1. Bibliapa profeciacunamanda yachajunata gushtachunga ¿imata ayudaita ushan?

 BEN shuti joven huauquiguca “Bibliapa profeciacunamanda yachajunataca ninandami gushtani” ninmi. Quiquinbash ¿chashnallatachu pensapangui? O Bibliapa profeciacunamanda yachajunaca yapa difícil o aburridomi can ¿nishpachu pensapangui? Shina pensashpaca, Jehová Dios imamanda profeciacunata Bibliapi escribichishcata intindishpami profeciacunata yachajunataca gushtai callaripangui.

2. Cai temapica ¿imatata yachajugripanchi?

² Cai temapica Bibliapa profeciacunata imamanda yachajuna cashcata y chai profeciacunata ali yachajui ushangapaj imata rurana cashcatapashmi yachajugripanchi. Chai jipaca Daniel libromanda ishcai profeciacunatami yachajugripanchi. Y chai profeciacunata intindina ñucanchita imashina ayudajtapashmi ricugripanchi.

3. Bibliapa profeciacunata intindingapaca ¿imatata rurana capanchi?

³ Bibliapa profeciacunata intindingapaca Jehovapa ayudatami mañana capanchi. Caipi pensaripashunchi: Quiquin na rijsishca llactapi capashcanguiman. Shinapash chai llactata ali rijsij shuj amigohuan capashcanguiman. Chai amigoca maipi cashcata y maimanbash ringapaj ima callecunata japina cashcatami ali yachan. Chai amigo quiquinhuan cashcamandaca ninandami cushijupanguiman. Jehová Diosca chai amigoshnallatami can. Paica ñucanchicuna shamuj punllacunapi imashina causanataca alimi yachan. Shinaca Bibliapa profeciacunata intindingapaca ñucanchita ayudachunmi Jehová Diostaca na jariyashpa mañana capanchi (Dan. 2:28; 2 Ped. 1:19, 20).

4. Jehová Diosca ¿imamandata Bibliapica profeciacunata escribichirca? (Jeremías 29:11) (Fotota ricupangui).

⁴ Jehová Diosca shuj ali taitashnami paipa huahuacuna shamuj punllacunapi ali causachun munan (Jeremías 29:11​ta liipangui).  Shinapash gentecunahuan ricujpica Jehová Diosca shamuj punllacunapi ima pasanata yachangapaca podertami charin. Chaimandami Jehová Diosca ñucanchicunapash shamuj punllacunapi ima importante cosascuna pasana cashcata yachachun Bibliapica profeciacunata escribichirca (Is. 46:10). Shinaca ñucanchicunaca Jehová Dios ñucanchita juyashcamanda Bibliapi profeciacunata escribichishpa saquishcata cuenta japipanchi. Shinapash Bibliapa profeciacuna pactarinataca ¿imashinata seguro caita ushanchi?

5. Max huauquigupa ejemplomandaca ¿imatata jovengunaca yachajuita ushan?

⁵ Escuelapi o colegiopica Testigo jovengunaca Bibliata na respetaj gentecunapa chaupipimi can. Jovengunaca chai gentecuna imata nijta uyashpa o imata rurajta ricushpami Bibliapa yachachishcacunapi talvez ñana tucui shunguhuan cri callarita ushanman. Max huauquiguta ima pasashcata ricupashunchi. Paica: “Ñuca joven cashpaca, ñuca taitamama yachachishca religionga ¿ciertopachachu ali religión can? Bibliaca ¿ciertopachachu Diosmanda shamun? nishpami pensari callarircani” ninmi. Paipa taitamamaca ¿imatata rurarca? Max huauquiguca: “Ñuca taitamamacuna preocupado cashpapash ñucataca pacienciahuanmi tratahuarca” ninmi. Maxpa taitamamaca paipa tapuicunataca Bibliahuanmi contestarca. Max huauquigupashmi esforzarirca. Paica: “Bibliapa profeciacunatami yachajui callarircani. Shinallata imata yachajushcataca congregacionmanda shuj jovengunahuanmi parlan carcani” ninmi. Chaita rurashcamandaca ¿imata pasarca? Max huauquiguca: “Chaita rurashca jipaca Biblia Jehová Diosmanda shamujushcatami seguropacha carcani” ninmi.

