1. Jehová Diosca paipa sirvijcunamanda ¿imashinata sintirin?

 JEHOVÁ DIOSCA paipa sirvijcuna llaquilla cajpi, cushilla cajpi imacunalla ñucanchi causaipi pasajtaca tucuitami ali ali yachan (Sal. 37:18). Jehová Diosca ñucanchicuna llaquicunata charishca jahua paita sirvingapaj esforzarijta ricushpaca ninandami cushijun. Chaimi ñucanchita ayudangapaj y consolangapaj munan.

2. Shungu ucupi ninanda llaquirij gentecunamandaca Jehová Diosca ¿imatata ruran? Jehová Diospa ayudamanda ñucanchicuna beneficiaringapaca ¿imatata rurana capanchi?

² Shungu ucupi ninanda llaquirijcunamanda parlashpaca, Salmo 147:3​pica Jehová Diosca “chugricunatapash huatachishpami alichin” ninmi. Cai versopica Jehová Dios imashina llaquilla cajcunata juyaihuan cuidajta, ayudajtami ricuchin. Shinapash Jehová Diospa ayudamanda ñucanchicuna beneficiaringapaca ¿imatata rurana capanchi? Por ejemplo shuj persona chugrishpaca shuj doctorpamanmi rina can. Shinapash ali tucungapaca doctor ima nishcatami tucuita cazuna can. Cai temapica shungu ucupi llaquilla cajcunata Jehová Dios imashina Bibliahuan ayudajtami yachajupashun. Shinallata paicuna imashina Jehová Diospa consejocunata pactachi ushashcatapashmi yachajupashun.

JEHOVÁ DIOSPACA ÑUCANCHICUNACA VALISHCAPACHAMI CAPANCHI

3. ¿Imamandata huaquin gentecunaca pipash ñucataca na juyahuangachu nishpa yuyan?

³ Cunan punllacunapica shujcunata na juyaj gentepuracunapimi causapanchi. Chaimandami ashtaca gentecunaca shujcunata nali tratashpa, imapapash na valijtashna sintichin. Helen a shuti paniguca cashnami nin: “Ñuca taitamamaca ñucanchitaca na juyashcachu.  Ñuca papitoca millai millaimi carca. Shinallata cutin cutinmi ñucanchitaca imapapash na valinguichichu nishpa nin carca”. ¿Talvez quiquindapashchu pipash nali tratashca? ¿Imatapash nishpa nali sintichishca o pipash candaca na juyangachu nishpachu llaquilla sintichishca? Chai cosascuna pasashcamandami pipash juyani nijpi crinaca difícil caita ushan.

4. Salmo 34:18​pica Jehová Diosca ¿imatata nin?

⁴ Aunque shuj gentecuna nali tratashca cajpipash Jehová Dios quiquinda juyajta, valorajtaca seguromi cana capangui. Jehová Diosca “shungupi ninanda llaquirishpa causajcunapaj ladopimi” can (Salmo 34:18​ta liipangui). ‘Shungupi ninanda llaquilla’ cashpaca Jehová Dios quiquinba shungupi ali cosascunata ricushcata, shinallata paita sirvichun saquishcatami siempre yuyarina capangui (Juan 6:44). Shinallata quiquinda ninanda juyaimandami ayudangapaca listo can.

5. Nali tratai tucushca gentecunata Jesús juyaihuan tratashcamanda ¿imatata yachajupanchi?

⁵ Jesuspa ejemplomi Jehová Dios imashina cashcata intindichunga ayudan. Jesús cai alpapi cashpaca shujcuna na ricunayachijpi llaquilla sintiri gentecunamanda preocuparishcata y juyashcatami ricuchirca (Mat. 9:​9-12). Jesusca shuj unguita charij huarmigu ali tucuna yuyaihuan paipa churajunata tacarijpica chai huarmiguhuan culiranapa randica paita consolashpa, shinallata shinlli feta charishcamandami felicitashpa cushichirca (Mar. 5:​25-34). Jesusca paipa Taita Jehová Dioshnami juyaj, llaquij can (Juan 14:9). Quiquinga Jehová Diospaca valishcami capangui. Shinallata shinlli feta charijta y paita juyajtaca Jehová Diosca alimi yachan.

