¿Yachaparcanguichu?
Davidpa soldadocunaca ¿imamandata shuj shuj llactacunamanda carca?
DAVIDPA soldadocunamandaca huaquingunaca na israelitacunachu carca. Por ejemplo, Zélec runaca ammonitami carca, Urías runaca hititami carca, Itmá runaca moabitami carca (1 Crón. 11:39, 41, 46). a Shinallata “cereteo nishcacuna, peleteo nishcacuna y geteo nishca” runacunapashmi carca (2 Sam 15:18). Ashtahuanbash cereteo y peleteo nishcacunaca filisteo gentecunahuanga familiami cashca yarin (Ezeq. 25:16). Cutin geteo gentecunaca filisteo gentecunapa llacta Gatpimi causarca (Jos. 13:2, 3; 1 Sam 6:17, 18).
Davidca ¿imamandata shuj llactamanda gentecunapash paipa soldadocuna cachun saquirca? Davidca cai soldadocuna paita na saquishpa cazunatami yacharca. Ashtahuanbachaca Jehová Diosta na saquishpa servina cashcatami seguro carca. Por ejemplo, cereteo y peleteo gentecunamanda parlashpaca, The New Interpreter’s Dictionary of the Bible nishcapica cashnami nin: “Cereteo y Peleteo soldadocunaca Davidtaca na saquircachu”. ¿Imamandata shina nipanchi? Israel llactamanda tucui runacunallatami ‘Seba shuti nalita ruraj’ runata catingapami rey Davidtaca jichushpa saquirca. Pero cereteo y peleteo soldadocunaca Seba shuti runata mishangapaj Davidtaca ayudarca (2 Sam 20:1, 2, 7). Shuj viajeca rey Davidpa churi Adoniasmi Davidpa randi rey tucungapaj munarca. Shina pasajpipash cereteo y peleteo soldadocunaca Davidta apoyashpami, Davidpa churi Salomón rey tucuchun ayudarca. Cai soldadocunaca Salomón rey cachun Jehová Dios agllashcatami yacharca (1 Rey. 1:24-27, 38, 39).
Ittái runapashmi rey Davidtaca na saquishpa paita apoyashcata ricuchirca. Ittái runagu y 600 soldadocunapashmi Davidpa randi Absalón rey tucungapaj munajujpica, cai soldadocunaca Davidta apoyarca. Chaimandami rey Davidca Ittái runagutaca “Canga shuj llactamandami cangui. Chaimandami ‘ñucata apoyana responsabilidadtaca na charipanguichu’” nircami. Shina nijpimi Ittái runaguca cashna nirca: “Taita Diosca causajumbachami. Ñuca amo can jatun mandajpash ricujunguimi. Huañungapaj cashpapash, causangapaj cashpapash, ñuca amo can jatun mandaj maipi cajpipash, canda servij ñucapash chaipimi casha nircami” (2 Sam 15:6, 18-21).
Ittái runaguca Jehová Dios agllashca Davidtaca na saquishpami apoyarca.
Cereteo, peleteo y geteo gentecuna shuj llactamanda cashpapashmi Jehová Dios Taita Dios cashcatami crirca. Shinallata Taita Diospa agllashca Davidtapashmi respetarca. Rey Davidca, paita na saquishpa sirvij soldadocunata charishcamandami cushilla sintirishcanga.
a Deuteronomio 23:3-6pi nishcashnaca Taita Diospa Leypica ammonita y moabita gentecunaca Israel llactapa congregacionman yaicuitaca na ushanllu nishcatami ricupanchi. Pero ammonita y moabitacunataca israelitacunahuan parlachun prohibishcataca na ninllu. Shinallata Israel llactapi na causanachu nishpa prohibishcatapash na nijunllu. Perspicacia para comprender las Escrituraspi “Ammonitas” nishcaman yaicushpa “Se casan con israelitas” nishcata ricupangui.
