1. Biblia ninan ushaita charishcataca ¿imamandata tucui shunguhuan cripanchi? (Callari fotocunata ricupangui).

JEHOVÁ DIOSTA sirvijcunaca, ‘Taita Diospa Shimi causaj cajta, ninan ushaita charijtaca’ tucui shunguhuanmi crinchi (Heb. 4:12). Bibliapi yachachishcacunami ñucanchitapash, shujcunatapash cambiachun ayudashca. Huaquingunaca shuhuacuna, drogata chupajcuna, shujhuan shujhuan puñujcunami cashca. Cutin shujcunaca, charij cashpa, famosocuna cashpapash paicunalla, llaquillami sintirin carca (Ecl. 2:3-11). Shinapash Biblia ayudajpimi, ashtacacunaca pundacuna llaquilla causashca cashpapash, cunanbica cushilla causan. Tucuicunallatami, Villajun revistapi “Bibliami gentecunapa causaita cambiashca” nishca parteta liishpaca, cushijushca cashun. Shinallata tucuicunami Testigo cashpapash, Jehová Diosman ashtahuan quimirishpa catingapaca, Biblia ayudachun minishtinchi.

2. Taita Diospa Shimi ayudajpica ¿imacunatallata apostolcunapa punllacunapi Jesusta catijcunaca saqui usharca?

² Imashinami ricupanchi, cunan punllacunapi ashtaca gentecunaca Bibliata yachajuimandami jatun cambiocunata rurai ushashca.  Apostolcunapa punllacunapi jahua cieloman rina esperanzata charijcunapash jatun cambiocunatami rurarca (1 Corintios 6:9-11, liingui). Picuna na jahua cieloman rinata parlashca jipami, apóstol Pabloca Jesusta catijcunataca nirca: ‘Cangunapash pundaca, chashnallata causarcanguichi’ nishpa. Shinapash, Diospa Shimi, shinallata Taita Diospa espíritu santomi paicunataca cambiachun ayudarca. Huaquingunacarin, ña bautizarishca jipapashmi, jatun juchata rurashpa Jehová Diospa ñaupajpi ali ricuritaca ñana usharca. Shuj ejemplota ricupashun. Bibliapi nishca shinaca, shuj ungido huauquimi, congregacionmanda expulsai tucurca. Shinapash jipamanga, cambiangapaj esforzarishpami, congregacionman cutin tigrai usharca (1 Cor. 5:1-5; 2 Cor. 2:5-8). Taita Diospa Shimi ayudajpi ashtaca huauquipanicuna cambiajta ricushpami, tucui shunguhuan cushijunchi.

3. ¿Imatata cai temapica yachajupashun?

³ Bibliata Jehová Dios carashcamandami aliguta aprovechangapaj munanchi (2 Tim. 2:15). Chaimandami cai temapica, ñucanchi causaipi, villachijushpa, huauquipanicunaman yachachijushpapash Bibliata imashina aliguta aprovechanata yachajupashun. Cai temami, ñucanchipa alipallata yachachijuj Jehová Diosta juyashcata ricuchichun, agradicichunbash ayudanga (Is. 48:17).

4. a) Ñucanchi causaipi Biblia ayudachun munashpaca ¿imatata rurana capanchi? b) Bibliata liingapaca ¿imatata quiquinga rurapangui?

⁴ Ñucanchi causaipi Biblia ayudachun munashpaca, tucui punllacuna liingapami esforzarina capanchi (Jos. 1:8). Tucuicunallatami ocupado capanchi. Ñucanchi responsabilidadcunatapash pactachinami capanchi. Shinapash, Bibliata liinataca na huashaman saquinachu capanchi (Efesios 5:15, 16, liingui). * Usharijpica, tutamanda, chaupi punlla o tutami liina capanchi. Salmo librota escribij runagushnami cashna ningapaj munanchi: ‘Can mandashcataca ninandami juyani, tucui punllami chaitaca aligutapacha yariajuni’ nishpa (Sal. 119:97).

5, 6. a) Imata liishcapi pensarinaca ¿imamandata minishtirishca can? b) Imata liishcapi aliguta pensaringapaca ¿imatata rurana capanchi? c) Bibliata liina, imata liishcapi pensarinaca ¿imashinata quiquindaca ayudashca?

⁵ Bibliata liina ali cajpipash na chaipillachu saquirina capanchi. Bibliapi imata liishcataca yariajuna o aliguta pensarijunami capanchi (Sal. 1:1-3). Shina rurashpallami, Bibliapi ali yachachishcacunataca pactachi ushashun. Bibliatapacha, o Bibliata celularpi o tabletpi liishpapash, chai liishcacuna ñucanchi shunguman chayachunmi munana capanchi.

