1. Jehová Diosca gentecuna ¿imata rurachunda munan?

 JEHOVÁ DIOSCA cada uno ima ali cajta, ima nali cajta decidichunmi saquishca. Imapash decisiongunata japingapaca Jehová Dios cushca libertadtami utilizapanchi. Jehovata sirvinata decidina y paipa organizacionman pertinicinaca shuj jatun importante decisionmi can. Jehová Diosca gentecunata juyaimanda, paicuna ali causachun munaimanda, paihuan ali amigo cachun munaimanda y para siempre causachun munaimandami paita sirvina decisionda japichun munan (Deut. 30:​19, 20; Gál. 6:​7, 8).

2. Jehová Diosca pecadorcunata arripintirichun ayudangapaca ¿imatata rurashca? (1 Juan 2:1).

² Shinapash Jehová Diosca paita sirvichunga pitapash na obliganllu. Cada unomi chai decisionda japichun saquin. Shuj huauqui o shuj pani Jehovapa mandashcacunata na cazushpa shuj pecadota rurajpica ¿imata pasan? Pecadota rurashca huauqui o pani na arripintirijpica congregacionmandami llujchi tucuna can (1 Cor. 5:13). Shinapash Jehová Diosca congregacionmanda llujchi tucushca arripintirishpa paiman tigrachunmi munan. Jehová Diosca pecadorcuna arripintirishpa paiman tigrachun munaimandami Jesustaca cai alpapi huañuchun cachamurca (1 Juan 2:1​ta liipangui). Jehová Diosca pecadorcuna arripintirichunga juyaihuanmi ayudan (Zac. 1:3; Rom. 2:4; Sant. 4:8).

3. Cai temapica ¿imatata yachajupashun?

³ Jehová Diosca nali ruraicunata y juchata rurajcunataca pai  ricunshnallata ricuchunmi munan. Y chaita imashina pactachina cashcatami yachajupashun. Cai temapica Corinto congregacionbi shuj cristiano pecadota rurajpi imata rurashcata, chai pecador arripintirijpi apóstol Pablo imata consejashcata, shinallata shuj cristiano shuj pecado graveta rurajpi Jehová Dios imashina ricujtami yachajupashun.

APOSTOLCUNAPA PUNLLACUNAPICA SHUJ PECADO GRAVETA RURAJPICA ¿IMATATA RURARCA?

4. Corinto congregacionbica ¿imata pasajurca? (1 Corintios 5:​1, 2).

⁴ (1 Corintios 5:​1, 2​ta liipangui). Apóstol Pabloca congregaciongunata visitajushpaca, Corinto congregacionmandami nali noticiacunata uyarca. Chai congregacionbi shuj huauqui paipa taitapa huarmihuanllata huainayana juchapi urmashpa causajushcatami yachaj chayarca. Chashnapacha jatun pecadotaca Diosta na adoraj gentecunapashmi nalipacha cashcataca yacharca. Corinto congregacionmanda huauquipanicunaca, chai huauqui alita rurajujtashna ricushpami congregacionbi cachun saquirca. Talvez huaquingunaca chai huauquita congregacionbi cachun saquishpaca, Jehová Dioshna llaquij, perdonaj cashcatami ricuchinajunchi yashpami pensashcanga. Shinapash Jehová Diosca nali cosascunataca nimamanda na ricunayachinllu. Cashna juchata na pingashpa rurajca, congregacionmanda huauquipanicunatami nalipi quidachijurca. Shinallata paipa nali ruraicunataca shuj huauquipanicunapashmi catita ushanman carca. Chaimanda apóstol Pabloca cai congregaciondaca ¿imata rurachunda consejarca?

5. Apóstol Pabloca Corinto congregaciondaca ¿imata rurachunda mandarca? Chai consejotaca ¿imashinata huauquipanicunaca pactachina carca? (1 Corintios 5:13) (Dibujota ricupangui).

⁵ (1 Corintios 5:13​ta liipangui). Corinto congregacionman escribishca cartapica apóstol Pabloca pecadota ruraj na arripintirijpica, congregacionmanda llujchichunmi mandarca. Apóstol Pabloca cristianocunataca pecadota rurashca huauquihuan o panihuan ‘tandanajunata saquinami canguichi’, ‘paihuanga micuitallapash na micunachu canguichi’ nishpami mandarca (1 Cor. 5:11). Por ejemplo, pihuanbash micungapaj tiarishpaca chai personahuanga ashtahuanmi llevarita ushanchiman. Chaimandami apóstol Pabloca congregacionmanda llujchi tucushca jarihuanga tandanajunataca saquinami canguichi nishpa mandarca. Chaita rurashpami pecadorpa nali ruraicunamanda huauquipanicunataca cuidajurca (1 Cor. 5:​5-7). Cai pecador jarihuan na tandanajushpaca, Jehová Diospa mandashcacunata na pactachijushcata cuenta  japichunmi ayudana carca. Shinallata pingai tucushpa arripintirichunbashmi ayudana carca.

