1. Jehová Diospa rurashcacunata ricushpaca ¿imatata Jehová Diosmandaca yachajupanchi?

JAHUA cielotapash, cai alpatapash nara rurashpaca Jehová Diosca paillami carca. Chai jipami angelcunata, gentecunatapash rurarca. Shinallata Jehová Diosca cushi Dios caimandami tucuicunaman ali cosascunata caran (1 Tim. 1:11, NM; Sant. 1:17, NM ). Ashtahuanbash Jehová Diosca cushilla causachun munaimandami gentecunataca carajcuna cachun yachachin (Rom. 1:20).

2, 3. a) Imagutapash caranaca ¿imashinata cushilla causachun ayudan? b) Cai temapica ¿imatata yachajupashun?

² Taita Diosca gentecunataca paiman rijchajtami rurarca (Gén. 1:27). Chaimi ñucanchicunaca paipa cualidadcunata ricuchi ushapanchi. Shinallata juchayucuna cashpapashmi imagutapash carai ushapanchi. Shinaca cushilla causangapaj, Jehovapa bendicionda charingapaca Jehová Dioshnami gentecunamanda preocuparishpa imagutapash carana capanchi (Filip. 2:3, 4; Sant. 1:5).

 ³ Cai temapica caranamanda Biblia ima nijtami yachajupashun. Shinallata Jehová Diospa ñaupapi ali ricuringapaj, paipa mandashcata pactachingapaj carana minishtirishca cashcatami yachajupashun. Ashtahuanbash imagutapash carashpa cushilla causai ushashcata, shujcunata ayudashpa catinatapashmi ricupashun.

4, 5. Jehová Diosmanda, Jesusmandaca ¿imatata yachajupanchi?

⁴ Jehová Diosca shujcunaman imagutapash carajpica ninandami cushijun (Efes. 5:1). Jehová Diosca ñucanchicuna cushilla causachun munaimandami ñucanchitapash, cai alpapi tucui ima tiajtapash alipacha rurashca (Sal. 104:24; 139:13-16). Shinaca shujcunata cushichishpaca Jehová Diostami jatunyachishun.

⁵ Jesús cai alpapi cashpaca carana imapacha cashcatami ricuchirca. Shinaca Jehovata sirvijcunaca Jesuspa chaquita catingapami esforzarina capanchi. Jesusca nircami: ‘Runa Aichayu tucushca ñucapash, ñucata servihuaichi ningapaca, na shamurcanichu. Ashtahuangarin shujcunata sirvishpa, ashtacacunata ñuca huañushpa quishpichingapajmi shamurcani’ nishpa (Mat. 20:28). Shinallata Jesusta catijcunata apóstol Pabloca nircami: “Cristo Jesús yarishpa causashcashnallatami, cangunapash yarishpa causana canguichi”. Paica “imata charishcatapash tucuillata saquishpami, servij tucushpa, runaman rijchajpacha tucushpa shamurca” nishpa (Filip. 2:5, 7). Shinaca cashna tapuripashunchi: “¿Jesuspa chaquita catishpa shujcunata ashtahuan ayudai ushanichu? nishpa (1 Pedro 2:21, liingui).

6. Samaritanomanda parlaj chimbapuraipica ¿imatata yachajupanchi? (Callari dibujota ricupangui).

⁶ Jehová Diosca paishna, Jesús shina gentecunamanda preocuparishpa, paicuna imata minishtishcata ricushpa ayudajpica ninandami cushijun. Jesusca chaita rurana minishtirishca cashcata yachachingapami samaritanomanda parlarca (Lucas 10:29-37, liingui). Shuj judío runa “¿pita ñuca cumba runaguyari?” nishpa tapujpimi Jesusca samaritanomanda parlarca. Chai chimbapuraihuanmi Jesusca tucui gentecunata ayudana cashcata paipa catijcunamanga yachachirca. Shina rurajpica Jehová Diosca ninandami cushijunga.

