• “Ñuca cusa, ñucata cutin cutin traicionajushcatashnami sintircani”.

• “Ñucaca imapapash na sirvinshnami sintirijurcani”.

• “Pihuanbash na parlaita ushaimandami ñucalla upalla sufrijurcani”.

• “Jehová Dios ñucamanda na preocuparinllu yashpami pensai callarircani”.

Caipi ricushca shimicunami cusacuna pornografiata ricujpi imashina huarmigucuna sintirijta ricuchin. Shuj cusa pornografiata ashtaca quillacunata o ashtaca huatacunata pacalla ricujushca cajpica, talvezpashmi paipa huarmiguca paipa cusapica ñana confiaita ushanichu yanman. Shuj huarmiguca nircami: “Cungashcapimi ñuca cusaca ajenoshna tucurca. Imacunatallashi ashtahuan pacahuarca yashpami pensarircani”.

Quiquinba cusaca ¿pornografiatachu ricui callarishca? a Cai informaciondaca cashna llaquita charij panigucunata ayudangapami llujchipashcanchi. Caipi tiashca Bibliamanda consejocunaca quiquinda consolangapaj, Jehová Dios quiquinda ayudajushcata ricuchun ayudangapaj, shinallata alillata sintirichun y Jehová Diosta sirvishpa catichun ayudangapami can. b

Quiquinba cusa pornografiata ama ricuchun na controlaita ushashpapash, caipi consejocunaca ama yapata preocuparishpa quiquin tranquila sintirichunmi ayudaita ushan.

Ama culparipaichu. Huarmigucunaca paicunapa cusa pornografiata ricunajushcamandami ñucapashmi culpata charini yashpa pensaita ushan. Alicia c huarmiguca paipa cusapaca na suficiente cashcashnami sintirijurca. Chaimandami: “¿Imamandashi ñuca cusaca shuj huarmicunatara ricunata gushtan?” yashpa pensarirca. Cutin huaquin huarmigucunaca nali sintirishcamanda cusahuarmi causaipi na ayudajushcashnami sintirin. Por ejemplo, Daniela shuti paniguca cashnami nin: “Ñuca cusa pornografiata ricushpa catishcamandaca ninandami culirarcani. Shina culira caimandami ñuca matrimoniopica cushilla causangapaca na ayudajunichu yashpa pensarcani”.

Cai parrafopi parlashca huarmigucunashna sintirijushpaca caita yaripangui. Jehová Diosca cusacunapa culpamandaca na huarmigutaca culpanllu. Santiago 1:14​pica: “Ñucanchicuna imata rurashcata ricushpami, Taita Diosca cada unota juzganga” nijunmi (Rom. 14:12; Filip. 2:12). Shinaca Jehová Diosca quiquingunapa cusacuna imata rurajpipash quiquindaca na culpanllu. Ashtahuangarin paita na saquishpa sirvingapaj munashcamandami cushijushpa ricun (2 Crón. 16:9).

Cusacunaca huarmigu imapipash faltajushcamandaca na pornografiataca ricui callarinllu. Caita intindinami  huarmigucunataca ayudaita ushan. Cai temamanda estudiashcacunaca ninmi: “Pornografiata ricujcunaca, pornografiapi ricushca cosascunatallatami rurangapaj munan. Y chaicunataca ni shuj huarmigupash na pactachi ushanllu ninmi”.

Ama yapata preocuparipaichu. Catherineca paipa cusa pornografiata ricunata yachashcamandaca preocupadami yalin carca. Francisca huarmigupash cashnami nin: “Ñuca cusagu maipi cajta na yachashpaca ninandami preocupari callarini”. Shuj huarmigucunaca paicunapa cusapa problemamanda huauquipanicuna yachanga yashpami, huauquipanicunahuan cashpaca pingaihuan sintirin. Cutin shuj huarmigucunaca paicunapa situacionda pipash na intindinllu yashpami solalla sintirin.

Cashna sintirinaca normalmi can shinapash chai problemapi yapata pensashpa catishpaca quiquinllatami ashtahuan llaquilla sintiripangui. Shinaca chai problemacunapi yapata pensajunapa randica Jehová Dioshuan ali amigo cashpa catingapami esforzarina capangui. Chaimi ñaupaman catichunga quiquindaca ayudanga (Sal. 62:2; Efes. 6:10).

