1. a) Jesusmanda parlashpaca ¿imatata Isaiasca nirca? b) Isaiaspa shimicunata liishpaca ¿imamandata cushijupanchi?

ISAIASCA Jesusmanda parlashpaca cashnami nirca: “Paica, na ñavita ricushpalla llaquichijungachu. Imata rurana cajpipash, na shujcuna nishcata uyashpalla rurajungachu. Ashtahuangarin imagutapash na charijcunataca, imatapash cashcatapacha rurashpami mandajunga” nishpa (Is. 11:3, 4). Cunan punllacunapica ashtaca gentecunami ñavita ricushpalla agllashpa tratan. Chaimi Isaiaspa shimicunata liishpaca ninanda cushijupanchi. Shinaca tucuicunallatami Jesús juzgachun munapanchi. Jesusca jucha illaj caimandami na ñavita ricushpalla tucuilla gentecunata juzganga.

2. a) Jesusca ¿imatata mandarca? b) Cai temapica ¿imatata yachajupashun?

² Juchayucuna caimandami pitapash ricushcandi pandacunatara pensanchi o imatapash ninchilla. Chaimi gentecunata ricushcandi imacunatapash pensanchilla. Shinapash Jesús cai alpapi cashpaca cashnami mandarca: “Chashnami canga nishpalla na pitapash juchachinachu canguichi. Imata rurashcatapash aliguta ricushpami, juchachi o juzgai ushana canguichi”  nishpa (Juan 7:24). Imashinami ricupanchi, Jesusca na ñavita ricushpalla shujcunata igual tratachunmi munan. Cai temapica shuj llactamanda cajpi, charij o pobre cajpi, mashna huatacunata charijpipash igual tratanata yachajupashun. Ashtahuanbash chai yuyaicunamanda yachajunajushpa, Jesuspa mandashcata imashina pactachinatami ricupashun.

3, 4. a) Apóstol Pedroca ¿imamandata paipa yuyaita cambiarca? (Callari dibujota ricupangui). b) Jehová Diosca ¿imatata apóstol Pedromanga yachachirca?

³ Cesarea llactamanda na judío Cornelio runagupa huasiman richun nijpica ¿imatashi apóstol Pedroca pensashcanga? (Hech. 10:17-29). Chai punllacunapi judío gentecunaca, na judío gentecunataca mapa gentecuna can ninmi carca. Shina gentecunapurapi viñashca caimandami apóstol Pedroca chai gentecunashnallata pensan cashcanga. Shinapash apóstol Pedroca huaquin cosascuna pasajpimi paipa yuyaita cambiarca. Shuj punllaca muscuipishnami “chuscundi pundapi huatashca jatun fachatashna cai pachaman urai shamujujta ricurca”. Chai fachapica mapa animalcunami tiarca. “Chaicunata ricujujpillatami, jahua pachamanda rimamuj uyarishpa: Pedro jatari, caicunata huañuchishpa micui” nishpa. Shina nijpipash apóstol Pedroca na cazurcachu. Chaimi casha nij uyarirca: “Taita Dios micunalla nishcataca, canga ama yangapi churaichu” nishpa (Hech. 10:9-16). Apóstol Pedroca chaita ricushpapash imata ruranataca na intindircachu. Chai horasllatami Cornelio runagupa sirvijcunaca apóstol Pedropa huasiman chayarca. Apóstol Pedroca Diospa espíritu santo yarichijpimi Cornelio runagupa huasiman rirca.

⁴ Judío gentecunaca, na judío gentecunapa huasicunamanga nimamanda na yaicunllu carca. Shinaca apóstol Pedroca chai gentecunashna pensashpaca Corneliopa huasimanga na rinmanllu carca. Shinapash apóstol Pedroca muscuipishna ricushcamanda, Taita Diospa espíritu santo ayudaimandami Cornelio runagupa huasiman rirca. Cornelio runaguta uyashca jipaca apóstol Pedro cashnami nirca: “Taita Diosca, na pitapash ñavita ricushpalla chasquinllu. Chaitaca, cunanga alipachami yachani. Maijan llactapi cashpapash, paita manllashpa, imatapash cashcatapacha rurajtami, Diosca alicachin” nishpa (Hech. 10:34, 35). Chai mushuj yachachishcami Jesuspa catijcunatapash ayudagrijurca.

