1. Feta charishcamandaca ¿imashinata sintiripanchi?

NA TUCUI gentecunachu feta charin (2 Tesalonicenses 3:2). Shinapash Jehová Diosca paipa adorajcunataca feta charichun o crichunmi ayudan (Romanos 12:3; Gálatas 5:22). Feta charichun ayudashcamandaca ashtacatami Jehová Diostaca agradicinchi.

2, 3. a) Jesuspi feta charishpaca ¿ima bendiciongunatata charinchi? b) ¿Ima ishcai tapuicunatata yachajupashun?

² Jehová Diosca Jesuspi feta churajcunapa juchacunata perdonangapami paipa juyashca Churi Jesustaca cai Alpaman cachamurca. Jesuspi feta charimandami gentecunaca Jehovapa amigo tucuitapash, para siempre causaitapash ushan (Juan 6:44, 65; Romanos 6:23). Paipa Churita cachamushcamandaca ashtacatami Jehová Diosta agradicinchi. Tucui gentecunami juchayucuna nacirimandaca huañuita chasquina canchi. Shinapash Jehová Diosca ñucanchicuna ali ruraicunata rurai ushashcatami ricushca (Salmo 103:10). Chaimandami Jehová Diosca ñucanchicunataca Jesusmandapash, Jesús ñucanchimanda huañushcatapash yachajuchun ayudashca. Jesuspi feta churashpa, Jesusta catishpami ñucanchica para siempre causana esperanzata chari ushanchi (1 Juan 4:9, 10, liingui).

 ³ Shinapash feta charinamandaca ¿imatata ashtahuan yachajui ushapanchi? Feta charingapaca ¿Jehová Dios ñucanchimanda imata rurashcata, imata ruranata yachanallachu minishtirin? Shinaca imata ashtahuan rurana cashcata yachajupashun.

4. Feta charishpaca ¿imatata rurangapaj munapanchi?

⁴ Jehová Diospi, Jesuspi feta charishpaca paicuna ñucanchimanda imata rurashcata, imata ruranata yachashca jahuapash paicuna munashcashnami causangapaj munanchi. Ashtahuangarin, shuj gentecunapash paicunata rijsichunmi ayudangapaj munanchi. Apóstol Pabloca nircami: “Jesusca ñucata Mandajmi cashca nishpami, cambaj shimihuanga villana cangui. Shinallata huañushcacunapaj chaupimanda Taita Dios paita causachishcatapash tucui shunguhuanmi crina cangui. Shina rurashpaca quishpiringuimi. Tucui shunguhuan crijpica, paihuan ali tucuchunmi Taita Diosca chasquinga. Shinallata Jesucristopajmi cani nishpa villajpica quishpichingami” nishpa (Romanos 10:9, 10, Mushuj Testamento Quichua Imbabura; 2 Corintios 4:13).

5. a) ¿Imamandata feta charinaca minishtirishca can? b) Shinlli feta charingapaca ¿imatata rurana capanchi? Shuj ejemplomanda parlapai.

⁵ Jehová Dios tucuita mandajujpi para siempre causangapaj munashpaca fetami charina canchi. Chai jahuapash ñucanchi fetaca shinlliyachishpami catina canchi. Ñucanchi feca shuj plantagu cuendami can. Shuj plantagu aliguta, juyailla viñashpa catichunga yacutami cutin cutin churana canchi. Yacuta na churajpica, chai plantaguca asha asha anguyashpami huañunga. Shinallata, shuj plantaguta cuendami ñucanchi fetapash ashtahuan shinlli cachun, ashtahuan mirachun ricuriana canchi (Tito 2:2; 2 Tesalonicenses 1:3; Lucas 22:32; Hebreos 3:12).

