TUCUICUNALLATAMI ñucanchipi preocuparichun, respetohuan tratachun munapanchi. Shina tratajpica ninandami cushijunchi. Ñucanchipash shinallata shujcunata tratangapaca ¿imatata rurana capanchi?

Bibliapica shujcunata llaquishpa tratanamandami parlan. Shujcunata llaquishpa tratana nishpaca respetota charinatallaca na nijunllu. Shujcunahuan aliguman parlashpa ali tratana cashcata, shujcuna ali cachun munashcata, shujcuna imashi sintirishcata intindina cashcatami shina nijun. Chaimi shujcunata llaquishpa tratangapaca gentecunata juyana canchi. Shinallata paicuna imashna sintirishcata intindinami capanchi. Shujcunata llaquishpa tratanaca Diospa espíritu santo granota fucuchinshna fucuchishca cualidadmi can. Jesusta catijcunaca shujcunata llaquishpa tratangapami esforzarina capanchi (Gál. 5:22, 23). Cai temapica Jehová Diospash, Jesuspash imashina shujcunata llaquishpa tratashcata, ñucanchicunapash shujcunata llaquishpa tratangapaj imata rurana cashcatami yachajupashun.

Shujcunata llaquishpa tratangapaca ali cana capanchi. * Jehová Diosca “pagui ninata na yachajcunatapash, nalita rurashpa causajcunatapash” llaquishpa ali tratan (Luc. 6:35). Jehová Diosca ‘nalicunamanbash, alicunamanbashmi inditaca punllayachin. Shinallata paillatami tamiatapash, imatapash cashcatapacha rurajcunaman, imatapash cashcatapacha na rurajcunamanbash tamiachimun’ (Mat. 5:45). Shinallata Jehovata na rijsi gentecunapashmi Jehová Dios carajpi causaitapash, shuj cosascunatapash charin. Cushilla causaitapash ushashca.

Adanda, Evata Jehová Dios imashina tratashcata ricupashunchi. Adanbash, Evapash Jehovata na cazushca jipaca ‘jigos fangacunata sirashpa, paicuna quilparinata rurarca’. Adanbash, Evapash jardín de Edenmanda llujshishca jipa ali ropata minishtishcataca Jehová Diosca alimi yacharca. Chaimi ‘animalpa caracunata rurashpa’ paicunamanga churachirca. Adanbash, Evapash Jehovata na cazuimandami cai alpaca huaglirca. Chaimi ‘jatun casha yuracuna, uchilla cashacunapash’ alpapi viñashpa jundarca (Gén. 3:7, 17, 18, 21).

Imashinami yachajupashcanchi Jehová Diosca alicunata, nalicunatapash ali tratashcata. Shinapash Jehová Diosca paita sirvijcunatami ashtahuan ali tratan. Profeta Zacariaspa punllacunapica Jerusalenbi Diospa templo huasita ñana shayachinajushcata ricushpami shuj angelca ninanda preocuparirca. Chaimi Jehová Diosca chai ángel ima nishcata ali uyarca. Shinallata chai angeltaca ‘juyailla shimicunahuan, cushichij shimicunahuanmi tigrachirca’ (Zac. 1:12, 13). Profeta Eliashuan ima tucushcata ricupashunchi. Profeta Eliasca llaqui llaqui caimandami Jehová Diostaca nirca, huañungapami munani nishpa. Chaita ricushpami Jehová Diosca Eliasta cushichichun shuj angelta cacharca. Chai ángel ayudashcamanda, ali shimicunahuan cushichishcamandami Eliasca Jehová Diosta ashtahuan sirvishpa catita usharca (1 Rey. 19:1-18). Shinapash ¿pita Jehovashna shujcunata llaquishpa alipacha tratarca?

Jesús cai alpapi cashpaca shujcunata llaquishpa ali tratarca. Paica gentecunataca ani anica na tratarcachu. Gentecuna imashina sintirishcata intindishpami Jesusca cashna nirca: “Imatapash rurashpa shaijushcashna, aparishcashna causajcuna, ñucapajman tucuilla shamuichi. Ñucami cangunataca samachisha. Ñucapaj yugoca fangallagumi” can nishpa (Mat. 11:28-30). Shina tratajpimi gentecunaca tucui ladoman Jesusta catingapaj munarca. Gentecunata juyaimandami Jesusca paicunamanga micunata cararca, ungüita charijcunata jambirca, Jehovamanda “tucuillaman yachachi callarirca” (Mar. 6:34; Mat. 14:14; 15:32-38).

