguichi” nircami (Mat. 5:44). Jesusllatami chai shimicunataca pactachirca. Jesusca ashtaca llaquicunatami aguantana tucurca. Por ejemplo, Jesustaca romano soldadocunaca shuj racu caspipimi clavarca. Shinallata humillarca y llaquinaitami maltratarca. Jesusca ninandami sufrishcanga. Paica yangamandami shinapacha llaquichi tucurca.

¹⁷ Jesusca shina llaquichi tucushpapash alita rurashpami catirca. Chaimandami Jehová Diostaca chai soldadocunataca castigai nishpaca na mañarcachu. Chaipa randica “Ñuca Taitalla cai gentecunataca perdonapayari. Porque paicunaca imata ruranajushcatapash na yachanllu” nishpami mañarca (Luc. 23:34). Ñucanchita nali trataj gentecunamanda mañanmi paicunata ama nali ricuchun ayudan. Shinallata culira, resentido ama quidachunbashmi ayudan.

18. Jehovata mañanaca ¿imashinata Alberto y John huauquicunataca ayudarca?

¹⁸ Cai parrafocunapi parlashca huauquicunataca Jehová Diosta mañanami shujcuna llaquichijpipash aguantashpa catichun ayudarca. Huauqui Albertoca ninmi: “Ñucata nali tratashca huauquipanicunamandami Jehová Diostaca mañarcani. Ima pasashcata cungangapami Jehová Diostaca ayudahuai nishpa cutin cutin mañarcani” ninmi. Cunanbica cutinmi huauqui Albertoca cushilla Jehová Diosta sirvishpa catijun. Huauqui Johnga cashnami nin: “Ñucata nali tratashca huauquimandami cutin cutin Jehová Diostaca mañan carcani. Shina mañanami chai huauquita perdonangapaj y ali ricungapaj ayudahuarca. Shinallata tranquilo sintirichunbashmi ayudahuarca” ninmi.

19. Cai nali mundopi causashpa catijuimandaca ¿imatata rurashpa catina capanchi? (1 Pedro 3:​8, 9).

¹⁹ Cai nali mundopi causashpa catijuimandami shujcunaca ñucanchita injustamente trataita ushan. Pero ima pasajpipash Jehová Diostaca ñucanchita ayudachunmi mañashpa catina capanchi. Shujcuna llaquichijpi o nali tratajpica Jesuspa ejemplota catipashunchi. Shinallata Bibliapa consejocunata pactachishpa catipashunchi. Shina rurajpi Jehová Dios bendicianataca seguromi caita ushapanchi (1 Pedro 3:​8, 9​ta liipangui).