6. Femanda parlashpaca ¿ima ishcai yuyaicunatata Hebreos 11:1​pica intindichin?

⁶ Femanda parlashpaca ¿imatata Bibliaca nin? Hebreos 11:1 callaripica ninmi: “Japigrishapacha yashpami shuyanajunchi” nishpa (chai textota liingui). Shinaca ¿imatata shuyanajunchi? Jipa punllacunapi Jehovapa cusha nishcacuna pactarinatami shuyanajunchi. Shuj ejemplota ricupashun. Ñucanchicunaca tucuilla nali ruraicuna tucurinata, shuj paraíso Alpagu tianataca seguromi canchi. Shinallata Hebreos 11:1 cati partepica ninmi: “Crishcamandami, na ricushpapash japigrinataca aligutapacha yachanchi” nishpa. ¿Imatallata na ricushpapash crinchi? Ñucanchicunaca Jehová Diosta, Jesusta, angelcunata, jahua cielopi Diospa Reinotaca na ricui ushanchichu. Shinapash chaicuna tiajtaca tucui shunguhuanmi crinchi (Hebreos 11:3). Shinaca ¿imashinata Jehová Diospa nishcacunapi crishcata, na ricushca cosascunapi tucui shunguhuan crishcatapash ricuchi ushanchi? Ñucanchi causaihuan, ñucanchi parlashcacunahuan, ruraicunahuanmi crishcata o feta charishcataca ricuchi ushanchi.

7. Feta charinamandaca ¿imatata Noepa ejemploca yachachin? (Callari dibujota ricupangui).

⁷ ¿Imatata Noepa femandaca yachajuita ushanchi? Apóstol Pabloca nircami, Noeca “imahuan llaquichinata na ricushpapash manllashpami paipaj huasipi causajcunandi quishpiringapaj, huambuna huasita” o arcata rurarca nishpa (Hebreos 11:7). Noeca Jehovata tucui shunguhuan crishpami shuj jatun arcataca rurarca. Paipa vecinocunaca Noetaca tapunajushcangami, imapata caitaca rurajungui nishpa. Shina tapujpica Noeca villachijushcangami. Bibliapica ninmi, Noeca ‘[alita] rurashpa causanata villaj runagumi’ carca nishpa (2 Pedro 2:5). Noeca tucuilla nali gentecunata tamiahuan Jehová Dios tucuchinatami villarca. Jehová Diosca Noemanga nircami: ‘Cai pachaca ninan llaquichinahuanlla  jundami. Chaimandami causaita tucui charijcunata tucuchingapaj yarishcani. Ricui, ñucami ninanbacha tamiata cai pachaman cachamugrini. Cai pachapi tucui causajcunata tucuchingapami chashna cachamugrini. Cai pachapi ima tiashcapash tucuillami huañunga” nishpa. Chai shimicunata villashca jipapash Noeca salvaringapaj imata rurana cashcatami gentecunamanga villashcanga. Jehová Diosca nircami: ‘Huambuna jatun huasimanmi’ yaicuna cangui nishpa (Génesis 6:13, 17, 18).

8. Femanda parlashpaca ¿imatata discípulo Santiagoca nirca?

⁸ Discípulo Santiagopash apóstol Pablo hebreo huauquicunaman escribishca jipami, femanda parlashpa escribirca. Discípulo Santiagoca nircami: “Alita ruranacunata na rurajushpapash, crij cajta ricuchihuai ninimi. Ñuca crij cajtaca, alita ruranacunata rurajushcahuanmi ricuchisha” nishpa (Santiago 2:18). Santiago nishca shinaca, feta charijcunaca Taita Dios tiajta yachashpallaca na saquirinllu. Bibliapica ninmi, demoniocunapashmi Taita Dios tiajtaca ali yachan. Shinapash Jehová Diospica na feta churanllu nishpa. Jehovapi feta churanapa randica Taita Diospa contracunami tucushca (Santiago 2:19, 20). Cutin feta charijcunaca Jehovata cushichingapaj munashpami Jehová Dios alicachishca cosascunata ruran. Abrahanga paipa ruraicunahuanmi feta charishcata ricuchirca. Santiagoca nircami: ‘Ñucanchi ñaupa taita Abrahandaca ¿nachu paipa churi Isaacta altarpi Diosman carajpi, [alita] rurashcatashna ricushpa chasquirca? Abrahanga chai ruranacunata rurashpami crij cajta ricuchishca. Chai ruranacunata rurashcamandami pai crishcapash ashtahuan alipacha tucushca’ nishpa. Ashtahuangarin, feta charishcata ruraicunahuan ricuchina cashcata ali intindichingapami Santiagoca nirca: ‘Imashinami cuerpoca [“samai”, NM] illajpi ña huañun, chashnallatami crishcapash alita ruranacunata na pactachijpica huañushcashna yanga tucun’ nishpa (Santiago 2:21-23, 26).

9, 10. Jesuspi feta churashpaca ¿imatata rurana capanchi?