⁶ Imata liishcapi aliguta pensaringapaca ¿imatata rurana capanchi? Huaquingunaca Bibliata liijushpaca, asha ratoguta liinata saquishpami pensarin: “Caipica ¿imatata Jehová Diosmandaca yachajuni? ¿Caipi yachachishca yuyaita pactachijunichu? ¿Imapita ashtahuan mejorai ushani?” nishpa. Diospa Shimipi aliguta pensarishpa, Jehová  Diosta mañashpaca, Bibliapi consejocunata pactachingapami munashun. Shina rurashpami, Taita Diospa Shimipa ninan ushaita aliguta aprovechanajunchi (2 Cor. 10:4, 5).

7. Villachijushpa Taita Diospa Shimita aliguta aprovechangapaca ¿imatata rurana capanchi?

⁷ Shuj gentecunaman villachijushpa, yachachijushpapash ¿imashinata Bibliata aliguta aprovechanajushcata ricuchishun? Aliguta aprovechanajushcata ricuchingapaca Bibliatami utilizana capanchi. Shuj huauquica ninmi: “Jehová Dioshuan cumba tucushpa huasin huasin villachijushpaca ¿quiquinllachu parlajunguiman, o Jehová Dios parlachunllu saquipanguiman?” nishpa. ¿Imamandata chai huauquica shina nirca? Bibliata shuj gentecunaman liishpaca Jehová Dios parlachunmi saquinajunchi. Maijan texto ali canata ricushpa, chai textota liijpica, ñucanchicuna aliguta parlajujpipash, chai textopi shimicunami ashtahuan ali canga (1 Tes. 2:13). Chaimandami tapurina capanchi: “Villachijushpaca ¿Bibliamanda siempre liingapachu esforzarini?” nishpa.

8. ¿Imamandata textocunata liishpallaca na saquirina capashcanchi?

⁸ Bibliata liishpallaca na saquirinachu capanchi. Imashinami apostolcunapa punllacunapi ashtaca gentecunaca, Biblia ima nijta na intindi ushan carca, shinallatami cunanbi gentecunapash can (Rom. 10:2). Chaimanda, villachijushpaca na pensanachu canchi, ñami shuj textoguta liircani, ñami intindirianga nishpa. Chaipa randica, liishca textopi minishtirishca shimicunata cutin liishpa, cutin uyachishpami aliguta intindichina capanchi. Shina rurajpimi, Taita Diospa Shimica gentecunapa yuyaiman, shunguman chayanga (Lucas 24:32, liingui).

9. Gentecuna Bibliata respetachunga ¿imatata nita ushapanchi? Shuj ejemplota churashpa parlapai.

⁹ Bibliamanda shuj textota liigrijushpaca, gentecuna Bibliata respetachunmi cashna nita ushanchi: “Taita Dios imata yuyajta ricupashun” nishpa. Cutin gentecuna Jesuspi na crijcuna cajpica nita ushanchimi: “Ricupai, Taita Diospa ñaupa tiempo escribishcacunapica cashnami nin” nishpa. Cutin gentecuna religionmanda na yachangapaj munajpica nita ushanchimi: “¿Nachu ima horapash cai shimicunata uyapashcangui?” nishpa. Gentecunaca shuj shujmi can. Chaimandami gentecunahuan parlangapaca, cada unohuan imashina parlana ali cashcata ricushpa parlana capanchi (1 Cor. 9:22, 23).

10. a) Villachijushpaca ¿ima ali experienciatata shuj huauquica charirca? b) Quiquin villachijushpaca ¿Taita Diospa Shimi imashina ayudajtata ricupashcangui?

¹⁰ Ashtaca huauquipanicunaca, Bibliamanda liishpa gentecunaman uyachina ali cashcatami cuenta japishca. Shuj huauquipa ejemplota ricupashun. Paica tauca huatacunatami shuj mayorlla rucuguman, mushuj llujshishca Villajun revistata saquingapaj rin carca. Shuj punllaca, revistata saquingapaj rishpapash, revistapillata tiajushca, 2 Corintios 1:3, 4​tami liishpa uyachirca. Chai textopica nijunmi: ‘Taita Diosmi ñucanchita ninanda llaquij, tucuipi cushichij Taita Dios’ can nishpa. Chai textota uyashpami,  mayorlla rucuguca cutin liishpa uyachihuai nirca. Jipamanga nircami, ñucapash, ñuca huarmigupash alillatami sintiripanchi. Bibliamanda ashtahuan yachangapami munapanchi nishpa. Imashinami ricupanchi, villachijushpa Taita Diospa Shimimanda liinaca alipachami can (Hech. 19:20, NM).

