1. Paraíso espiritualca ¿imata can? ¿Imata rurangapata decidido cana capanchi?

 CUNAN punllacunapica Jehovata tucui sirvijcunallatami shuj paraíso espiritualpi a causanajupanchi. Y cai paraíso espiritualpi Jehovapa munaita rurashpami ocupado ocupado yalipanchi. Shinallata cushilla, tranquilomi causapanchi. Y cai causaita nimamanda na saquingapami decidido capanchi. Ashtahuanbash tucui gentecunallata cashna causaiguta charichunmi munapanchi.

2. Cai mundopi ruraicuna peligroso cajpipash ¿imamandata Jehová Diospa sirvijcunaca cushilla caita ushan?

² Cai mundopi ruraicuna peligroso nalipacha cajpipashmi Jehová Diosca paipa sirvijcuna tranquilo, cushilla ali causaiguta charichun ayudashca (1 Juan 5:19; Apoc. 12:12). Diablo mandajuj cai mundopa ruraicuna ñucanchita ninanda llaquichi ushashcataca Jehová Diosca alimi yachan. Jehová Diosca ñucanchita ninanda juyaimandami, paraíso espiritualpi cachun ayudashca. Chaipimi Jehová Diostaca tranquilo cushilla sirvita ushapanchi. Bibliapi paraíso espiritualmanda parlashpaca shuj ‘pacajuna’ pushtuhuan y shuj juyailla jardinguhuanmi comparan (Is. 4:6; 58:​11, TNM-S). Cunan punllacuna difícil tiempocuna cajpipash, paraíso espiritualpi causajcunaca cushilla tranquilomi sintirin (Is. 54:14; 2 Tim. 3:1).

3. Isaías capítulo 65​pica ¿maijan primer profeciata pactarirca?

³ Isaías capítulo 65​pica, profeta Isaiasca Jehová Diospa ayudahuanmi paraíso espiritualpi causai imashina cana cashcata villarca. Profeta Isaiaspa nishcacunaca Jesús cai alpaman nara shamujpi huata 537​pimi primer profeciaca pactarirca. Chai tiempopi  arripintirishca judiocunaca Babilonia llactamanda libre quidashpami Jerusalén llactaman cutin tigrarca. Paicunaca Jehová Diospa ayudahuanmi, Jerusalén llactapa pircacunata cutin shayachishpa arreglai callarirca. Shinallata Jehová Diosta limpio adorai callaringapapashmi templo huasiguta arreglarca (Is. 51:11; Zac. 8:3).

4. Isaías capítulo 65​pi nishca profeciacunaca ¿imashinata cai tiempocunapi pactarijushca?

⁴ Catipica profeta Isaiaspa profeciacunaca huata 1919​pimi pactari callarirca. Cai huatapimi Jehovata sirvijcunaca importante Babilonia llactamanda o panda religionmanda libre quidarca. Chai huatamandapachami Jehovata sirvijcunaca mundo enteropi mirashpa catishca. Shinallata ashtaca congregaciongunatapashmi callarichirca. Huainayashpa nali ruraicunata rurashpa causaj ashtaca gentecunaca Jehová Diosmanda yachajushpami Jehová Dios munashcashna ‘mushuj causaitaca ropata churajunshna’ causai callarishca (Efes. 4:24). Profeta Isaías parlashca huaquin bendiciongunaca paraíso alpapipashmi pactaringa. Pero huaquin bendiciongunataca cunanbillatami ña chasquinajupanchi. Cunanga paraíso espiritualpi caimanda ima beneficiocunatalla charishcata, shinallata paraíso espiritualmanda imamanda nunca na caruyana cashcatami yachajupashun.

PARAÍSO ESPIRITUALPI CAIMANDACA ¿IMASHINATA SINTIRIPANCHI?

5. Isaías 65:13​pi nishcashnaca, paraíso espiritualpi caimandaca ¿ima bendiciongunatata charipanchi?

⁵ Espiritualmente ali cangapaca Bibliata, publicaciongunata y shuj ayudacunatapashmi charipanchi. Profeta Isaiasca paraíso espiritualpi causajcuna y paraíso espiritualpi na causajcunaca, diferente causaita charishcatami nirca (Isaías 65:13​ta liipangui). Jehová Diosca paraíso espiritualpi cajcunataca, espiritualmente ali cachunmi tucui minishtirishcaguta carashpa ayudajun. Ñucanchicuna espiritualmente micushpa, ufiashpa y cushilla causachunga Jehová Diosca Bibliata, paipa espíritu santota y ashtaca publicaciongunatami carashpa ayudashca (Apocalipsis 22:17​huan chimbapurashpa ricupangui). Cutin paraíso espiritualpi na causajcunaca ‘yarjachishpa’, ‘yacunayachishpa’ y ‘pingai’ tucushpami causan. Shinallata espiritualmente ali cangapaj ayudacunatapash na charinllu (Amós 8:11).

