1934​pimi nacirircani. Ñuca taitamamaca Suiza llactamandami carca. Pero Canadá llactapa Timmins llactamanmi causangapaj rirca. 1939 huatapimi ñuca mamitaca La Atalaya revistata lii callarirca. Shinallata testigo de Jehovacunapa tandanajuicunamanbashmi ri callarirca. Tandanajuicunamanga ñucatapash y ñuca seis huauquipanicunatapashmi apashpa rin carca. Y asha tiempo jipallami ñuca mamitaca bautizarirca.

Ñuca papito ñuca mamitapa decisionhuan na de acuerdo cajpipash ñuca mamitaca Jehová Diosta sirvishpa catinatami dicidirca. Ñuca mamitaca Canadá llactapi predicanata prohibijpipash Jehová Diosta sirvishpami catirca. Ñuca papito ñuca mamitata nali tratajpipash paica siempremi juyaihuan, respetohuan tratan carca. Ñuca mamitapa ali ejemplomandami ñucapash y ñuca huauquipanicunapash testigo de Jehová tucurcanchi. Tiempohuanga ñuca papitopashmi cambiarca. Chaimandami familiataca ashtahuan juyaihuan tratai callarirca.

Nueva York llactapica “Aumento de la Teocracia” nishca asambleami tiagrijurca. Chaimi 1950 huatapica chai asambleaman rircani. Chai asambleapica ashtaca huauquipanicunatami rijsircani. Shinallata Escuela de Galaadman rishca huauquicunapa experienciatapashmi uyarcani. Chaimi Jehová Diosta ashtahuan sirvina munaita chari callarircani. Jehová Diosta tiempo completopi sirvina metatami charircani. Shinapash chai asambleaca Jehová Diosta ashtahuan sirvina munaita charichunmi ayudahuarca. Huasiman chayashpaca precursor regular shina sirvingapaj solicitudta jundachishpa cacharcani. Chaimi Canadá sucursalmandaca primeroca bautizarishparami ali canman nishpa nihuarca. 1 de octubre de 1950 huatapi bautizarishca shuj quilla jipami precursor regular tucurcani.  Chai jipaca ñuca huasimanda carupi quidaj Kapuskasing nishca pueblopi sirvichunmi cachahuarca.

Huata 1951​pica sucursalmandami francés shimita parlaj huauquicunataca Quebec llactaman ayudangapaj richun animarca. Chai llactapica ashalla huauquipanicunami tiarca. Ñucaca inglés y francés shimita yachaimandami ashtahuan ayudangapaj ofrecirircani. Chaimi Rouyn puebloman cachahuarca. Chai pueblopica pitapash na rijsircanichu. Shinapash huauqui Marceltami rijsircani. Paihuanga alipacha amigocunami tucurcanchi. Quebec llactapica chuscu huatatami paihuanga sirvircani. Tiempohuanga precursor especial shina sirvichunmi nombrahuarca.

Quebec llactapi cajpimi Escuela de Galaad clase 26man invitahuarca. Chai escuelataca South Lansing, Nueva Yorkpimi rurarca. Chai escuelaman invitajpica ninandami cushijurcani. 12 de febrero de 1956​pimi graduarircani. Chai escuelamandaca Ghana b llactamanmi cachahuarca. Chai llactaman ringapaj ñuca papelcuna listo cangacamanmi Canadá llactaman tigrarcani. Chai papelcuna uchalla llujshichunmi munarcani.

Shinapash Ghana llactaman ringapaca Toronto llactapimi siete quillacunata shuyarcani. Papelcuna llujshingacamanga Cripps cusahuarmigupa huasipimi quidajurcani. Paicunaca Sheila shuti hijagutami charirca y paimandami ñucaca enamorarircani. Tiempohuanga paihuan cazarangapami munarcani. Shina yuyajujpimi visa llujshirca. Sheila y ñucaca Jehová Diosta mañarcanchi. Chaimandami Ghana llactaman sirvingapaj rinata dicidircani. Pero ishcandimanda escribiringapami parlarircanchi. Ishcandipa carupi cana difícil cagrijujpipash tiempohuanga ñucanchicunapallata ali cashcatami cuenta japircanchi.

Ghana llactaman chayangapaca shuj quillatami trenbi, barcopi y avionbi viajarcani. Ghana llactaman chayajpica superintendente de distrito shina sirvichun nombrahuarca. Chaipica Ghana, Costa de Marfil y Togo nishca llactacunatami visitana  carcani. Congregaciongunata visitachunga sucursalmandaca shuj carrogutami cuhuarca.

Fin de semanacunataca asamblea de circuitopimi ashtaca responsabilidadcunata charircani. Salón de Asambleacunataca na charircanchichu. Chaimandami huauquipanicunahuanga indimanda pacajungapaca bambú y palmera nishcacunahuan techocunata ruran carcanchi. Micunata huacaichingapaj refrigeradoracuna na tiajpimi animalcunataca chai rato huañuchishpa yanun carca. Shinami asambleaman rijcunamanga micunata carai ushan carca.

