1. Apostolcunapa punllacunapi Jehovata sirvijcunaca ¿imashinata ordenado carca?

 JEHOVÁ DIOSCA paipa sirvijcunaman imapash asignaciongunata cushpaca ordenado, aliguman pactachichunmi munan (1 Cor. 14:33). Por ejemplo, Jehová Diosca ali villaigucunataca mundo enteropi gentecunaman predicachunmi munan (Mat. 24:14). Y cai responsabilidadta pactachichunga Jehová Diosca Jesusmanmi mingashca. Chaimandami Jesusca tucui ordenado cachun ricuriajushca. Apostolcunapa punllacunapica Jerusalén llactapica shuj grupomi tiarca. Y cai grupopica apostolcuna y ancianocunami tiarca. Paicunami congregacionda ayudangapaj imapash decisiongunata agllana shinallata instrucciongunata cuna responsabilidadta charirca (Hech. 15:2; 16:4). Jerusalén llactamanda apostolcuna y ancianocunami tucui congregaciongunapi ancianocuna tiachun nombran carca. Y cai nombrashca ancianocunami congregacionbi huauquipanicunata ñaupaman pushashpa shinallata instrucciongunata cai huauquipanicuna pactachichun ayudana responsabilidadta charirca (Hech. 14:23). Congregacionmanda huauquipanicunaca apostolcunapa, ancianocunapa instrucciongunata cazuimandami ‘tucui shungumi ashtahuan crishpa catinajurca’. Shinallata “cada punllami ashtahuan ashtahuan mirashpa catinajurca” (Hech. 16:5).

2. 1919​manda Jehová Diosca ¿imashinata paipa sirvijcunataca ayudajushca?

² Cunan punllacunapipashmi Jehová Diosca paita sirvijcuna ordenado cashpa catichun ricuriajun. Huata 1919​pica Jesusca shuj grupo ungido huauquicunatami utilizai callarirca. Cai huauquicunami predicacionda ordenado ñaupaman pushanajurca. Y huauquipanicuna espiritualmente ali cachun publicaciongunata y  shuj shuj informaciongunata cushpa ayudanajurca (Luc. 12:42). a Cai huauquicuna paicunapa responsabilidadta ali pactachijushcamanda Jehová Dios bendiciajushcataca alimi yachapanchi (Is. 60:22; 65:​13, 14).

3, 4. a) Ordenado cana ima beneficiocunatalla charishcata shuj ejemplohuan intindichipai. b) Cai temapica ¿imatata yachajupashun?

³ Jesuspa mandashcata ali pactachingapaca ordenado canaca minishtirishcapachami can (Mat. 28:​19, 20). Por ejemplo, congregacionba territoriocuna na ordenado cajpica maipashcachunmi predicanajupanchiman. O shuj territoriocunataca talvez nunca na predicanchimanllu. Shinaca ordenado canaca ¿ima beneficiocunatallata charin?

⁴ Jesús cai alpapi cashpa paipa discipulocunata imashina ordenado cachun ayudashcashnallatami cunan punllacunapipash Jehová Diosta sirvijcunatapash ayudajun. Cai temapica Jesús imashina ordenado cashcatami yachajupashun. Shinallata Jehovapa organización Jesuspa ejemplota catishpa ordenado cashcatami yachajupashun. Ashtahuanbash Jehovapa organizacionbi tucui shungu confiashcata ricuchingapaj imata rurana cashcatapashmi yachajupashun.

JEHOVAPA ORGANIZACIONGA JESUSPA EJEMPLOTAMI CATIN

5. Jehovapa organizacionga ¿imashinata Jesuspa ejemplota catinajushcata ricuchin? (Juan 8:28).

⁵ Jesusca imata ninata, imata ruranataca Jehová Diosmandami yachajurca. Shina cuendallatami Jehovapa organizacionga Bibliapa yachachishcacunata, consejocunata catin (Juan 8:28​ta liipangui; 2 Tim. 3:​16, 17). Shinallata Jehovapa organizacionga Bibliata seguido liichun y imata yachajushcata pactachichunmi siempre yarichijun. Shinaca cai consejocunata catishpaca ¿imashinata beneficiaripanchi?

