1, 2. a) ¿Imacunamandata huaquinbica na seguro sintirinchi? b) Cai temapica ¿imatata yachajugripanchi?

 TUCUI gentecunallatami huaquinbica imacunamandapash na seguro sintirin. a Por ejemplo, caipi pensaripashunchi. Shuj jovenga, Jehová Dios paimanda preocuparijta o na preocuparijta na seguro caimandami bautizarinataca na decidin. Cutin shuj huauquiguca, joven cashpa trabajashpa ashtaca culquita gananapa randica Jehová Diosta sirvinatami decidirca. Shinapash cazarashpa shuj familiata charimandami paipa familiata mantiningapaj culqui na pactajpica, Jehovatara primero sirvinata decidishpaca ¿alitachu rurarcani nishpa pensarita ushanman? Cutin shuj mayorlla paniguca joven cashcashna Jehová Diosta na sirvi ushajushpami, talvez desanimada sintirijunga. Quiquinbash talvez Jehová Diosca ¿ñucamanda preocuparinlla? Paita ashtahuan sirvingapaj imapash decisiongunata japishpaca ¿alitachu rurarcani? Jehová Diosta pundashna na sirvi ushajpipash, Jehová Diosca ¿ñucataca juyashpa catingarachu? nishpami talvez pensarita ushapangui.

² Chashna nali pensamientocunata charishpaca Jehová Diospi crinata y paita sirvinatami saquita ushanchiman. Cai temapica Jehová Dios ñucanchimanda preocuparishcata, Jehová Diosta sirvingapaj japishca decisionguna ali cashcata y Jehová Diosta pundashna na sirvi ushajpipash pai ñucanchita juyashcata seguro cangapaj Biblia imashina ayudajtami yachajupashun.

 IMAPASH DUDACUNATA CHARISHPACA ¿IMATATA RURAITA USHAPANCHI?

3. Dudacunata charijpica, ñucanchitaca ¿imata ayudaita ushan?

³ Imamandapash dudajujpica Bibliami ñucanchitaca ayudaita ushan. Bibliami ñucanchicunataca Jehová Dioshuan ashtahuan ali amigo tucuchun ‘tucui shunguhuan’ crichunbash ayudanga (1 Cor. 16:13).

4. 1 Tesalonicenses 5:21​pi nishca consejotaca ¿imashinata catita ushapanchi?

⁴ (1 Tesalonicenses 5:21​ta liipangui). Bibliapica: “Tucui cosascuna cabal cajta o na cabal cajtaca aligutami ricuna capanguichi” nijunmi. Ñucanchi pensashcacuna ali cajta, nali cajta yachangapaca, Bibliapi imata nijtami ricuna capanchi. Por ejemplo, caipi pensaripai. Shuj joven Jehová Dios paimanda preocuparijta o na preocuparijta na seguro cashpaca ¿imatata rurana can? Bibliata liishpami Jehová Dios imata paimanda yuyajta yachajuna can.

5. Dudacunata charishpaca Jehová Dios imata yuyajta yachangapaca ¿imatata ruraita ushapanchi?

⁵ Bibliata liishpaca Jehová Diosta uyajunshnami capanchi. Pero dudacunata charishpaca Jehová Dios chaicunamanda imata yuyajta yachangapaca, Bibliapi chai temamanda parlaj textocunatami mascana capanchi y Jehová Diospa organización cushca publicaciongunatapashmi investigaita ushapanchi (Prov. 2:​3-6). Ñucanchi dudajushca temamanda respuestacunata taringapaj estudiajushpaca, Jehová Diospa ayudata mañanaca importantepachami can. Shina rurashpami ñucanchita ayudaj consejocunata, informaciongunatapash tarita ushapashun. Shinallata ñucanchishnallata sintirishca personacunamandami Bibliapica yachajuita ushapanchi.

6. Dudacunata charijpica ¿imashinata reuniongunaman rinaca ayudaita ushan?

⁶ Tandanajuicunaman rishpapashmi Jehová Dios imata yuyajtaca yachajuita ushapanchi. Tandanajuicunaman na faltashpa rishpaca, ñucanchi dudajushca yuyaicunamandaca shuj discursopi o shuj comentariopimi Jehová Dios chai yuyaimanda imata pensajta yachajuita ushapanchi (Prov. 27:17). Cunanga ima dudacunata chari ushashcata, shina dudacuna ricurijpi imata rurana cashcatami yachajugripanchi.

JEHOVÁ DIOSCA ÑUCAMANDACA ¿PREOCUPARINLLU?

7. Huaquinbica ¿imatata pensaita ushapanchiman?

⁷ Jehová Diospa ñaupapica imapapash na valinshnami talvez sintiripashcangui. Shina sintirishpaca Jehová Dioshuan amigo caitaca nunca na ushashachu nishpami pensapanguiman. Talvez rey Davidpash imapapash na valinshna sintirimandami cashna pensarishcanga: “Mandaj Dioslla, ¿runaca ima cajpita paitaca yarijupanguiyari? Na cashpaca, ¿imamandata huañuna aichayu runataca, ninan valishcatashna charinguiyari?” nircami (Sal. 144:3). Jehová Dios ciertopacha gentecunamanda preocuparin cashcataca cati yuyaipimi ricupashun.