⁹ Discípulo Santiago escribishcamanda 30 huatacuna jipami apóstol Juanbash Evangelio de Juan nishcatapash, quimsa cartacunatapash escribirca. Paipash fe ima cajtaca alimi intindirca. Juanga griego shimipi escribishpaca crinamanda o feta charinamandaca cutin cutinmi escribirca.

¹⁰ Shuj ejemplota ricupashun. Juanga nircami: ‘Diospa Churita maijanbash crishpaca causaita causagrinatami charin. Ashtahuangarin Diospa Churita na cringapaj munajca, causaita causagrinataca napacha charingachu. Taita Dios ninanda fiñashpa llaquichinallami paitaca shuyajun’ nishpa (Juan 3:36). Jesuspi feta churashpaca Jesusta cazunami canchi. Apóstol Juan nishca shinaca, Jesusca yachachircami para siempre causangapaj munashpaca paipipash paipa Taitapipash feta churanami can nishpa (Juan 3:16; 6:29, 40; 11:25, 26; 14:1, 12).

11. Jehová Dios ayudashcamandaca ¿imashinata paita agradicishcata ricuchi ushapanchi?

¹¹ Jehová Diosca paipa espíritu santota cushpami ñucanchitaca paimanda yachajuchun, Jesusmanda yachajuchun, Jesuspi feta churachun, paipi feta churachunbash ayudashca (Lucas 10:21, liingui). Chashna ayudashcamandaca ¿imashinata Jehová Diosta agradicishun? Jehovata agradicingapaca Jesusmandalla paipa amigocuna cai ushashcatami siempre yarina canchi. Bibliapica ninmi: “Jesusmi ñucanchicuna crichun ñaupaman pushajun, paimi aligutapacha crishpa causachun” ayudan nishpa (Hebreos 12:2, NM). Ñucanchicunapash shinlli feta charishpa  catingapaca Jehovatami siempre mañana canchi. Paipa Shimitapash siempremi estudiashpa catina canchi (Efesios 6:18; 1 Pedro 2:2).

12. Shinlli feta charishcata ricuchingapaca ¿imatata rurana capanchi?

¹² Jehovapa nishcacunapi tucui shunguhuan crishcata ricuchingapaca ¿imacunatata rurana canchi? Huaquin ejemplocunata ricupashun. Diospa Reinomandami villachishpa catina canchi. Gentecunatapash Jesuspa catijcuna tucuchunmi yachachina canchi. Shinallata ‘ima aliguta maijanman rurai ushashpapash tucuicunamanmi rurana canchi’. Ashtahuanbachaca ñucanchi huauquipanicunamanmi chaitaca ‘pactachina canchi’ (Gálatas 6:10). Ashtahuangarin, Jehová Diospa ñaupajpi ali ricurishpa catingapaj munashpami ‘punda causashcata’ saquishpa tucui nali ruraicunamanda caruyangapaj shinllita esforzarina canchi (Colosenses 3:5, 8-10).

13. a) ¿Imamandata Taita Diospi crina o feta charinaca minishtirishcapacha can? b) Femanda parlashpaca ¿imatata Bibliaca ashtahuan nin? ¿Imamanda shina nin?

¹³ Bibliapica ninmi: “Crishpallami Taita Diostaca cushichin. Taita Diospajman quimiringapaj pipash munashpaca, pai tiajtaca crinapachami. Paita mascashpa causajcunaman aliguta caranatapash crinapachami” can nishpa (Hebreos 11:6). Feta charinamanda parlashpaca Bibliapica ninbashmi, callaripica ‘Taita Diosta crinaca’ minishtirishcapachami can nishpa. ¿Imamandata callaripica nin? Bibliapi nishca shinaca, feca shuj huasipa cimientocunashnami can (Hebreos 6:1). Shinapash, Jehová Diospa amigo cashpa catingapaj munashpaca feta charishca jahuapash ¿imatata charina capanchi? (2 Pedro 1:5-7, liingui; Judas 20, 21).

14, 15. Apóstol Pablo nishca shinaca ¿imamandata juyaita charinaca ashtahuan minishtirishca can?

¹⁴ Bibliata griego shimipi escribijcunaca feta charinamandaca ashtacatami escribirca. Shinapash ¿feta charinachu ashtahuan minishtirishca can?

