Nueva York llactapica Betelmanda huauquicunaca, WBBR radiopa estaciondami shuj huata yalipi tucuchirca. Primeroca trabajadorcunapa shuj edificiota y shuj bodegatami rurai callarirca. Chai jipaca estación de radiota funcionachingapami huaquin trabajocunata rurai callarirca. Shinapash huauquicunaca huaquin jarcaicunatami chari callarirca.

Pundapica 91 metrota midij antenata shayachinaca dificilmi carca. Shinapash Jehová Dios ayudajpimi antenataca shayachita usharca. Calvin Prosser huauquiguca cashnami nirca: “Callarishcandi antenata shayachishpaca, ñucanchi ushaimandami antenataca shayachishcanchi nishpami yuyaiman carcanchi”. Shinapash huauquicunaca Jehová Dios ayudashcatami cuenta japirca. Pero ashtahuan jarcaicunami ricurirca.

Chai tiempopi estación de radiocuna chairalla llujshishca caimandami, radiopa equipocunata randinaca difícil carca. Shinapash huauquicunaca radiopa utilizashca equipocunatami randirca. Shuj microfonota utilizanapa randica shuj telefonopa microfonotami utilizarca. Chai equipocunahuanmi febrero quillapica shuj pruebata rurarca. Chai pruebapica canticocunatami yalichirca. Ernest Lowe shuti huauquica, paicuna candanajujpi juez Rutherford huauqui cayashcatami yuyarin. b Rutherford shuti huauquica Brooklynmandami radiotaca uyajushcarca.

 Chaimi huauqui Rutherfordca Ernest Lowe shuti huauqui telefonota contestajpica: “Quiquinguna candanajunmi uyarijun, radiota apagaichi” nishcarca. Radio funcionajujta cuenta japishpami, paicunaca radiotaca uchalla apagarca.

24 de febrero de 1924 huatapimi, huauqui Rutherfordca “Diospa Gobiernomanda predicangapami radiotaca utilizashun. Gentecuna Bibliamanda cabal yachachishcacunata tucui gentecuna yachajuchunmi radiotaca utilizashun” nirca.

33 huatacunatami Jehová Diospa organizacionga, WBBR radiotaca ali villaigucunata predicangapaj utilizashca.

Julio de 1924 huatapimi, Bibliamanda Estudiantecunaca Columbus llactapi shuj asambleata charingapaj tandanajurca. Chai asambleataca alemán, árabe, escandinavo, francés, griego, húngaro, inglés, italiano, lituano, polaco, ruso, ucraniano y Europa shuj shuj shimita parlaj huauquipanicunami uyarca. Asambleapa huaquin partecunataca radiopimi yalichirca. Shinallata huauquicunaca asambleapa yuyaita cada punlla llujchichunmi shuj periodicotaca mañarca.

Jueves 24 de julio quillapimi, asambleaman rishca 5 mil yali huauquipanicunaca predicarca. Paicunaca casi 30 mil librocunatami saquirca. Shinallata ashtaca curso biblicocunatapashmi chari callarirca. The Watch Tower revistapica chai punllataca “shuj jatun cushijuimi can” nirca.

Viernes 25 de julio punllataca huauquigu Rutherfordca na manllashpami curacuna llullanajushcataca nirca. Huauqui Rutherfordca “politicocuna, religionda ñaupaman pushajcuna, negociantecunaca, gentecuna Diospa Gobiernomanda yachajushpa, Diospa bendiciongunata chasquita ushachun jarcashca” nircami. Shinallata huauquica, Taita Diospa Gobiernota apoyanchi nishpa Sociedad de Naciones nishcata apoyaimandami chai gentecunataca tacurirca. Ashtahuangarin chai gentecunaca Sociedad de Nacionesta apoyashpaca, Taita Diospa Gobiernota apoyanchi nishpami yuyan carca. Chaimandami huauqui Rutherfordca paicunataca tacurirca. Bibliamanda Estudiantecunaca na manllashpami gentecunamanga chai mensajeta predicana carca.

 Asambleamanda parlashpaca, The Watch Tower nishca revistaca cashnami nirca: “Asambleaman rishca huauquipanicunaca ima pasajpipash na manllashpalla villachingapami llujshirca”. Leo Claus shuti huauquica, asambleapi ima pasashcata yuyarishpami cashna nin: “Ñucanchi llactapi chai mensajeta tucui gentecunaman predicangapaca decididomi caparcanchi”.

Octubre quillapica, huauqui Rutherford nishca copiacunatami Bibliamanda Estudiantecunaca ashtaca millón gentecunaman entregai callarirca. Chai copiacunaca Eclesiásticos denunciados nishcami carca. Frank Johnson shuti huauquica chaishuj publicador huauquicunahuan tuparingapaj 20 minutocuna faltajpillatami, tratadocunata entreganataca tucuchishca carca. Pero huaquin vecinocunaca chashna predicajushcamandami culirashca carca. Chaimi huauquica chaishuj huauquicunataca maipipash na shuyaita ushaimandami shuj iglesiapi pacajurca. Chai iglesiapi pipash na tiajpimi, huauquiguca cada asientopi shuj tratadota saquishpa uchalla llujshirca. Tiempota charishcamandami ishcai iglesiacunaman yaicushpapash chaitallata rurarca.