11. Ñaupaman yalishpa yachachij huauquicunaca ¿ima responsabilidadtata charin?

¹¹ Tucuicunami jatun tandanajuicunamanbash, congregacionbi tandanajuicunamanbash cushijushpa rinchi. Ashtahuanbachaca Jehová Diosta adorangapaj munaimandami tandanajuicunamanga rinchi. Shinallata, chaipi yachachishcacunata yachajungapaj munaimandapashmi rinchi. Tandanajuicunapi yachachinata huauquicuna alicachishpapash, huauquipanicunaman yachachinaca shuj jatun responsabilidadmi can (Sant. 3:1, NM). Chaimandami imata yachachijushpapash, chai yachachishcacuna Bibliamanda cashcataca seguro cana can. Quiquinbash ñaupaman yalishpa yachachijushpaca, Taita Diospa Shimihuan huauquipanicunata ayudangapaca ¿imatata rurana capangui?

12. Bibliata pundapi churashpa yachachingapaca ¿imatata discursota cujuj huauquica rurana can?

¹² Yachachijushpaca, Bibliamanda yuyaicunata yachachijushcataca seguromi cana capangui (Juan 7:16). Ejemplocunata, chimbapuraicunata churashpa yachachijushpapash, chaicunaca Taita Diospa Shimitaca na huashaman saquinachu can. Shinallata na cunganachu capangui, Bibliamanda textocunata liina  ali cajpipash, tauca textocunata liijpica, discursota uyanajuj huauquipanicunaca na yuyarita ushangachu. Ashtahuangarin siempremi yarina capangui, Bibliamanda textocunata liina ali cajpipash, Bibliata intindichinami ashtahuan ali can. Chaimandami maijan textocunata liinataca aliguta pensarishpa agllana can. Chai jipaca, intindirijta, aligutami Bibliapi textocunataca liina capangui. Shinallata, chai textocunataca chimbapuraita churashpa, imashina pactachinata ricuchishpami aliguta intindichina capangui (Neh. 8:8). Bosquejopi yuyaicunata catishpa discursota cuna cashpaca, chai bosquejopi shimicuna imata nisha nijta, chaipi textocuna chai yuyaicunata imashina apoyajtami aliguta intindina capangui. Chai jipaca, bosquejopi yuyaicunata intindichingapaj maijan textocuna ali cajta ricushpa agllapangui (ashtahuan yachangapaj munashpaca, Benefíciese de la Escuela del Ministerio Teocrático libropi 21, 22, 23 lecciongunata ricupangui). Ashtahuanbachaca, Jehová Diostami quiquinba Shimita aliguta yachachingapaj ayudahuangui nishpa mañana capangui (Esdras 7:10; Proverbios 3:13, 14, liingui).

13. a) Bibliamanda shuj textoguta tandanajuipi uyanaca ¿imashinata shuj panigutaca ayudarca? b) Bibliapa textocunata tandanajuicunapi uyanaca ¿imashinata quiquindaca ayudashca?

¹³ Cunanga Australia llactamanda shuj paniguta, tandanajuipi liishca texto imashina ayudashcata ricupashun. Pai huahua cashpaca shuj jatun llaquitami charirca. Jipamanga, Bibliapi yachachishcacunata alicachishpami bautizarirca. Shinapash,  Jehová Dios paita juyajtaca na cringapaj munarcachu. Shuj punllaca, tandanajuipi liishca textomi paipa shunguman chayarca. Chai textopi cutin aliguta pensarishpa shuj textocunapipash aliguta pensarishpami, Jehová Dios paita ciertopacha juyajta cuenta japirca. * ¿Quiquinbash shuj jatun tandanajuipi cashpa, o congregación tandanajuipi cashpa shunguman chayajta shuj textoguta uyapashcanguichu? (Neh. 8:12).

14. ¿Imashinata Taita Diospa Shimita tucui shunguhuan alicachishcata ricuchipanchi?

¹⁴ Bibliata cushcamanda, paipa Shimi ama chingarichun Jehová Dios cuidariajushcamandaca tucui shunguhuanmi Jehová Diostaca agradicinchi (1 Ped. 1:24, 25). Chaimandami Bibliata liinata, chaipi imata nijujta pactachinata, shuj gentecunata ayudangapaj utilizanataca na cungana capanchi. Shina rurashpami Bibliata tucui shunguhuan alicachishcata ricuchinchi. Ashtahuanbachaca shina rurashpami, Jehová Diosta juyashcata ricuchinchi.