6. Imapapash na valinshna sintirishpaca ¿imatata ruraita ushapanchi?

⁶ Imapapash na valinshna sintirijushpaca ¿imatata rurana capangui? Jehová Dios quiquinda juyajta parlaj versocunatami liina capangui. Shinallata chai versocunapimi pensarina  capangui (Sal. 94:19). b Quiquin munashcashna na tucuita pactachi ushashpa o shujcunashna na imagutapash rurai ushashpaca na desanimarinachu capangui. Jehová Diosca quiquin imata rurai ushashcagutalla rurachunmi munan (Sal. 103:​13, 14). Maltratai tucushca cashpa o violai tucushca cashpaca na culparijunachu capangui. Quiquinga imapash culpataca na charipanguichu Jehová Diosca dañota ruraj gentecunatami juzganga, pero Jehová Diosca maltratai tucushca o llaquichi tucushcacunatami ayudanga (1 Ped. 3:12). Huahua cashpa maltratai tucushca Sandra paniguca ninmi: “Jehová Diostaca ñucapi ali cualidadcunata ricungapaj ayudahuai nishpami cutin cutin mañani”.

7. Difícil causaita charishca cashpaca ¿imashinata shujcunata ayudaita ushapanchi?

⁷ Jehová Diosca shujcunata ayudachunmi quiquindaca utilizaita ushan. Jehová Diosca ali villaigucunata predicana bendiciondami quiquinmanga cushca (1 Cor. 3:9). Difícil causaita charishca cashpaca shujcunata imashina ayudanata, imashina sintirishcata intindinaca ashtahuan facilmi caita ushan. Párrafo 3​pi parlashca Helen panigutaca paipa causaipi pasashca cosascunami shujcunata ashtahuan ali ayudaita ushachun ayudashca. Paica ninmi: “Pundaca imapapash na valinmi sintirin carcani. Shinapash Jehová Diosca ñucata ninanda juyashcata y valishca cashcatami sintichihuashca”. Helen paniguca cunanga cushillami can. Shinallata precursora regular cuendami sirvijun.

JEHOVÁ DIOS PERDONASHCATAMI SEGURO CANA CAPANCHI

8. Isaías 1:18​pica Jehová Diosca ¿imatata nin?

⁸ Huaquin huauquipanicunaca Jehová Diosta nara rijsishpa juchata rurashcamanda o bautizarishca jipa imapash juchata rurashcamandami llaquillapacha sintirin. Shinapash Jehová Dios ñucanchita juyaimanda, pecadocunata perdonachunga paipa churiguta ñucanchimanda huañuchun cachamushcatami siempre yarina capanchi. Jehová Diosca ñucanchitaca “ñucahuan cutin ali tucungapaj shamuichi” ninmi. c Ñucanchi juchacunamanda arripintirishpa paita perdonahuai nijpica Jehová Diosca tucuilla ñucanchi pecadocunatami perdonanga (Isaías 1:18​ta liipangui). Punda nali rurashcacunata Jehová Dios cungashcata yachashpaca ninandami agradicipanchi. Shinapash ñucanchi ali cosascunata rurashcataca nunca na cungangachu (Sal. 103:​9, 12; Heb. 6:10).

9. ¿Imamandata cunan punllacunapi y shamuj punllacunapi imata rurai ushashcapi pensarina capanchi?

⁹ Punda rurashca juchacunata na cungai ushajushpaca ¿imatata ruraita ushapangui? Cunanbi y shamuj punllacunapi imacunata rurai ushashcapimi pensarita ushapangui. Apóstol Pablopa ejemplopi pensaripashunchi. Paica cristiano nara tucushpa shuj cristianocunata catiriashpa llaquichishcamandaca ninandami llaquirin carca. Shinapash Jehová Dios paita perdonashcataca siempremi yarin carca (1 Tim. 1:​12-15). Apóstol Pabloca punda rurashca juchacunamanda, shinallata cristiano tucungapaj tucui saquishca cosascunapica na cutin cutin pensarinllu carca (Filip. 3:​4-8, 13-15). Ashtahuangarin cushijushpami predican carca. Shinallata jipa punllacunapi imata rurai ushashcapimi pensarirca. Punda rurashca cosascunata na cambiai ushashpapash apóstol Pabloshnami cunan punllacunapi y shamuj punllacunapi Jehová Diosta sirvinapi pensarina capangui.

