1. Efesios 6:10-13​pi nishca shinaca Jehová Diosca ¿imashinata ñucanchita juyashcata, ñucanchimanda preocuparishcata ricuchishca?

DIABLOPASH, ayacunapash nali ruraicunahuanmi ñucanchitaca umachingapaj munan. Chaimi ayacunapa ruraicunahuan ama umachi tucuchun Jehová Diosca ñucanchita ayudan. Shinallata ayacuna nalicunapachami can nishpa Jehová Diosca ñucanchita yachachishca. Ashtahuanbash ayacunapa ruraicunahuan ama umachi tucungapami imata rurana cashcatapash Jehová Diosca ñucanchita yachachin. Shinami paica ñucanchita juyashcata, ñucanchimanda preocuparishcata ricuchishca (Efesios 6:10-13, liingui). Shinaca Jehovapi confiashpa, paipa ayudata chasquijpica Diabloca ñucanchitaca na umachi ushangachu. Chaimi ñucanchipash apóstol Pabloshna nin ushapanchi, “Taita Dios ñucanchihuan cajpica” ¿pita ñucanchitaca imatapash nalita rurai ushangayari? nishpa (Rom. 8:31).

2. Cai temapica ¿imatata yachajupashun?

² Jehovata sirvijcunaca Diablomanda, ayacunamanda tucui tucuita yachangapaca na munapanchichu. Chaipa randica Jehovamanda cabalta yachangapaj, paita ali sirvingapami munapanchi (Sal. 25:5). Shinapash ama umachi tucungapami Diablo ima ruraicunahuanlla pandachijtami yachana capanchi (2 Cor. 2:11). Chaimi cai temapica Diablopash, ayacunapash ima ruraicunahuan gentecunata umachitami yachajupashun. Shinallata ayacunapa ruraicunahuan ama umachi tucungapaj imata rurana cashcatami yachajupashun.

3, 4. a) Ayacunapa ruraicuna o espiritismoca ¿imata can? b) ¿Cai panda crishcacunaca maicunapillata tian?

³ Diablopash, ayacunapash nali ruraicunahuan o espiritismo  nishcahuanmi gentecunataca umachishca. Por ejemplo huaquin gentecunaca shamuj punllacunapi ima pasanata yachai ushanchi ninmi. Cutin shujcunaca huañushcacunahuan parlai ushanchi nishpami shujcunata umachin. Shinallata shuj gentecunaca brujocuna shina trabajaimandami shujcunata llaquichingapaca nalicunata ruran. *

⁴ Ayacunapa ruraicunaca o espiritismo nishcacunaca mundo enteropimi tian. Por ejemplo Latinoamericanamanda, Caribemanda 18 llactacunapi causaj gentecunataca cai crishcacunamanda tapuchijpica ashtacacunami brujeriapi crinchi, huañushcacunapa espirituhuan parlaita usharinmi nirca. Cutin Africamanda 18 llactacunapi tapuchishca gentecunamandaca chaupi yalimi brujeriapi crinchi nirca. Shinaca Diabloca tucui cai alpapi causajcunatami umachingapaj munan. Chaimi maipi causashpapash Diablo ñucanchicunatapash umachichunga na saquinachu capanchi (Apoc. 12:9).

5. Jehová Diosca ayacunapa ruraicunamanda o espiritismo nishcamandaca ¿imatata yuyan?

⁵ Jehová Diosca ‘Na llullaj Taita Diosmi’ can (Sal. 31:5). Chaimi Jehová Diosca ayacunapa ruraicunata o espiritismo nishcataca nimamanda na ricunayachinllu. Jehová Diosca israelitacunamanga nircami: “Canguna purapica, paipaj churita, paipaj ushita cashpapash, rurashcalla diosman carashpa rupachij runaca na tianachu. Shinallata yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu. Yumbu canata, yachaj canata, ayacunata mañaj canata, huañushcacunata tapuj canata yachajuj runapash na tianachu. Imatapash chashna nalicunata ruranaca, Mandaj Diospaj ñaupajpica millanayaimi” nishpa (Deut. 18:10-12). Cunanbi ñucanchicunaca Jehová Dios israelitacunaman cushca leycunata cazuna obligaciondaca na charipanchichu. Shina cajpipash ayacunapa ruraicunata o espiritismo nishcata Jehová Dios nimamanda na ricunayachishcataca alimi yachapanchi (Mal. 3:6).