Jesusca ali yuyashpami shujcunata imashina tratanataca ali yacharca. Chaimi shujcunata llaquishpa, paipa ruraicunata saquishpa gentecunata ayudan carca (Luc. 9:10, 11). Shuj punllaca 12 huatacunata yahuar shamujuj ungüihuan causaj huarmimi, Jesuspaman quimirishpa paipa churajunata tacarirca. Moisesman cushca leypi nishca shinaca, chai huarmica na quimirinachu carca (Lev. 15:25-28). Paipa churajunata tacarishcamandaca Jesusca na culirarcachu. Chaipa randica ali tratashpami chai huarmitaca cashna nirca: “Ñuca huahualla, ñucata tucui shunguhuan crishpami” ali tucushcangui. “Cunanga, ninanda cushijushpa rilla. Astinshna llaquichijuj chai nanaica, cutinga na llaquichingachu” nishpa (Mar. 5:25-34). Jesusca chai huarmiguta llaquishpa tratashcatami ricuchirca.

Imashinami ricupashcanchi shujcunata llaquishcataca ruraicunahuanmi ricuchina capanchi. Shujcunata llaquishpa tratana minishtirishca cashcata ricuchingapami, Jesusca samaritano runagumanda chimbapuraita parlarca. Jesuspa tiempopica judio gentecunaca samaritano gentecunahuanga na llevarinllu carca. Chai chimbapuraipi parlashca samaritano runaguca, ña huañunalla macai tucushca judio runatami llaquishpa ayudarca. Chai samaritano runaguca judio runapa chugrishcacunata shuj finduhuan pillushpa, shuj mingarij huasimanmi aparca. Paita cuidachunmi huasi dueñomanbash pagashpa saquirca. Shinallata huasi dueñomanbash cashna nirca: “Cai runaguta ali cuidapangui. Cai culquigu na pactajpipash, ñuca tigramushpaca cupashallami” nishpa (Luc. 10:29-37).

Ruraicunahuan shujcunata llaquishcata ricuchishpapash, ali parlocunahuanbashmi cushichi ushapanchi. Bibliapica ninmi: “Runapaj shungupi llaquilla canami, ñavita urai cumuchin. Ashtahuangarin alita rimashca shimicunaca, cushichinllami” nishpa (Prov. 12:25). Shujcunata llaquishpaca ali parlocunata nishpa cushichishpami paicunapi preocuparishcatapash ricuchishun. Shinami paicunaca llaquicunata o problemacunatapash aguantai ushanga (Prov. 16:24).

Ñucanchicunaca ‘Taita Diosman rijchajpacha rurashca’ caimandami shujcunata llaquishpa tratai ushanchi (Gén. 1:27). Bibliapi parlashca gentecunamanda yachajupashunchi. Soldadocunata mandaj Julio runaca Apóstol Pablotaca Roma llactamanmi prezu apajurca. Chai soldadoca apóstol Pablotaca alimi tratashcarca. Chaimi apóstol Pablotaca Sidón llactapi “pai ali rijsijcunapajman rijpi, imagutapash carachun cacharirca” (Hech. 27:3). Chai punlla jipaca apóstol Pablopash, shuj gentecunapash barcopi rijujpimi barcoca yacupi pambari callarirca. Chaimi Malta islamanda gentecunaca apóstol Pablotaca, barcopi rijuj gentecunatapash llaquishpa ayudarca. Paicunaca apóstol Pablopash, chaishuj gentecunapash cunuchun nishpami ninata japichirca. Shinallata paicunata ayudangapami imagutapash ruranajurca (Hech. 28:1, 2). Malta islamanda gentecuna shina ayudashcamandaca alimi rurarca. Shinapash huaquinbica shujcunata llaquishcataca ali parlocunahuan, cushichi shimicunahuanmi ricuchina capanchi.

Jehová Diospa ñaupapi ali ricuringapaj munashpaca shujcunata llaquishcata ricuchina capanchi. Shinapash huaquinbica shujcunata llaquinaca dificilmi can. ¿Imamandata shina nipanchi? Huaquin gentecuna ñucanchita llaquichishcamanda, na seguro sintirimanda, jariyashca caimandami huaquinbica shujcunata llaquinaca shinlli ricurin. Chai jarcaicunata mishangapaca Jehovapa espiritu santota mañanami capanchi. Shinallata Jehová Dioshna cangapami esforzarina capanchi (1 Cor. 2:12).