Huaquinbica asambleacunapica chistoso cosascunami pasan carca. Shuj viajeca Herb Jennings c huauqui shuj discursota cujujpimi shuj toroca huauquicuna tianajuj ñaupaman calpashpa yaicurca. Toroca maiman rinata na atinashpami shayajurca. Chaimi Herb Jennings shuti huauquigupash imata ninatapash na atinashca shayajurca. Jipaca chuscu huauquicunami torota japishpa aparca.

Shinallata gentecunamanga La Sociedad del Nuevo Mundo en acción nishca peliculatami ricuchin carcanchi. Chai peliculata ricuchingapaca shuj proyector nishcatami utilizan carcanchi. Gentecunaca cushijushpami peliculataca ricun carca. Ashtacacunaca por primera vezmi shuj peliculataca ricunajurca. Bautizarinajujta ricushpaca ninandami maquicunataca huactajun carca. Chaita ricushpami gentecunaca mundo enteropi huauquipanicuna tiajta cuenta japita usharca.

África llactapi ishcai huatacunata cashca jipami 1958 huatapica Nueva Yorkpi tiashca asamblea internacionalman rina oportunidadta charircani. Chai asambleapimi Sheilahuanga tuparishpaca cushijushcami carcani. Paica precursora especial shinami Quebec llactapi sirvijurca. ¿Ñucahuan cazarangapaj munanguichu? nishpa tapungapami aprovecharcani. Shina tapujpica paica ari nircami. Huauquigu Knorrtaca d ¿Sheilaca escuela de Galaadman rita ushanllu? nishpami shuj cartapi escribishpa tapurcani. Shinallata graduarishca jipa África llactaman rita ushanllu nishpami tapurcani. Shina tapujpimi huauquiguca, ari nirca. Sheila Ghana llactaman chayajpimi 3 de octubre de 1959 huatapi cazararcanchi. Jehová Dios paipa gobiernota pundapi churashcamanda Jehová Dios ñucanchicunata bendiciajushcatami cuenta japiparcanchi.

Huata 1961​pica Camerún llactapi shuj mushuj sucursalta ruranapi ayudachunmi cacharca. Shinallata siervo de sucursal cachunmi nombrahuarca. Chaimandami ashtaca cosascunata ruranata charircani y ashtaca cosascunatapash yachajunarami carcani. 1965​pica ñuca huarmigu vijsayu cashcatami yachaj chayarcanchi. Shinapash chaita yachaj chayanaca ñucanchipaca shinllimi ricurirca pero tiempohuanmi shuj huahuaguta charigrijushcamandaca cushilla sintirinajurcanchi. Chaimandami Canadaman tigrangapaj yuyanajujpi shuj jatun llaquita aparcanchi.

Ñucanchi huahuagumi nara nacirishpallata huañurca. Doctorca quiquingunapa huahuaguca jarigumi cashca nishpami nirca. Ñucanchi huahuaguta pirdishcamandaca ñami 50 huatacuna yalishca. Cunangamanmi chaita yarishpaca llaquiyanchi. Ñucanchi huahuaguta perdishca jipa llaqui llaqui sintirinajushpapash ñucanchiman cushca asignaciondami pactachishpa catinata dicidircanchi.

Politicapi na chapurishcamandami Camerún llactamanda huauquipanicunataca catiriashpa llaquichinajurca. Presidentecunata agllana tiempopimi huauquipanicunataca ashtahuan catiriashpa llaquichin carca. 13 de mayo de 1970 huatapimi Camerún llactapica Testigo de Jehovacunapa obrata prohibirca. Ñucanchi sucursaltapashmi quichurca. Y chai sucursaltaca apenasmi cinco quillacunatalla utilizashca carcanchi. Huaquin semanacunapillami Camerún llactamanda misionero huauquipanicunataca llujchishpa cacharca. Ñucanchi huauquipanicunata ninanda juyaimandami Camerún llactamanda llujshishpa rinaca shinlli carca. Paicunata imapash pasanga yashpami preocupado carcanchi.

6 quillacunatami Francia llactapi sucursalpi sirvinajurcanchi. Chai pushtumandami Camerún llactapi huauquipanicunata ayudangapaj tucuita ruranajurcanchi. 1970 huatapillatami diciembre quillapica ñucanchitaca Nigeria llactapa sucursalman cacharca. Chai sucursalmi Camerún llactapa Testigo de Jehovacunapa obrataca ricui callarirca. Nigeria llactamanda huauquipanicunaca juyaihuanmi chasquirca. Y chaipi paicunahuan pacta sirvishpaca ninandami cushilla carcanchi.