6. Biblia na cabal cashcata pensai callarishpaca ¿imatata rurana capanchi? ¿Imamandata chaita rurana capanchi?

⁶ Max huauquigushna quiquinbash Biblia na cabal cashcata pensai callarishpaca imapash nalitaca na rurajupanguichu. Shinapash Biblia cabal cashcata cutin seguro cangapami uchalla imagutapash rurana capangui. Pensaripashunchi: Imapash valishca cosascunata na cuidajpica asha ashami huaglishpa rita ushan. Chashnallatami Biblia na cabal cashcata pensai callarishpa y chai yuyaicunata anchuchingapaj na imatapash rurashpaca tiempohuanga Jehová Diospi ñana tucui shunguhuan crishun. Shinaca Biblia na cabal cashcata ña pensai callarishca cashpaca cashna pensaripai: “¿Shamuj punllacunamanda Biblia imata nishcataca crinichu?” nishpa. Biblia imata nishcata na tucui shunguhuan crishcata cuenta japishpaca Bibliapa ña pactarishca profeciacunata yachajunami ali canman. Shinaca Bibliapa profeciacunata imashina yachajui ushashcata ricupashunchi.

7. Danielca profeciacunata yachajungapaca ¿imashinata shuj ali ejemplota saquirca? (Daniel 12:10) (Fotota ricupangui).

⁷ Bibliapa profeciacunata yachajungapaca Danielca shuj ali ejemplotami saquirca. Danielca cabalta yachajuna munaihuanmi profeciacunataca yachajun carca. Shinallata humildemi carca. Chaimandami Danielca Jehová Dios paita rijsijcunata y paipa ali mandashcacunata cazujcunata Bibliapa yachachishcacunata intindichun ayudajtaca ali yacharca (Dan. 2:27, 28; Daniel 12:10​ta liipangui). Shinaca Jehová Dios paita ayudachun mañashpami Danielca humilde cashcata ricuchirca (Dan. 2:18). Ashtahuanbash Danielca Diospa Shimitaca aliguta intindingapami esforzarin carca.  Chaipaca pai causajushca tiempopi Bibliapa tiashca partecunataca aligutami yachajurca (Jer. 25:11, 12; Dan. 9:2). Danielpa ejemplotaca ¿imashinata catita ushapanchi?

8. Huaquingunaca ¿imapata Bibliapa profeciacunataca yachajun? Shinapash ñucanchicunaca ¿imatata rurana capanchi?

⁸ Ima munaihuan yachajujushcata aliguta ricupangui. Bibliapa profeciacunata imamanda yachajushcata pensaripai. ¿Cabal yachachishcacunata yachangapachu yachajupangui? Shina rurajpimi Jehová Diosca quiquindaca ayudanga (Juan 4:23, 24; 14:16, 17). Huaquin gentecunaca nali munaicunahuanmi Bibliataca yachajun. Por ejemplo, huaquingunaca Biblia Diosmanda na shamushcata ricuchingapami Bibliataca yachajun. Paicunaca: “Biblia Diosmanda na shamushcata ricuchishpaca ñucanchillatami ima ali cashcata, ima nali cashcata agllashpa ñucanchi munashcata rurai ushashun” nishpami pensarin. Shinapash ñucanchicunaca Bibliapa profeciacunataca cabalta yachajuna munaihuanmi yachajuna capanchi. Chaita rurashca jahuapash ima cualidadta charina minishtirishca cashcata ricupashunchi.

