1. Arripintirij personaca ¿imashinata can?

 IMATAPASH nalita rurashpaca arripintirinami capanchi. Bibliapica arripintirij personaca nali ruraicunataca millanayachinmi ninmi. Shinallata chai nali ruraicunataca ama cutin rurangapaj decidijtami ricuchin (“arripintirina” nishcataca Glosariopi ricupangui).

2. ¿Imamandata tucuicuna arripintirinata minishtipanchi? (Nehemías 8:​9-11).

² Adán y Evapa familia cashcamandami tucuicunallata cada punlla pandarishpa pecadota rurapanchi. Chaimi tucuicunallata arripintirinata minishtipanchi (Rom. 3:23; 5:12). Por ejemplo, apóstol Pabloca shinlli feta charishpapashmi nalita rurana munaihuan shuj macanajuipishna causan carca (Rom. 7:​21-24). Pero pecadorcuna cashcamandaca na yapata culparinachu capanchi. Jehová Diosca ninanda llaquij caimandami ñucanchicuna cushilla causachun munan. Nehemiaspa tiempopi judiocunahuan ima pasashcata pensaripashunchi (Nehemías 8:​9-11​ta liipangui). Jehová Diosca paicunapa juchacunamanda yapata llaquirinajuchunga na munarcachu. Ashtahuangarin paita cushilla sirvichunmi munarca. Jehová Diosca ñucanchicuna arripintirishpa cushilla sintirijta ali yachaimandami ñucanchicuna arripintirichun munan. Jehová Dios ninan llaquij, juyaj Dios cashcata yachaimandami ñucanchicuna arripintirijpi perdonanataca seguro capanchi.

3. Cai temapica ¿imatata yachajupashun?

³ Cai temapica arripintirina ima cashcatami ashtahuan yachajupashun. Pundapica arripintirinamanda israelitacunaman Jehová Dios imata yachachishcatami yachajupashun. Jipaca Jehová Dios gentecuna arripintirichun imashina ayudashcata. Ultimopica Jesuspa discipulocuna arripintirinamanda imata yachajushcatami ricupashun.

 ARRIPINTIRINA IMA CASHCATAMI JEHOVÁ DIOSCA ISRAELITACUNAMANGA YACHACHIRCA

4. Israelitacuna arripintirijpica Jehová Diosca ¿ima pasanatata yachachirca?

⁴ Jehová Diosca israelitacunata paipa llacta tucuchun agllashpaca paicunahuanga shuj tratotami rurarca. Jehová Diosca israelitacunamanga paipa mandashcacunata cazujpica paicunata cuidanata, bendicianatami prometirca. Chaimi paicunataca: ‘Cai mandashcacunata pactachinajuchun cunan ñuca mandashcacunaca, na yapa shinlli, ni carupipash na canllu’ nircami (Deut. 30:​11, 16). Y Jehová Diospa mandashcacunata na cazushpa paicunallatami llaqui apashpa, Jehovapa ñaupapica nali quidagrinajurca. Shinapash Jehová Diosca paipa mandashcacunata na cazushpa paipa ñaupapi nali ricurijcunamanga cutin paihuan ali tucuna oportunidadtami curca. Moisesman Cushca Leypica israelitacunaca Jehovapa mandashcacunata uyashpa cutin paiman tigrai ushashcatami nijurca (Deut. 30:​1-3, 17-20). Cashna nishpaca arripintirijpica cutinmi Jehová Diosca paicunahuan ali tucushpa, paicunata bendiciana cashcata ricuchirca.

5. Israelitacuna na cazujpipash Jehová Diosca pacienciata charishcataca ¿imashinata ricuchirca? (2 Reyes 17:​13, 14).

⁵ Israelitacunaca Jehová Diostaca cutin cutinmi na cazurca. Yanga dioscunata adorashca jahuapash shuj shuj nali cosascunatapashmi ruran carca. Chaimandami paicunallata llaqui aparca. Shinapash Jehová Diosca paicunata na saquishpami paicuna paipaman arripintirishpa tigrachunga huaquin profetacunata utilizashpa cutin cutin ayudarca (2 Reyes 17:​13, 14​ta liipangui).

