1, 2. a) Jarcarinata na yachaimandaca ¿ima llaquicunata tian? b) ¿Imamandata jarcarinaca, cunan punllacunapi minishtirishca can?

JEHOVÁ DIOS ayudajpimi, jarcarita ushanchi (Gál. 5:22, 23, NM). Jehová Diosca tucuipimi jarcarita ushan. Shinapash ñucanchicunapaca, juchayu caimandami jarcarinaca shinlli can. Cai mundopica gentecuna jarcarinata na yachajpimi, ashtaca llaquicuna tian. Jarcarinata na yachaimandami, ashtacacunaca minishtirishca cosascunata ruranataca jipaman saquin, aliguta trabajaita, aliguta estudiaitapash na ushan. Cutin shujcunaca, jarcarinata na yachaimandami, shujcunata yangata rimanlla, macanlla, machanlla, divorciarin, dibi tucun, prezo yaicunbash. Shujcunacarin, na jarcari ushaimandami, shujhuan shujhuan puñushpa imapash ungüicunata japin, o na munashpapash vijsayu quedan (Sal. 34:11-14).

² Imashinami ricupanchi, jarcarinata na yachajcunaca paicunallatami llaquicunata charin, shujcunatapash llaquichin. Jarcarinata na yachaj gentecunaca ashtahuan ashtahuanmi miranajun. Bibliapi nishca shinaca, ‘tucurimui punllacunapimi’ jarcarinata na yachaj gentecuna tiana carca (2 Tim. 3:1-3).

3. ¿Imamandata jarcarinata yachajuna capanchi?

 ³ ¿Imamandata jarcarinata yachajuna capanchi? Ishcai yuyaicunata ricupashun. Pundapica, jarcarinata yachajcunaca na jatun problemacunapi yaicunllu. Shujcunahuanbash alimi llevarin. Na ñapash culiranllu, na musparishpa imatapash ruranllu, o na yapata llaquirijunllu. Shinallata, Jehová Dios chasquichun munashpaca, tentaciongunamanda caruyashpami, nali munaicunamandapash jarcarina canchi. Adán y Evaca na jarcarita ushaimandami Diosta na cazushpa juchata rurarca (Gén. 3:6). Cunan punllacunapi ashtaca gentecunapash na jarcarita ushaimandami ashtaca llaquicunapi urmashca.

4. Na tucuipi jarcarita ushajcunaca ¿imamandata animarita ushan?

⁴ Gentecunaca tucuipi jarcaritaca na ushanchichu. Ñucanchi nali munaicunamanda jarcaringapaj esforzarijujtaca Jehová Diosca ricujunmi. Chaimandami, ayudangapaj munan (1 Rey. 8:46-50). Paica shuj ali Amigo caimandami, na tucuipi jarcari ushajcunataca jarcarichun animan. Cai temapica, Jehová Diospa ali ejemplota yachajushpami callaripashun. Jipaca, jarcarina imamanda ali cashcata, na jarcarishcamanda ima llaquicunata tiashcatami Bibliapa huaquin ejemplocunapi ricupashun. Tucuripica, ashtahuan jarcaringapaj imata ruranatami yachajupashun.

5, 6. ¿Imashinata Jehová Diosca jarcarinata yachaj Taita Dios cashcata ricuchirca?

⁵ Jehová Diosca ima pandapash illaj Taita Dios caimandami, tucuipi jarcarita ushan (Deut. 32:4). Shinapash ñucanchicunaca juchayumi canchi. Jarcarina ima cajta ali intindingapaj, Jehová Diospa ali ejemplota imashina catinata yachangapaca, paipa ali ejemplomandami yachajuna capanchi. Shinaca ¿imashinata Jehová Diosca jarcarinata yachaj Taita Dios cashcata ricuchirca? Ricupashun.

⁶ Diablo na cazujpica, Jehová Diospash, jahua cielopi Jehová Diosta sirvinajujcunapash ninandami culirashcanga. Ñucanchicunapash, Diablopa culpamanda ashtaca llaquicuna tiashcata yachashpaca, tal vez culirashunmi. Jehová Diosca Diablota na yangata saquina cashcata ali yashpapash, na culiramandalla imatapash rurarcachu. Paica ‘na ñapash fiñarij’ Taita Dios cashpami, Diablota imashina llaquichinataca ali yachan (Éx. 34:6; Job 2:2-6). Shinapash ¿imamandata ashtaca ashtaca huatacuna yalichun saquishca? Shujllapash ama tucuchi tucuchun munashpa, ‘tucuicuna arripintirichun munashpami’ shuyashca (2 Ped. 3:9, NM).

