1, 2. Jehová Diosca ñucanchicunataca ¿imashinata rurashca?

 JEHOVÁ DIOSCA ñucanchicunataca shujcunamanda imagutapash rurashpa, imagutapash tucui shungu carashpa cushilla sintirita ushachunmi rurashca (Hech. 20:35). Shujcuna ñucanchicunaman imagutapash carajpica cushillami sintirinchi. Shinapash ñucanchicuna shujcunamanda imagutapash rurashpa o imagutapash carashpami ashtahuan cushilla sintirinchi. Jehová Dios ñucanchicunata chashna rurashcamandaca ninandami agradicipanchi.

² Shinaca ashtahuan cushilla cangapaca shujcunamandami imagutapash rurana capanchi. Shujcunamanda pendiente cashpaca shujcunataca ashtahuanmi ayudaita ushapashun. Chaita rurashpaca ñucanchillatami cushilla sintiripashun. Jehová ñucanchita chashna rurashcamandaca ninandami agradicipanchi (Sal. 139:14).

3. Bibliapica ¿imamandata Taita Diosca “cushilla Taita Dios” can nin?

³ Bibliapica carajcunaca ninandami cushijun ninmi. Jehová Dios caraj Dios cashcamandami paitaca ‘cushilla Taita Dios’ can nishpa nin (1 Tim. 1:11). Jehová Diosmi callarimandapacha caraj Dios cashcata ricuchishca. Chaimi apóstol Pabloca “paimandami causaita charinchi, purinchi y caipi capanchi” nirca (Hech. 17:28). Ashtahuanbash “Taita Diosmi jahua cielomandaca ashtahuan alipacha regalocunata caramun. Paipa carashcacunaca siempremi perfecto can” (Sant. 1:17).

4. Ashtahuan cushilla cangapaca ¿imatata rurana capanchi?

⁴ Imagutapash rurashpa, tucui shungu carashpa ashtahuan cushilla sintiringapaca ¿imatata rurana capanchi? Jehová Diospa ejemplotami catina capanchi. Y chaitami cai temapica yachajupashun (Efes. 5:1). Shinallata shujcunamanda imagutapash rurajpi paicuna na agradicijpi imata rurai ushashcatapashmi  yachajupashun. Caita ruranami cushilla carashpa catichun shinallata ashtahuan cushilla sintirichun ayudanga.

JEHOVÁ DIOSHNA CARAJ CAPASHUNCHI

5. Jehová Diosca ¿imacunata cushpata ayudan?

⁵ Jehová Dios caraj Dios cashcataca ¿imashinata ricuchin? Jehová Diosca siempremi ñucanchi minishtirishca cosasgucunata carashpa ayudan. Por ejemplo micunaguta, ropaguta y maipi causanaguta cushpami ayudan (Sal. 4:8; Mat. 6:​31-33; 1 Tim. 6:​6-8). Jehová Diosca na obligacionmandallachu ñucanchicunamanga imapash minishtirishca cosasgucunata caran.

6. Mateo 6:​25, 26​pi shimicunaca ¿imatata yachachin?

⁶ Jehová Diosca minishtirishca cosascunataca juyaimandami caran. Jesús nishca shimicunata yachajupashunchi. (Mateo 6:​25, 26​ta liipangui). Cai versocunapica Jesús pajarocunamanda parlashpami cashna nirca: “Cozechaitapash na cozechanllu, granocunata tandachina huasicunapipash granocunataca na alichinllu”. Shinallata: “Jahua cielopi cangunapa Taita micunaguta carajpimi micun” nircami. Chaimi paipa discipulocunataca cashna tapurca: “¿Nachu cangunaca chai animalgucunatapash yali, ashtahuan valishca canguichi?” nishpa. Cai chimbapuraita utilizashpaca Jehová Diosta sirvijcuna animalgucunatapash yali ashtahuan valishca cashcatami Jesusca yachachirca. Animalgucunata Jehová Dios cuidajpica ñucanchitacarin ashtahuan yali cuidanataca seguromi cana capanchi. Jehová Diosca ñucanchita juyaimandami minishtirishca cosasgucunataca caran (Sal. 145:16; Mat. 6:32).

7. ¿Imashinata Jehová Dioshna caita ushapanchi? (Fotocunata ricupangui).

