1, 2. a) Cunan punllacunapi gentecunaca ¿imatata shuyan? Shinapash ¿imatata ñucanchicunaca shuyanajunchi? b) Cai temapica ¿ima ishcai yuyaicunatata yachajupashun?

JEHOVÁ DIOSCA ashtaca ali cosascunatami cusha nishca. Shinapash ¿ima ali cosascunatallata Jehová Diosca cusha nishca? Huaquingunamanga jahua cielopi para siempre causana esperanzatami cushca. Cutin shujcunamanga cai Alpapi para siempre causana esperanzatami cushca (Juan 10:16; 2 Pedro 3:13). Shinapash pundapica paipa shutitami tucui llullacunamanda limpiasha nishca. Ashtahuangarin paipa munaitami jahua pachapipash cai pachapipash pactachisha nishca (Mateo 6:9, 10). Ñucanchicunaca cai tucuri punllacunapi ñucanchita imashina ñaupaman pushashpa catijta, ayudajujtapashmi ricungapaj munanchi.

² Bibliapica ninmi, feta charijcunaca Taita Diospa cusha nishcacunata ‘japigrishapacha yashpami shuyanajun’ nishpa. ¿Imamandata Bibliapica shina nin? Feta charijcuna Jehová Diospa nishcacuna ciertopacha pactarinata tucui shunguhuan crijpimi shina nin (Hebreos 11:1). Cutin, shuj gentecunaca jipa punllacunapi manapash japi ushana cosascunatami munashpa shuyanajun. Shuj ejemplota ricupashun.  Huaquingunaca loteriata ganangapaj munashpami causan. Shinapash chai munai ciertopacha pactarinataca na seguro canllu. Chaimandami cai temapica cai ishcai yuyaicunata yachajushun: 1) Taita Diospa nishcacuna ciertopacha pactarinata tucui shunguhuan cringapaca ¿imatata rurana canchi? 2) Taita Diospa nishcacunapi tucui shunguhuan crina o shinlli feta charinaca ¿imashinata cunan punllacunapipash ayudan?

3. ¿Imamandata Taita Diospa nishcacuna pactarinataca seguropacha capanchi?

³ ¿Gentecunaca nacirishcandichu Taita Diospi feta charinchi? Na. Taita Diospi feta charingapaca paipa espíritu santohuan ñucanchita ayudachunmi saquina canchi (Gálatas 5:22). Jehová Diospa espíritu santopa ayudahuanmi ñucanchicunaca Jehová Dios Tucui Ushaita Charijta, alipacha yachaj cashcata intindi ushanchi. Shina yachajushpami Jehovapa nishcacuna ciertopacha pactarinataca tucui shunguhuan cri ushanchi. Ashtahuangarin paipa nishcacuna ciertopacha pactarina cajpimi Jehová Diosca nirca: “Cashna nishcataca, ña pactachircanimi” nishpa (Apocalipsis 21:3-6, liingui). Jehová Diosca ‘imata nishcata pactachij Taita Diosmi’ can. Chaimandami paipa nishcacuna jipa punllacunapi pactarinataca seguropacha canchi (Deuteronomio 7:9).

4. Ñaupa punllacunapi Jehová Diosta sirvijcunaca ¿imapita tucui shunguhuan crirca?

⁴ Hebreos capítulo 11​pica, Jehová Diospa nishcacunapi shinlli feta charij 16 jaricunamanda huarmicunamandami parlan. Shinallata, chai capitulopica Jehovapi ‘crishcamanda ninanda alicachi tucushca’ shuj jaricunamanda huarmicunamandapashmi parlan (Hebreos 11:39). Paicunaca Jehová Dios cachamusha nishca “mirai” shamunataca tucui shunguhuanmi crirca. Shinallata chai “mirai” shamushpa Jehovapa tucui contracunata tucuchishpa, cai Alpatapash cutin shuj paraíso Alpaguta ruranatami tucui shunguhuan crirca (Génesis 3:15). Ashtahuangarin, Jehová Dios paicunata causachinataca tucui shunguhuanmi crirca. Shinapash causarishca jipa ¿maipi causanatata paicunaca shuyanajurca? ¿Jahua cielopi causangapachu causarina carca? Na. Chai punllacunapica Jesusca nara cai Alpaman shamushpa huañurcachu. Chaimandami paicunaca jahua cielopi causangapaj causarinataca na shuyanajurca (Gálatas 3:16). Paicunaca shuj juyailla paraíso Alpagupi para siempre causangapaj causarinatami shuyanajurca (Salmo 37:11, NM; Isaías 26:19; Oseas 13:14).