10. Shujcunata llaquichishca cashpaca ¿imatata rurana capanchi?

¹⁰ Punda imapash nalita rurashpa shujcunata llaquichishcamandami talvez llaquilla sintirijupangui.  Shinapash ama llaquilla sintiringapaca chai personatami perdonda mañashpa paimanda imagutapash ruraita ushapangui (2 Cor. 7:11). Shinallata quiquin llaquichishca personacunata ayudachunmi Jehová Diosta mañaita ushapangui. Jehová Diosca quiquinda y llaquichishca personacunatapashmi tranquilo, ali sintirichun ayudaita ushan.

11. Jonaspa ejemplomanda ¿imatata yachajupanchi? (Callari paginapa dibujota ricupangui).

¹¹ Pundacunapi imapash nalita rurashca cashpaca Jehová Dios munashcashna utilizachunmi saquina capangui. Por ejemplo, profeta Jonaspi pensaripashunchi. Jonasca Jehová mandashcashna Nínive llactaman rinapa randica na cazushpami shuj ladoman rirca. Jehová corregijpimi Jonasca Jehová Diosta cazunata yachajurca (Jon. 1:​1-4, 15-17; 2:​7-10). Callaripi Jonás, Jehová Diosta na cazushca cajpipash Jehová Diosca cutin Nínive llactaman richunmi utilizarca. Chaimi Jonasca Jehová Dios ima nishcata cazurca. Jehovapa mandashcata na cazuimandami Jonasca arrepentido sintirirca. Shina sintirijushpapash chai pensamientocuna na vincichun saquishpami Jehová Dios cutin utilizachun saquirca (Jon. 3:​1-3).

JEHOVÁ DIOSCA CONSOLANGAPACA PAIPA ESPÍRITU SANTOTAMI UTILIZAN

12. Jatun llaquicunata charijpica Jehová Diosca ¿imashinata ayudan? (Filipenses 4:​6, 7).

¹² Jatun llaquicunahuan cajpica Jehová Diosca paipa espíritu santota utilizashpami ñucanchitaca consolan. Ron y Carol cusahuarmita ima pasashcata ricupashunchi. Paipa churigumi suicidarishpa huañurca. Paicunaca cashnami nin: “Ashtaca llaquicunatami charishcanchi. Shinapash ñucanchi churigu huañujpimi ashtahuanbachaca llaquilla sintirircanchi. Ashtaca tutacunata na puñui ushaimandami Jehová Diostaca tranquilo ali sintiringapaj mañan carcanchi” (Filipenses 4:​6, 7​ta liipangui). Llaquicunata charishpa llaquillapacha sintirijushpaca Jehová Diosmanmi imashina sintirishcataca parlaita ushapangui. Quiquin imashina sintirishcataca ima hora cashpapash mashna tiempota cashpapashmi Jehová Dioshuanga parlaita ushapangui (Sal. 86:3; 88:1). Jehová Diosta cutin cutin mañajpica de seguromi paipa espíritu santota cushpa ayudanga (Luc. 11:​9-13).

13. Jehová Diosta sirvishpa catichunga ¿imashinata paipa espíritu santoca ayudaita ushan? (Efesios 3:16).

¹³ ¿Ashtaca llaquicunata charimandachu fuerza illajshna sintiripangui? Jehovata sirvishpa catita ushachunga Jehová Diosca paipa espíritu santota cushpami ayudanga (Efesios 3:16​ta liipangui). Flora paniguta ima pasashcata ricupashunchi. Flora y paipa cusaca misionerocunami carca. Shinapash paipa cusa paita traicionajpimi divorciarirca. Paniguca cashnami nin: “Ñuca cusa traicionashcamandaca llaquillapachami sintirin carcani. Chaimi ñaupaman catita ushangapaca Jehová Diostaca paipa espíritu santota cushpa ayudahuai nishpa mañan carcani. Callaripica ñuca cusa traicionashcataca nunca na cungaita ushashachu yashpami pensarin carcani. Shinapash chai difícil situacionda cungachunmi Jehová Diosca ninanda ayudahuarca”. Shinallata Flora paniguca caitapashmi nin: “Jehová Dios ayudajpimi Salmo 119:32 shimicunaca ñucapi pactarishca”. Chaipica: “Ñuca shunguta can ninanda cushichijui punllapica, can mandashcacunata ricuchijuj ñambimi calpajusha” nin. Flora paniguca Jehová Dios paipi ashtahuan confiachun ayudashcata, shinallata ima pasajpipash Jehová ayudanata seguro cashcatami cuenta japishca.

