1, 2. Jehová Diospa sirvijcunaca ¿imamandata cushilla causapanchi? (Santiago 1:​22-25).

 JEHOVÁ DIOSPASH y paipa churi Jesuspash ñucanchi cushilla cachunmi munan. Salmo 119:2​pica: “Imashna causanata yachachishcata pactachishpa, tucui shunguhuan paita mascajcunaca ninandami cushijun” ninmi. Jesuspash “Taita Diospa shimita uyashpa pactachijcunami ashtahuan cushijun” nircami (Luc. 11:28).

² Jehová Diosta sirvijcunaca Bibliata cada punlla liimanda, Bibliapi yachajushcata ñucanchi causaipi pactachishpa causaimandami cushilla causapanchi (Santiago 1:​22-25​ta liipangui).

3. Taita Diospa shimita pactachishpaca ¿imashinata beneficiaripanchi?

³ ‘Taita Diospa shimita pactachishpaca’ ¿imashinata beneficiaripanchi? Jehová Diospa ñaupapi ali ricurita yachashpaca cushillami sintiripanchi (Ecl. 12:13). Shinallata Bibliapa consejocunata ñucanchi causaipi pactachishpaca, ñucanchi familiahuan ali llevarichun y congregacionmanda huauquipanicunahuan ali amigocuna cachunbashmi ayudanga. Shinaca Bibliapa consejocunata pactachina ali cashcataca quiquinllatami cuenta japipashcangui. Jehová Diosta na cazuj gentecuna charishca llaquicunamandapashmi jarcaripashun. Rey Davidca Jehová Diospa mandashcacunamanda parlashpaca: “Chaicunata cazushpaca, alitapacha japinami tian” nircami (Sal. 19:​7-11).

4. ¿Imashpata Bibliapi mandashcacunata ñucanchi causaipi pactachinaca na siempre fácil can?

⁴ Shinaca Bibliapa mandashcacunata pactachinaca, na siemprechu fácil can. Ashtaca cosascunata ruranata charishpapash  Bibliata liingapaj, Bibliata estudiangapami tiempota llujchina capanchi. Shina rurashpami Jehová Dios imata rurachun munashcata intindipashun. Chaimandami cai temapi Bibliata cada punlla liingapaj imacunatalla rurai ushashcata huaquin yuyaicunapi ricugripanchi. Shinallata imata liishcapi pensarichun y liishcata ñucanchi causaipi imashina pactachi ushashcatapash yachajuchunmi ayudanga.

BIBLIATA LIINGAPAJ TIEMPOTA LLUJCHIPAI

5. ¿Imamandata Jehová Diosta sirvijcunaca ocupado causaita charipanchi?

⁵ Jehová Diosta sirvijcunaca ocupado causaitami charipanchi. Shinallata huaquin responsabilidadcunatapashmi pactachina capanchi. Por ejemplo, huaquingunaca ñucanchipa y ñucanchi familiata mantiningapami trabajana capanchi (1 Tim. 5:8). Ashtaca huauquipanicunami mayorlla o ungushca familiacunatami cuidana tucun. Y tucuicunallatami ñucanchi propio saludtapash cuidangapaj tiempota llujchina capanchi. Shinallata congregacionbi responsabilidadcunata pactachingapaj y predicacionmanbash llujshingapami tiempota llujchina capanchi. Ashtaca ruraicunata charimandami: “¿Imashinata Bibliata cada punlla liingapaj, liishcapi pensaringapaj y ñuca causaipi pactachingapaca tiempota llujchita ushani?” nishpami pensarita ushapangui.

6. Bibliata cada punlla lii ushangapaca ¿imatata rurai ushapangui? (Fotota ricupangui).

⁶ Jesuspa catijcunapaca Bibliata liinami “ashtahuan importante” can. Chaitaca siempremi rurana capanchi (Filip. 1:10). Salmos libropica cushilla personamanda parlashpaca cashnami nin: “Mandaj Dios mandashcata pactachishpami cushijun. Tutapash, punllapash chai mandashcataca aliguta yariajunllami” (Sal. 1:​1, 2). Bibliata liingapaca tiempota llujchinapachami canchi. Cada unomi Bibliata liina ima tiempopi ali cashcata ricuna capanchi. Bibliata liingapaj shuj horariota agllashpaca, chai horariota pactachi ushashcatami ricuna capanchi. Por ejemplo  Victor shuti huauquica ninmi: “Tutamanda jatarinata na gushtashpapash tutamandami Bibliata liinataca gushtani. Chai horascunami tranquilo o na shaijushca caimanda chai horaspi Bibliata liinata gushtani. Samashcalla caimandami ashtahuan concentrarita ushashcani”. ¿Victor huauquishnachu quiquinbash yuyapangui? Cashna pensaripai: “Ñucapaca, ¿ima tiempopita Bibliata liinaca ashtahuan ali canman?”.