⁷ Jehová Dioshna shujcunata juyaimandami minishtirishca cosasgucunata shujcunaman tucui shungu carashpa ayudapanchi. Por ejemplo shuj huauqui o shuj pani micunaguta o ropata minishtijujpica Jehová Diosca quiquindami paicunata ayudachunga utilizaita ushan. Jehová Diosta sirvijcunaca imapash llaquicuna tiajpi ayudaj cashcamandami rijsishca can. COVID-19 ungui tiashca tiempopica huauquipanicunaca micunata, ropata y shuj cosascunatapash minishtinajujcunaman carashpami ayudarca. Ashtahuanbash ashtaca huauquipanicunaca mundo enteropi llaqui apashca huauquipanicunata ayudachunmi obra mundialpa contribuciongunata cushpa ayudarca. Cai tucui huauquipanicunaca Hebreos 13:16​pi consejotami pactachirca. Chaipica: “Alita ruranataca na cunganachu capanguichi. Imata charishcata shujcunaman  compartinatapash na cunganachu canguichi. Chaicunaca shuj sacrificio cuendami can. Y chashna ruraicunataca ninanda cushijushpami Taita Diosca ricun” ninmi.

8. Jehová Dios fuerzata cushpa ayudashcamandaca ¿imatata ruraita ushapanchi? (Filipenses 2:13).

⁸ Jehová Diosmi fuerzata cushpa ayudan. Jehová Dios ninan poderta charimandami paipa sirvijcunamanga fuerzata cushpa ayudan (Filipenses 2:13​ta liipangui). Jehová Diostaca shuj tentacionmanda jarcarita ushangapaj, llaquicunata aguantangapami fuerzata carahuai nishpa talvez mañapashcangui. Shinallata cada punlla imagutapash rurangapaj fuerzata carahuai nishpapashmi mañapashcangui. Jehová Dios fuerzata cushpa ayudajpica apóstol Pabloshnami sintiripariangui. Paica: ‘Dios poderta cujpimi ñucaca tucuita rurangapaj fuerzata charini’ nircami (Filip. 4:13).

9. ¿Imashinata Jehová Dioshna shujcunata ayudaita ushapanchi? (Fotota ricupangui).

⁹ Ñucanchicunaca shujcunata ayudangapaca Jehová Dioshna fuerzata cushpa ayudaitaca na ushapanchichu. Shinapash ñucanchi fuerzacunata utilizashpami shujcunata ayudaita ushapanchi. Por ejemplo shuj huauqui o shuj pani mayorlla o irquilla cajpica paicunamandami imagutapash rurashpa ayudaita ushapanchi. Shinallata Salón del Reinota limpiashpa y mantenimientota rurashpami ayudaita ushapanchi. Ñucanchi huauquipanicunata ayudangapaj ñucanchi fuerzata utilizashpaca ninandami ayudaita ushapashun.

10. Huauquipanicunata animangapaca ¿imatata ruraita ushapanchi?

¹⁰ Ñucanchi shimicunahuan shujcunata animai ushashcataca na cunganachu capanchi. Pipash animachun minishtijujta ¿yachapanguichu? Pipash animachun minishtijujta yachashpaca visitashpa, telefonopi cayashpa, shuj tarjetaguta rurashpa o shuj mensajeguta cachashpami animaita ushapangui. Huauquipanicunata animangapaca ashtaca shimicunata ninaca na minishtirinllu. Ashtahuangarin shungumanda parlashpami paicunataca animaita ushapanchi. Talvez huauquipanicunaca ashalla shimicunapi paicunata animachunmi minishtinga (Prov. 12:25; Efes. 4:29).

11. Jehová Diosca paipa ali yachaihuanga ¿imatata ruran?

¹¹ Jehová Diosmi ali yachaita caran. Discípulo Santiagoca: “Ali yachaita pipash minishtijushpaca, Taita Diostami cutin cutin mañana can. Porque Taita Diosca na culirashpa, tucui shunguhuanmi ashtacata caranata yachan” nircami (Sant. 1:5). Cai versopi ricushcashnaca Jehová Diosca paipa ali yachaitaca paita mañajcunamanmi caran. Ñucanchicuna Jehová Diosta paipa ali yachaita carahuai nishpa mañajpica ñucanchihuan culiranapa randica ñucanchicuna paipa ayudata minishtijtaca alimi yachan (Prov. 2:​1-6).

