1. Jehová Diostaca ¿imashinata ashtahuan ayudaita ushapanchi?

TUCUI gentecunata Jehová Dios rurashpaca paita sirvichunmi rurarca. Shinami paicunaca Jehovapa munai cai alpapi pactarichun ayudana carca. Shinaca ñucanchicuna juchayucuna cashpapash Jehová Diosta sirvishpami catita ushanchi. Bibliapica ninmi: “Ñucanchica, Taita Diosta ayudajcunallami canchi” nishpa. Shinaca villachishpa, gentecuna Jesusta catijcuna tucuchunbashmi ayudana capanchi. Chaimi Tucuita Ruraj Jehová Dios cushca shuj jatun bendición can (1 Cor. 3:5-9). Ashtahuangarin Jehová Diosta sirvingapaca imata ashtahuan ruranatami cai temapica yachajugrinchi. Por ejemplo, imashina ñucanchi familiata ayudanata, huauquipanicunata ayudanata, shuj gentecunata ayudashpa mingachinata, Jehová Diospa organizacionbi ima ruraicunapipash ayudanata, minishtirishca pushtucunapi sirvigrinatapashmi yachajupashun (Col. 3:23, NM ).

2. ¿Imamandata caishuj huauquipanicunahuanga na igualarina capanchi?

² Cai temapi yuyaicunata yachajujushpaca shuj huauquipanicuna Jehová Diosta ashtahuan sirvinajujta ricushpapash, paicunahuanga na igualarinachu capanchi. Shinallata cada unomi imatalla rurai ushashcata, mayorlla o joven cashcata, sano o na sano cashcata yarina capanchi. Chaimandami apóstol Pabloca cashna  nirca: “alitachu rurajuni, nalitachu rurajuni nishpa, cangunallata tucuicuna yaringuichi. Shina yarishpami, na shujhuan chimbapurashpa, canguna imashna causashcatalla yarishpa, cushijuna canguichi” nishpa (Gál. 6:4).

3. Jehová Diosta sirvijushcataca ¿imashinata ricuchi ushapanchi?

³ Jehová Diosca paita sirvijcuna paicunapa familiata cuidashpa mantinichunmi munan. Shuj ejemplota ricupashun, ashtaca mamacunaca paicunapa huahuacunata cuidangapami huasipi quedan. Cutin shuj huauquipanicunaca paicunapa taitamamacuna mayorlla cajpimi cuidangapaj quedan. Bibliapica ninmi: “Maijan cashpapash, paipurapillata imagutapash na carashpa, paipaj huasipipacha causajcunamambash na carashpaca, crij cashcata saquishcatami ricuchinajun. Chaicunaca, na crijcunatapash ashtahuan yali nalicunami” can nishpa (1 Tim. 5:8). Shinaca maijanbash cashna cuidajushpaca ñucanchi munashcashnaca Jehová Diostaca na sirvi ushashunllu. Shinapash ama llaquiripashunchichu. Ashtahuangarin Jehová Diosca ñucanchi familiata cuidajujpica ninandami cushijun (1 Cor. 10:31).

4. a) Taitamamacunaca ¿imashinata Diospa munaita pundapi churashcata ricuchin? b) Shina rurashpaca ¿ima bendiciongunatata charipanguichi?

⁴ Jehová Diosta sirvij taitamamacunaca, paicunapa huahuacuna Jehová Diosta ashtahuan sirvichunmi ayudan. Shina ayudajpimi paicuna jatunyashpaca tiempo completopi sirvishpa shuj ladocunapi sirvingapaj rin. Cutin huaquingunaca misionerocuna, precursorcuna shinami minishtirishca pushtucunapi sirvingapaj rin. Shinallata huaquingunaca Betelpi sirvingapami rin. Paicunaca caru carupi causanajuimandami familiataca na fácil visitaita ushan. Shina cajpipash taitamamacunaca paicunapa churicuna Jehová Diosta sirvishpa catichunmi ayudan. Jehová Diospa munaita pundapi churanajujta ricushpami paicunaca ninanda cushijun (3 Juan 4). Huaquin taitamamacunaca Ana huarmigushnami sintirin. Ana huarmiguca paipa churi Samueltami Jehová Diospa templo huasipi sirvichun curca. Shinaca cunanbi taitamamacunapash quiquingunapa churicuna, ushicuna Jehová Diosta ashtahuan sirvichun ayudanaca shuj jatun bendicionmi can (1 Sam. 1:28).

5. ¿Imashinata congregacionbica ayudaita ushapanchi? (Callari fotocunata ricupangui).