6. Joel 2:​21-24​pica ¿imamandata parlan? ¿Ima significadocunatata charin? Y ¿imashinata chaimandaca beneficiaripanchi?

⁶ Jehová Dios paipa sirvijcunaman tucui minishtirishcaguta carasha nishcatami profeta Joelca parlarca. Por ejemplo, granota, vinota y aceite de olivacunatami carasha nishcarca (Joel 2:​21-24). Shinaca Jehová Diosca paipa tucui sirvijcunaman minishtirishcaguta carashca jahuapash, espiritualmente shinlli cachunbashmi ayudajurca. Cunan punllacunapica Jehová Diosca ñucanchimanga Bibliata, publicaciongunata, jw.org paginata, reunionda y asambleacunatami carashca. Cai ayudacunamandami espiritualmente shinlli tucushpa ñaupaman catita ushapanchi.

7. ¿Imamandata cushillapacha sintiripanchi? (Isaías 65:14).

⁷ Cushillapachami sintiripanchi. ¿Imamandata Jehová Diosta sirvijcunaca cushijunchi? (Isaías 65:14​ta liipangui). Bibliapa cabal yachachishcacunata yachajuimanda, Jehovapa promesamanda yachajuimandami shina cushilla sintiripanchi. Ashtahuanbash, Jesús paipa causaita cushpa huañushcamanda, shuj esperanzata charishcamandapashmi ninanda cushijunchi. Cai bendiciongunamanda huauquipanicuna parlashpaca ninandami animarin (Sal. 34:8; 133:​1-3).

8. Paraíso espiritualpi Jehovata sirvijcunapaca ¿imacunallata ashtahuan importante can?

⁸ Jehová Diosta sirvijcunapaca shujllashna tandanajushca cana y juyaita randimanda ricuchirinaca ninan importantemi can. Randimanda  juyarinami huauquipanicunahuan ‘alipacha unido cachun’ ayudan. Shinallata paraíso alpagupi causai imashina cana cashcata pensarichunbashmi ayudan. Shinaca cai paraíso alpagupimi cunan punllacunata yali tucuicunahuan ashtahuan juyarishpa shujllashna tandanajushpa causaita ushapashun (Col. 3:14). Shuj paniguca testigo de Jehovacunata rijsishpa imashina sintirishcatami parlan. Paniguca ninmi: “Ñucaca ñuca propio familiahuan causashpapash na cushilla causarcanichu. Pero testigo de Jehovacunatami ciertopacha randimanda juyarijta ricurcani”. Shinaca pipash cushilla causangapaj munashpaca paraíso espiritualpi cangapami esforzarina can. Jehovata na sirvij gentecuna imata nijpipash, jahua cielopi y cai alpapi Jehová Diosta tucui adorajcunapa ñaupapi y Jehová Diospa ñaupapipash alimi ricuripanchi (Is. 65:15).

9. Ñucanchita llaquichi ruraicunahuanga ¿imata pasanga? (Isaías 65:​16, 17).

⁹ Tranquilo alimi sintiripanchi. Paraíso espiritualpi na cangapaj munajcunaca Isaías 65:14​pi nishcashnami ‘shungu nanaihuan, ninanda caparinajunga’. Shinallata paicunapa ‘espiritu llaquilla cashpami, caparishpa huacanajunga’ ninmi. Pero Jehová Diospa sirvijcunahuanga ¿imata pasanga? Shinallata Jehovata sirvijcunata sufrichij ruraicunahuanga ¿imata pasanga? Jehová Diosca: ‘Punda llaquicunataca, cunganguichimi’ nishpami prometishca. Shinallata “Ñuca ñaupajpica, na ashtahuan ricuringachu” nishcami (Isaías 65:​16, 17​ta liipangui). Jehová Dios llaquicunata, problemacunata tucuchijpimi chai llaquicunataca yaritapash ñana yarishun.

10. ¿Imamandata huauquipanicunahuan tiempota yalinaca shuj jatun bendicionmi can nipangui? (Fotota ricupangui).