6. Bibliata estudiashpaca ¿imashinata beneficiaripanchi?

⁶ Bibliataca publicaciongunapa ayudahuanmi yachajupanchi. Shina rurashpaca ñucanchillatami ninanda beneficiaripanchi. Por ejemplo, Jehovapa organizacionbi yachachishcacuna o instrucciongunataca Bibliahuanmi comparaita ushapanchi. Shinaca chai instruccionguna Bibliapi nishcashna caimandami Jehovapa organizacionbica ashtahuan confiashpa catipanchi (Rom. 12:2).

7. Jesusca ¿imatata rurarca? Jehovata sirvijcunaca ¿imashinata Jesuspa ejemplota catinajun?

⁷ Jesusca ‘Taita Diospa Gobiernomanda ali villaicunatami’ predicarca (Luc. 4:​43, 44). Shinallata paipa discipulocunapash chaitallata rurachunmi mandarca (Luc. 9:​1, 2; 10:​8, 9). Cunan punllacunapipash Jehovata sirvijcunaca maipi cashpapash o ima responsabilidadcunata charishpapash Jehová Diospa Gobiernomandami predicanajun.

8. Ñucanchica ¿ima bendiciondata charipanchi?

⁸ Jehovapa Gobiernomanda gentecunaman villachinaca shuj jatun bendicionmi can. Y cai bendiciondaca na tucuicuna charinllu. Por ejemplo, Jesús cai alpapi cashpaca demoniocuna paimanda parlachunga na saquircachu (Luc. 4:41). Cunanbipash pipash testigo de Jehovacunahuan predicangapaj munashpaca primeroca Bibliapa mandashcacunatami pactachijuna can. Shinaca predicanata valichishcataca ¿imashinata ricuchipanchi? Predicangapaj oportunidadcuna ricurijpi uchalla predicashpa. Jesushnallatami tucui gentecunaman predicangapaj y Jehová Diosmanda yachachingapaj munapanchi (Mat. 13:​3, 23; 1 Cor. 3:6).

9. Jehovapa organizacionga ¿imata rurajushca?

⁹ Jesusca Jehovapa shutimandami yachachirca. Jesusca paipa Taitata mañajushpaca: “Quiquinba shutimandaca ñami paicunamanga yachachipashcani” nirca (Juan 17:26). Jehovapa organizacionga Jesuspa ejemplota catishpa,  Taita Diospa shutita rijsichingapami ninanda esforzarinajun. Por ejemplo, Traducción del Nuevo Mundo Bibliataca entero cashpa o Bibliapa huaquin librocunatalla cashpapash más de 270 idiomacunapimi llujchishca. Cai Bibliapica Taita Diospa shimita primero escribinajushca tiempopi Taita Diospa shutita churashca pushtucunapillatami churashca can. Español Bibliapa apéndice A4 y A5 partecunapica Taita Diospa shutimandami parlan. Biblia de estudiopa apéndice C partepica Escrituras Griegas Cristianaspi Taita Diospa shuti 237 viajecunata imamanda tiajuna cashcatami ricuchin.

10. Myanmar llactapi causaj shuj huarmigupa experienciamandaca ¿imatata yachajupanchi?

¹⁰ Jesushnallatami ñucanchicunapash Jehová Diospa shutita tucui gentecuna rijsichun munapanchi. Myanmar llactapica shuj panigumi 67 huatacunata charij shuj huarmiguman Taita Diospa shuti Jehová cashcata yachachirca. Chaita uyashpami cai huarmiguca ninanda cushijuimanda huacashpami cashna nirca: “Taita Diospa shutimandaca primera vezmi uyapani. Caita yachanaca ñucapaca importantemi can”. Cai experienciapi ricushcashnami gentecunaca Taita Diospa shutimanda yachajushpaca paicunapa causaipi cambiocunata ruraita ushan.