⁵ Ñucanchi familia ucupi imapash ungüihuan, maijanbash mayorllata na cuidanata charishpaca ¿imatata rurai ushapanchi? Ushashpaca congregacionmanda imapash ungüihuan cajpi o mayorlla huauquipanicuna imagutapash minishtijujta ricushpami ayudanalla capanchi. Shinallata cuidajcunatapash ashata samachun o shuj cosascunata rurachunbash ayudanallami capanchi. Shinaca congregacionbi pipash ayudata minishtijujta ricushpaca ayudapashunchilla. Caipi pensaripashunchi, shuj panigu paipa mayorlla taitata cuidajushcanman. Chai panigu shuj cosascunata rurachunbash ayudaita ushapanchimi. Shinallata, Tandanajui Huasiman pushashpa, hospitalpi cajcunatapash visitachun, imagutapash minishtijujta randishpami ayudaita ushapanchi. Shina ayudajpimi, chai huauquipanicunaca Jehová Dios uyashcata cuenta japinga (1 Corintios 10:24, liingui).

6. Ñucanchicunaca ¿imatata rurai ushapanchi?

⁶ Jehová Diosta sirvijcunataca na rijsishca gentecunata mingachijlla cajtami gentecunaca rijsin (Heb. 13:2). Shinallata shuj gentecunata mingachishcatami Bibliapica yachachin. Chaitallatami ñucanchicunapash yachajuna capanchi (Gén. 18:1-5). Shinaca shuj gentecunata, ñucanchi huauquipanicunatapash mingachingapaj esforzaripashunchi (Gál. 6:10).

7. Tiempo completopi sirvij huauquipanicunataca ¿imashinata ayudaita ushapanchi?

⁷ Tiempo completopi sirvij huauquipanicunatapash mingachipashunchi (3 Juan 5, 8, liingui). Shina rurashpaca ‘shujmanda caishujmanda’ animarishun (Rom. 1:11, 12). Olaf huauquimanda yachajupashunchi. Paica ninmi, ñuca joven cai horasca shuj soltero superintendente de circuito huauquimi congregacionda visitangapaj shamurca. Shinapash nipi na mingachi usharcachu. Chaimandami paipa taitamamacunata tapurca, ¿chai huauquita huasiman pushamuita ushanichu? nishpa. Olaf huauquipa taitamamacunaca na testigo de Jehovacuna carcachu. Shinaca canga sillonbimi puñungui, pushamuilla nirca. Olaf huauquica chai superintendentehuan parlashpaca chai semanaca cushillami yalirca. Paica ninmi: “Tutamanda jatarishpami cafeguta ufiashpandi alipacha yuyaicunamanda parlan carcanchi. Chaicunami ñucataca Jehová Diosta ashtahuan sirvichun ayudahuashca” nishpa. Jipamanga 40 huatacunatami Olaf huauquica misionero shina shuj shuj llactacunapi sirvishca.

8. Gentecuna na agradicijpipash ¿imatata rurashpa catina capanchi? Shuj ejemplomanda parlapai.

⁸ Na agradicijpipash na rijsi gentecunata ayudanallami capanchi. Shuj ejemplota ricupashunchi. Shuj paniguca España llactapimi Yésica huarmiguman Bibliamanda yachachijurca. Shina yachachijujpimi Yésica huarmiguca huacai callarirca. Shina huacajujpimi imashcata nishpa tapurca. Chaimi chai huarmiguca Ecuador llactapi ima pasashcata parlarca. Shuj punllaca nima nimata na charishpami ñuca ushigumanga yacugutalla cararcani. Ñuca huahuata puñuchishpami Taita Diosta mañarcani. Chai jipallami ishcai Testigocuna ñuca punguta huactachij shamurca. Yésica huarmiguca paicunata ricushpaca ninanda culirashpami nali tratashpa revistatapash liquishpa shitarca. Shinallata cashnami caparirca: “¿Cai revistatachu ñuca ushigumanga carasha?” nishpa. Shina caparijujta ricushpaca panigucunaca aligumanmi parlarca. Shinapash na uyangapaj munarcachu. Jipamanga chai panigucunaca micunagutami paipa huasipi saquigrirca. Paica ninmi: “Ñuca mañashcata uyashpa Taita Dios ayudangapaj munajpipash na chasquishcarcanichu. Chaita yarishpaca nalipachami sintirini” nishpa. Cunanga chai huarmiguca Jehová Diosta sirvingapaca tucui shunguhuanmi munan. ¿Imamandata shina rurangapaj munan? Chai panigucuna shina ayudashcamandami chai huarmiguca Jehová Diosta sirvingapaj munan (Ecl. 11:1, 6).

9, 10. a) Punda tiempopi Israel llactamanda gentecunaca ¿imatata rurarca? b) Congregacionbica ¿imacunatallata rurashpa ayudai ushapanchi?