7. Jehová Diospa mandashcacunata cazunaca ¿imamandata ali can?

⁷ Jesusta catijcunaca ¿imamandata carajcuna cana capanchi? Chaipaca jardín de Edenbi ima tucushcata ricupashunchi. Satanasca Adanda, Evatapash cashnami nirca: “Chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi” nishpa. Satanás shina nishpaca Jehová Diosta cazunapa randi paicunapilla pensarishpami cushilla causanguichi ningapaj munarca. Imashinami ricupanchi, Evaca paipilla pensarimandami Taita Dioshna cangapaj munarca. Shinallata Adanbash paipilla pensarimandami Jehová Diosta cazunapa randica paipa huarmi nishcatara rurarca (Gén. 3:4-6). Chaimandami ashtaca llaquicuna tiai callarirca. Shinaca ñucanchipilla pensarishpaca na cushilla causashunllu. Jehová Diospa mandashcacunata cazuna ali cajpimi shujcunamanda preocuparishpa ayudangapaj munapashun.

8. Adanbash, Evapash ¿imatata na rurana carca?

⁸ Adanbash, Evapash Jardín de Edenbi paicunalla causashpapash na paicunapilla pensarinachu carca. Jehová Diosca Adandapash, Evatapash nircami: “Ninanda mirashpa, ashtacacunapacha tucushpa, cai pachapi jundanguichi” nishpa (Gén. 1:28). Jehová Diosca tucui gentecuna cushilla causachunmi munan. Shinallatami Adanbash Evapash paicunapa huahuacuna cushilla cachun munana carca. Jehová Diosca cai tucui alpata shuj juyailla paraíso tucuchunmi Adanba familia ayudachun munarca.

9. Adanbash, Evapash ¿imashina causaitata charinman carca?

⁹ Adanbash, Evapash Jardín de Edenbi causashpapash tucui alpa shuj paraíso tucuchunga Jehovapa munaita pactachinami carca. Cai tucui alpa shuj juyailla paraíso tucuchun ayudanaca Adanbapash, Evapapash alipachami canman carca. Shinallata Adanbash, Evapash paicunapilla pensarinapa randica shujcunamanda preocuparishca cajpica Jehová Dios ashtacatami bendicianman carca.

10, 11. Jehová Diospa mandashcata pactachingapaca ¿imatata rurana capanchi?

¹⁰ Cunan punllacunapica Jehová Diospa mandashcata pactachishpami villachina, gentecuna Jesuspa catijcuna tucuchunbash ayudana capanchi. Chaipaca tucui shunguhuanmi gentecunapi preocuparina capanchi. Shinallata Jehová Diosta, gentecunatapash  juyaimandami shujcunata ayudashpa catishun.

¹¹ Apóstol Pabloca cashnami nirca: Jehovata sirvijcunaca “Taita Diosta ayudajcunallami canchi”. Ñucanchica ‘tarpunshnami villachinajunchi’. ‘Yacuta churanshnami’ Diospa Reinomanda yachachinajunchi nishpa (1 Cor. 3:6, 9). Cunan punllacunapica ñucanchicunapashmi ‘Taita Diosta ayudajcunalla capanchi’. Ñucanchi culqui charishcaguhuan, tiempohuan, fuerzahuanmi Jehová Diospa mandashcataca pactachi ushapanchi. Jehová Diospa mandashcata pactachinaca shuj sumaj bendicionmi can.

12, 13. Diospa Reinomanda yachachishpaca ¿ima bendiciongunatata charipashun?