6. a) Diabloca ¿imacunahuanda gentecunata llaquichijushca? b) Eclesiastés 9:5​pi nishca shinaca huañushca jipaca ¿imata tucunchi?

⁶ Diabloca paipa ruraicunahuan o espiritismo nishcahuanmi gentecunataca llaquichishca. Jehová Diosca chaitaca alimi yachan. Chaimi ñucanchicunataca chai nali ruraicunamanda caruyachun mandan. Diabloca pipash huañujpica almaca shuj ladopimi causangapaj rin nishpami gentecunataca umachishca (Eclesiastés 9:5, liingui). Shina llullacunahuanmi Diabloca gentecunata manllachishca, Jehová Diosmandapash caruyachishca. Diabloca chai nalicunata ruraj gentecuna Jehová Diospi confianapa randi, ayacunapi confiachunmi shina umachijushca.

7. Jehová Diosca ¿imatata ñucanchitaca yachachin?

⁷ Imashinami ricuparcanchi Diablopa, ayacunapa ruraicunahuan ama umachi tucungapaca imata rurana cashcatami Jehová Diosca ñucanchicunata yachachishca. Shinaca ayacunapa ruraicunahuan ama umachi tucungapaj imata ruranata ricupashunchi.

8. a) Ayacunapa ruraicunahuan ama umachi tucungapaca ¿imatata rurana capanchi? b) Salmo 146:4​pica ¿imatata huañushcacunamandaca yachachin?

⁸ Bibliata liishpa, chai liishcapi pensarina capanchi. Shina rurashpallami ayacunapa ruraicunahuan na umachi tucushun. Bibliaca shuj espada cuendami Diablopa ruraicunahuan ama umachi tucuchun ayudanga (Efes. 6:17).  Por ejemplo, Bibliapica huañushcacunahuan parlaitaca na ushanchichu nishpami yachachin (Salmo 146:4, liingui). Shinallata shamuj punllacunapi ima pasanata Jehová Dioslla yachai ushashcatami Bibliapica nin (Is. 45:21; 46:10). Shinaca Bibliata cada punlla liishpa, chai liishcapi pensarina capanchi. Shinami ayacunapa ruraicunahuan na umachi tucushun. Shinallata ayacunapa ruraicunataca nimamanda na rurangapaj munashunllu.

9. ¿Ayacunapa ima ruraicunahuanda na chapurinchi?

⁹ Ayacunapa ruraicunahuan o espiritismo nishcahuanga na chapurinachu capanchi. Jehovata sirvijcunaca brujocunapamanga nimamanda na rinchichu. Shinallata huañushcacunahuan parlangapaj nishpa imacunatapash na ruranchichu. Imashinami chaishuj temapi yachajuparcanchi, gentecunaca huañushcacuna jipa almaca shuj ladopi causashpa catin nishpami crin. Chaimi paicunaca huañushcamanda costumbrecunata ruran. Shinapash ñucanchica chai nali ruraicunataca nimamanda na rurapanchichu. Shinallata shamuj punllacunapi ima pasanata yachangapaca, horóscopo nishcacunataca na ricupanchichu (Is. 8:19). Chai ruraicunata, chaipura shuj nali ruraicunatapash nimamanda na rurangapaj munapanchichu. Shina ruraicunapi chapurishpaca Diablopa, ayacunapa ruraicunapipachami chapurinajushun.

10, 11. a) Éfeso llactamanda huaquin gentecuna Bibliamanda yachajushpaca ¿imatata rurarca? b) 1 Corintios 10:21​pi nishca shinaca ¿imamandata paicunashna cangapaj esforzarina capanchi?