9. Bibliapa profeciacunata intindingapaca ¿imashina gentecunata cana capanchi?

⁹ Humilde capangui. Jehová Diosca humildecunatami ayudasha ninmi (Sant. 4:6). Chaimandami Bibliapa profeciacunata intindingapaj munashpaca ñucanchita ayudachunga paita mañana capanchi. Jehová Diosca aliguta cazushpa, aliguta pensarishpa sirvij encargadota utilizashpami ñucanchitaca yachachin. Shinaca humilde cashpaca chai huauquicunapa ayudatapashmi chasquipashun (Luc. 12:42). Jehová Diosca ordenadomi can. Chaimandami Bibliapa yachachishcacunata ñucanchita intindichingapaca aliguta cazushpa, aliguta pensarishpa sirvij encargadotalla utilizan (1 Cor. 14:33; Efes. 4:4-6).

10. Esther panigupa ejemplomandaca ¿imatata yachajupangui?

¹⁰ Aliguta intindingapaj esforzarishpa Bibliata yachajupangui. Quiquin gushtashca profeciata estudiashpa callaripangui. Esther shuti paniguca chaitami rurarca. Mesías shamunamanda parlaj profeciacunamandami ashtahuan yachangapaj munarca. Paica ninmi: “15 huatacunata charishpaca Jesús cai alpaman shamuna nishca profeciacunataca Jesús nara shamujpillata ciertopacha escribishcata o na escribishcataca ñucallatami yachangapaj munarcani”. Chaimandami paica Rollos del mar Muerto nishcacunamanda informaciongunata lii callarirca. Shinami Bibliapa profeciacuna cabal cashcata cuenta japirca. Esther paniguca ninmi: “Huaquin rollocunaca Jesús cai alpaman nara shamujpillatami escribishca carca. Chaimandami chaipi tiashca profeciacunaca Taita Dios escribichishca can. Shinallata huaquin partecunata ali intindingapaca cutin cutinmi liina tucurcani”. Ashtacata esforzarina cashpapash paniguca chaita rurana paipallata ali cashcatami cuenta japirca. Ashtaca profeciacunata aliguta estudiashca jipaca paniguca: “Bibliapa nishcacuna cierto cashcataca ñucallatami ricui usharcani” ninmi.

11. Bibliapi nishcacuna cabal cashcata seguro cangapaj esforzarinaca ¿imashinata ñucanchitaca ayudan?

¹¹ Bibliapa huaquin profeciacuna ña pactarishcata ñucanchillata seguro cashpaca Jehová Diospi y pai cushca instrucciongunapimi tucui shunguhuan confiapashun. Bibliapa profeciacunata yachajunaca Jehová Dios ali causaiguta carasha nishcapi confiachun, ima llaquicuna shamujpipash ama yapata llaquiyachunmi ayudan. Cunanga Daniel libromanda  cunan punllacunapi pactarijun ishcai profeciacunamandami yachajugripanchi. Chai profeciacunata ali intindinami ali decisiongunata japichun ayudanga.

12. ‘Jirruhuan, turuhuan’ rurashca chaquicunaca ¿imatata ricuchijun? (Daniel 2:41-43).

¹² (Daniel 2:41-43​ta liipangui). Rey Nabucodonosorca shuj muscuipica ‘jirruhuan, turuhuan’ rurashca chaquicunata charij shuj jatun estatuatami ricurca. Cai profeciata Daniel libropillata shuj profeciacunahuan y Apocalipsis libropa shuj profeciacunahuan comparashpami cai estatuapa chaquicuna Estados Unidos y Reino Unido llactacunata ricuchijushcata cuenta japipanchi. Cunan punllacunapica cai llactacunaca ashtahuan shinlli llactacunami can. Nabucodonosorpa muscui ima nisha nijta Daniel villajushpaca chai llactacunamandaca caitami nirca: Chai llactacunaca ‘chaupica shinlli, chaupica urmanallami canga’ nircami. ¿Imamandata ‘chaupica urmanallami canga’ nirca? Chai profeciapica ‘turuca’ gentecunatami ricuchin. Chai gentecuna gobiernocunata na apoyashcamanda, paicunapura na unido cashcamandami chai gobiernocunaca ñana ‘jirrushna’ shinllita mandashpa catita ushashca. b

13. ¿Ima cosascunata intindichunda cai profeciaca ayudan?