¹⁰ Problemacunahuan o llaquicunahuan cashpapash reuniongunapi cashpaca tranquilo cushillami sintiripanchi. Shinaca paraíso espiritualpi tranquilo cushilla causai tiashpa catichunga ¿imatata ruraita ushapanchi? Jehová Diospa espíritu santo cujun cualidadcunatami ricuchina capanchi. Por ejemplo, juyaita, cushijuita, tranquilo ali causanata, ali shunguta y na ñapash culirana cualidadcunatami ricuchina capanchi (Gál. 5:​22, 23). Paraíso espiritualmanda na caruyashpallami Jehová Diospa promesacuna imashina pactarijta ricuita ushapashun. Paica: “Ñucami jahua pachatapash, cai pachatapash mushujta rurasha” nishpami prometirca. Shinaca Jehová Diospa organizacionbi canaca shuj jatun bendicionmi can.

11. Paraíso espiritualpi cai ushashcamandaca ¿imashinata sintiripanchi? (Isaías 65:​18, 19).

¹¹ Jehová Diostaca ninandami agradicipanchi. Profeta Isaiasca Jehovata sirvijcuna cushilla cangapaca ashtaca razongunatami charin  nishpami parlarca. Paraíso espiritualtaca Jehová Diosmi rurashca (Isaías 65:​18, 19​ta liipangui). Panda religiongunaca Jehová Diosmandaca na yachachinllu. Jehová Diosca tucui gentecuna paraíso espiritualman yaicuchun munaimandami gentecunata ayudachun ñucanchicunata utilizajun. Jehová Diospa organizacionbi cai ushashcamandaca ninandami cushijupanchi. Chaimandami cai bendiciongunamanda shuj gentecunamanbash parlangapaj munapanchi (Jer. 31:12).

12. Isaías 65:​20-24​pi nishca promesacunata liishpaca ¿imashinata sintiripangui?

¹² Jehovata tandanajushpa sirvijcunaca Jehová Dios paipa promesata pactachinata yachaimandami cushillapacha sintiripanchi. Paraíso alpagupi Jehová Diospa promesacuna tucui pactarinata ricui ushanata, shinallata ñucanchicuna ashtaca cosascunata rurai ushanapipash pensaripangui. Bibliapica: ‘Shuj huahuaca, na huaquin punllacunatalla causashpa huañungachu. Rucucunapash, huañuna punllapash nara pactajpillataca na huañungachu’. Shinallata cashnapashmi nin: “Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga”. Shinallata Jehová Dios bendiciajushcamandami ‘na yanga trabajanajupashun’. Jehová Diosca tucuicunamanmi tranquilo, cushilla ali causaiguta caranata prometishca. Shinaca paraíso alpagupi causajcuna ima minishtishcata nara mañajpillatami Jehová Diosca paicunamanga tucuita caranga (Is. 65:​20-24; Sal. 145:16).

13. Isaías 65:25​pi nishcashnaca Jehovata sirvingapaca ¿ima cambiocunatata rurana can?

¹³ Tucuicunallatami tranquilo ali causanajupanchi. Jehová Diospa ayudahuanmi, nalita rurashpa causaj gentecunaca ashtaca cambiocunata ruraita ushashca (Isaías 65:25​ta liipangui). Shinallata paicunapa comportamientocunapipashmi ashtaca cambiocunata rurashca (Rom. 12:2; Efes. 4:​22-24). Tucuicunallata juchayu caimandami imagupipash pandaripanchi. Shina cajpipash ‘tucui clase o tucui laya gentecuna’ randimanda juyarishpa shujllashna tandanajushpa tranquilo causachunmi Jehová Diosca ayudashca (Tito 2:11). Jehová Diosca ashtaca poderta charimandami chaitaca ruraita ushan.

14. ¿Imashinata shuj huauquigupa causaipica Isaías 65:25​pi shimicuna pactarirca?

¹⁴ Ñucanchi causaipi cambiocunata ruraitaca ushapanchimi. Por ejemplo, 20 huatacunata charij shuj jovenga nali millai millai y huainayashpalla causajmi carca. Carrocunata shuaimanda y cosascunatapash shuaimandami ashtaca viajecuna carcelman rirca. Ashtahuanbash siempremi macanajunata mascashpalla causan carca. Primera vez Bibliamanda uyashpa shinallata testigo de Jehovacunapa tandanajuiman rishpaca, Jehovata sirvishpalla ali causai ushashcatami convincirirca. Bautizarishca jipami Isaías 65:25​pi shimicuna paipi imashina pactarishcata cuenta japirca. Huauquiguca millai millai caimanda manso manso llamagushna tucushcatami cuenta japirca.

15. ¿Imamandata gentecunataca paraíso espiritualpi cachun ayudangapaj munapangui? Chaita pactachingapaca ¿imatata ruraita ushapangui?