¹⁵ Apóstol Pabloca nircami, feta charinapash juyanapash minishtirishcapachami can nishpa. Paica nircami: “Urcucunata shujmanda shujman yalichingapaj, tucui shunguhuan crij cashpapash, juyaita na charishpaca, imapash na canichu” nishpa (1 Corintios 13:2). Jesuspash nircami, Taita Diosta juyanami ‘mandashca shimipica ashtahuan yali ali can’ nishpa (Mateo 22:35-40). Juyaita charishpaca Taita Diosta cushichingapaj munashpami shuj cosascunatapash rurashun. Shuj ejemplota ricupashun. Bibliapica ninmi, juyaica “tucuita crinllami” nishpa. Shinaca juyaita  charishpaca, Jehová Diospa nishcacuna cierto cajtaca tucui shunguhuanmi crishun (1 Corintios 13:4, 7).

16, 17. a) Feta charinamanda, juyaimanda parlashpaca ¿imatata Bibliaca nin? b) Jipa punllacunapica ¿imata ashtahuan minishtirishca canga? ¿Imamandata shina canga?

¹⁶ Feta charinapash, juyanapash minishtirishcapacha cajpimi Bibliata escribijcunaca feta charinamandapash, juyanamandapash igual escribin carca. Apóstol Pabloca huauquipanicunataca cashna nishpami animarca, soldadocuna paicunapa ‘shunguta pacangapaj jirru churajunshnami, crinatapash juyanatapash churajushpa causana’ canguichi nishpa (1 Tesalonicenses 5:8). Apóstol Pedropash Jesusmanda parlashpaca nircami: ‘Jesucristota na ricushca cashpapash ninandami juyanguichi. Cunanbi na ricushpapash paita crishpami causanajunguichi’ nishpa (1 Pedro 1:8). Discípulo Santiagopash ungido huauquicunataca cashna nishpami tapurca: ‘¿Nachu Taita Diosca, cai pachapi causanajuj imagutapash na charijcunatara agllashca? Paita ninanda crishpa charijyashpa, paita juyajcunamanmi pai mandajuj llactaguta carashapacha nishcata japigrichun agllashca’ nishpa (Santiago 2:5). Apóstol Juanga nircami, Taita Diosca mandanmi, “paipaj Churi Jesucristota crichun, caishujhuan chaishujhuan juyarishpa causachun” nishpa (1 Juan 3:23).

¹⁷ Shinapash apóstol Pabloca nircami: ‘Cunanga crinapash, shuyanapash, juyaipash tiangallami. Cai quimsamandaca juyaimi ashtahuan yali ali’ can nishpa (1 Corintios 13:13). ¿Imamanda shina nirca? Jipa punllacunapica Jehová Diospa tucuilla nishcacuna pactarijpimi feta charinaca ñana minishtiringa. Chai punllacunapimi ñucanchicunaca Bibliapi nishca shina shuj juyailla causaita charishun. Chai punllacunapi feta charina ñana minishtirijpipash, Jehová Diostapash gentecunatapash juyanaca minishtirishcapachami canga. Chaipica Jehovatapash gentecunatapash ashtahuan ashtahuanmi juyashpa catishun.

18, 19. a) Jehová Dios paipa espíritu santohuan cunanbi ayudashcamandaca ¿imata pasashca? b) ¿Imamandata Jehová Diostaca alabana capanchi?

¹⁸ Cunan punllacunapi Jehovata sirvijcunaca Diospa Reino tiajta crishpami Diospa Reinota apoyanajun. Shinallata feta charimandami caishujhuan chaishujhuan juyarin. Paicunaca Jehová Dios paipa espíritu santohuan ayudajpimi shina causai ushashca (Gálatas 5:22, 23). Jehová Dios ayudashcamandami cunanbica mundo enteropi 8 millón yali huauquipanicuna congregaciongunapi tranquilo, shujllashna tandanajushca caita ushan. Imashinami ricunchi, feta charinapash juyanapash minishtirishcapachami can.

¹⁹ Jehová Dios ayudajpillami tandanajushca caita ushashcanchi. Chaimandami paitaca alabana canchi (Isaías 55:13). Paipi ‘crishcamanda’ ñucanchita quishpichishcamandaca tucui shunguhuanmi agradicina canchi (Efesios 2:8). Jehová Diosca shuj gentecunapash paipi feta churachunmi ayudashpa catinga. Shina ayudajpimi mundo enteropica jucha illaj, alita ruraj, cushilla gentecuna Jehová Diostaca para siempre alabashpa causanga.