IMATA LIISHCAPI PENSARIPAI

7, 8. Bibliata liijushpaca ¿imatata na rurana capanchi? Shuj ejemplomanda parlapai.

⁷ Bibliata liingapaj tiempota ña agllashca cashpaca liina cashcamandalla ama liingapami cuidadota charina capanchi. Ñucanchicunaca ashtaca cosascunatami liinchi chaimi huaquinbica liishcacunataca ñapash cunganchi. Bibliata liishcahuan shina pasajpica llaquimi canman. Talvez Bibliapa huaquin capitulocunata liingapami metata churaripashcangui. Chai metata churarishpa, pactachingapaj esforzarinaca alimi canman (1 Cor. 9:26). Bibliata liishpa beneficiaringapaca, ashtahuan shuj shuj cosascunata ruranami minishtirin.

⁸ Cai ejemplopi pensaripashunchi: Tamiatami plantagucunaca minishtin. Shinapash ñapash yapata tamiajpica plantagucunaca na beneficiarita ushanllu. Shina cuendallatami ñucanchicunapash Bibliata ñapash liishpaca na beneficiarishun. Shinallata ñucanchi causaipipash na pactachita ushashunllu (Sant. 1:24).

9. Bibliata ñapash liina costumbreta charishpaca ¿imatata rurai ushapanchi?

⁹ Bibliata ñapash liijushcata cuenta japishpaca ¿imatata ruraita ushapanchi? Imata liijushcata intindingapami, Bibliataca alimanda liina capanchi. Bibliata liishpaca, chai liishcapi pensaringapami tiempota llujchina capanchi. Y chaita na rurai ushashpaca, ashalla versocunata liingapaj y chaipi pensaringapami tiempota llujchina capanchi. Párrafo 6​pi parlashca Victor huauquica ninmi: “Ashtaca capitulocunata liingapaj randica shuj capitulotallami liingapaj esforzarini. Tutamanda Bibliata liishpaca, punlla enteromi imata  liishcapi pensaringapaj tiempota charini”. Ashtaca capitulocunata chai rato liinaca na importantechu can. Sino liishcata intindinami ashtahuan importante can (Sal. 119:97;  Bibliata liijushpaca cashna pensaripangui nishca recuadrota ricupangui).

10. Bibliapi yachajushcata ñucanchi causaipi pactachingapaca ¿imatata rurai ushapanchi? Shuj ejemplomanda parlapai (1 Tesalonicenses 5:​17, 18).

¹⁰ Bibliata ima hora liishpapash o mashna tiempota liishpapash chai yachajushcatami quiquinba causaipi pactachingapaj esforzarina capangui. Bibliamanda shuj parteguta liijushpaca cashna tapuripai: “¿Imashinata cai informaciondaca cunan punllacunapi o jipa punllacunapipash pactachita ushani?” nishpa. Por ejemplo, 1 Tesalonicenses 5:​17, 18​ta liipangui. Chai textota intindingapaca cashnami pensarita ushapangui: Ñuca mañashcacunaca ¿imashinata can? ¿Mashna viajecunatata mañani? ¿Ima cosascunamandata agradicita ushapani? nishpa. Cashna pensarishca jipaca Jehová Diostaca quimsa cosascunamandami agradicita ushapangui. Bibliapi imata liishcata pensaringapaj tiempota llujchishpaca ñucanchi causaipipashmi pactachita ushapashun. Cada punlla caita rurashpaca, Jehová Diospa ashtahuan ali amigomi tucupashun. Shinapash ashtaca cosascunapi mejorashpa catina cashcata ricushpaca ¿imatata rurai ushapangui?

PACTACHI USHANALLA METACUNATA CHURARIPAI

11. ¿Imamandata huaquinbica Bibliata liijushpaca desanimado sintirinchiman? Shuj ejemplomanda parlapai.

¹¹ Bibliata liijushpaca ashtaca cosascunapi mejoranata cuenta japishpami talvezpash desanimado sintiripashun. Caipi pensaripashunchi, por ejemplo, shuj punllaca gentecunata agllashpalla ali tratana nali cashcata Bibliapi liinajupashcanchiman (Sant. 2:​1-8). Chaita cuenta japishpaca tucuicunatallata ali tratangapami esforzarina tucunga. Shinallata cati punllapaca ñucanchi parlocunapi controlarina importante cashcata Bibliapi liinajupashcanchiman (Sant. 3:​1-12). Chaita cuenta japishpaca, ali shimicunahuan parlangapaj y animangapami esforzarina tucunga. Shinallata cai mundopa nali ruraicunahuan chapurinamanda cuidarina cashcata cuenta japishpaca peliculacunahuan y musicacunahuanmi cuidadota charingapa esforzarina tucunga (Sant. 4:​4-12). Shinapash cada Bibliata liishcapi siempre imapipash mejorana cashcata cuenta japishpaca desanimado sintiripanchiman.