Frank shuti huauquiguca huauquicunahuan tuparingapaj quedashca pushtumanmi rirca. Catirianajuj jaricuna ama tarichunmi huauquiguca shuj gasolinera huashapi pacajurca. Chai gentecunaca huauqui maipi pacajushcata na ricushpami yalirca. Chai gentecuna yalishcandimi chaishuj huauquicunaca huauqui Frank maipi cashcapi tuparirca.

Shuj huauquiguca cashnami nin: “Chai quimsa iglesiapa ñaupapica más o menos 50 gentecunami cada iglesiapi shayanajujta ricurcanchi. Huaquingunaca tratadotami liinajurca. Cutin shujcunaca tratadotaca sacerdotemanmi ricuchinajurca. Chai situacionbi Jehová Dios ayudashcamandaca ninandami agradiciparcanchi”.

Shuj llactacunapipashmi Bibliamanda Estudiantecunaca na manllashpa predicarca. Por ejemplo, Francia llactapica Józef Krett shuti huauquica minaspi trabajaj gentecunamanmi predicarca. Huauquiguca “Huañushcacunaca ñami causaringa” nishca discursotami cugrijurca. Chai discursota uyachun invitaciongunata entregai callarijpica, sacerdoteca chai llactamanda gentecunataca na rinachu canguichi nishpami prohibirca. Shinapash chai discursota uyangapaca 5 mil yali gentecuna y sacerdotepashmi rishcarca. Sacerdotetaca quiquinba crishcacunataca difindita ushanguimi nishpami nirca. Shinapash paica na munarcachu. Józef Krett huauquiguca apashca publicaciongunataca tucui gentecunamanmi saquirca. Y sacerdotemanga gentecunaca Taita Diosmandami yachajungapaj munan nircami (Amós 8:11).

Claude Brown shuti huauquica Ghana llactapimi predicarca. Discursocunamanda y publicaciongunamandami ashtaca gentecunaca Taita Diosmanda yachajui callarirca. John Blankson shuti jariguca, huauqui Brownba discursocunata uyaimandami Bibliamanda cabal yachachishcacunata yachachijujta cuenta japirca. Paica cashnami nin: “Bibliamanda yachajushpaca shuj gentecunaman parlanatami ninanda gushtahuan carca”.

Trinidadmanda Bibliapi imata nijta ali intindimandami huauqui Johnga shuj viajeca iglesiaman yaicushpami sacerdotetaca trinidadmanda  tapurca. Chaimi sacerdoteca: “Canga na cristianochu cangui. Caimanda llujshi” nishpa nirca.

Huasiman chayashpaca sacerdotetaca trinidadmanda difindingapaj munashpaca, shuj tandanajuiman shamuita ushapanguimi nishpa shuj cartata escribirca. Sacerdoteca John huauquitaca pai estudiajushca Universidadpa profesorpa oficinaman richunmi nirca. Chaimi profesorca Johndaca: “¿Canllu sacerdotemanga escribircangui?” nishpa tapurca.

Ari, ñucami escribircani nirca.

Chaimi profesorca Johndaca sacerdoteman disculpahuai nishpa shuj cartata escribichun mandarca.

Chaimi Johnga cashna escribirca: “Ñuca profesorca quiquinda disculpahuai nishpa mañachunmi mandahuashca. Pero ñucami pandata yachachijuni nijpimi ñucaca quiquinhuanga disculparisha”.

Chaimi profesorca: “John ¿caitachu cachangapaj munangui?” nishpa tapurca.

Ari, chaitami cachangapaj munani.

Shina cashpaca, universidadmandami llujshina cangui. Ñucanchica sacerdotetami apoyana canchi ¿ima nishpata paipa contra tucujungui?

Pero profesor, ñucanchi imatapash na intindishpaca ¿nachu quiquinda tapupanchi?

Ari.

Sacerdote Bibliamanda yachachijujpimi ñucaca shuj tapuitalla rurarcani. Na contestajpica ¿ima nishpata ñucaca disculpata mañana cani?

Shina nijpimi John huauquitaca universidadmandaca na llujchirca y disculpatapash na mañarca.

Chai huatapi imacunalla pasashcata ricushpami The Watch Tower revistapica cashna nijurca: “David nishcashnami ñucanchicunapash: ‘Macanajuchunga, chumbilichinshnami ushaita cuhuarcangui’ nita ushanchi (Salmo 18:39). Cai huatapica imashina Jehová Dios ñucanchicunata ayudashcata ricushpami ninanda cushijupanchi. Paipa sirvijcunaca ali villaigucunataca cushijushpami predicashca”.

Nara huata tucurijpillatami huauquicunaca ashtahuan ali villaigucunata radiopi yalichingapaj decidirca. Chaimi Chicago llactapica shuj mushuj estación de radiota rurai callarirca. Chai radiotaca Diospa Shimita parlaimandami WORD nishpa shutichirca. Chai radiotaca Canadá llactacamanmi uyaita usharca.

1925 huatapica Bibliamanda Estudiantecunaca Apocalipsis capítulo 12​tami ashtahuan aliguta intindita ushagrinajurca. Apocalipsis capítulo 12pa mushuj entendimientocunata na chasquishpami huaquin huauquipanicunaca Jehová Diosmanda caruyarca. Shinapash ashtaca huauquipanicunaca jahua cielopi pasashca cosascuna, cai alpapi Diosta sirvijcunata imashina afectanata yachashpami ninanda cushijurca.