JEHOVAPA ORGANIZACIONBI TUCUI SHUNGU CONFIASHCATA RICUCHIPASHUNCHI

11. Ancianocunaca Jehovapa organizacionbi confiashcataca ¿imashinata ricuchin? (Fotocunata ricupangui).

¹¹ Jehovapa organizacionbi confiashcataca ancianocunaca ¿imashinata ricuchita ushan? Jehovapa organización cushca instrucciongunata ali ali liishpa y chai instrucciongunata tucuita pactachingapaj esforzarishpami confiashcata ricuchin. Por ejemplo, ancianocunaca asignaciongunata imashina pactachina cashcata, reuniongunapi oraciongunata imashina rurana instrucciongunatami chasquin. Ashtahuanbash Jehovata tucui sirvijcunata imashina cuidana instrucciongunatapashmi chasquin. Ancianocuna Jehová Diospa organizacionbi cushca tucui instrucciongunata pactachijta ricushpaca congregacionmanda huauquipanicunaca Jehová Dios paicunata juyashcata y cuidajushcatami sintin.

12. a) ¿Imamandata ancianocunapa instrucciongunata cazuna capanchi? (Hebreos 13: 7, 17). b) ¿Imamandata ancianocunapa ali cualidadcunata ricuna capanchi?

¹² Ancianocuna ñucanchiman imapash instrucciongunata cujpica aligumanmi cazuna capanchi. Paicuna cushca instrucciongunata aliguman cazushpami ancianocuna paicunapa responsabilidadta fácil pactachita ushachun ayudapashun. Bibliapica ancianocunataca cazushpa sujetarinami canguichi nishpa yachachin (Hebreos 13:​7, 17​ta liipangui). Y chaita pactachinaca na siemprechu fácil can. Porque anciano huauquicunaca imperfectocunami can. Y ancianocunapa pandarishcacunata cutin cutin ricujushpaca Jehovapa contracunapa munaitami ruranajunchiman. Jehovapa contracunaca ancianocunamanda y Jehovapa organizacionmanda desconfiachunmi munan. Shinaca Jehovapa contracunapa llullacunata ama cringapaca ¿imatata rurana capanchi?

JEHOVAPA ORGANIZACIONBI DESCONFIACHICHUNGA NA SAQUINACHU CAPANCHI

13. Contracunaca Jehovapa organizacionda, gentecuna ¿imashina ricuchunda munan?

¹³ Jehovapa contracunaca Jehovapa organizacionba ali ruraicunata nalitashna gentecuna ricuchunmi munan. Por ejemplo, Bibliapica Jehová Diosca paipa sirvijcuna huainayana juchapi na urmashpa limpio causaita charichun y espiritualmente ali cachun munashcatami yachachin. Shinallata shuj huauqui o pani, nali ruraicunata, mapa, huainayashpa causanata na saquishpa, na arripintirijpica congregacionmanda expulsana cashcatami yachachin (1 Cor. 5:​11-13; 6:​9, 10).  Shinaca ñucanchicuna Jehová mandashcata cazujta ricushpami Jehovapa contracunaca ñucanchitaca gentecunata na juyanllu, nali gentecunami can o orgullosocunami can nishpa juchachin.

14. Jehovapa organizacionmandaca ¿pita llullacunata ni callarirca?

¹⁴ Jehovapa organizaciondaca ¿pita atacai callarirca? Bibliapica Diablo ‘llullapa taita’ can ninmi. Paimi Jehovapa organizacionmandaca llullacunata nijushca (Juan 8:44; Gén. 3:​1-5). Shinallata Diabloca Jehovapa organizacionmanda llullacunata mirachishpa catingapaca gentecunatami utilizajushca. Chaica apostolcunapa punllacunapipashmi pasarca.