¹² Gentecunaman villachingapaj, Bibliamanda yachachingapaj tiempota llujchishpaca ninandami cushijupanchi. Ashtaca huauquipanicunaca nishcami, gentecunaman Bibliamanda yachachishpaca ninandami cushijunchi nishpa. Shinallata Bibliamanda yachajujcuna Bibliapa yachachishcacunata ali intindijta, paicunapa fe shinlli cajta, paicunapa causaipi cambiajta, shuj gentecunaman paicunapa crishcata parlajta ricushpami ninanda cushijunchi. Shinallata Jesusca paipa 70 catijcunatami gentecunaman villachichun cacharca. Gentecuna paicunata ali uyajpimi paicunaca cushijushpa tigranajurca. Chaita ricushpami Jesuspash ninanda cushijurca (Luc. 10:17-21).

¹³ Mundo enteropimi gentecunaca Diospa Reinomanda ali chasquishpa paicunapa causaipi cambiashca. Chaita ricushpami Jehová Diosta sirvijcunaca ninanda cushijunchi. Cunanga shuj soltera Anna panigumanda yachajupashun. Paica Europa llactapi ashtahuan villachijcunata minishtijuj pushtumanmi sirvingapaj rirca. * Paica ninmi: “Shuj gentecunata Bibliamanda yachachishpaca ninandami cushijuni. Shinallata paicunapa charishca problemacunapi, paicuna llaquilla sintirijpi imashina Bibliahuan ayudanapimi pensarini. Shina ocupada cashpaca ñuca charishca problemacunataca yaritallapash na yarinichu. Ashtahuangarin paicunata imashina ayudanapimi pensarini. Chaimandami cai shimicunata ni ushani: ‘Carajpi japijcunatapash yalimi carajcunaca, ninanda cushijun’” nishpa (Hech. 20:35).

14. Gentecuna na uyangapaj munajpipash ¿imatata rurashpa catina capanchi?

¹⁴ Diospa Reinomanda gentecuna na uyangapaj munajpipash shujcunaman cushijushpami villachishpa catina capanchi. Punda tiempopipashmi Jehová Diosca profeta Ezequielman cashna mandarca: Gentecuna “uyachun, ama uyachumbash ñuca shimicunataca villajunguilla” nishpa. Jehová Diosca ñucanchicunatapashmi shinallata rurachun mandashca (Ezeq. 2:7; Is. 43:10). Shinallata gentecuna Diosmanda na uyangapaj munajpipash ñucanchicuna villachishpa catijpica, Jehová Diosca ninanda alicachishpami ñucanchitaca ricunga (Hebreos 6:10, liingui). Shuj huauquica nircami: “Tarpunshna villachinajunchi, yacuta churanshnami yachachinajunchi. Shinallata gentecuna Bibliamanda ashtahuan yachajuchunmi Taita Diosta mañanajunchi” nishpa (1 Cor. 3:6).

15. Gentecuna na agradicijpipash ¿imatata rurashpa catina capanchi?

¹⁵ Jesusca ñucanchicuna cushilla causachunmi  munan. Chaimandami cashna nirca: “Shujcunaman caraichi, Diospash cangunaman carangami. Ali medishpa churashpa, tushuchishpa, jicharijta jundachishpami cangunaman migllachinga. Shujcunaman imashna medishpa carajpipash, chashnallatami Diospash cangunaman caranga” nishpa (Luc. 6:38). Huaquinbica, gentecunaca ayudajpipash alimanga na chasquinllu. Cutin shuj gentecunaca paicunata ayudajpica ninanda agradicishpami, paicunapash shujcunata ayudangapaj munan. Masqui shuj gentecuna ñucanchi ayudashcata na sirvichijpipash ayudashpami catina capanchi. Shina rurajpica tal vez Bibliamanda uyangapaj o yachajungapaj munanga.

16. ¿Picunatallata ayudana capanchi? Shina rurashpaca ¿imashinata sintirishun?