¹³ Danielpa muscuipi ricushca jatun estatuapa chaquicunaca huaquin importante cosascunata intindichunmi ayudan. Primeroca, Estados Unidos y Reino Unido tandanajushca llactacuna shinlli llactacuna cashcata intindichunmi ayudan. Por ejemplo, Primera y Segunda Guerra Mundialta ganangapaca chai llactacunami ninanda ayudarca. Shinapash chai llactacunapi causaj gentecuna gobiernocunata na apoyashcamanda y paicunapura ashtaca cosascunapi na de acuerdo cashcamandami chai llactacunaca asha asha ñana shinlli cashpa catishca. Catipica, Diospa Gobierno cai alpapi tucuilla gobiernocunata nara tucuchijpillata Estados Unidos y Reino Unido llactacunami ashtahuan shinlli último gobierno canga. Shuj gobiernocuna cai llactacunapa contra tucushpapash Estados Unidos, Reino Unido llactacunapa jipaca ashtahuan shinlli llactacunaca na tiangachu. ¿Imashinata caitaca yachapanchi? Porque Danielpa profeciapica shuj jatun ‘rumi’ estatuapa chaquicunata tucuchishcatami ricuchin. Shinaca Diospa Gobiernoca cai último llactacunata o Estados Unidos y Reino Unido llactacunatami tucuchinga (Dan. 2:34, 35, 44, 45).

14. Jirruhuan, turuhuan rurashca chaquicunamanda parlaj profeciata intindinaca ¿imamandata ali decisiongunata japichun ayudan?

¹⁴ Estatuapa chaquicunamanda Daniel nishcacuna cierto cashcataca ¿segurochu capangui? Shina cashpaca quiquinba decisiongunahuanmi crishcata o na crishcata ricuchipangui. Cai Danielpa profecía nishcacunapi crishpaca cai mundopi charijyanatallaca na mascapanguichu (Luc. 12:16-21; 1 Juan 2:15-17). Ashtahuangarin cai profeciata intindinaca predicana, Bibliamanda gentecunata yachachina ninan importante cashcata ricuchunmi ayudanga (Mat. 6:33; 28:18-20). Shinaca cunan horas cai profeciata yachajushca jipaca cashnami pensarita ushapangui: “Ñucapa decisiongunaca ¿Jehová Dios cai mundopi tucui gobiernocunata ñalla tucuchinata tucui shunguhuan crishcatachu ricuchin?” nishpa.

15. Cunan punllacunapica ¿“jahua lado”, ‘ura lado’ reycunaca picunata can? (Daniel 11:40).

¹⁵ (Daniel 11:40​ta liipangui). Daniel capítulo 11​pica ishcai reycunamanda o gobiernocunamandami parlan. Cai gobiernocunaca cai mundota controlangapaj munaimandami paicunapura macanajun. Cai profeciata Bibliapa shuj profeciacunahuan comparashpa ricushpami ‘jahua lado rey o mandaj’ Rusia y paita apoyaj llactacuna cashcata, y ‘ura  lado rey o mandaj’ Estados Unidos y Reino Unido llactacuna cashcata yachapanchi. c

16. ‘Jahua lado llactata mandajpa’ llactacunapica Diosta sirvijcunaca ¿ima llaquicunatata charishca?

¹⁶ ‘Jahua lado llactata mandaj’ reyca chaipi causaj Diosta sirvijcunataca ninanda catiriashpami llaquichijun. Huaquin Testigocunataca paicunapa crishcacunamanda macashpa carcelpipashmi churashca. ‘Jahua lado llactata mandaj’ rey paicunata shina tratajpipash huauquipanicunaca Jehová Diospi ashtahuan confiashpami paita sirvishpa catishca. Paicunaca Daniel libropi catiriashpa llaquichij tucuna nishca shimicunata ali yachaimandami shina ruran d (Dan. 11:41). Cai profecía pactarijushcata yachanaca Jehová Diospa nishcacunapi crishpa catichun y Jehová Diosta tucuipi cazushpa catichunmi ayudan.