¹⁵ Isaías 65:13pa callari partepica: Jehová ‘Diosca, cashnami nin’ nishpami callarin. Y verso 25pa ultimo partepica Jehová ‘Diosca nircami’ ninmi. Cai textocunapi nishcashnaca Jehová Diospa promesacunaca siempremi pactarin (Is. 55:​10, 11). Paraíso espiritual tiana nishca promesataca Jehová Diosca ñami pactachishca. Cai nali mundopi causashpapash Jehovapa organizacionbi caimandami tranquilo cushilla causapanchi (Sal. 72:7). Cai tucui razongunamandami, ashtaca gentecunata Jehová Diospa organizacionman quimirichun ayudangapaj munapanchi. Chaita pactachingapaca gentecuna Jesuspa discipulocuna tucuchunmi ayudana capanchi (Mat. 28:​19, 20).

 PARAÍSO ESPIRITUALMAN GENTECUNA QUIMIRICHUN AYUDAPASHUNCHI

16. ¿Imata ricushpata gentecunaca paraíso espiritualman quimiringapaj munanga?

¹⁶ Tucuicunami paraíso espiritualman gentecuna quimirina munaita charichun ayudaita ushapanchi. Chaipaca Jehová Diospa ejemplotami catina capanchi. Jehová Diosca gentecuna paraíso espiritualpi cachunga na obliganllu. Chaipa randica gentecuna paicunapa munai quimirichunmi munan (Jer. 31:3; Juan 6:44). Ali shunguta charij gentecunaca Jehová Dios imashina cashcata rijsishpami paiman quimirina munaita charin. Shinaca ¿imashinata ñucanchi ejemplohuan gentecuna paraíso espiritualman quimirichun ayudai ushapanchi?

17. Gentecuna paraíso espiritualman quimirichunga ¿imatata ruraita ushapanchi?

¹⁷ Gentecuna paraíso espiritualman quimirina munaita charichunga ñucanchicunarami huauquipanicunataca juyaihuan aliguman tratana capanchi. Corinto llactamanda gentecuna chai tiempopi reuniongunaman rishpaca, “Taita Diosca ciertopachami quiquingunahuan cashca” nircami. Cunan punllacunapipash ñucanchi reuniongunaman gentecuna rishpaca chashnallata nichunmi munapanchi (1 Cor. 14:​24, 25; Zac. 8:23). Chaimandami ‘caishujhuan chaishujhuan tranquilo ali causashpa catina capanguichi’ nishca consejota pactachinaca ninan importante can (1 Tes. 5:13).

18. ¿Imamandata gentecunaca Jehovapa organizacionman quimirina munaita charita ushan?

¹⁸ Jehová Dios ricunshnallatami ñucanchi huauquipanicunataca ricuna capanchi. Chaimandami huauquipanicunapa pandarishcacunata ricujunapa randica paicunapa ali cualidadcunata ricungapaj esforzaripanchi. Juyaita ricuchinami huauquipanicunahuan imapash problemacunata charishpaca “caishujhuan chaishujhuanmi ali shungu cana capanguichi. Shinallata caishuj chaishujmi randimanda llaquirishpa  aliguta tratarina capanguichi” nishca consejota pactachichun ayudanga (Efes. 4:32). Randimanda juyarijta ricuimandami huaquingunaca paraíso espiritualman quimirina munaita charinga. b

PARAÍSO ESPIRITUALPI CASHPA CATIPASHUNCHI

19. a) Paraíso espiritualman tigramushcacunaca ¿imatata nishca? (“ Paraíso espiritualmanmi cutin tigramun” nishca recuadrota ricupangui). b) ¿Imata rurangapata decidido cana capanchi? (Dibujota ricupangui).

¹⁹ Paraíso espiritualpi Jehová Diosta sirvijcuna ashtahuan tiashcamandami ninanda cushijupanchi. Paraíso espiritualta Jehová Dios rurashcamandaca ninandami agradicipanchi. Tranquilo, seguro, cushilla causangapaj munashpaca paraíso espiritualmanmi yaicuna can. Y chaimandaca nunca na llujshinachu can. Pero Diabloca cai paraíso espiritualmanda caruyachingapaj munashpami imacunatapash rurashpa umachijun. Chaimandami ninanda cuidarina capanchi (1 Ped. 5:8; Apoc. 12:9). Shinapash Diablo pandachichunga na saquinachu capanchi. Ñucanchicunaca paraíso espiritualpi tranquilo, cushilla, ali causaigu tiashpa catichunmi ayudangapaj ninanda esforzarina capanchi.