6. Jehová Diosca israelitacunata ¿imapi ayudangapata profetacunataca utilizarca? (Dibujota ricupangui).

⁶ Israelitacunata advirtingapaj, corregingapaca Jehová Diosca profetacunatami utilizarca. Por ejemplo, Jehová Diosca Jeremiasta utilizashpami: ‘Na cazuj israelcuna, ñucapajman tigrarimuichi. Ñucaca, na ashtahuan fiñarishpa llaquichishachu. Ñucaca, llaquijmari cani, na causaita causaicaman fíñashachu. Canda Mandaj Taita Diosta na cazushcamandami llaquirina cangui’ nircami (Jer. 3:​12, 13). Shinallata Joelta utilizashpapashmi: “Tucui shunguhuan ñucapajman tigrarichi” nircami (Joel 2:​12, 13).  Isaiaspash cashnami nirca: “Mapa illaj tucuichi. Jatun nalita canguna ruranajushcata ñuca ñaupajmanda anchuchichi. Nalita ruranataca, ña saquichi” nishpa (Is. 1:​16-19). Shinallata Jehová Diosca Ezequielta utilizashpapashmi: ‘¿Ñucata na manllaj runa huañuchun na munanichu? ¿Nachu pai nalita rurashpa causajushcata saquishpaca causanga? Huañunapacha cajtaca, na huañuchun munanichu. Shina cajpica, nalita ruranata saquishpa tigrarichi. Chashna tigrarishpaca causanguichi’ nircami (Ezeq. 18:​23, 32). Jehová Diosca gentecuna para siempre causachun munaimandami paicuna arripintirijpica ninanda cushijun. Shinapash Jehová Diosca ¿pecador arripintirijpillachu ayudan?

7. Jehová Diosca israelitacunamanga Oseaspa y paipa huarmipa ejemplohuanga ¿imatata yachachirca?

⁷ Profeta Oseasta y paipa huarmi Gomerta utilizashpa Jehová Dios israelitacunaman imata yachachishcata ricupashunchi. Gómer huarmica huainayana juchapi urmashpami tiempohuanga paipa cusata saquishpa shuj jaricunahuan rirca. Jehová Diosca shungu ucupi ima tiajta ali yachaimandami Gómer huarmi nunca na cambiangachu nishpaca na yuyarca. Chaimandami Oseasmanga Jehová Diosca: “Paipaj cumbahuanllata juyarishpa, cazarashca jahua shujcunahuan causaj huarmi cajpipash Mandaj Dios, israelcunata juyashcashnallata juyagrilla. Israelcunaca, shuj dioscunatami mañanajun” nircami (Os. 3:1; Prov. 16:2). Gómer huarmica pecadota rurashpami causajurca. Shinapash Jehová Diosca Oseasmanga paita perdonachun y paihuan cutin tigrachunmi mandarca. a Jehová Diosca cai ejemplohuanmi israelitacunata perdonangapaj munashcata ricuchirca. Israelitacuna jatun pecadocunata ruranajujpipash Jehová Diosca paicunata juyashpami catirca. Chaimandami paicuna arripintirichun y paicunapa causaipi cambiocunata rurachun ayudangapaca profetacunata cutin cutin cacharca. Shinaca ¿pipash shuj jatun juchata rurajujpillatachu chai personataca Jehová Diosca ayudanga? (Prov. 17:3).

PECADORCUNA ARRIPINTIRICHUNGA JEHOVÁ DIOSCA ¿IMASHINATA AYUDAN?

8. Caín arripintirichunga Jehová Diosca ¿imashinata ayudarca? (Génesis 4:​3-7; fotota ricupangui).

⁸ Cainga Adán y Evapa churi caimandami pecadotaca shuj herenciatashna chasquirca. Bibliapica: “Cainga nalicunata rurajmi carca” nijunmi (1 Juan 3:12). Caín nalicunata ruraj cashcamandami pai shuj ofrendata cujpica Jehová Diosca ‘paipa carashca ofrendataca na gushtarca’. Cainga cambianapa randica ‘ninanda culirashpami nali sintirirca’. Chaimi Jehová Diosca paihuan parlarca (Génesis 4: 3-7​ta liipangui). Jehová Diosca Caindaca nali ruraicunata saquishpa cambiangapaj esforzarishpaca ñuca ñaupapica cutinmi ali ricuringui nircami. Shinallata ama culirashpa catichunmi animarca. Porque culirashca cashpaca nalicunatami rurai ushangui nircami. Jehová Dios Cainda arripintirichun ayudangapaj munajpipash Cainga na saquircachu. Chai pasajpica Jehová Diosca ¿imatata rurarca? Caín paipa ayudata na chasquishcamandallachu shujcunataca ñana ayudashachu nishpa dicidirca. Na, na shina rurarcachu.