12. Bibliata liijushpa cambiocunata rurana cajpica ¿imamandata na desanimarina capangui? (Notata ricupangui).

¹² Cambiocunata rurana cashcata cuenta  japishpaca na desanimarinachu capangui. Porque cambiocunata rurana cashcata cuenta japinaca humilde cashcata y Bibliata ali yachajungapaj munashcatami ricuchin. a Ñucanchicunaca ‘mushuj causaitaca ropata churajunshna churajushpa’ catina cashcatami yarina capanchi (Col. 3:10). Taita Diospa shimita pactachishpa catingapaca ¿imata ayudanga?

13. Mejorashpa catingapaca ¿imatata ruraita ushapangui? (Fotocunata ricupangui).

¹³ Bibliata yachajushpaca tucuita pactachingapami munanchiman. Shinapash na tucuita pactachi ushashcata intindingapaca humildemi cana capanchi (Prov. 11:2). Por ejemplo, ima cosascunapilla mejorangapaj munashcatami anotaita ushapangui. Shinapash shuj o ishcai cosascunapi ashtahuan mejorangapaj munashcatami agllaita ushapangui. Shinaca ¿imapita mejoraita ushapangui?

14. ¿Ima metacunatata primeroca pactachita ushapangui?

¹⁴ Primeroca facillla metacunata pactachingapaj o imapi ashtahuan mejorai ushashcatami ricuita ushapangui. Imata ruranata ña yachashpaca Índice de las publicaciones Watch Tower o Bibliamanda ashtahuan ali intindingapaj informacionguna nishca publicaciongunapimi ashtahuan informacionda mascaita ushapangui. Y chai metacunata pactachingapami tanto ‘munaita charingapaj y chaita pactachingapapash fuerzata cuhuai’ nishpa Jehovataca mañaita ushapangui (Filip. 2:13). Jipaca imata yachajushcatami pactachita ushapangui. Churarishca metacunata pactachijushcata cuenta japishpami shuj metacunatapash pactachingapaj munapangui. Shinallata quiquinba causaipi cambiocunata  rurajushcata ricushpa o ali cualidadcunata charishcata cuenta japishpami quiquinba causaipi cambiocunata ruranaca ashtahuan fácil canga.

BIBLIAPA YACHACHISHCACUNA QUIQUINDA AYUDACHUN SAQUIPANGUI

15. Jehovata sirvijcunahuan y shuj gentecunahuanga Bibliata liishpaca ¿imapita diferente capanchi? (1 Tesalonicenses 2:13).

¹⁵ Huaquin gentecunaca Bibliataca ashtaca viajecunatami liishcanchi ninmi. Shinapash paicunaca chai liishcacunapica ¿crishcachu? ¿Bibliapa yachachishcacuna paicunapa causaita cambiachun ayudachun saquishcachu? Na, paicunaca Bibliata liishpapash paicunapa causaipi Biblia ayudachunga na saquishcachu. Shinaca cai gentecunahuan ricujpica Jehovata sirvijcunaca diferentemi capanchi. Punda cristianocunashnallatami ñucanchipash Bibliataca ‘Taita Diospa shimipacha cajpi, Taita Diospa shimitaca chasquiparcanchi’. Chaimandami Bibliapa yachachishcacunata ñucanchi causaipi pactachingapaj esforzaripanchi (1 Tesalonicenses 2:13​ta liipangui).

16. Bibliapi liishcacunata ñucanchi causaipi pactachichunga ¿imata ayudaita ushan?

¹⁶ Bibliata liina, liishcata ñucanchi causaipi pactachinaca na siempre fácil canllu. Huaquinbica Bibliata liingapami tiempota llujchinaca difícil caita ushan. Bibliata liingapaj tiempota llujchishpapash, ñapash ñapash liishpaca imatapash talvez na yarishunllu. O talvez, ñucanchi causaipi ashtaca cambiocunata ruranata ricushpami desanimarita ushapanchi. Bibliata liingapaj ima jarcaicunata charijpipash Jehová Diosmi chai jarcaicunata mishachunga ayudanga. Shinaca Bibliata liishpa catingapaj, liishcata quiquinba causaipi pactachingapami esforzarishpa catina capangui. Chaita rurashpami cushilla causapangui (Sant. 1:25).