8. 1 Samuel 16:​6, 7, 10-12​pi nishcashnaca, Jehová Diosca gentecunapica ¿imatata ricun?

⁸ Shuj persona shujcunapa ñaupapi na valinshna ricurijpipash Jehová Diospa ñaupapica ninanda valishcami can. Por ejemplo, Jehová Diosca Israel llactapa shuj reyta agllachunga, Samueltaca Jesepa churicunamanda shuj churita agllachunmi cacharca. Samuel chayajpica, Jeseca paipa 7 churicunata Samuelman presentashpapash, Davidtaca na presentarcachu. b Shinapash Jehová Diosca Davidtami Israel llactapa rey cachunga  agllashca carca (1 Samuel 16:​6, 7, 10-12​ta liipangui). Jehová Diosca ¿imamandata Davidtaca agllarca? Porque Davidca Taita Diospa mandashcacunata cazungapaj munaj, ali shunguta charij jovenmi carca.

9. Jehová Dios quiquinmanda preocuparijtaca ¿imamandata seguro caita ushapangui? (Fotota ricupangui).

⁹ Jehová Dios quiquinmanda preocuparishcata ricuchingapaj imatalla rurashcapi pensaripai. Paica ñucanchita ali ali rijsimandami minishtirishca consejocunata cushpa ayudan (Sal. 32:8; Sal. 139:1). Jehová Diospa consejocunata ñucanchi causaipi pactachina ali cashcata ricushpaca, Jehová Dios ñucanchimanda preocuparijtaca ashtahuan seguromi capashun (1 Crón. 28:9; Hech. 17:​26, 27). Jehová Diosca paita sirvingapaj imatalla rurajta, shinallata ali cualidadcunata charishcata alicachishpami ricun (Jer. 17:10). Jehová Diosca paipa amigo cachunmi munan (1 Juan 4:19).

JEHOVÁ DIOSTA ASHTAHUAN SIRVINATA DECIDISHPACA ¿ALITACHU RURASHCANI?

10. Jehová Diosta ashtahuan sirvingapaj japishca decisiongunamandaca ¿imatata pensarita ushapanchiman?

¹⁰ Huaquingunaca Jehová Diosta ashtahuan sirvina decisionda japishcamandami arripintirita ushanman. Por ejemplo, huaquingunaca Jehová Diosta ashtahuan sirvingapaj munaimandami shuj ali trabajota y shuj ali negociota charinata saquishca. Shinapash tiempohuan huaquin rijsishcacuna ashtaca culquita charijta ricushpa, ali causanajujta ricushpami talvez cashna pensarita ushanman: “Jehovata ashtahuan sirvinata decidishpaca ¿alitachu rurarcani? O ¿ashtahuan culquita ganangapachu trabajana carcani?” nishpa.

11. Salmo 73​ta escribij runaguca ¿imamandata llaquilla y preocupado sintirin carca?

¹¹ Quiquinbash talvez chashna pensamientocunatallata charishca cashpaca, Salmo 73 librota escribij runagu imashina sintirishcata  pensarita ushapangui. Salmos librota escribij runaguca Jehová Diosta na sirvijcunara ali saludta, tranquilo causajta, ashtaca culquita charijtami ricurca (Sal. 73:​3-5, 12). Jehová Diosta na sirvij gentecunara ali causajtashna ricushpami Salmista runaguca, Jehová Diosta sirvingapaj imatapash ruranaca na sirvijtashna ricurca. Chashna nali pensamientocunata charimandami Salmista runaguca cada punlla llaquilla, preocupadomi yalin carca (Sal. 73:​13, 14). Shinapash ama shina pensashpa catichunga ¿imata paitaca ayudarca?

12. Salmo 73:​16-18​pi nishcashnaca, salmista runagutaca aliguta pensarichunga ¿imata ayudarca?

¹² (Salmo 73:​16-18​ta liipangui). Salmista runaguca aliguta pensaringapaca Jehová Diospa templo huasimanmi rin carca. Salmista runaguca Diosta na sirvijcuna ali causaita charinshna ricurijpipash paicuna na para siempre cushilla causai ushashcatami cuenta japirca. Ashtahuangarin Jehová Diosta sirvina ali cashcata cuenta japishpami, tranquilo sintirishpa Jehová Diosta sirvishpa catirca (Sal. 73:​23-28).

13. ¿Imamandata tranquilo, ali sintirita ushapanchi? (Fotocunata ricupangui).