12. Shujcunaman yachachingapaca ¿ima oportunidadtata charipanchi?

 ¹² ¿Imashinata Jehová Diospa ejemplota catita ushapanchi? (Sal. 32:8). Jehová Dioshnami ñucanchicunapash ñucanchi yachajushcacunata shujcunaman compartina oportunidadta charipanchi. Por ejemplo, mushuj publicadorcunamanmi imashina predicanata yachachita ushapanchi. Shinallata ancianocunaca, siervo ministerial huauquicunata, shinallata bautizarishca huauquicunatapashmi congregacionbi huaquin responsabilidadcunata aliguta pactachichun pacienciahuan yachachita ushan. Construccionbi y mantenimientopi experienciata charij huauquipanicunaca ñucanchi organizacionba huasicunata ricuriashpa cuidachunmi huauquipanicunataca yachachin.

13. Shujcunaman yachachijushpaca ¿imashinata Jehová Diospa ejemplota catita ushapanchi?

¹³ Shujcunaman yachachishpaca Jehová Diospa ejemplotami catina capanchi. Imashina ricupashcanchi Jehová Diosca paipa sirvijcunamanga paipa ali yachaitaca na mitsashpami caran. Ñucanchicunapashmi chairalla yachajunajuj huauquipanicunamanga ñucanchi yachajushcacunataca compartingapaj munapanchi. Shujcuna ñucanchi responsabilidadcunata “quichunga yashpa” manllaimandallaca na shujcunaman yachachinataca jarcarinachu capanchi. Shinallata “ñucataca pipash na yachachihuarcachu” “Ñucapash pimanbash na yachachinachu cani” nishpaca na pensarinachu capanchi. Jehová Diospa sirvijcunaca cai pensamientocunataca na charinachu capanchi. Ashtahuangarin tucui ñucanchi yachajushcacunata shujcunaman compartishpami cushilla sintiripashun (1 Tes. 2:8). Shina rurashpaca huauquipanicunapash ‘shujcunaman yachachingapaj alipacha preparadocuna’ cashcatami seguro capashun (2 Tim. 2:​1, 2). Tucuicunallata ñucanchi yachajushcacunata shujcunahuan compartishpaca cushillami causashun.

ÑUCANCHI RURASHCACUNATA NA AGRADICISHCATA RICUCHIJPICA ¿IMATATA RURAI USHAPANCHI?

14. Huauquipanicunata ayudajpica ¿imatata ruran?

¹⁴ Ñucanchi huauquipanicunaca paicunamanda imagutapash rurajpica agradicishcatami ricuchin. O na cashpaca shuj cartaguta rurashpa o imagutapash rurashpami agradicin (Col. 3:15). Chashna agradicijpimi ñucanchicunaca cushilla sintiripanchi.

15. Shujcuna na agradicijpipash ¿imatata rurashpa catina capanchi?

¹⁵ Shinapash ñucanchicunaca imagutapash shujcunamanda rurajpi na tucuicuna agradicina cashcataca yaipimi cana capanchi. Huaquinbica huaquin huauquipanicunaca paicunamanda imagutapash rurashpa ayudajpica na agradicishcatami ricuchita ushan. Shina pasashcamanda ama llaquilla sintiringapaca ¿imatata ruraita ushapanchi? Chaipaca Hechos 20:35​pi imata nijujtami yuyarina capanchi. ‘Imagutapash shujcunaman carashpa’ ayudajpi paicuna na valichijpipash ñucanchicunaca tucui shungu carashpami catina capanchi. Shina rurashpami ñucanchicunallata cushilla causaita ushapashun. Imagutapash carashpa cushilla sintirishpa catingapaj ima yuyaicuna ayudajta ricupashunchi.

16. Shujcuna na agradicijpipash ¿imatata yarina capanchi?

¹⁶ Shujcunaman imagutapash carashpaca Jehová Diospa ejemplotami catinajupanchi. Jehová Diosca gentecuna agradicijpi o na agradicijpipash ali cosascunata carashpami catin (Mat. 5:​43-48). Jehová Diosca paipa sirvijcunamanga ‘cutin japishami nishpa na pensashpalla’ imagutapash carajpica ‘ninanda bendiciasha’ nishpami prometishca (Luc. 6:35). Imagutapash rurashcamanda  shujcuna na agradicijpica na llaquirinachu capangui. Jehová Diosca quiquin shujcunata ayudashcamanda “cushijushpa” imagutapash rurashcamanda bendicianataca siempremi yarina capangui (2 Cor. 9:7; Prov. 19:17).