17. ‘Ura lado llactata mandajpa’ llactacunapica Diosta sirvijcunaca ¿ima llaquicunatata charishca?

¹⁷ ‘Ura lado llactata mandaj’ o reypashmi Jehová  Diosta sirvijcunataca llaquichishca. Por ejemplo, Primera y Segunda Guerra Mundial tiempopica ashtaca huauquipanicunaca politicapi na chapurishcamanda, guerrata na apoyashcamandaca carcelcunapimi churai tucurca. Huaquin Testigo huahuacunatapashmi escuelamanda expulsarca. Shinapash chairalla huatacunapica Jehovata sirvijcunaca Jehovapa Gobiernota apoyajushcata ricuchingapaca shuj llaquicunatami charishca. Por ejemplo, presidentecunata agllangapaj campañacunata rurajujpica shuj cristianoca talvezpashmi shuj candidatota apoyana munaita charita ushan. Aunque shuj candidatota apoyangapaj paipa votota na cushpapash, talvezpashmi paipa shungupica shuj candidato ganashcanman yashpa pensajuita ushan. Shinaca Jehová Diospa Gobiernotalla tucui shunguhuan apoyajushcata ricuchingapaca ñucanchi ruraicunapi, ñucanchi yuyaicunapipashmi cuidarina capanchi (Juan 15:18, 19; 18:36).

18. Jahua lado rey ura lado reyhuan macanajujujta ricushpaca ¿imashinata sintiripanchi? (Dibujocunata ricupangui).

¹⁸ Bibliapa profeciacunapi na crij gentecunaca cai ishcandi gobiernocuna o reycuna ‘macanajunajujta’ ricushpaca manllarishpa ninanda preocupadomi sintirin (Daniel 11:40). Cai gobiernocuna charishca bombacunahuanga cai mundopi tucui gentecunapa, animalcunapa, plantacunapa causaitami tucuchita ushanman. Shinapash Jehová Diosca chaita rurachunga na saquingachu (Is. 45:18). Chaimandami ñucanchicunaca na manllanchi. Chaipa randica, cai ishcandi reycuna macanajunajujta ricushpaca Jehová Diospimi ashtahuan confiapanchi. Porque cai cosascunaca cai mundopi tucui nali cosascuna ñalla tucurina cashcatami ricuchin.

19. Profeciacunamandaca ¿imatata yaipi charina capanchi?

¹⁹ Bibliapa huaquin profeciacuna imashina pactarinataca na yachapanchichu. Profeciacunata escribijushpaca profeta Danielpash na tucuita intindircachu (Dan. 12:8, 9). Bibliapa profeciacuna imashina pactarinata na tucuita intindijpipash chai profeciacunaca tucuillami pactaringa. Punda tiempocunapishnallatami Jehová Diosca minishtirishca horaspi profeciacuna imashinapacha pactarina cashcata ñucanchicunamanga ricuchinga. Chaitaca seguromi capanchi (Amós 3:7).

20. ¿Ima profeciacunata ñallapacha pactaringa? Chaicamanga ñucanchicunaca ¿imatata rurana capanchi?

²⁰ Gobiernocuna, gentecunaca ñallami “tranquilo ali, seguromi causanajunchi” ninajunga (1 Tes. 5:3). Chai jipaca gobiernocunaca panda religiongunata atacashpami tucuchitapacha tucuchinga (Apoc. 17:16, 17). Jipaca Diospa llactatami atacanga (Ezeq. 38:18, 19). Shina atacajpimi Armagedón nishca guerra callaringa (Apoc. 16:14, 16). Cai tucui cosascuna ñallapacha pasana cashcataca seguromi capanchi. Chai punlla chayamungacamanga Bibliapa profeciacuna imashina pactarijujta pendiente cashpa y shujcunapash pendiente cachun ayudashpa Jehová Diosta agradicishcata ricuchipashunchi.