Bibliata liina, liishcapi pensarinaca ¿imashinata quiquindaca ayudaita ushan? Bibliapica shinallata ninan llaquita charishca huarmigucunamandami parlan. Y paicunaca Jehová Dioshuan parlashca jipa ali sintirishcatami ricuchin. Jehová Dios problemacunata na solucionashpapash paicuna siempre tranquilo sintirichunmi ayudashca. Ana huarmigupi pensaripashunchi, Anaca ninanda ‘llaquirishca’ llaqui llaquimi sintirijurca. Chaimandami ‘Ana huarmiguca ña unaita mañajurca’, chai jipaca paipa problemacunahuan ima pasanata na yachashpapashmi tranquila sintirirca (1 Sam. 1:10, 12, 18; 2 Cor. 1:3, 4).

Congregacionmanda ancianocunapa ayudata mañapangui. Paicunaca “shinllita huairajuj tiempopipash, ushashcata tamiajuj tiempopipash paicunamandaca cada unomi pacajuna pushtushna canga” (Is. 32:2 TNM). Ancianocunaca cai situacionmanda shuj de confianza paniguhuan parlashpa animarichunmi ayudaita ushan (Prov. 17:17).

Quiquinga talvezpashmi quiquinba cusagu pornografiata ricunata saquichunga imatashi rurai ushaiman yashpa pensaripashcangui. Bibliapica imapash problemata mishangapaj o imapash nali cosascunata mishangapaca “ishcaipura causanami ashtahuan ali can” nijunmi (Ecl. 4:9-12). Cai temamanda estudiashcacunaca cusahuarmicuna ishcandillata ayudarishpami pornografía viciotaca ashtahuan fácil saquishpa matrimoniopipash cutin confianza tiaita ushan ninmi.

Huarmigucunaca paicunapa cusa ciertopacha pornografiata saquingapaj munashcata o na munashcatami ricuna can. Y chaita saquingapaj imata rurajushcatapashmi ricuna can. Quiquinba cusa chai viciota  saquingapaj ¿Jehová fuerzata cuchun mañajunllu? ¿Ancianocunapa ayudatapash mascajunllu? (2 Cor. 4:7; Sant. 5:14, 15). Y cai viciopi ama urmangapaca quiquinba cusaguca ¿imatata rurajushca? ¿Telefonocunata yapata utilizanata saquishcachu? Shinallata ¿pornografiata ricuchun apana cosascunamanda caruyajunllu? (Prov. 27:12). ¿Quiquinman tucuita villashpa quiquinba ayudata chasquingapaca dispuestochu can? Cai tapuicunata ari nishpaca talvezpashmi quiquinba cusagutaca ayudai ushapangui.

Shinapash ¿imashinata ayudai ushapangui? Felicia huarmigu imata rurajta ricupashunchi. Paipa cusaca Ethan shutimi can. Paipa cusaca huahuamandami pornografiata ricuna viciopi urmashca. Chaimandami paipa cusagu pornografiata ricuna munaita charishpa paihuan de confianza tranquilo parlai ushachun ayudan. Paipa cusa Ethanga cashnami nin: “Ñuca huarmiguhuanga tranquilomi imagutapash na pingashpa parlai ushani. Paica juyaihuan tratashpami pornografiapi ama urmachun ayudahuan. Shinallata siempremi imata rurajujta yachangapapash pendiente can. Internetpi ama yapata yalichunbashmi ayudahuan”. Pero Felicia huarmiguca paipa cusa pornografiata ricunata gushtashcamandaca llaquillami sintirin. Paica ninmi: “Ñuca cusa pornografiata ricunata gushtashcamanda culira, llaquilla cashpapash cashna sintirinaca ñuca cusagutaca na imapipash ayudanllu. Ashtahuangarin chai viciomanda ñuca cusaguhuan parlashca jipa pai tranquilo sintirishpami, ñuca imashina sintirishcata ayudangapaj preparado can ninmi”.

Shinaca cusacunataca huarmigucunahuan parlanami pornografía viciopi ama urmachun ayudaita ushan. Shinallata ishcandimanda parlarinaca huarmigu cusapi confiashpa catichunbashmi ayudan. Shuj cusa paipa huarmiguman imapi pandarijlla cashcata villajpi, maipi cashcata villajpi, imata rurajushcata villajpica, huarmiguca paicunapa cusapica tranquilomi confiaita ushan.