6. Apóstol Pablo Corinto congregacionman cachashca cartataca huauquipanicunaca ¿imashinata chasquirca? Y pecadota rurashcataca ¿imashinata ayudarca?

⁶ Apóstol Pabloca Corinto congregacionman paipa cartata cachashca jipaca, huauquipanicuna chai cartata imashina chasquishcata yachangapami munarca. Chaimandami Titoca apóstol Pablomanga pai cachashca cartata huauquipanicuna ali chasquishcata villarca (2 Cor. 7:​6, 7). Huauquipanicunaca apóstol Pablopa consejotami pactachirca. Shinallata apóstol Pablo cartata cachashca punllamanda huaquin quillacuna jipaca pecadota rurajca arripintirishcami carca. Y paipa nali ruraicunata saquishpami Jehová mandashcashna causai callarishca carca (2 Cor. 7:​8-11). Pecadota ruraj arripintirijpica apóstol Pabloca congregaciondaca ¿imata rurachunda mandarca?

 ARRIPINTIRISHCA HUAUQUITACA CONGREGACIONGA ¿IMASHINATA TRATARCA?

7. Juchata rurajta congregacionmanda llujchinaca ¿imapata ayudarca? (2 Corintios 2:​5-8).

⁷ (2 Corintios 2:​5-8​ta liipangui). Apóstol Pabloca “pecadota rurashca runataca, ñami consejanataca consejashcanguichi” nircami. Shinaca pecadota rurashca huauquica consejota uyashpami ña arripintirishca carca (Heb. 12:11).

8. Apóstol Pabloca arripintirishpa congregacionman tigrashca huauquitaca ¿imashina tratachunda mandarca?

⁸ Apóstol Pabloca arripintirishca huauquitaca: ‘Tucui shunguhuanmi perdonana canguichi’ y ‘paita juyashcatami ricuchina canguichi’ nircami. Shinaca apóstol Pabloca arripintirishca huauquita congregacionman tigrachun saquishpapash tucui shunguhuan perdonashcataca huauquipanicunaca paicunapa nishcacunahuan, ruraicunahuanmi juyashcata ricuchichun mandarca. Juyaihuan tratashpaca congregacionman cutin tigrashcamandami huauquipanicunaca cushilla cashcata ricuchinajurca.

9. ¿Imamandata huaquingunapaca arripintirishca huauquita perdonanaca difícil cashcanga?

⁹ Shinapash arripintirishca huauqui congregacionman tigrajpica huaquin huauquipanicunaca talvez chai huauquita na cushijushpa chasquingapaj munashcangachu. Pecadota rurashca huauqui, congregaciondapash paipa familiatapash nalipi saquishcamandami huaquin huauquipanicunapaca paita perdonashpa cushilla chasquinaca difícil cashcanga. Porque huaquin huauquipanicunaca Jehová Dios munashcashna limpio causaita charingapami ninanda esforzarinajushcarca (Lucas 15:​28-30​huan chimbapurashpa ricupangui). Shinapash ¿imamandata congregacionmanda huauquipanicunaca arripintirishca huauquitaca ciertopacha juyashcata ricuchina carca?

10, 11. Arripintirishca huauquita ancianocuna na perdonajpica ¿imata pasaita ushanman carca?

¹⁰ Ancianocuna, arripintirishca huauquita congregacionman na tigrachun saquishpa o congregacionman ña tigrajpi huauquipanicuna paita na juyaihuan tratajpica cai huauquica ‘llaquilla’ sintirimandami Jehová Diosta sirvinataca na miricinichu yashpa paimanda caruyanman carca.

¹¹ Shinallata congregacionmanda huauquipanicuna arripintirishca huauquita na perdonajpica paicunapashmi Jehová Diospa ñaupapi nali ricurita ushanman carca. Arripintirishca huauquita na perdonashpaca Diabloshna nali, na llaquij cashcatami ricuchinajunman carca. Diabloca chai huauquipanicunata utilizashpami arripintirishca huauquitaca espiritualmente desanimachita ushanman carca (2 Cor. 2:​10, 11; Efe. 4:27).

12. Jehová Diospa ejemplotaca ¿imashinata Corinto congregacionmanda huauquipanicunaca catina carca?

¹² Corinto congregacionmanda huauquipanicunaca arripintirishca huauquipanicunata Jehová Dioshna llaquishpa, juyaihuan tratashpami Jehovapa ejemplota catinajushcata ricuchina carca. Bibliapi escribishca huaquin jaricuna Jehová Diosmanda imata nishcata ricupashunchi. Davidca: “Can Jatun Diosca, aligupachami capangui, nalita rurashcatapash cungajmi capangui” nircami (Sal. 86:5). Cutin Miqueas jariguca: “Taita Dioslla, canshnalla shuj Diosca, ¿pita tiangayari? Canga, can agllashcapuramanda huaquin puchushcacuna ima nalita rurashcatapash cungajmi cangui” nircami (Miq. 7:18). Isaiaspash: “Paita na manllajpash, nali causaitaca saquichun. Nalita ruraj runapash, nali yuyaicunata saquichun. Chaita saquishpa, Mandaj  Diospajman tigrarichunlla, paica llaquingami. Ñucanchi Taita Diospajman tigrarichunlla. Paimi, ashtaca ima nalicunata rurashcatapash anchuchinga” nircami (Isa. 55:7).