 Shujcunata ayudajushpa imapi mejoranata yachangapaca ¿imatata rurana capanchi? Tapurishunchi: “Shujcuna imashina sintirishcata parlajujpica ¿alichu uyani? Na rijsicunata ayudangapaca ¿esforzarijunichu? Na cashpaca ¿ñucanchi familiatalla o ñucanchi ali amigocunatallachu ayudanajunchi?” nishpa. Shinallata huauquipanicunata ali rijsingapami esforzarina capanchi. Shina rurashpami ñucanchi huauquipanicuna imata minishtijujtaca ali yachashun. Chai jipami shujcuna ñucanchita imashna tratachun munashcashna shujcunatapash ali tratashun (Mat. 7:12). Shinallata shujcunata llaquishpa tratangapami Jehová Diosta mañana capanchi. Paica ñucanchitaca ayudangami (Luc. 11:13).

Apóstol Pabloca shujcunata llaquishpami tratan carca. Chaimandami paitaca alicachishpa ricun carca. Bibliapica ninmi: “Paipajman shamujcunataca, pitapash aligutami mingachijurca” nishpa (Hech. 28:30, 31). Apóstol Pabloca shujcunata ayudanatami gushtan carca. Paica paipa parlocunahuan, ruraicunahuanmi ricuchin carca. Chashna cajpimi ashtaca gentecunaca paitaca ninanda alicachishpa paihuan parlangapaj munan carca. Shinaca ñucanchicunapash shujcunata llaquishpa tratajpica chai gentecunapashmi Jehová Diosmanda yachajungapaj munanga. Shina tratajpica ñucanchi crishcacunamanda na uyangapaj munajcunapashmi shuj punllaca cambiaita ushanga (Rom. 12:20). Tiempo yalijpica chai gentecunaca Bibliamanda yachajungapaj tal vez munaita charinga.

Paraíso alpagupica ashtaca ashtaca huañushca gentecunami causaringa. Paicunata primera vez shujcuna llaquishpa tratajpica cushillami sintiringa. Shina tratashcamandami paicunapash shujcunata llaquishpa tratanga. Shujcunata juyaihuan, llaquishpa tratajpica Jehová Diosca shuj juyailla paraíso alpagutami caranga. Shinapash pipash na llaquishpa tratajcunataca paraíso alpagupi causachunga na saquingachu (Sal. 37:9-11). Jehová Diospa Reino ña mandajujpica tucuicunami tranquilo, nimata na manllashpa causanga. Chai punlla nara chayajpillatami shujcunata llaquishpa tratana capanchi. Shina rurashpaca ¿imatata chasquishun?

Bibliapica ninmi: “Pitapash llaquij runaca” shujcuna imashina sintirishcatami ali intindi ushan. Shina rurashpaca paillatami cushilla sintirin nishpa (Prov. 11:17). Shujcunata llaquishpa tratajta gentecuna ricushpaca paicunapashmi shinalla cangapaj munan. Chaimandami Jesusca cashna nirca: “Shujcunaman imashna medishpa carajpipash, chashnallatami Diospash cangunaman caranga” nishpa (Luc. 6:38). Shujcunata llaquishpa trataj gentecunaca ñapashmi amigocunatapash chari ushan.

Apóstol Pabloca Éfeso llactamanda huauquicunataca cai consejotami curca. Paica nircami: “Cangunaca, tucuicunahuan aliguta causashpa, caishuj chaishuj llaquirishpa causaichi. Cristomanda Taita Dios cangunapaj juchacunata perdonashcashnallatami, caishujmanda chaishujmanda perdonarina canguichi” nishpa (Efes. 4:32). Shinaca congregacionbica caishuj chaishuj ayudaringapaj esforzarina capanchi. Huauquipanicunaca shujcunata pingaipi saquingapaj, imatapash nishpa llaquichingapaj, huasha rimashpa puringapaca na munanachu can. Chaipa randica shujcunata imagutapash nishpa cushichingapami parlana capanchi (Prov. 12:18). Shina rurajpica Jehová Diosta sirvijcunami ashtahuan congregacionbica mirashpa catinga.

Shinaca shujcunata llaquina nishpaca, ñucanchi parlocunahuan, ruraicunahuan shujcunata llaquishpa tratanatami ricuchin. Shinaca shujcunata llaquishpa tratashpaca Jehová Dioshna cashcatami ricuchinajushun (Efes. 5:1). Shujcunata llaquishpa tratashcata ricuchishpaca huauquipanicunapura ñaupaman catichunmi ayudashun. Shinallata shuj gentecunapash Jehová Diosta rijsina munaita charichunbashmi ayudashun. Shinaca shujcunata llaquishpa catipashunchi. Shujcunapash chaitallata rurachun ayudapashunchi.