Quiquinga, quiquinba cusaguta ayudangapaj ¿quiquinba cusaguhuan parlaita ushapanguimanllu? Quiquinba cusaguhuan parlai ushashpaca, cai temata ishcandillata liinaca alimi canman. Shinallata quiquinba cusaguca pornografiata saquina munaitami charina can. Quiquinba cusaca cai problemamanda parlajpi culiranapa randica. Chai problemahuan quiquin imashina sintirijushcata intindingapami esforzarina can. Shinallata quiquinga quiquinba cusaguta imata rurachun ayudangapaj munashcatami ali ricuna capangui. Quiquinga pornografía viciota vincichun, cutin paipi confiai ushashcata ricuchichunmi ayudaita ushapangui. Cusahuarmicunaca ishcandillatami imamanda gentecuna pornografiata ricuna viciopi urmajtami ali yachajuna capanguichi. Y chai viciota vincingapaj imata rurana cashcatapashmi ali yachajuna capanguichi. d

Cai temamanda ishcandi na tranquilo parlai ushanata sintishpaca talvezpashmi tranquilo parlangapaj shuj ancianopa ayudata mañaita ushapangui. Y chai  ayudata mañashpaca quiquingunapa de confianza ancianohuanmi parlaita ushapanguichi. Quiquinba cusagu pornografiata ricunata saquijpipash talvezpashmi paipi totalmente cutin confiangapaca tiempo minishtiringa. Quiquinba cusagupi cutin confiangapaca talvezpashmi tiempo minishtiringa. Shinapash na desanimarishpa esforzarishpa catipangui. Quiquinba matrimonio imagupi mejorajushcata ricupangui. Tiempohuan pacienciahuanmi quiquinba matrimoniopica cutin ali caita ushapanguichi (Ecl. 7:8; 1 Cor. 13:4).

Quiquinba cusa pornografiata ricunata saquishca jipa cutin ricui callarishpaca, na arripintirishcata o nunca chai viciota saqui ushanataca na nisha ninllu. Cai pornografiata ricuna ña shuj vicio cajpica tucui causaipi esforzarishpa catinami minishtiringa. Ashtaca huatacunata pornografiata ña na ricushca cashpapashmi cutin ricui callarita ushan. Chashna ama pasachunga quiquinba cusaca pornografiata ricuna viciopi urmachij tucui cosascunamanda caruyaitapacha caruyangapami ninanda esforzarina can. Y chai viciomanda jarcaringapaj imata rurajushpapash chaicunatami rurashpa catina can (Prov. 28:14; Mat. 5:29; 1 Cor. 10:12). Paica ali pensamientocunata charingapaj esforzarishpami ‘nalita ruranataca millanayachitapachami’ millanayachina can. Nali cosascunata millanayachina nishpaca, pornografiata millanayachinata, masturbacionda millanayachinata, pornografiata ricuchun apaj shuj shuj mapa nali cosascunata saquinatami nijun (Efes. 4:23; Sal. 97:10; Rom. 12:9). Cai tucui nali cosascunata saquingapaj dispuesto cashpaca cai viciotaca talvezpashmi vinci ushanga. e

Quiquinba cusa cai viciota saquingapaj imatapash na rurangapaj munajpica ¿imatata rurai ushapangui? Cashna pasajpica talvezpashmi quiquinga, quiquinba cusahuanga llaquilla culira sintiripangui. Y chashna sintirinaca normalmi can. Shinapash quiquinga chai problemataca Jehová Diospa maquipimi saquita ushapangui. Chaimi ama yapata preocuparichun tranquilo sintirichunbash ayudanga (1 Ped. 5:7). Quiquinga Jehová Dioshuan ashtahuan ali amigo tucungapami Bibliata estudiashpa, estudiashcapi pensarishpa, Jehovata mañashpa catina capangui. Chaimi Jehová Diospash quiquinmanga ashtahuan quimiringa. Jehová Diosca ‘shungupi ninanda llaquirishpa causajcunapaj ladopimi can’ (Sal. 34:18). Shinapash quiquinga Jehová Diosta na saquishpa sirvishpa catingapaj esforzaripangui. Ancianocunapa ayudatapash mañapangui. Quiquinba cusagu shuj punlla cambiai ushashcata confiashpa catipangui (Rom. 2:4; 2 Ped. 3:9).