7. ¿Imatata Jehová Diospa ejemplomandaca yachajupanchi?

⁷ Jehová Diospa ejemplota catishpami, aliguta pensarishpara parlana, rurana canchi. Shuj jatun decisionda agllagrijushpapash aliguta pensarinami canchi, na yangata musparishpa decidinachu canchi. Shinallata, alita rurangapaj, aliguta parlangapapash, ali yachaita  carahuai nishpami Jehová Diosta mañana capanchi (Sal. 141:3). Culira cashpaca, culiramandallami huaquinbica imatapash ruranchi, jipacunamangarin imata nishcata o rurashcata arripintirinajunchi (Prov. 14:29; 15:28; 19:2).

8. a) Jarcarinata yachajungapaca ¿maipita ali ejemplocunata tari ushapanchi? b) ¿Imamandashi Joseca Potifarpa huarmi inguitangapaj munajpipash na umachi tucurca? (Callari dibujota ricupangui).

⁸ Jarcarinata yachajungapaca, Bibliapi ali ejemplocunatami ricuna capanchi. Shinaca Josepa ali ejemplota ricupashun. Joseca Jacobpa churimi carca. Paica, Egiptomanda reypa soldadocunata mandaj Potifarpa huasipimi sirvijurca. Potifarpa huarmica, José ‘ali ñavi, juyailla huambragu cajpimi’, paita cutin cutin inguitajurca. Shinapash Joseca nircami: “¿Imashpata ñucaca cai jatun nalita rurashpa juchata rurashpa, Taita Diosta fiñachishayari?” nishpa. Shinaca ¿imamandashi Joseca Potifarpa huarmi inguitangapaj munajpipash na umachi tucurca? Joseca, jipaman ima llaquicuna tianata pensarishpami, na umachi tucushcanga. Potifarpa huarmi, Josepa ropapi charirishpa huarcurijpipash, Joseca paihuan na cangapaj munashpami calpashpa rirca (Gén. 39:6, 9; Proverbios 1:10, liingui).

9. Tentaciongunata mishangapaca ¿imatata pundatallata rurana capanchi?

⁹ ¿Imatata Josepa ejemplomandaca yachajupanchi? Jehová Diospa mandashcacunata cazungapaj munashpaca, huaquinbica calpashpami tentaciongunamandaca rina capanchi. Huaquingunaca, nara Testigo tucushpami yapata micushpa, ufiashpa, tabacota chupashpa, drogacunata chupashpa, shujhuan shujhuan puñushpa causan carca. Chaimandami chai huauquicunaca, bautizarishca jipapash chai tentaciongunaman tigrangapaj munashca. Chai tentacionbi cashpaca pensarinami capanchi, na jarcarishpaca ¿Jehová Diospa ñaupajpi ali ricurishpa catita ushagrinichu? nishpa. Shinallata pensarinami capanchi ¿ima ratocunapita chai tentaciongunaca ricurin? Chai tentaciongunamanda caruyangapaca ¿imatata rurana cani? nishpa (Sal. 26:4, 5; Prov. 22:3). Tentacionbi cashpaca, Jehová Diostami ali yachaita carahuai nishpa, cai tentacionda mishangapaj ayudahuai nishpa mañana capanchi.

10, 11. a) Ashtaca jovengunaca ¿ima llaquicunatata escuelapi, colegiopi charin? b) Imapash tentacionbi ama urmangapaca ¿imatata ashtaca jovengunaca ruraita ushan?

¹⁰ Cunan punllacunapipash, ashtaca jovengunami José cuenda causanajun. Kimberly shuti panigupa ejemplota ricupashun. Colegiopi cumbacunaca, cada semana pihuan puñushcatami jariyashpa parlanajun carca. Shinapash chai paniguca, na shina pasashca cashpami imata parlanatapash na charin carca. Huaquinbica pailla, llaquillami sintirin carca. Cumbacunapash burlarishpami paitaca riman carca. Shinapash paica, joven cashca punllacunapi shuj jarihuan cana munaicunamanda cuidarina cashcataca alimi yacharca (2 Tim. 2:22). Cumbacunaca cutin cutinmi tapun carca ¿narachu maijanbash jarihuan cashcangui?  nishpa. Chaimi paica, imamanda pihuan nara cashcata aliguta intindichingapaj aprovechan carca. Cunan punllacunapi jovengunaca, shujcuna nalicachishpa rimanajujpipashmi, pihuanbash cana tentacionbica na urmashca. Chaimandami, Jehová Diospash, ñucanchipash ashtacata cushijunchi.