¹⁶ Ayudachun yashpallaca ñucanchica na ayudanachu capanchi. Chaimi Jesusca cashna nirca: “Ashtahuangarin jatun micuita rurajushpaca, imagutapash na charijcunata, shuj maqui cashpa, shuj chaqui cashpapash illajcunata, jangacunata, ñausacunatami micungapaca shamupaichi nishpa carana cangui. Shina rurashpaca, ninandami cushijungui. Paicunaca, canman cutin tigrachishpa caraitaca na ushangachu” nishpa (Luc. 14:13, 14). Bibliapica cashnami nin: “Imagutapash na charij runaguta yarij runaca, ninandami cushijun” nishpa (Prov. 22:9; Sal. 41:1). Gentecunata juyaimanda ayudashpaca ninandami cushijushun.

17. ¿Imata rurashpata cushilla sintirishun?

¹⁷ Apóstol Pabloca Jesuspa nishcacunatami nirca. Paica nircami: “Carajpi japijcunatapash yalimi carajcunaca, ninanda cushijun” nishpa. Chashna nishpaca na nijurcachu imapash cosascunata caranatalla. Ashtahuangarin cushichina, shujcunata ayudana cashcatami nijurca (Hech. 20:31-35). Apóstol Pabloca paipa parlocunahuan,  ruraicunahuanmi gentecunataca ayudarca. Ñucanchicunapash gentecunata juyaimandami ñucanchi tiempohuan, ñucanchi fuerzahuan ayudangapaj munapanchi.

18. Huaquin estudiashca gentecunaca ¿imatata nishca?

¹⁸ Huaquin estudiashca gentecunaca ninmi, imagutapash caranaca cushilla causachunmi ayudan nishpa. Shinallata shuj ali estudiashcacunaca ninmi, shujcunata ayudajcunaca ashtahuan cushillami sintirin nishpa. Cutin shuj estudiashca gentecunaca nin shujcunata ayudanaca ali causachun, ñucanchi causaipi imata ruranata yachachunmi ayudan nishpa. Chaimi estudiashcacunaca, gentecuna ashtahuan cushilla sano causachunga shujcunata ayudachunmi mandashca. Shinapash Jehovata sirvijcunaca, shujcunata ayudana cushilla sintirichun ayudaj cashcataca alimi yachapanchi (2 Tim. 3:16, 17).

19, 20. ¿Imamandata carajcuna cana capanchi?

¹⁹ Paicunapilla pensari gentecunapurapi causajuimandami shujcunata ayudanaca shinlli can. Shina cajpipash Jesusca mandarcami: “Taita Diostaca, tucui shunguhuan, tucui almahuan, tucui yuyaihuan, cambaj tucui ushaihuambash juyangui” nishpa. Ashtahuanbash nircami: “Cambaj cumba runagutaca, imashna can juyarinshnallata juyangui” nishpa (Mar. 12:28-31). Cai temapica Jehová Diosta juyajcuna Jehovapa cualidadcunata ricuchingapaj esforzarin cashcata yachajupashcanchi. Jehovapash, Jesuspash carajcuna caimandami ñucanchi cushilla causachun shujcunata ayudachun mandan. Shinaca Jehovapa mandashcata pactachingapaj, shujcunata ayudangapaj esforzarishpaca Jehová Diostami jatunyachishun. Ashtahuanbash shina rurashpaca ñucanchicunapash, shujcunapashmi cushilla causanga.

²⁰ Ñucanchicunaca shuj gentecunata ayudashpapash, ashtahuanbachaca huauquipanicunata ayudangapami esforzarinajupanchi (Gál. 6:10). Shujcunata ayudashpa catijpica gentecunaca ñucanchita agradicinga. Shina pasajpica ñucanchicunaca cushillami sintirishun. Chaimi Proverbios 11:25​pica nin: “Shujcunaman imagutapash carana yuyaita charij runaca, tucuipimi ali Ilujshin. Shujcunaman na munangacaman caraj runaca, paipashmi na munangacaman micunga” nishpa. Shinapash ñucanchi causaipi, villachinapipash ¿imashinata shujcunata tucui shunguhuan ayudai ushapanchi? Cai tapuitaca cati temapimi yachajupashun.