Testigo de Jehovacunapa publicaciongunataca ¿imamandata Internetpi ñucanchi paginacunapi o redes sociales nishcacunapica na churana capanchi?

Bibliamanda publicaciongunata saquishpaca Jehovapa organizacionga na imatapash cobranllu. Chaimi huaquin gentecunaca pensan chai publicaciongunata copiashpa Internet paginacunapi o redes sociales nishcacunapi churanallami can nishpa. Shinapash Testigocunapa paginacunapi ¿Imashinata utilizana can? * nishca partepi yuyaicunata na pactachishcamandaca, ashtaca problemacunatami charishca. ¿Imashinata utilizana can? nishcapica cashnami nijun: “Cai paginapi publicaciongunata, dibujocunata, grabaciongunata, videocunata, fotocunata, organizacionba marcacunata, musicacunata, redes sociales nishcapi, páginas para compartir archivos o videos nishcacunapi, shuj paginacunapipash nipi na churanachu can” nishpa. Chaicunata cazunaca ¿minishtirinllu?

Testigo de Jehovacunapa organizacionba paginacunapa tucui derechocunami paicunapalla can. Chai derechocunaca leycunapi aprobashcami can. Apostatacuna, Testigocunata na ricunayachij gentecunaca ñucanchi publicaciongunata, paicuna llujchishca informaciongunatami paicunapa Internet paginacunapi churashca. Shina rurashpami ñucanchi huauquipanicunatapash, shuj gentecunatapash pandachin (Sal. 26:4; Prov. 22:5). Cutin shuj gentecunaca propagandacunapi, imatapash jatungapaj, celularpa, tabletpa aplicaciongunapimi ñucanchi publicaciongunatapash, jw.org letracunatapash llujchishca. Shinapash testigo de Jehovacunapa organizacionga leycuna aprobashca derechocunata, marcacunatapashmi charin. Chaimi gentecuna ama shina rurashpa catichunga juezcunapaman apaita ushanchi (Prov. 27:12). Shinapash shuj gentecuna o ñucanchi huauquipanicunallata imatapash jatungapaj, shuj paginacunapi churangapaj ñucanchi publicaciongunata, jw.org letracunata utilizachun saquishpaca, juezcunapaman rijpipash Testigocunapa organizaciondaca juezcunaca na ayudangachu.

Shuj yanga paginacunamandara descarganaca nalichu canman. Jehová Diosca paita sirvijcunaman micunaguta caranshna Bibliamanda yachachichunga ‘aliguta cazushpa, aliguta yarishpa sirvij’ esclavotami saquishca (Mat. 24:45). Chai esclavomi Internetpi www.pr418.com, tv.pr418.com, wol.pr418.com paginacunapilla Bibliamanda publicaciongunata llujchin. Shinallata celularcunapa, tabletacunapaca JW Language^®, JW Library^®, JW Library Sign Language^® aplicaciongunatallami llujchishca. Testigo de Jehovacunapa aplicaciongunapi, Internet paginacunapipash propagandacuna o shuj nali cosascunaca na tianllu. Cutin shuj yanga paginacunapi, shuj aplicaciongunapi informaciongunataca, tal vez mirachishpaiman o anchuchishpaimanmi gentecunaca llujchin (Sal. 18:26; 19:8).

Shinallata Internetpi huaquin paginacunapica tucui gentecunami paicunapa yuyaicunata churanlla. Chai paginacunapi ñucanchi publicaciongunata churajpica apostatacuna o shuj gentecunapash imapash yanga yuyaicunata churashpami Testigocunapa organizaciondaca nalipi quedachinga. Chaicunata ricushpaca Jehovapa organizacionbica ñana confiangachu. Cutin huaquin huauquipanicunaca Bibliapa yachachishcacunamanda shuj gentecunahuanmi Internetpi escribirishpa culirarishca. Shinami huaquin huauquipanicunaca Diospa shutita ashtahuan nalipi saquishca. Chai paginacunaca gentecunaman Bibliamanda yachachichunbash na ayudanllu (2 Tim. 2:23-25; 1 Tim. 6:3-5). Ashtahuanbash Testigocunapa organizacionba, Cuerpo Gobernantepi huauquicunapa shutita japishpami huaquin gentecunaca Internetpi, redes sociales nishcacunapipash yanga paginacunata llujchishca. Shinapash Cuerpo Gobernantepi huauquicunaca Internetpi paginacunata o redes sociales nishcacunataca na charinllu.

Internetpi jw.org paginaman yaicuchun ricuchishpaca ashtahuan gentecuna ‘ali villaicunata’ uyachunmi ayudashun (Mat. 24:14). Testigo de Jehovacunapa paginacuna, aplicaciongunapash ashtahuan alimi can. Chaicunata utilizachunmi munapanchi. Chaimi cunanbica ñucanchi publicaciongunata descargashpa o gentecunallata jw.org paginamanda publicaciongunata descargachun correo electrónico nishcacunata cachai ushanchi. Chashna ruranalla cashcataca ¿Imashinata utilizana can? nishca partepimi villajun. Shina rurajpica Bibliamanda yachachingapaj ‘aliguta cazushpa, aliguta yarishpa sirvij’ esclavotalla Jehová Dios saquishcatami gentecunaca ricunga.