14. Jehová Diospa espíritu santota chasquingapaca ¿imatata rurana capanchi?

¹⁴ Jehová Diospa espíritu santota mañashca jipaca ¿imatata rurana capangui? Jehovapa espíritu santota chasquingapaca tandanajuicunaman rina y predicacionman llujshinami ayudanga. Bibliata cada punlla liishpaca Jehová Dios pensashcashnami pensari  callarishun (Filip. 4:​8, 9). Bibliata liijushpaca picunalla llaqui apashcata y chai llaquicunata aguantachun Jehová Dios imashina ayudashcapi pensaripai. Párrafo 6​pi parlashca Sandra paniguca ashtaca llaquicunatami charirca. Paica cashnami nin: “Josepa ejemplomi ñuca causaipica ninanda ayudahuashca. Paica ashtaca llaquicunata y paita nali tratashpa llaquichijpipash Jehová Diospa amigo canataca nunca na saquircachu” (Gén. 39:​21-23).

JEHOVÁ DIOSCA ÑUCANCHI HUAUQUIPANICUNATA UTILIZASHPAMI CONSOLAN

15. Llaquicunata charijpica ¿picunata ayudaita ushan? (Fotota ricupangui).

¹⁵ Llaquicunata charijpica ñucanchi huauquipanicunami ‘ninanda cushichita’ ushan (Col. 4:11). Jehová Diosca ñucanchita juyashcata ricuchingapami huauquipanicunata utilizan. Paicunaca ñucanchita ali ali uyashpa y ñucanchihuan tiempota yalishpami consolaita ushan. Talvez Bibliata utilizashpa o ñucanchihuan shuj oracionda rurashpami animaita ushan (Rom. 15:4). d Shinallata huauquipanicunaca Jehová Dios imata yuyashcata intindichun, tranquilo sintirichunmi ayudaita ushan. Paicunaca shuj cosascunata rurashpapashmi ayudaita ushan.

16. Huauquipanicunapa ayudata chasquingapaj ¿imatata rurana capangui?

¹⁶ Huauquipanicuna ayudachunga paicunatami ayudahuai nishpa mañana capangui. Paicunaca  ñucanchita juyaimandami ayudangapaj listo can (Prov. 17:17). Shinapash ñucanchi imashina sintirishcata, imata minishtijtaca na yachangachu (Prov. 14:10). Llaquillapacha sintirijushpaca quiquinba ali amigocunamanmi imashina sintirishcataca parlaita ushapangui. Quiquinda imashina ayudachun munashcatapashmi nita ushapangui. Shinallata confianzata charij huauqui ancianocunahuanmi parlaita ushapangui. Huaquin panigucunaca espiritualmente ali caj panicunaman paicuna imashina sintirishcataca parlashpami ali sintirin.

17. Llaquilla sintirijushpaca ¿imatata na rurana capanchi?

¹⁷ Yapata llaquilla sintirijushpaca ama shujcunamanda caruyapaichu. Talvez huauquipanicunaca quiquin imashina sintirishcata na intindishpami imatapash nali nita ushan (Sant. 3:2). Shina pasajpipash paicuna ayudachunmi saquina capangui. Depresionda charij Gavin shuti anciano huauquica cashnami nin: “Ashtaca viajecunatami ñucalla cangapaj munashcani”. Shinapash huauquiguca shujcunahuan tiempota yalingapami ninanda esforzarishca. Chaita rurashpami ali sintirishca. Amy paniguca cashnami nin: “Nali experienciacunata charimandami shujcunapi confianaca difícil cashca. Shinapash Jehová Dios turiñañacunata juyanshna juyangapaj y paicunapi confiangapami ninanda esforzarishcani. Chaita rurajpica Jehová Diospash y ñucapashmi cushilla sintirini”.

JEHOVÁ DIOSPA CUSHCA PROMESACUNAMI ÑUCANCHITACA CONSOLAN

18. Jehová Diosca ¿imatata ñalla ruranga?

¹⁸ Ñucanchita llaquichij cosascunata Jehová Dios ñalla tucuchinata yachashpaca cushillami sintiripanchi (Apoc. 21:​3, 4). Paraíso alpagupica cunan charishca llaquicunaca “yuyaimanllapash na shamungachu” (Is. 65:17). Imashina yachajupashcanchi Jehová Dios ñucanchita consolangapaj, animangapaca ashtaca ashtaca cosascunatami carashca. Jehová Diosca quiquindaca ninandami juyan. Chaimi pai ayudachun saquina capangui (1 Ped. 5:7).