17. Jehová Diospa ejemplota catingapaca ¿imata ayudaita ushan? (Lucas 14:​12-14).

¹⁷ Cushilla tucui shungu carashpa catingapaca Jehovapa ejemplotami catina capanchi (Lucas 14:​12-14​ta liipangui). Ñucanchita ayudashca huauquipanicunata mingachina o paicunaman imagutapash caranaca na malochu can. Shinapash ñucanchita ayudachun munaimandalla shujcunata ayudanajushcata cuenta japishpaca ¿imatata rurai ushapanchi? Chaita cuenta japishpaca Jesuspa consejota catishpami ñucanchiman imagutapash na tigrachij ushana huauquipanicunata ayudaita ushapanchi. Chaita rurashpaca Jehová Diospa ejemplota catijushcamandami cushilla sintirita ushapashun. Shinallata shujcunaman carajpi paicuna na agradicijpipash siempremi cushijushpa carashpa catipashun.

18. Shujcunamanda ama nalita pensachunga ¿imata ayudanga?

¹⁸ Shujcunamanda ama nalita pensapashun (1 Cor. 13:7). Shujcunamanda imagutapash rurajpi paicuna na agradicishcata ricuchijpica cashnami pensarina capanchi. “¿Ciertopachachu ñuca rurashcacunataca na valichin o pagui ninatachu cungashca?” nishpa. O talvez shuj shuj razongunamandapashmi na agradicishcataca ricuchita ushan. Huaquingunaca agradicido cashpapash paicunapaca agradicishcata ricuchinaca dificilmi caita ushan. Cutin shujcunaca pitapash nunca na ayudata mañashcamandami ayudajpica pingaihuan sintirin. Shinaca imamanda ñucanchita na agradicishcata ricuchijpipash juyaimandami paicunata ayudashpa catina capanchi (Efes. 4:2).

19, 20. ¿Imamandata shujcunahuanga pacienciata charina capanchi? (Fotocunata ricupangui).

¹⁹ Pacienciata charipangui. Rey Salomonga tucui shungu caranamandaca cashnami nirca: “Cambaj tandataca, yacupi cacharilla. Tauca punllacuna yalijpica, cutin japinguillami” nircami (Ecl. 11:1). Cai shimicunaca ‘tauca punllacuna  yalishca’ jipa talvez agradici ushashcatami ricuchin.

²⁰ Superintendentepa huarmiguca chairalla bautizarishca panigumanmi shuj tarjetaguta rurashpa Jehová Diosta sirvishpa catichun animarca. 8 huatacuna jipaca tarjetata chasquishca paniguca “quiquinba tarjetapi nishca shimicunaca ashtaca huatacunatami ñucataca ninanda ayudahuarca” nishpami superintendentepa huarmigumanga escribirca. Shinallata paica “tarjeta juyaillagu cajpipash Bibliapa versomi ñucataca ninanda ayudahuarca” nishpami escribirca. Paipa causaipi huaquin llaquicunata charishcata parlashca jipapashmi cashna nirca: “Llaquicunahuan cashpaca tucuitami saquingapaj munarcani. Shinapash chai versomi ñucataca ñaupaman catichun ayudahuarca” nircami. “Shinallata cai versomi tucuimanda yali ayudahuashca” nircapashmi. Superintendentepa huarmigu cai tarjetaguta chasquishpaca ninandami cushijushcanga. Shinaca ñucanchicuna shujcunamanda imagutapash rurashpaca talvez “huaquin huatacuna jipami” chai personaca agradicinga. a

21. ¿Imamandata Jehová Dioshna imagutapash carashpa catingapaj esforzarina capanchi?

²¹ Imagutapash carajpica ninandami cushijupanchi. Shinapash Jehová Diosca ñucanchitaca shujcunaman imagutapash carashpa cushilla sintirichunmi rurashca. Ñucanchi huauquipanicunata ayudashpa paicuna agradicijpica cushillami sintiripanchi. Shinapash agradicijpi o na agradicijpipash alita rurajushcamandami cushilla sintirina capanchi. Imaguta carashpapash 2 Crónicas 25:9​pi nishca shimicunatami siempre yarina capanchi, chaipica: “Mandaj Diosca, chaitapash yalitami carai ushan” ninmi. Jehová Dioshnaca pipash na caraita ushanllu. Y ñucanchicunaca Jehová Dios bendiciashcamandami ashtahuanbachaca cushilla sintiripanchi. Shinaca Jehová Dioshna shujcunaman imagutapash tucui shungu carashpa catingapami siempre esforzarina capanchi.