⁹ Punda tiempopi Israel llactamanda gentecunaca, tauca viajetami paicunapa munai Jehová Diosta ashtahuan sirvingapaj munarca (Éx. 36:2; 1 Crón. 29:5; Neh. 11:2). Cunanbipash ñucanchi tiempohuan, culquiguhuan,  cada uno imatalla rurai ushashcahuanmi ñucanchi huauquipanicunataca ayudai ushapanchi. Shina ayudashpaca ninandami cushijushun. Shinallata ashtaca bendiciongunatapashmi chasquipashun.

¹⁰ Bibliapica congregacionbi siervo ministerial, ancianocuna tucuchunmi huauquicunataca animan (1 Tim. 3:1, 8, 9; 1 Ped. 5:2, 3). Shinaca siervo ministerial, ancianocuna tucungapaj munajcunaca, shuj huauquipanicuna Jehová Diosta ashtahuan sirvichun ayudangapaj munaimandami shina rurana can (Hech. 6:1-4). Anciano huauquicunaca nachu quiquindaca tapushca, ¿acomodador cangapaj, publicaciongunata cuna pushtupi cangapaj, territoriopa tarjetacunata rurangapaj, Tandanajui Huasita fichangapaj o shuj cosascunapi ayudangapaj munangui? nishpa. Maijanbash ña cai privilegiota charijcunaca ñucanchimanga ningami, cashna rurashpaca ninandami cushijunchi nishpa.

11. Shuj panigupa experienciamanda parlapai.

¹¹ Jehová Diospa organizacionbi sirvingapaj rishcacunaca ashtaca ali amigocunatami charin. Cunanga Margie panigumanda yachajupashun. Chai paniguca 18 huatacunatami Tandanajui Huasicunata shayachishpa trabajarca. Chai tucui huatacunataca shuj joven panicunatapashmi alipacha yachachirca. Chaicunami Jehová Diosta ashtahuan sirvishpa catichun paicunataca ayudarca (Rom. 1:12). Margie panigu shuj shuj llaquicunata charijpimi paipa ali amigacunaca paitaca cushilla shimicunata nishpa ayudarca. Ñucanchicunaca cashna tapuripashunchi ¿Tandanajui Huasicunata shayachishpa ayudashcanichu? nishpa. Tandanajui Huasicunata shayachinata na yachashpapash ayudangapaca rinallami capanchi.

12. Jatun llaquicuna tiajpica ¿imashinata ñucanchicunaca ayudaita ushapanchi?

¹² Terremotocuna, acapanacuna llaquichishca jipami huauquipanicunapa huasicuna  huagli quedajpi, arreglashpa, limpiashpa ayudai ushapanchi. Shinallata culquiguhuan, ima minishtirishcahuanmi ayudai ushapanchi. Shinami Jehová Diosta sirvinajushcata ricuchishun (Juan 13:34, 35; Hech. 11:27-30). Shuj ejemplota ricupashunchi. Gabriela paniguca Polonia llactapimi causan. Ushashcata tamiajpimi paipa huasiguca nimapa na sirvi quedarca. Shinapash Gabriela paniguca ¿imamandata na yapata llaquirirca? Shuj congregaciongunamanda huauquipanicuna paita ayudangapaj shamujta ricushpami ninanda cushijurca. Paica ninmi: “Cosascunata ñana charishpapash na yapata llaquirinichu. Ashtahuanbachaca Jehová Diospa organizacionbi cashcamandami ninanda cushijuni. Jehová Diosta sirvinaca shuj jatun bendicionmi can” nishpa. Jatun llaquita apashca huauquipanicunaca ninmi, huauquipanicuna ayudajta ricushpaca ninandami cushijunchi nishpa. Shinallata jatun llaquicunapi ayudaj huauquipanicunaca Jehová Diosta ayudajuimandami cushilla sintirin (Hechos 20:35; 2 Corintios 9:6, 7, liingui).

13. Jehová Diosta ayudanaca ¿imamandata ali can? Shuj ejemplomanda parlapai.

¹³ Shuj huauquipanicunaca paicunapa llactapi guerra tiajpimi Estados Unidos llactapi pacajungapaj rirca. Chaimi Stephanie panigu, shuj huauquipanicunapash pacajungapaj shamushca huauquipanicunata ayudarca. Shina ayudashpaca Jehová Diosta ayudajuimandami cushilla sintirirca. Stephanie panigu, shuj huauquipanicunaca chai huauquipanicuna maipi causanata, ima minishtirishcagucunata charichunbashmi ayudarca. Stephanie paniguca ninmi: “Tucui turiñañacuna paicunata ayudashcata ricushpaca chai turiñañacunaca ninandami agradicirca. Chaita ricushpaca ninandami cushijurcanchi. Shina ayudaimandami juyanata, feta charinata, Jehová Diospi ashtahuan confianata, turiñañacunapura shujllashna cana cashcata ricushcanchi. Chaicunami Jehová Diosta ashtahuan juyachun ayudashca. Shinallata Jehovapa organización ñucanchimanda imatalla rurashcata ricushpaca ninandami cushijupanchi” nishpa.