5, 6. Abrahanbash paipa familiapash ¿imatata ña ricunajunshna shuyanajurca? ¿Imashinata paicunaca tucui shunguhuan crita usharca? (Callari dibujota ricupangui).

⁵ Hebreos 11:13​pica Jehovata ñaupa punllacunapi ali sirvijcunamanda parlashpami nin: “Ñaupa taitacunaca crishpallami, Dios carashapachami nishcacunatapash, nara japishpallata huañunajurca. Paicunaca, alipacha crij cashpami alicachishpa, jipaman Dios imata pactachinatapash, carumandalla ricunshna crishpa cushijurca” nishpa. Chai punllacunapi Jehovata ali sirvijcunaca Taita Dios carasha nishca Alpagupi jipa punllacunapi causanataca tucui shunguhuanmi crirca. Chaimandami ña chai Alpagupi causanajunshna pensarin carca. Abrahanbash chai Alpagupi causanataca yariami causarca. Jesusca nircami, Abrahanga Taita Diospa nishcacuna pactarinata ali ‘yachashpami cushijurca’ nishpa (Juan 8:56). Sarapash, Isaacpash, Jacobpash, shujcunapash Diospa Reino tucuilla Alpata mandanata tucui shunguhuan crishpami chai punllacunata ña ricujunshna shuyanajurca (Hebreos 11:8-11).

⁶ ¿Imashinata Abrahanbash, paipa familiapash tucui shunguhuan crita o shinlli feta charita usharca? Paicunaca Jehovamanda yachajushpa catimandami tucui shunguhuan crita usharca. Jehová Diospash muscuchishpa, muscuipishna  ricurishpa o angelcunata cachashpami paicunahuan parlarca. Shinallata, punda tiempocunapi Jehovata sirvijcunapa ejemplota uyashpa, punda escribishcacunata ricushpami Abrahanbash paipa familiapash tucui shunguhuan cri ushashcanga. Paicunaca Jehová Dios imata cusha nishcataca siempre yarishpa, chaicunapi pensarinata alicachishpami causarca. Chaimandami paicunaca Jehová Diospa nishcacuna pactarinataca seguropacha carca. Seguropacha caimandami ima llaquicuna japijpipash, shujcuna catiriashpa llaquichijpipash Jehová Diosmandaca nunca na caruyarca.

7. Ñucanchicunapash shinlli feta charichunga ¿imatata Jehová Diosca cushca? Shinlli feta charingapaca ¿imatata ñucanchipash rurana capanchi?

⁷ ¿Imashinata ñucanchicunapash shinlli feta chari ushanchi? Jehová Diosca ñucanchimanga Bibliatami cushca. Bibliapimi jipa punllacunapi pai imata ruranata villachijun. Ashtahuangarin Bibliapimi nijun, ñucanchicuna cushilla causangapaj imata rurana cashcata. Chaimandami Bibliata cada punlla liishpa, imata liishcatapash pactachina canchi (Salmo 1:1-3; Hechos 17:11, liingui). Jehová Diosca ‘aliguta cazushpa, aliguta yarishpa sirvij’ esclavotapash churashpami ñucanchimanga ‘micuna horaspi’ micuchinshna yachachijun (Mateo 24:45). Imashinami ñaupa punllacunapi Jehovata sirvijcunaca Jehová Dios carasha nishcacunata liishpa chaicunapi tucui shunguhuan pensarin carca, shinallatami ñucanchicunapash rurana canchi. Shinami, ñucanchicunaca Jehovamanda na caruyashun, Taita Diospa Reino tucuilla Alpata mandanatapash ña ricujunshna tucui shunguhuan crita ushashun.