5. a) Jehovata sirvijcunaca ¿imatata ali yachapanchi? b) Tucuicunata igual tratanaca ¿imamandata shinlli can?

⁵ Apóstol Pedrota na judío runagupa huasiman cachashpami na ñavita ricushpalla chasquij cashcata Jehová Diosca paipa sirvijcunaman yachachirca. Shinaca shuj llactamanda cajpipash, shuj shimita parlajpipash Jehovata manllashpa, alita rurajpica Jehová Diosca tucuicunatami chasquin (Gál. 3:26-28; Apoc. 7:9, 10). Chaitaca tucui Jehovata sirvijcunaca alimi yachanchi. Shinapash pitapash ricushcandi nalicachij familiapi o llactapi viñashca cashpaca tucuicunata igual tratanaca shinllimi canga. Cutin Apóstol Pedropi pensaripashunchi. Taita Diosca na pitapash ñavita ricushpalla chasquij cashcata shujcuna yachachunmi paica ayudarca. Shina ayudashpapash tiempo  jipaca shujcunata nalicachishpami ricui callarirca (Gál. 2:11-14). Shinaca Jesús mandashcata pactachishpa tucuicunata igual tratangapaca ¿imatata rurana capanchi?

6. a) Tucuicunata igual o na igual tratajushcata yachangapaca ¿imata ayudanga? b) Shuj anciano huauquihuanga ¿imata pasarca?

⁶ Tucuicunata igual o na igual tratajushcata yachangapaca Diospa Shimipi yachajushcahuanmi ricuna capanchi (Sal. 119:105). Ñavita ricushpalla tratajushcata ñucanchillata cuenta japinaca shinllimi can. Chaimi shujcunata imashina tratajushcata yachangapaca shuj ali amigota tapuna capanchi (Gál. 2:11, 14). Chaipaca tiempo completopi sirvij shuj cusahuarmimanda shuj anciano huauqui ima nishcata ricupashunchi. Tiempo completopi sirvij huauquica shuj llactamandami carca. Chai ancianoca cashnami nirca: “Chai llactamanda gentecunaca shuj shuj costumbrecunata charimandami mapa mapa, nali causan. Chai llactamanda cashpapash chai huauquica limpio ali causashpami shuj gentecunapash paishnalla causachun ayudashca” nishpa. Chai ancianoca chai llactamanda gentecunata nalicachishcata na cuenta japishcarcachu. Shinaca Jehovapa organizacionbi ima privilegiota charishpapash humildemi cana capanchi. Shinallata tucuicunata igual tratachun shujcuna ayudajpica alimanmi chasquina capanchi.

7. Na ñavita ricushpalla ali tratangapaca ¿imatata rurana capanchi?

⁷ Tucuicunata juyashpaca ñavita ricushpallaca na tratashunllu (2 Cor. 6:11-13). Ñucanchi llactapuracunahuanlla llevarinapa randica shuj llactamanda gentecunahuan, shuj shuj costumbrecunata charijcunahuan, shuj shimita parlaj gentecunahuanbashmi llevari ushapanchi. Shinallata shuj llactamanda huauquipanicunahuan villachinaman llujshingapaj, micungapaj, asha ratota ñucanchihuan yalichunmi invitai ushapanchi (Hech. 16:14, 15). Shina rurashpaca tucuicunata juyashpami igual tratashun. Shinapash charij o pobre cajta ricushpami tal vez agllashpa tratai ushanchiman.

8. Levítico 19:15​pica ¿imatata yachajupanchi?

⁸ Charij o pobre gentecunataca ¿igualchu tratanajupanchi? Chaipaca Levítico 19:15​pi ima nijta ricupashunchi. Chaipica ninmi: “Ama imagutapash na charij cajpilla alita ruranguichu. Shinallata ashtacata charij cajpilla, ama alita ruranguichu. Ashtahuangarin cambaj cumba runagutaca imatapash cashcatapacha rurashpa llaquita alichingui” nishpa.

9. Proverbios 14:20​mandaca ¿imatata yachajupanchi?

⁹ Diospa espíritu santo yarichijpimi gentecunamanda parlashpaca Salomonga cashna nirca: “Imagutapash na charij runagutaca, paipaj cumbapashmi na ricunayachin. Ashtahuangarin charij runataca, taucacunami juyan” nishpa (Prov. 14:20). Imashinami ricupanchi na cuidadota charishpaca charij gentecunahuanlla llevarishpami pobre gentecunahuanga na llevarinchiman. Shina ruranaca ¿imamandata nali can?