¹¹ Bibliapica, jarcarinata na yachaimanda, ima llaquicuna tiajtapashmi parlan. Pipash Kimberly panigushna llaquita charishpaca, Proverbios capítulo 7​pi parlajuj joven huambragu ima pasashcapimi pensarina can. Shinallata, Amnón shuti runa jarcarinata na yachaimanda ima jatun llaquicunapi urmashcatami pensarina can (2 Sam. 13:1, 2, 10-15, 28-32). Huahuacuna jarcarinata yachajuchun, ali decisiongunata agllachunga, Bibliapi ejemplocunamandami taitamamacunaca Familiahuan Adorana Tutapi yachachita ushan.

12. a) ¿Imashinata Joseca paipa huauquicunapa ñaupajpica jarcarirca? b) ¿Ima ratocunapita jarcarinata yachajuna capanchi?

¹² Josepa ali ejemplota cutin yaripashun. Shuj punllaca, paipa huauquicunami Egipto llactapi micunata randingapaj rirca. Joseca paipa huauquicuna imata pensajta yachangapaj munashpami, pai José cashcataca na villarca. Ñana aguantai ushashpaca, shuj ladoman rishpami pacalla huacarca (Gén. 43:30, 31; 45:1). Shuj familia, o shuj huauqui llaquichijpica, Josepa ali ejemplota yarishpami, jarcarishpa, imatapash na yangata rurana canchi (Prov. 16:32; 17:27). Ashtahuangarin, expulsashca familiata charishpaca, jarcarishpami imapash minishtirishcapacha cajpilla paicunahuanga parlana canchi. Chaita rurana shinlli cajpipash, Jehová Diospa ejemplota catijushcata, pai imata mandashcata cazujushcata yarishpami, expulsashca familiahuanga minishtirijpipachalla parlashun.

13. ¿Ima ishcai yuyaicunatata rey Davidmandaca yachajupanchi?

¹³ Rey Davidpa ali ejemplotapash ricupashun. Saúl catiriashpa llaquichijpi, Simeí nalicachishpa rimajpica Davidca na culirarcachu. Paicunata llaquichingapaj autoridadta charishpapash, na imatapash rurarcachu (1 Sam. 26:9-11; 2 Sam. 16:5-10). Shinapash shuj punllaca, Nabal shuti runataca casimi llaquichirca. Shinallata na jarcarimandami Bat-seba shuti huarmihuanga juchapi urmarca (1 Sam. 25:10-13; 2 Sam. 11:2-4). Shinaca ¿imatata Davidmandaca yachajupanchi? Pundapica, superintendente huauquicuna jarcarina cashcata, autoridadta charishpapash na shujcunata llaquichina cashcatami yachajupanchi. Shinallata, tentaciongunata mishangapaj na ñucanchipilla confiana cashcatami yachajunchi (1 Cor. 10:12).

14. a) Shuj huauquitaca ¿imata pasarca? b) Chai huauquishna llaquita charishpaca ¿imamandata jarcarina capanchi?

¹⁴ Ashtahuan jarcaringapaj munashpaca ¿imatata rurana capanchi? Luigi shuti huauqui ima pasashcata ricupashun. Carropi rijujpimi shuj carroca huashamanda chocarca. Chaishuj runa culpata charishpapash,  pairami chai huauquitaca culirashpa rimarca, macanajungapapash munarca. Shinapash ñucanchi huauquica, Jehová Diostami jarcaringapaj ayudahuai nishpa mañarca. Chaishuj runa tranquiloyachunbashmi aliman parlarca. Aliman parlajpipash, chaishuj runaca ashtahuan culirashpami rimashpa catirca. Shina cajpipash ñucanchi huauquica jarcari usharcami. Shuj semana jipaca, shuj huarmigumanmi cutin Bibliamanda parlangapaj rirca. Chai huarmigupa cusaca, huauquipa carrota chocashca runami cashcarca. Chai runaca ninanda pingai tucushpami, disculpahuanguilla nirca, carrota chocashcamandapash pagashallami nirca. Ashtahuangarin, Bibliamanda parlajujtapash aliman uyashpami, Bibliamanda imata parlashcatapash alicachinimi nirca. Chaimandami Luigi huauquica, jarcarina ali cashcata, na jarcarishpaca llaquipi urmanalla cashcata cuenta japirca (2 Corintios 6:3, 4, liingui).