¹³ Quiquinbashmi salmista runagushnallata tranquilo sintirita ushapangui. Jehová Diosta sirvimanda ima bendiciongunatalla charishcapi pensarinami tranquilo sintirichunbash ayudan. Cutin Jehová Diosta na sirvijcunaca paipa bendiciondaca na charinllu. Paicunaca cai mundopi tiashca cosascunahuanllami cushijushpa causanajun. Shinapash Jehová Diosca paipa sirvijcunamanga cunanbipash, shamuj punllacunapipash ashtaca ali bendiciongunata caranatami prometishca (Sal. 145:16). Jehová Diosta sirvinata na agllashca cashpaca, ñucanchi causaihuan ima pasanataca na yachanchimanllu carca. Pero Jehovata y  shuj gentecunata juyaimandami ali cosascunata ruranata decidishpaca cushilla causaita ushapashun.

IMAPAPASH NA VALINSHNA SINTIRISHPA

14. Huaquin huauquipanicunaca ¿imashinata sintirin?

¹⁴ Huaquin huauquipanicunaca paicunapa edadmanda, nali saludmanda o shuj discapacidadta charimandami Jehová Diostaca paicuna munashcashnaca na sirvita ushan. Chaimandami imapapash na valinshna sintirita ushan.

15. Salmista runaguca ¿imatata seguro carca?

¹⁵ Salmo 71​ta escribij jarigupash imapapash na valinshnami sintirirca. Chaimandami Jehová Diostaca: “Ñuca ushai illaj tucujpipash, ama jichushpa saquihuanguichu” nirca (Sal. 71:​9, 18). Shinapash salmista jariguca Jehová Diosta tucui shunguhuan sirvijpica paita ayudanata y ñaupaman pushanataca seguromi carca. Shinallata Jehová Diosta sirvingapaj tucui usharishcaguta rurajpica, Jehová Dios chai rurashcacunamanda cushilla sintirijtami yachajurca (Sal. 37:​23-25).

16. Mayorlla huauquipanigucunaca ¿imashinata ayudaita ushan? (Salmo 92:​12-15).

¹⁶ Mayorlla huauquipanicunataca Jehová Diosca ninandami juyan. Pundashna Jehová Diosta na sirvi ushajpipash, Jehová Diosca shujcunata animachun, ayudachunmi paicunataca utilizaita ushan (Salmo 92:​12-15​ta liipangui). Imata na rurai ushashcapi yapata pensarinapa randica, imata rurai ushashcagutami rurangapaj esforzarina capangui. Por ejemplo shujcunata ayudashpa, shujcunamanda preocuparishpami ayudaita ushapangui. Shinallata Jehová Dios quiquinba causaipi imashina ayudashcata, Jehová Dios cushca promesacunamanda maijan pactarichun munashcatami shujcunaman parlaita ushapangui. Quiquinba rurashca oraciongunapash  shujcunataca ninandami ayudaita ushan (1 Ped. 3:12). Shinaca tucuicunallatami Jehová Diosta sirvingapaj y shujcunatapash ayudangapaca imagutapash ruraita ushapanchi.

17. ¿Imamandata shujcunahuanga na compararijuna capanchi?

¹⁷ Jehová Diosta pundashna na sirvi ushashcamanda yapata llaquilla sintirijushpaca, quiquinba tucui esfuerzocunata Jehová Dios valorajtaca seguromi cana capangui. Shinallata shujcunahuanga na compararinachu capangui. Porque Jehová Diosca ñucanchicunataca shujcunahuanga nunca na comparanllu (Gál. 6:4). Por ejemplo, María huarmiguca Jesuspa chaquipimi mishquilla ashnajuj valishca aceiteta javirca (Juan 12:​3-5). Cutin shuj viuda pobre huarmiguca ishcai uchilla culqui monedagutami templo huasipa cajapi churarca (Luc. 21:​1-4). Shinapash Jesusca cai ishcai huarmigucunapa ruraicunataca na comparashpa ricurcachu. Ashtahuangarin cai ishcai huarmigucuna shinlli feta charishcatami ricurca. Shinaca Jehová Diosca paita juyaimanda, shinlli feta charimanda, paita sirvingapaj tucui esfuerzocunata rurajtaca ninandami valichin.

18. Dudacunata charishpaca ¿imatata ruraita ushapangui? (“ Bibliami ama dudacunata charishpa catichun ayudan” nishca recuadrota ricupangui).

¹⁸ Tucuicunallatami huaquinbica dudacunata charipanchi. Shinapash Biblia imashina chai dudacunata ama charishpa catichun ayudajtami yachajupashcanchi. Chaimandami Bibliata aliguta estudiashpaca Jehová Diospi ashtahuan confiachun ayudanga. Jehová Dios quiquinmanda preocuparijta, paita sirvingapaj rurashca sacrificiocunata valorajta, shinallata quiquinda bendicianataca seguromi cana capangui. Jehová Dios quiquinda juyajta, siempre cuidanataca nunca na cunganachu capangui.