14, 15. a) Profeta Isaiasca ¿imatata nirca? b) Profeta Isaiasmandaca ¿imatata yachajupanchi?

¹⁴ Jehová Diosta ashtahuan sirvingapaca ¿imatata rurai ushapanchi? Ashalla Testigocuna tiaj pushtucunapi villachigrinaca alimi canman. Jehová Diosta sirvingapaca caru llactacunaman rinaca na minishtirinllu. Shinapash huaquin huauquipanicunaca shuj llactacunapi sirvigritaca ushashcami. Shina rurashpaca profeta Isaías cuendami paicunaca nishca. Jehová Diosca profeta Isaiastaca  cashnami tapurca: “¿Pitata cachashayari, maijanshi ñucanchi imatalla nishcataca villagringa?” nishpa. Chaita uyashpami: “Ñucami caipi capani, ñucata cachahuailla” nirca (Is. 6:8). Shinaca, ñucanchi ushashpaca Isaías cuendami ñucata cachahuailla ni ushapanchi. ¿Imashinata ashtahuan Jehová Diosta sirvi ushapanchi?

¹⁵ Jesusca villachinamanda, gentecuna paipa catijcuna tucuchun ayudanamanda parlashpami cashna nirca: “Granota tandachinaca, ashtaca ashtacami. Ashtahuangarin tandachijcunaca huaquingullami. Shinamandami granocunata tandachijcunata cachamuchunga, granocunapaj Dueñota ninanda mañana canguichi” nishpa (Mat. 9:37, 38). Ashtahuan villachijcuna minishtirishca pushtucunapi villachingapaj ripashunchi. Ñucanchicuna na ushashpaca shuj huauquipanicuna shuj llactacunapi sirvigrichun ayudapashunchi. Ashtaca huauquipanicunaca minishtirishca pushtucunapi precursor shina sirvigrishpaca Jehová Diosta, shuj gentecunatapash juyashcatami ricuchishca. Shinaca ashtahuan Jehová Diosta sirvingapaj munashpaca ¿imatata rurai ushapanchi? Jehová Diosta ashtahuan sirvishpaca ninandami cushijupashun.

16, 17. Jehová Diosta ashtahuan sirvingapaj munashpaca ¿imatata rurai ushapanchi?

¹⁶ Betelpi sirvingapaj, Tandanajui Huasicunata shayachingapaca ¿mashna punllacunatata ayudangapaj munapangui? Jehová Diospa organizacionbica imagupipash, maipipash ayudachunmi huauquipanicunata minishtin. Shinaca ñucanchi imata rurai ushashcaguhuan, imagupipash ayudapashunchi. Jehová Diosca paita tucui shunguhuan ayudajpica ninanda alicachishpami ñucanchitaca ricunga (Sal. 110:3).

¹⁷ Jehová Diosta ashtahuan sirvingapaj munashpaca Diospa Reinomanda Villachijcunapa Escuelaman ringapami solicitudta jundachi ushapanchi. Chai Escuelaca tiempo completopi sirvij huauquipanicunatami ashtahuan ali villachijcuna cachun alipacha ayudan. Shinami Jehová Diospa organizacionbi ashtahuan sirvichun utilizan. Chai Escuelaman rijcunaca ima asignaciondapash, maipi sirvigrinatapashmi cushijushpa chasquina can. Shinaca chai Escuelaman ringapaj, ashtahuan asignaciongunata chasquingapaca ¿imatata ruranajupanchi? (1 Cor. 9:23).

18. Jehová Diosta ayudashpaca ¿ima bendiciongunatata charipashun?

¹⁸ Jehová Diosta sirvijcuna caimandami shuj gentecunamanda preocuparinchi, juyanchi, cada punlla ayudapanchi. Shina ruraimandami ñucanchicunaca ninanda cushijunchi, casilla causaigutapash charipanchi (Gál. 5:22, 23). Shinaca ñucanchi rurai ushashcahuan Jehová Diosta ayudashpa catipashunchi. Shina rurashpaca Jehová Diospa ejemplota catijushcatami ricuchipanchi. Shinami Jehová Diosca paita alipacha sirvijushcata ricunga (Prov. 3:9, 10).