13. Congregacionmanda llujchi tucushca huauquitaca ¿imamandata tigrachun saquina carca? (“ Corinto congregacionmanda pecadota rurashca huauquitaca ¿ima horata congregacionman cutin tigrachunga saquirca?” nishca recuadrota ricupangui).

¹³ Corinto congregacionmanda huauquipanicunaca Jehová Diospa ejemplota catishpami arripintirishca huauquitaca aliguman chasquishpa y juyaihuan tratana carca. Arripintirishca huauquita juyaihuan aliguman chasquishpaca, apóstol Pablopa consejota catishpa tucuipi cazushcatami huauquipanicunaca ricuchinajurca (2 Cor. 2:9). Pecadota rurashca huauquica congregacionmanda llujchi tucushca huaquin quillacuna jipallami ña arripintirishca carca. Arripintirishca cashcamandami ancianocunaca juchata rurashca huauqui cutin congregacionman tigrachunga na ashtaca tiempota shuyana carca.

JEHOVÁ DIOSHNA LLAQUIJ, JUSTO CASHCATACA ¿IMASHINATA RICUCHITA USHAPANCHI?

14, 15. Corinto congregacionbi shuj grave pecadota rurashca huauquita imashina tratashcamandaca ¿imatata yachajupanchi? (2 Pedro 3:9) (Fotota ricupangui).

¹⁴ “Ñucanchita yachachingapami” Corinto congregacionbi shuj pecado graveta rurashca huauquita imashina tratashcata Bibliapica escribichishpa saquishca (Rom. 15:4). Corinto  congregacionbi ima pasashcata ricushpami Jehová Dios paipa sirvijcuna nali ruraicunata nimamanda na rurachun munashcata yachajupanchi. Jehová Diosca pecadota rurashcacuna na arripintirijpi paicunata llaquishpa congregacionbi cachun saquina cashcataca na mandanllu. Jehová Diosca llaquij, juyaj Dios cashpapash paipa mandashcacunata yangapi churachunga na munanllu (Judas 4). Jehová Diosca pecadorta congregacionmanda llujchichun saquishpaca, paita juyashcatami ricuchin. Shinallata congregaciondapash cuidangapaj munaimandami shina ruran (Prov. 13:20; 1 Cor. 15:33).

¹⁵ Shinapash Jehová Diosca pipash tucuchi tucuchunga na munanllu. Gentecuna ayudachun saquijpica, Jehová Diosca paicunata ayudangapami munan. Nali causaita saquishpa y Jehová Dioshuan ali tucungapaj munaj personacunataca, Jehová Diosca llaquishcata, juyashcatami ricuchin (Ezeq. 33:11; 2 Pedro 3:9​ta liipangui). Chaimi Corinto congregacionmanda pecadota rurashca huauqui arripintirijpi y nali ruraicunata saquijpica Jehová Diosca congregacionmanda huauquipanicunataca paita perdonachun y congregacionbi cutin paita chasquichun mandarca.

16. Corinto congregacionbi shuj grave pecadota Jehová Dios imashina tratachun mandashcamandaca ¿imatata yuyapangui?

¹⁶ Corinto congregacionbi shuj grave pecadota rurashca huauquita imashina tratashcata ricushpaca Jehová Dios juyaj, llaquij, justo cashcatami yachajupashcanchi (Sal. 33:5). Jehová Dios cashna Dios cashcata yachashpami paitaca alabangapaj munapanchi. Tucuicuna juchayucuna cashcamandami Jehová Dios llaquishpa perdonachun minishtipanchi. Shinallata Jehová Dios ñucanchimanda Jesusta huañuchun cachamushcataca cada unomi agradicishcata ricuchita ushapanchi. Jehová Dios paipa sirvijcunata juyashcata, paipa sirvijcuna ali causachun munashcata yachashpaca ninandami cushijupanchi.

17. Cati temacunapica ¿imatata yachajupashun?

¹⁷ Pipash shuj pecado graveta rurajpica congregacionmanda ancianocunaca paicuna arripintirichun ayudangapaca ¿imashinata Jehová Dioshna, juyaj, llaquij cashcata ricuchita ushan? Anciano huauquicuna congregacionmanda shuj pecadota rurashca huauquita o panita llujchijpi o cutin congregacionman tigrachun saquijpica huauquipanicunaca ¿imashinata ricuna can? Cai tapuicunataca cati temacunapimi yachajupashun.