Jesús paipa huañushca punllata yuyarichun nishpa mandajun tutapi paipa 70 discipulocuna paihuan na cashcamandaca paicuna Jesusta jichushca rishcataca na pensanachu capanchi. Shinapash Jesusca chai tutaca paipa 12 apostolcunahuan cangapallami munarca.

12 apostolcuna y 70 discipulocunami Jesuspa catijcuna carca. Primeroca Jesusca paipa tucui discipulocunamandami 12 jaricunata agllarca y paicunataca apóstol nishpami shutichirca (Luc. 6:​12-16). Galileapi cashpami ‘Jesusca paipa 12 apostolcunata tandachishpa’ “paicunataca Taita Diospa Gobiernomanda ali villaicunata predicachun y ungushcacunata jambichunbash cacharca” (Luc. 9:​1-6). Jipaca Judea llactapi cashpami “Jesusca paipa discipulopuramandaca 70cunata agllarca. Paicunataca ishcai ishcaimi cacharca” (Luc. 9:51; 10:1). Shinaca Jesús predicashca pushtucunapimi paipa discipulocunaca tiarca.

Judiocunaca Jesuspa catijcuna tucushpaca cada huatami Pascua fiestataca paipa familiacunahuan ruran cashcanga (Éx. 12:6-11, 17-20). Huañungapaj tiempo faltajpimi Jesusca paipa apostolcunahuanga Jerusalenman rirca. Shinapash Jesusca Judea, Galilea y Perea llactamanda discipulocunataca paihuan Pascua fiestata rurachunga na mañarcachu. Jesusca paipa apostolcunahuanllami chai tutaca cangapaj munarca. Chaimandami paicunamanga: “Ñuca sufrina tiempo nara chayamujpillata, cangunahuan cai Pascuapi micungapaca ninandami shuyajushcani” nircami (Luc. 22:15).

Jesusca ¿imamandata paipa apostolcunahuanlla cangapaj munarca? Porque ñallami ‘Gentecunapa pecadota anchuchij Taita Diospa Maltun Llamagushna’ huañugrijurca (Juan 1:29). Pundacunaca Jerusalenbimi Jehová Diosmanga sacrificiocunata caran carca y chaipimi Jesusca huañuna carca. Fiesta Pascuata rurashpaca israelitacunataca Jehová Dios Egiptomanda libre llujchishcatami yuyarin carca. Shinapash Jesús huañushcamandaca tucui gentecunami pecadomanda y juchamanda libre quidaita ushashca (1 Cor. 5:​7, 8). Jesús huañushcamandami 12 apostolcunaca shuj importante mingaita chasquirca. Paicunaca shuj shuj gentecunaman villachishpa discipulocuna tucuchunmi ayudarca. Shinami congregación cristianata callarirca (Efes. 2:​20-22). Jahua cielopi Jerusalén “cimientoca 12 rumicunatami charirca. Chai rumicunapica Maltun Llamagupa 12 apostolcunapa shuticunami escribishca tiajurca” (Apoc. 21:​10-14). Shinaca Bibliapi nishcashnaca Jehová Diospa munaita pactachingapami cai 12 apostolcunaca agllashca carca. Jesusca paipa huañushca punllata yuyarichun nara mandashca jipami por última vez Pascua fiestata paipa apostolcunahuan rurangapaj munashcanga.

Chai tutapica Jesusca 70 discipulocunahuan y shuj discipulocunahuanbash na carcachu. Chai tutaca paipa 12 apostolcunahuanllami Jesusca shuj tratota rurarca. Jesús rurashca tratomandaca Jehová Diosta tucui shunguhuan sirvijcunami beneficiarita ushagrijurca. ¿Imamandata shina nipanchi? Porque chai tratomandami huaquin discipulocunaca Jesushuan jahua cielopi mandangapaj agllai tucugrinajurca (Luc. 22:​29, 30).