9. Jehová Diosca David arripintirichunga ¿imashinata ayudarca?

⁹ Jehová Diosca Davidta ninanda juyaimandami paimanda parlashpaca “ñuca munaitami ruranata yachan” nirca (Hech. 13:22). Pero Davidca jatun pecadocunatami rurashca carca. Por ejemplo, huainayana juchapi y shuj personata huañuchina juchapimi urmashcarca. Moisesman Cushca Leypi nishcashnaca chai juchacunata rurashcamandaca huañunami carca (Lev. 20:10; Núm. 35:31). Shinapash David  shuj jatun pecadota rurashcata cuenta japishpa arripintirichunmi Jehová Diosca profeta Natanda cacharca. b David pandarishcata cuenta japichunga profeta Natanga shuj chimbapuraita utilizashpami paihuanga parlarca. Chaimi Davidca Jehová Diospa ñaupapi shuj jatun juchata rurashcata cuenta japishpa ninanda llaquirishpa arripintirirca (2 Sam 12:​1-14). Davidca juchata rurashcamanda llaquillapacha sintirishcata ricuchingapami Salmo capítulo 51​ta escribishpa saquirca (Sal. 51, callaringapaj shimicunata ricupangui). Salmo capítulo 51​ca pecadota rurashca gentecunatami ninanda consolashca. Shinallata paicunapa pecadocunamanda arripintirichunbashmi ayudashca. Jehová Dios Davidta juyaihuan arripintirichun ayudashcata yachashpaca ninandami cushijupanchi.

10. Jehová Dios pacienciata charishcata y perdonaj cashcata yachanaca ¿imapata ayudaita ushan?

¹⁰ Jehová Diosca tucui pecadocunatami millanayachin (Sal. 5:​4, 5). Jehová Diosca tucuicuna pecadorcuna cashcataca alimi yachan. Shinapash ñucanchita juyaimandami pecadota rurajpipash, cutin paipa amigo tucuchun ayudangapaj munan. Grave pecadocunata rurashca personacunata arripintirichun y paiman quimirichun Jehová Dios ayudata yachanaca ninandami consolan. Jehová Diospa pacienciapi y paipa perdonbi pensarinaca Jehová Diosta siempre cazuchun, imapash juchacunata rurashpa uchalla arripintirichunmi ayudan. Cunanga arripintirinamanda Jesuspa discipulocuna imata yachajushcata ricupashunchi.

JESUSPA DISCIPULOCUNA ARRIPINTIRINAMANDACA ¿IMATATA YACHAJURCA?

11, 12. Jehová Dios perdonangapaj dispuesto cashcata ricuchingapaca ¿Jesusca ima chimbapuraitata yachachirca? (dibujota ricupangui).

¹¹ Chaishuj temapica, Jehová Diosca arripintirina imamanda importante cashcata yachachingapaca Juan Bautistata y Jesustami utilizarca (Mat. 3:​1, 2; 4:17).

¹² Jesús cai alpapi cashpaca Jehová Dios perdonangapaj dispuesto cashcatami yachachirca. Jesús parlashca tucuita yanga tucuchishca jovenmanda chimbapuraipimi Jehová Dios perdonangapaj dispuesto cashcatami Jesusca yachachirca. Chai jovenga huasimanda rishpami  pai charishca culquita yangata malgastashpa tucuchirca. Jipamanga “pandarijushcata cuenta japishpami” paipa huasiman cutin tigrarca. Chaimi chai jovenba “taitaca paipa churigu caruta shamujujta ricushpallatami shungu ucucaman ninanda llaquirishpa, tuparingapaj calpashpa rirca. Ña tuparishpaca ugllashpami paipa churigutaca mucharca”. Churica paipa taitataca ‘quiquinba trabajadorcunatashna tratahuailla’ nishpami mañarca. Shinapash taitaca paipa churiguta perdonangapaj munaimandami paipa churitashnallata chasquishpa: ‘Ñucapa cai churiguca chingashcami carca. Pero ñami tigramushca’ nirca (Luc. 15:​11-32). Jesús cai alpaman nara shamushpaca Jehová Dios pecadota rurashcacuna arripintirijpi imashina tratajtami ricurca. Chaimandami Jesús cai jovenba chimbapuraimanda parlashpaca Jehová Dios ninan juyaj llaquij cashcata ricuchirca.

13, 14. Apóstol Pedroca ¿imatata ali yacharca? Arripintirishca cashcata ricuchijcunaca ¿imatata rurana can? (Dibujocunata ricupangui).