8. Jehovata mañanaca ¿imashinata shinlli feta charichun ayudan?

⁸ Ñaupa punllacunapi Jehovata sirvijcuna shinlli feta charingapaca ¿imatata ashtahuan rurarca? Paicunaca Jehovapa ayudata mañashpami Jehová Dios imashina ayudajta ricurca. Shinami paicunapa feta shinlliyachirca (Nehemías 1:4, 11; Salmo 34:4, 15, 17; Daniel 9:19-21). Ñucanchicunapash Jehová Dios ñucanchi mañashcacunata uyashpa, ñucanchi minishtijuj horaspi ayudashcata cuenta japishpami ñucanchi feta shinlliyachinchi (1 Juan 5:14, 15, liingui). Ñucanchi feta shinlliyachingapaj munashpaca Jehovatami paipa espíritu santota cuchun mañashpa catina canchi (Lucas 11:9​, NM,13).

9. ¿Imacunamandallata Jehová Diostaca mañana capanchi?

⁹ Jehovata mañajushpaca na ñucanchi minishtishcacunatallachu mañana canchi. Paica ashtaca ali cosascunatami rurashca (Salmo 40:5). Chaimandami cada punlla Jehová Diosta agradicishpa alabana canchi. Jehovata sirvijcunaca mundo enteropi shuj huauquipanicunamandapashmi mañana canchi. Huaquingunaca ‘prezomi tianajun’. Cutin shujcunaca congregaciongunata ‘michishpami’ ñaupaman pushanajun. Paicunamandapash Jehovataca mañanami canchi. Jehová Dios ñucanchi mañashcacunata imashina contestajta ricushpami ñucanchi feta shinlliyachishpa Jehovaman ashtahuan quimirinchi (Hebreos 13:3, 7).

10. ¿Imamandata huaquingunaca llaquicunata aguantashpa Jehovata cazushpa cati usharca?

¹⁰ Hebreos capítulo 11​pica apóstol Pabloca nircami: ‘Huañushcacunata causachijpi chasquij huarmicunapashmi tiarca. Ashtahuangarin shujcunaca, ninanda llaquichi tucushpami huañurca.  Paicunaca, Dios causachijpi, ashtahuan ali causaita japingapaj munashpami, cacharishunmi nijpipash na munashpa huañurca’ nishpa (Hebreos 11:35). Ashtacacunaca llaquicunata charishpapash Jehová Dios causachinata tucui shunguhuan crishpami Jehová Diosta cazushpa catirca. Paicunaca jipa punllacunapi Jehová Dios huañushcacunata causachijpi cai Alpapi para siempre causachun saquinataca seguromi carca. Nabotta, profeta Zacariasta yaripai. Paicunaca Taita Diosta tucuipi cazuimandami rumicunahuan pigai tucushpa huañurca (1 Reyes 21:3, 15; 2 Crónicas 24:20, 21). Danielpash yarjachijuj leongunapa utujumanmi shitai tucurca. Paipa amigocunapash ushashcata rupajuj jorno ucumanmi shitai tucurca. Paicunaca Jehová Diosta tucuipi cazungapaj munashpami huañunata agllarca. Paicunaca Jehová Dios paipa espíritu santota cushpa, llaquicunata aguantachun ayudanataca seguromi carca (Daniel 3:16-18, 20, 28; 6:13, 16, 21-23; Hebreos 11:33, 34).