15, 16. ¿Imashinata Bibliata yachajunaca ñucanchitapash, ñucanchi familiatapash jarcarinata yachajuchun ayudan?

¹⁵ Jarcarinata yachajushpa catingapaca, Bibliatami aliguta yachajushpa catina capanchi.  Jehová Diosca Josuetaca nircami: ‘Cai libropi mandashcata liinataca, ima horapash na saquinachu cangui. Ashtahuangarin chai mandashcataca punllapash, tutapash yarijunallami cangui. Chai escribishcacunapi mandashcashnallata, tucuita cazushpa pactachingapami, chashna rurana cangui. Chashna pactachishpami, canba causaipipash aliguta causangui. Tucui imatalla can rurashcapash, alimi llujshinga’ nishpa (Jos. 1:8). Shinaca ¿imashinata Bibliata yachajunaca jarcarichun ayudan?

¹⁶ Imashinami huaquin gentecunapa ejemplota Bibliapi ricupashcanchi, jarcarinaca alimi can. Cutin, na jarcarinaca ashtaca llaquicunamanmi apan. Jehová Diosca ñucanchicuna yachajuchunmi chaicunata Bibliapi escribichishpa saquishca (Rom. 15:4). Chaimandami Bibliapi imata nijujta liina, yachajuna canchi, imata yachajushcapipash pensarinami canchi. Bibliapi liishcacuna ñucanchita, ñucanchi familiata imashina ayudajtapash pensarinami canchi. Shinallata, Bibliapi imata yachajushcata pactachingapaj ayudahuangui nishpami, Jehová Diostaca mañana canchi. Jarcarina shinlli cajpica, na jarcari ushanichu nishpallaca na saquirinachu canchi. Ashtahuangarin Jehová Diosta mañashpami, imacunapilla mejorana cashcata ricuna canchi (Sant. 1:5). Ñucanchi publicaciongunapi informacionda mascanapash alipachami can.

17. Huahuacuna jarcarinata yachajuchunga ¿imashinata taitamamacunaca yachachita ushan?

¹⁷ Taitamamacuna, huahuacunaman jarcarinata yachachingapaca ¿imatata rurana capanguichi? Huahuacunaca uchillagumandapachami jarcarinata yachajuna can. Chaimandami taitamamacunaca, shuj ali ejemplota ricuchina capanguichi (Efes. 6:4). Quiquinba huahuacuna na jarcarita ushanajujpica, pensaripai ¿ima ejemplotata ricuchijupani? nishpa. Siempre villachingapaj llujshishpa, tandanajuicunaman rishpa, Familiahuan Adorana Tutata rurashpami shuj ali ejemplota ricuchina capanguichi. Shinallata na tucuitachu ari nina capanguichi. Na nina cajpica, na manllashpami na ninalla capanguichi. Jehová Diosca Adán y Eva paipa autoridadta respetachunmi, na tucuipi decidichun saquirca. Shinallata, taitamamacuna aliguta intindichishpa yachachijpi, ali ejemplota ricuchijpimi huahuacunapash jarcarinata yachajunga. Taitamamacunaca, Jehová Diospa autoridadta, mandashcacunata respetachunmi huahuacunamanga yachachina can (Proverbios 1:5, 7, 8, liingui).

18. ¿Imamandata ñucanchi cumbacunata ali agllana capanchi?

¹⁸ Huahuacunata charishpa, na charishpapash tucuicunami ali cumbacunata agllana capanchi. Ñucanchi cumbacuna Jehová Diosta juyashpaca, ali metacunata charichun, problemacunamanda caruyachunmi ayudanga (Prov. 13:20). Ashtahuangarin, paicuna jarcarijta ricushpami ñucanchipash paicunapa ali ejemplota catingapaj munashun. Tucui punllacuna jarcarishcata ricuchishpami, Jehová Diospa ñaupajpi ali ricurishun, cushilla causashun, ñucanchi huauquipanicunahuanbash ali llevarishun.