¹⁰ Ayacunapa ruraicunamanda yachachij cosascunata rupachinami capanchi. Apostolcunapa punllacunapica Éfeso llactapica ashtaca brujocunami tiarca. Shinapash chai llactamanda huaquin gentecuna Bibliamanda yachajushpaca chai ruraicunatami saquirca. Bibliapica ninmi: “Taucacunami, yumbu tucungapaj yachajuna librocunata apamushpa, tucuicunapaj ñaupajpi rupachinajurca” nishpa (Hech. 19:19). Paicunaca ayacunapa ruraicunahuan ama chapuringapami shina rurarca. Chai librocunaca valishcapachami carca. Chai librocunata jatunapa  o caranapa randica rupachitami rupachirca. Chai librocuna valishcapacha cajpipash Jehová Diosta cazunami paicunapaca ashtahuan minishtirishca carca.

¹¹ Ñucanchicunapash paicunashna cangapaca ¿imatata rurana capanchi? Suertepa nishca cosascunata o ayacuna ama llaquichichun nishca cosascunata charishpaca rupachinami capanchi (1 Corintios 10:21, liingui). *

12. ¿Imacunatallata tapurina capanchi?

¹² Diversiongunata ali agllapashunchi. Tapuripashunchi: “¿Librocunapi, revistacunapi o Internetpi ayacunapa ruraicunamanda o espiritismo nishcamanda liinatachu gushtani? ¿Ñuca ricushca telepi programacuna, peliculacuna o ñuca uyashca musicacuna o videojuegocunaca vampirocunamanda, zombis nishcacunamanda o shuj nali cosascunamandachu ricuchijun? Na cashpaca ¿brujería ruraicunataca alitashnachu ricuchijun?” nishpa. Shinapash na tucui diversiongunachu ayacunapa ruraicunahuan chapurishca can. Shinaca shuj diversionda agllagrijushpaca Jehová Dios na ricunayachishca ruraicunahuan chapurishcata o na chapurishcataca alimi ricuna capanchi. Ñucanchica Jehovapa ñaupapi ali ricuringapami munapanchi (Hech. 24:16). *

13. ¿Imatata na rurana capanchi?

¹³ Ayacunamanda parlocunataca na parlajunachu capanchi. Ñucanchica Jesushna cangapami esforzarina capanchi (1 Ped. 2:21). Jesus jahua cielopi causashpaca Diablomanda, ayacunamandapash tucuitami yachaj chayarca.  Shinapash cai alpapi causajushpaca Jesusca Diablomandallaca na parlashpa purijurcachu. Ashtahuanbachaca Jehová Diosmandami villachishpa purirca. Ñucanchicunapash Jesushnami ayacunapa parlocunamandaca na parlashpa purijunachu capanchi. Chaipa randica ‘juyailla shimicunata’ nishpa Bibliapa yachachishcacuna ñucanchi shungupi charishcata ricuchipashunchi (Sal. 45:1).

14, 15. a) ¿Imashpata ayacunataca na yapata manllana capanchi? b) Cunanbica ¿imashinata Jehová Diosca paita sirvijcunataca cuidajun?

¹⁴ Ayacunataca ama yapata manllashunchichu. Cai nali mundopica tucuicunatallatami llaquicunaca japin. Huaquinbica na yashcapimi shuj accidente, shuj ungüita chari ushanchi. Huaquinbicarin huañuitapash huañuita ushanchi. Shina llaquicunata charishpaca ¿ayacunatachu juchachina capanchi? Bibliapica ninmi: ‘Ima punlla tucuicuna ima tucunataca’ na yachai ushanchichu nishpa (Ecl. 9:11). Jehová Diosca ayacunamanda ashtahuan poderta charishcataca ñami ricuchishca. Por ejemplo, Job runaguta Diablo huañuchichunga Jehová Diosca na saquircachu (Job 2:6). Shinallata Moisespa punllacunapica Egiptopa brujocunamanda ashtaca yali poderta charishcatami Jehová Diosca ricuchirca (Éx. 8:18; 9:11). Ashtaca huatacuna jipaca Jehovamanda poderta chasquishpami Jesusca jahua cielomanda Diablotapash, paipa ayacunatapash cai alpaman shitarca. Shinallata ñallami Jesusca ayacuna gentecunata ama llaquichishpa catichun “manllanayai ucu ucu utujuman” shitanga (Apoc. 12:9; 20:2, 3).