11. Feta charimandaca ¿ima llaquicunatallata huaquin profetacunaca aguantarca?

¹¹ Profeta Micayata, profeta Jeremiasta, shujcunatapash contracunaca burlarirca, prezo churarcami. Cutin profeta Eliaspash, shujcunapash ‘jichushca pambacunapi, urcucunapi, huaicucunapi, utujucunapimi pacajushpa causajurca’. Chai profetacunaca ‘imata japigrinata japigrishapacha yashpa shuyanajuimandami’ llaquicunata aguantashpa Jehovataca tucuipi cazushpa catirca (Hebreos 11:1, 36-38; 1 Reyes 18:13; 22:24-27; Jeremías 20:1, 2; 28:10, 11; 32:2).

12. a) Pipa ali ejemplotata cati ushapanchi? b) Jesusca ¿imamandata ashtahuan jatun llaquicunatapash aguantai usharca?

¹² Jesusca ashtahuan jatun llaquicunata charishpapash, Jehová Diostaca tucui shunguhuanmi cazushpa catirca. ¿Imamandata Jesusca llaquicunata aguantai usharca? Apóstol Pabloca nircami, Jesusca “cushijushpa causagrinata yachashpami” jatun racu caspipi llaquinayaita huarcui tucuna cashpapash, “nalicachishpa rimanajujpipash na pinganayachishpa huañurca. Cunanga, Taita Dios mandashpa tiajuj ali ladomanmi tiajun” nishpa (Hebreos 12:2). Chaita nishca jipami apóstol Pabloca Jesusta catijcunataca nirca, “Jesusta ricujunshna catishunchi” nishpa (Hebreos 12:3, liingui). Jesuspa ejemplota catishpami Jesusta punda catijcunapash Jehovata tucuipi cazuimanda huañurca. Chai punllacunapica Antipas shuti runagupash Jehovata tucuipi cazuimandami huañuita tarirca (Apocalipsis 2:13). Jesusta punda catijcunaca ñami Jehová Dios cusha nishcataca chasquishca. Cutin Jesús nara shamushca punllacunapi causashcacunaca Jehová Dios nishca shinami shuj paraíso Alpagupi causanata shuyanajunra (Hebreos 11:35). Jesusca 1914 huatapimi mandai callarirca. Chai huata jipacunapi ungidocuna huañushpaca ¿imata tucushca? Paicunaca jahua cielopi causangapami causarirca. Paicunami shamuj punllacunapica Jesushuan cai Alpata mandanga (Apocalipsis 20:4).

13, 14. a) Rudolf Graichen shuti huauquica ¿ima llaquicunatallata aguantarca? b) Jehovata ali sirvishpa catichunga ¿imata paitaca ayudarca?

¹³ Cunanbica Jehová Diosta ashtaca sirvijcunami Jesuspa ejemplota catinajun. Paicunaca Jehová Dios cusha nishcacunapi pensarishpami llaquicunapi cashpaca Jehovata cazui usharca. Rudolf Graichen shuti huauquipa ejemplota ricupashun. Paica 1925 huatapimi Alemania llactapi nacirirca. Pai joven cajpica paipa  taitamamacunami Bibliamanda huaquin cuadrocunata huasipi churarca. Paica nircami: “Shuj cuadropica shuj atujhuan shuj huahua llamaguhuan, shuj huahuahuan shuj leopardo animalhuan, shuj shicuhuan shuj leonhuan igual cajta, shuj uchilla huambragu michishpa purijujtami dibujashca carca” nin (Isaías 11:6-9). Chai cuadroguta ricushpami Rudolf huauquica paraíso Alpagupi ashtahuan pensarishpa shinlli feta chari usharca. Shinlli feta charimandami paica Alemania nazi nishcapa policiacuna, shinallata jipaman Alemania comunista nishcapa policiacuna catiriashpa llaquichijpipash Jehovata tucuipi cazushpa catirca.