10. Discípulo Santiagopa punllacunapica ¿imatapasarca?

¹⁰ Charij o pobre cajta ricushpara imashina tratanata agllashpaca huauquipanicunahuan shujllashna tandanajushca  caitaca na ushashunllu. Discípulo Santiagopa punllacunapipash ñavita ricushpalla trataimandami huaquin congregacionbica shujllashna tandanajushca caitaca na ushanajurca (Santiago 2:1-4, liingui). Shinaca huauquipanicuna shujllashna tandanajushca cangapaca ¿imatata rurana capanchi?

11. ¿Jehovapa amigo cangapaca charij o pobre canachu minishtirin?

¹¹ Charij cajpi o pobre cajpipash Jehová Diosca igualmi tratan. Chaimi ñucanchicunapash charij gentecunata, pobre gentecunatapash igual tratana capanchi. Shinaca Jehová Diospa amigo cangapaca ashtaca culquita o ashtaca cosascunata charinaca na minishtirinllu. Shinapash Jesusca nircami: ‘Ninan charij runapaca jahua pachapi Dios mandajuj llactaguman yaicunaca ninan shinllipachami’ can nishpa. Jesús shina nishpaca charij gentecuna Jehová Diosta na sirvi ushashcataca na nijurcachu (Mat. 19:23). Shinallata Jesusca nircami: “Imagutapash na charij cangunaca, ninanda cushijuichi. Taita Dios mandanaca cangunapajmi” can nishpa (Luc. 6:20). Jesús shina nishpaca tucui pobre gentecuna paita catinata, ashtaca bendiciongunata chasquinataca na nijurcachu. Chai punllacunapica ashtaca pobre gentecunaca Jesustaca na catircachu. Shinaca charij gentecunaca Jehovapa amigo caitaca na ushanllu nitaca na  ushanchichu. Shinallata pobre gentecunallami Jehovapa amigo cai ushan nitapash na ushanchichu. Tucuicunallatami Jehovapa amigo caita ushapanchi.

12. Jehová Diosca ¿imatata tucuicunata mandashca?

¹² Jehovapa llactapica charij cashpa o pobre cashpapash tucuicunallatami Jehová Diostaca tucui shunguhuan sirvinajupanchi. Shinapash charij huauquipanicunataca Bibliapica cashnami nin: ‘Cai pachapi ninanda charijyashpa causajcuna, imata charishpapash ama chaillahuan jariyashpa causanguichichu. Ashtahuangarin Taita Diosta yariashpa causana canguichi’ nishpa (1 Timoteo 6:17-19, liingui). Shinallata tucui huauquipanicunataca Jehová Diosca ninmi: Culquipilla pensarishpa causanaca nalimi can nishpa (1 Tim. 6:9, 10). Jehová Dios shinami ñucanchi huauquipanicunataca charij o pobre cajpipash igual tratana capanchi. Shinapash huauquipanicunataca ¿mashna huatacunata charijta ricushparachu ali tratana capanchi?

13. Mayorllacunata imashina tratanamandaca ¿imatata Bibliapica yachachin?

¹³ Bibliapica mayorlla gentecunataca respetachunmi mandan. Chaimi Levítico 19:32​pica nin: “Yuraj uma rucugupaj ñaupajpica jatarishpa, paipaj ñavita ricushpa alicachinami cangui. Cambaj Taita Diostaca, manllanami cangui” nishpa. Shinallata Proverbios 16:31​pica ninmi: “Imatapash cashcatapacha rurashpa causajcunaca, rucu cashpapash ali cajta ricuchijuj coronata churajushcashnami” can nishpa. Apóstol Pabloca Timoteotaca nircami: “Ruculla taitacunataca, ama yapata rimanguichu. Ashtahuangarin cambaj taitatashna, aliguta yarichishpa rimangui” nishpa (1 Tim. 5:1, 2). Shinaca Timoteo congregacionbi huaquin responsabilidadcunata charishpapash mayorlla huauquipanicunataca llaquishpa respetohuanmi tratana carca.

14. ¿Mayorlla huauquipanicunatapash consejanallachu capanchi?