Huata 1973​pica shuj difícil decisiondami japina tucurcanchi. Ñuca huarmigu Sheilaca paipa saludhuanmi nali carca. Shuj asambleapi cajpica paica huacashpami cashna nirca: “Ñana ushanichu, shaijushcapachami sintirini. Cada punllami irquiyashcalla yalijuni”. África llactapica más de 14 añoscunatami ishcandillata sirvinajushca carcanchi. Pai ñucata ayudashcamandaca cushillapachami carcani. Shinapash huaquin cambiocunata ruranami ricurirca. Ñuca huarmiguhuan parlarishpa y Jehovata ninanda mañashca jipami, Canadá llactaman tigranata decidircanchi. Chaimi ñuca huarmigupa saludpi ayudangapaca ashtahuan fácil cagrijurca. Ñucanchipaca tiempo completopi sirvina asignacionda saquinata decidinaca ninan shinllimi ricurirca. Llaquillapachami sintirircanchi.

Canadá llactaman chayashca jipaca shuj trabajotami tarircani. Toronto llactapa jahua ladomanmi carca. Chaipica shuj amigomi carrocunata jatuna negociota charishcarca. Y paimi trabajota  cuhuarca. Shuj cuartoguta arrendashpami ama endeudaringapaca usado mueblecunatapash randircanchi. Cutin tiempo completopi sirvingapaj munaimandami minishtirishca cosascunahuanlla causangapaj dicidircanchi. Na yashcapimi cutin tiempo completopi sirvi callarircanchi.

Norval llactapimi shuj mushuj Salón de Asambleata ruranajurca. Chaipimi tucui sabadocunata voluntario cuenda sirvishpa callarircani. Tiempohuanga chai Salón de Asambleapa superintendente cuenda sirvichunmi invitarca. Ñuca huarmigu paipa saludhuan mejorajushcamandami chai invitaciondaca chasquita ushashunmi yashpa pensarircanchi. Junio de 1974 huatapimi Salón de Asambleapi causangapaj rircanchi. Cutin tiempo completopi sirvita ushagrinajushcamandami cushijushcapacha carcanchi.

Ñuca huarmigupa saludca cada vezmi ashtahuan mejorashpa catijurca. Ishcai huatacuna jipaca superintendente de circuito shina sirvichun invitajpimi chai invitaciondaca chasquita ushaparcanchi. Canadá llactamanda provincia Manitobapa congregaciongunatami visitai callarircanchi. Chai llactaca chiri chirimi carca. Chiri chiri llacta cajpipash chai llactapi causaj huauquipanicunaca ñucanchimanga ninan juyaitami ricuchirca. Chaipi cashpaca maipi cashpapash Jehová Diosta tucui shunguhuan sirvina ashtahuan importante cashcatami yachajurcanchi.

Huaquin huatacunatami superintendente de circuito shina sirvijurcani. Shinapash 1978 huatapimi Canadá llactapa Betelpi sirvichun invitarca. Montreal llactapimi shuj reunión especial tiarca. Chai tandanajuipimi francés shimipi shuj hora y mediata shuj discursota cuchun mañahuarca. Discursota cujpica huauquipanicunaca na ashta intindircachu. Chaimandami Departamento de Serviciopi sirvij shuj huauquica discurso na aliguta intindirishcata nihuarca. Huauquipa nishcataca nimamanda na gushtahuarcachu. Chai ratopi huauquipa nishcata intindinaca dificilmi cahuarca. Huauquihuan na ali llevarita ushashcamanda paica yapatami exagerajun ñuca discursomandaca imatapash nalitaca na nijunllu nishpami yuyai callarircani. Chaimi huauqui cushca consejocunataca nali chasquircani.

Huaquin punllacuna jipami Comité de Sucursalpi sirvij shuj huauquica ñucahuan parlarca. Chaimi huauquipa cushca consejocunataca nali ricui callarircani. Chaimi huauquitaca nalitami rurashcani chaimanda disculpahuai nircanimi. Jipaca ñucaman consejota cushca huauquitami disculpahuai nigrircani. Shina nijpica huauquica aligumanmi chasquirca. Chai pasashcamandami humilde cana importantepacha cashcata yachajurcani (Prov. 16:18). Ama chashnallata pandaringapami Jehová Diostaca cutin cutin mañashcani. Shinallata pipash consejota cujpi aliguman chasquingapami munani.

Canadá llactapa Betelpica más de 40 huatacunatami sirvipashcani. Huata 1985​mandaca Comité de Sucursalpi sirvina bendiciondami charipashcani. Ñuca juyashca huarmiguca febrero de 2021​tami huañuparca. Paitaca ninandami extrañani. Ñuca salud nali cajpipash Jehová Diosta cushilla sirvishpa ocupado yalimandami tiempo yalijtapash na sintini (Ecl. 5:20). Ñuca causaipi llaquicunata charishpapash Jehovata sirvishcamandami cushilla ashtahuanbachaca yalipashcani. Jehovata pundapi churana y 70 huatacunata tiempo completopi Jehová Diosta sirvinaca ñucapaca shuj jatun cushijuimi cashca. Jehovata sirvishpalla ciertopacha shuj cushilla causaiguta charinata seguro caimandami Jehová Diostaca jovenguna paita ashtahuan sirvichun ayudapai nishpa mañapani.