¹³ Apóstol Pedroca arripintirishca gentecunata Jehová Dios imashina perdonajta Jesús yachachishcatami yachajurca. Pedro cutin cutin pandarijpipash Jesusca perdonangapaca siempremi dispuesto carca. Por ejemplo, Pedroca Jesustaca ‘na rijsinichu’ nishpami quimsa viajecunata negarca. Chashna negashcamanda jipamanga llaquillapachami sintirirca (Mat. 26:​34, 35, 69-75). Jesusca Pedro paita negashcamanda llaquillapacha y arripintirishca sintirijujtaca alimi yacharca. Chaimi Jesús causarishpaca paita consolangapaj y paita perdonashcata ricuchingapaca paimanlla ricurirca (Luc. 24:​33, 34; 1 Cor. 15:​3-5). (Marcos 16:7​pa español Bibliapi “Pedro” nishca nota de estudiota ricupangui).

¹⁴ Pedroca arripintirina ima cashcata, shinallata perdonajpi imashina sintirijtaca alimi yacharca. Chaimi Pedroca shujcunamanga perdonanamanda, arripintirinamanda yachachita usharca. Pentecostés fiesta jipaca apóstol Pedroca Jesusta huañuchishca ashtaca judiocunamanmi cashna yachachirca: “Quiquingunapa pecadocunata perdonachunga arripintirishpami,  Taita Diosman tigrana canguichi. Chaimi Jehová Diosca tranquilo cana tiempoguta caramunga” nircami (Hech. 3:​14, 15, 17, 19). Cai shimicunata nishpaca apóstol Pedroca arripintirishca cashcata ricuchijcunaca paicunapa causaipi cambiana cashcata, nali ruraicunata saquina cashcata, shinallata Jehová Dios munashcashna causangapaj esforzarina cashcatami yachachijurca. Shinallata apóstol Pedroca Jehová Dios paicunapa juchacunata cungaitapacha cungajtami yachachirca. Ashtahuanbash Pedroca ashtaca huatacuna jipaca Jehová Diosca: “Tucuicuna arripintirichun munashpa y shujllapash na tucuchi tucuchun munashpami pacienciata charishcata quiquingunamanga ricuchijun” nircami (2 Ped. 3:9). Jatun juchacunata rurajpipash Jehová Dios chai pecadocunata cungaitapacha cungajta yachashpaca ninandami cushijupanchi.

15, 16. a) Apóstol Pabloca Jehová Diosmanda y Jesusmanda ¿imatata yachajurca? (1 Timoteo 1:​12-15). b) Cati temapica ¿imatata yachajupashun?

¹⁵ Huaquin gentecunaca Saulo de Tarso runagushnami nali cosascunata rurashcamandaca arripintirishca. Saulo de Tarso runaguca Jesuspa catijcunataca ninanda catiriashpami llaquichirca. Chaimi Jesuspa catijcunaca Saulo de Tarsoca nunca na cambiangachu nishpa yuyan cashcanga. Pero Jehová y Jesusca Saulopa ali cualidadcunatami ricurca. Chaimi Jesusca: “Cai runagutaca gentecunaman ñucamanda villachichunmi agllashcani” nirca (Hech. 9:15). Shinallata Saulo arripintirichunmi shuj milagrota utilizashpa Saulotaca ayudarca (Hech. 7:58–8:3; 9:​1-9, 17-20). Shinapash Saulo cristiano tucujpica paitaca apóstol Pablo nishpami rijsirca. Apóstol Pabloca Jehová Dios y Jesuspash llaquishpa tratashcamandaca ninandami agradicirca (1 Timoteo 1:​12-15​ta liipangui). Chaimi apóstol Pabloca cristianocunamanga: “Quiquingunata llaquimanda quiquingunata arripintirichun ayudangapaj munashcataca ¿nachu cuenta japinguichi?” nishpami yachachirca (Rom. 2:4).

¹⁶ Shuj viajeca apóstol Pabloca Corinto congregacionbi huainayashpa causaj shuj cristiano chai congregacionbi cashpa catichun saquishcatami yachaj chayarca. Apóstol Pabloca chai problemata arreglangapaca ¿imatata rurarca? Apóstol Pabloca chai situaciondaca aligumanmi arreglarca. Chaihuanga Jehová Dios imashina corregijta, juyaj llaquij Dios cashcatami ricuchirca. Cati temapica Corinto congregacionbi ima pasashcatami yachajupashun.