¹⁴ Shuj mayorlla huauqui yachashca jahua juchapi urmajpi o nalicunata rurachun shujcunata pandachijpica Jehová Diosca na yangata saquingachu. Chaipaca Isaías 65:20​pi ima nijta ricupashunchi. Chaipica ninmi: “Patsaj huatapilla shuj runa huañushpaca, juchayu cajpi Dios ninanda nalicachishcamandami huañunga” nishpa. Shinallata Ezequiel 9:5-7​pipash chai yuyaitallatami intindichijun. Imashina ricupanchi, Jehová Diostami ashtahuanbachaca respetana capanchi. Bibliapica Jehová Diostaca ‘unai unai huatacunata charij Rucugumi’ can nin (Dan. 7:9, 10, 13, 14). Shinaca shuj huauqui o pani consejachun minishtijpica mashna huatacunata charijpipash consejanallami capanchi (Gál. 6:1).

15. Apóstol Pablomandaca ¿imatata yachajupanchi?

¹⁵ Joven huauquipanicunataca ¿imashinata tratana capanchi? Chaipaca Timoteohuan ima pasashcata ricupashunchi. Apóstol Pabloca Timoteo 30 huatacuna yalita charijpimi cashna nirca: ‘Pipash candaca chairalla viñai cajpilla nalicachinman. Ashtahuangarin crijcuna canda ricushpa catichunmi, aliguta parlaj, aliguta causaj, juyaita charij, alipacha crij, ima nalitapash na yarij cana cangui’ nishpa (1 Tim. 4:12). Timoteo joven cajpipashmi apóstol Pabloca ashtaca responsabilidadcunata  cushcarca. Shinallata na cunganachu capanchi, Jesusca 30 huatacuna yalita charishpami villachi callarirca. Imashinami ricupanchi, huauquipanicunataca joven cajpipash respetohuanmi tratana capanchi.

16, 17. a) Shuj huauqui siervo ministerial o anciano cachunga ¿imatata ancianocunaca ricuna can? b) Ñucanchi yuyaicunata o gentecunapa yuyaicunata catinapa randica ¿imatata rurana capanchi?

¹⁶ Huaquin llactacunapica jovengunataca na respetohuan tratanllu. Ñucanchi llactapi gentecuna jovengunata na respetohuan tratajpica, ancianocunapash chai gentecunashna pensashpaca jovenguna siervo ministerial o anciano cangapaj Bibliapa mandashcacunata pactachinajujpipash huaquin ancianocunaca na saquinmanllu. Shinapash Bibliapica siervo ministerial o anciano cachun mashna huatacunata charina cashcataca na nijunllu (1 Tim. 3:1-10, 12, 13; Tito 1:5-9). Shuj anciano paipa yuyaitara catijushpaca Bibliapa mandashcataca na pactachijunmanllu. Shinaca anciano huauquicunaca Biblia mandashcashnami jovengunataca ali tratana can (2 Tim. 3:16, 17).

¹⁷ Anciano huauquicuna gentecunapa yuyaicunata catishpaca jovengunata siervo ministerial o anciano cachunga na saquinmanllu. Shuj llactapica shuj siervo ministerial huauquica congregacionbi huaquin responsabilidadcunatami ali pactachijurca. Chai huauqui anciano tucungapaj Bibliapa mandashcacunata pactachijushcatami anciano huauquicunaca cuenta japirca. Shinapash huaquin mayorlla ancianocunaca chai huauqui joven cajpimi anciano cachunga na saquirca. Shuj llactacunapipash ashtaca anciano huauquicunaca shinallata pensan. Shinaca ñucanchi yuyaicunata catinapa randica Bibliapa mandashcacunata pactachina capanchi. Shina rurashpaca Jesusta cazushpami tucuicunata igual tratashun.

18, 19. Jehová Dios shina gentecunata tratangapaca ¿imatata rurana capanchi?

¹⁸ Juchayucuna cashpapash Jehová Dios shinami gentecunataca na ñavita ricushpalla igual tratana capanchi (Hech. 10:34, 35). Chaipaca cada punllami Bibliapi consejocunata pactachingapaj esforzarina capanchi. Shina rurashpaca Jesuspa mandashcata cazushpami na ñavita ricushpalla tucuicunata igual tratashun (Juan 7:24).

¹⁹ Ñallami Jesusca gentecunata na ñavita ricushpalla, na shujcuna nishcata uyashpalla juzganga (Is. 11:3, 4). Tucuicunallatami chai pactarichun shuyanajupanchi.