¹⁴ Rudolf huauquica shuj jatun llaquicunatapashmi charirca. Pundapica paipa mamami shuj campo de concentración nishcapi prezo cashpaca tifus ungüi japijpi huañurca. Chai jipaca paipa taitami ñana testigo de Jehová cangapaj munanichu nishpa shuj papelta firmarca. Shina llaquicunapi cashpapash Rudolf huauquica shinlli fetami charishpa catirca. Jipamanga carcelmanda llujshishpami superintendente de circuito shina sirvijurca. Chai jipaca Galaad Escuelamanmi paitaca invitarca. Chaimandaca Chile llactapi sirvichunmi cacharca. Chaipimi Patsy shuti misionera paniguta rijsishpa paihuan cazararca. Shuj huata jipaca paicunapa  llullu huahuaguca huañurcami. Asha tiempogu jipaca paipa huarmigupashmi 43 huatacunatalla charishpa huañurca. Ninanda llaqui apashpapash Rudolf huauquica Jehovata ali sirvishpami catirca. Ña mayorllagu cashpa, ungushca cashpapash precursor regular shina, anciano shinami sirvishpa catirca. Paipa causaimanda ashtahuan yachangapaj munashpaca La Atalaya del 1 de agosto de 1997 revistapimi 20-25 paginacunata ricui ushapangui. ^[1] (Cai tema tucuripi notata ricupangui).

15. Llaquicunapi cashpapash Jehovata cushilla sirvishpa catij huaquin huauquipanicunapa ejemplocunamanda parlapai.

¹⁵ Cunan punllacunapipash ashtaca huauquicuna, panicunami ninanda llaquichi tucushpapash Jehovata ali sirvishpa catinajun. Ashtacacunaca ‘na macanajuimandami’ Eritrea, Singapur, Corea del Sur nishca llactacunapi prezo can (Mateo 26:52). Isaac, Negede, Paulos shuti huauquicunapa ejemplota ricupashun. Paicunaca 20 yali huatacunatami Eritrea llactapi nali tratai tucushpa prezo can. Chai tucui huatacunapica cazaraitapash na ushashpa, paicunapa taitamamacunatapash na cuidai ushashpami causashca. Shinapash cunangamanmi Jehovata cazushca, paicunapa fepash shinllimi can. Cunanbica carcelmanda guardiacunaca ñami chai huauquicunataca respetan. Chai huauquicunapa fototaca jw.org direccionbimi ricuita ushanchi. Paicunaca llaquicunapi cashpapash cushillami can.

16. Shinlli feta charishpaca ¿imatata rurai ushashun?

¹⁶ Jehová Diosta ashtaca sirvijcunaca, ñaupa parrafopi huauquicunashnaca na carcelpi churai tucushcanchichu o na llaquinaita tratai tucushcanchichu. Shinapash ashtacacunaca pobre caimanda, ñucanchi llactacunapillata macanajuicuna tiaimanda, terremotocunamanda, acapanacunamandami jatun llaquicunata charishcanchi. Cutin shujcunaca Abrahanba, Isaacpa, Jacobpa, Moisespa ejemplota catishpami cai mundopi rijsishca canatapash, ashtacata charina munaicunatapash ladoman saquishpa Jehovata sirvinata pundapi churashca. Chai huauquicunaca ¿imamandata Jehovata cushilla sirvishpa cati ushashca? Paicunaca Jehovata juyaimanda, Jehovapa nishcacunapi tucui shunguhuan crimandami cushilla sirvishpa cati ushashca. Ashtahuangarin, paraíso Alpagupi para siempre causana bendicionda Jehová Dios caranataca seguromi can. Paraíso Alpagupica tucui nali ruraicunami tucuringa (Salmo 37:5, 7, 9, 29, liingui).

17. a) Shinlli feta charingapaca ¿imatata rurana capanchi? b) Cati temapica ¿imatata yachajupashun?

¹⁷ Cai temapi yachajushca shinaca, shinlli feta charimandami Taita Diospa cusha nishcacunataca ‘japigrishapachami yashpa shuyanajunchi’. Shinlli feta charingapaca Jehová Diostami mañana canchi, Jehovapa cusha nishcacunapipash pensarijunami canchi. Shina rurashpami llaquicunataca aguantai ushashun. Cati temapipash feta charinamandami ashtahuan yachajupashun.