¹⁵ Cunan punllacunapica Jehová Dios paita sirvijcunata cuidashcataca alimi yachapanchi. Cunanga caipi pensaripashunchi: Mundo enteropimi Jehovamanda villachinajupanchi (Mat. 28:19, 20). Shinami Diablopa ruraicunaca llullacuna cashcata ricupanchi. Diablo ushashpaca Jehovamanda villachinataca jarcaita ushanmanmi carca. Shinapash Diabloca jarcaitaca na ushashcachu. Chaimandami ayacunataca na manllana capanchi. Ashtahuangarin Bibliapica Jehovamandaca cashnami nin: “Paita cazujcunaman alita rurashpa, paipaj tucui ushaita ricuchingapajmi, tucui cai pachata ricuriajun” nishpa (2 Crón. 16:9). Ayacunaca na siempre umachishpa catingachu. Chaimandami ñucanchicunaca Jehovata tucui shunguhuan sirvishpa catina capanchi.

16, 17. Shuj paniguca ¿imatata rurarca? Intindichipai.

¹⁶ Huaquinbica ñucanchi familiacuna, amigocuna ñucanchita ningapashchari, cai costumbreta ruranami cangui nishpa. Shinapash ayacunapa ruraicunahuan ama umachi tucungapami ninanda esforzarina capanchi. Shina rurajpica Jehovallatami bendicianga. Cunanga Erica panigumanda ricupashunchi. Paica Ghana llactapimi causan. Chai paniguca 21 huatacunata charishpami Bibliamanda yachajui callarirca. Erica panigupa taitaca brujomi carca. Paipa taitaca shuj yanga dioscunaman animalcunata huañuchishpa, chai dioscunaman cushca animalpa aichata micuna costumbretami charirca. Shinaca Ericapash paipa taitashna chai costumbreta catichunmi paipa familiaca munarca. Chaicunata na rurashachu nijpica, familiaca ñucanchi dioscunataca nimapa na sirvichijunguichu nishpami ninanda culirarca. Shinallata ñucanchi dioscunaca imapash nanaihuanmi castiganga nishpami pensarinajurca.

¹⁷ Chai costumbreta catichunmi Ericapa familiaca obligangapaj munarca. Masqui huasimanda llujshishpa rina tucujpipash, Erica paniguca chai costumbretaca na rurashcahuanmi yalirca. Shina rurashcamandaca ¿imashinata Jehová Diosca Ericata ayudarca? Ashtaca huauquipanicunami paitaca paicunapa huasipi mingachishpa ayudarca. Shinami Erica paniguca Jehová Diosta sirvij ashtaca familiata charirca (Mar. 10:29, 30). Cutin Ericapa familiaca paita na ricunayachishpa paipa cosascunatapash rupachishpami saquirca. Shina rurajpipash Jehovata sirvishpa catingapaj munaimandami paica bautizarirca. Cunanga precursora regularmi can. Shinami Erica paniguca ayacunata na manllashcata ricuchirca. Paica ninmi: “Cada punllami Jehovata mañani ñuca familiapash Jehovata rijsichun” nishpa.

18. Jehová Dios ayudanapi confiashpaca ¿imatata chasquishun?

¹⁸ Ñucanchica, chai panigushna charishca llaquicunataca tal vez na charishunllu. Shinapash tucuicunami ayacuna ama umachichun cuidarina capanchi. Ashtahuanbachaca Jehovapimi confiashpa catina capanchi. Shina rurajpica Jehovallatami bendicianga. Jehovapi confiashpaca Diablopa ruraicunahuan umachichunga na saquishunllu. Diablo ñucanchita na umachichun saquishpaca, Jehovata sirvinataca nunca na saquishunllu. Shinami Jehovahuan ashtahuan ali amigo cashpa catishun. Discípulo Santiagoca nircami: “Taita Diostalla cazushpa causashpa, diablohuanga shinllita macanajuichi. Chashna causajpimi, cangunamandaca diabloca anchuringa. Taita Diospajman quimirichi. Shina quimirijpica, paipash cangunapajman quimiringami” nishpa (Sant. 4:7, 8).