15. Jesusmanda y paipa discipulocunamandaca religionda ñaupaman pushajcunaca ¿imatata nirca?

¹⁵ Jesusca perfectomi carca. Y ashtaca milagrocunatami rurarca. Shinapashmi Diabloca Jesusmanda llullacunata ningapaca gentecunata utilizarca. Por ejemplo, chai tiempopi religionda ñaupaman pushajcunaca Jesusca “demoniocunata mandajpa” ayudahuanmi demonio catishca gentecunamanda demoniocunata expulsan nishpami llullanajurca (Mar. 3:22). Shinallata Jesusta juiciota ruranajushpaca religionda ñaupaman pushajcunaca Jesusca Taita Diospa shutita na respetanllu nishpa llullashpami Jesusta huañuchingapaj gentecunata convincirca (Mat. 27:20). Tiempohuan Jesuspa discipulocuna predicai callarijpica Jehovapa contracunaca Jesuspa discipulocunata catiriashpa llaquichichunmi gentecunataca paicunapa ‘contra shayarichun yachachinajurca’ (Hech. 14:​2, 19). Hechos 14:2​manda parlashpaca, La Atalaya del 1 de diciembre de 1998​pi llujshishca revistapica cashnami nin: Huaquin judiocunaca Jehovapa ali villaigucunataca na chasquircachu. Shina cashpapash shuj gentecunapash Jehovapa sirvijcunapa “en contra shayarichunmi llullacunata mirachishpa catirca”.

16. Imapash llullacunata uyashpaca ¿imatata yarina capanchi?

 ¹⁶ Diabloca cunangamanmi llullashpa catijun. Chaimandami “cai alpapi tucui gentecunata umachijun” (Apoc. 12:9). Chaimandami Jehovapa organizacionmanda o congregacionda ñaupaman pushaj huauquicunamanda imapash llullacunata uyashpaca, Jehovapa contracuna Jesusmanda y Jesuspa discipulocunamanda ima llullacunata nishcatami yarina capanchi. Bibliapi nishcashnami testigo de Jehovacunataca Jehovapa contracunaca catiriashpa llaquichinajushca. Shinallata llullacunatapashmi ninajushca (Mat. 5:​11, 12). Jehová Diospa contracunapa nishcacuna llulla cashcata seguro cashpaca paicunapa nishcacunataca na crishunllu. Pero chai llullacunata ama cringapaca ¿imatata rurana capanchi?

17. Imapash llullacunata uyashpaca ¿imatata rurana capanchi? (2 Timoteo 1:13; “ Llullacunata uyashpaca caita rurapangui” nishca recuadrota ricupangui).

¹⁷ Llullacunataca rechazanami capanchi. Apóstol Pabloca imapash llullacunata uyashpaca imata rurana cashcatami explicarca. Chaimandami 1 Timoteo 1:​3, 4​pica: ‘Llulla parlocunata na uyanachu capanguichi’ nirca. Ashtahuanbash Timoteomanga: “Taita Diosta na respetaj parlocunataca rechazanami cangui” nishpami consejarca (1 Tim. 4:7). Por ejemplo, shuj uchilla huahuaguca alpamanda imatapash japishpaca ñapashmi shimipi churan. Pero caita rurana peligroso cashcamandami shuj mayor personaca nunca na ruranmanllu. Shinallatami ñucanchicunapash llulla parlocunataca na crina capanchi. Ashtahuanbachaca ‘ali shimicunata’ o Bibliapa cabal yachachishcacunatallami uyana capanchi (2 Timoteo 1:13​ta liipangui).

18. Jehovapa organizacionbi confiashcataca ¿imashinata ricuchita ushapanchi?

¹⁸ Jehovapa organización Jesuspa ejemplota catijushcataca quimsa razongunahuanmi yachajupashcanchi. Bibliata estudiashpa catishpaca Jehovapa organizacionbi confiangapaj ashtahuan razongunatapashmi taripangui. Shinallata Jehovapa organizacionbi huauquipanicuna confiashpa catichunbash ayudapangui. Jehová Diostaca na saquishpami sirvishpa catina capangui. Shinallata paipa organizacionmanda pipash caruyachichunga na saquinachu capangui. Jehová Diosca paipa organizacionda utilizashpami paipa voluntadta pactachijun (Sal. 37:28). Jehovapa organizacionbi paita sirvinaca shuj jatun bendicionmi can. Chaitaca ninandami valorana capanchi.