1, 2. Hebreos 13:4​pica ¿imatata yachajupanchi?

TUCUICUNAMI Jehová Diostaca respetana capanchi. Shina rurashpaca Jehová Diosca ñucanchita alicachishpami ricunga (1 Sam. 2:30; Prov. 3:9; Apoc. 4:11). Shinallata shuj gentecunatapash, autoridadcunatapash respetachunmi Jehová Diosca munan (Rom. 12:10; 13:7). Ashtahuanbachaca cazarashca causaita respetachunmi munan.

² Apóstol Pabloca nircami: “Cazarashpa causanajujtaca tucuicunallata alicachinami canguichi” nishpa (Heb. 13:4, MTQI ). Apóstol Pablo shina nishpaca, cazarashca causaita respetachunmi Jesusta catijcunataca mandajurca. Shinaca ¿ñucanchipashchu cazarashca causaitaca respetanchi?

3. Cazarashca causaimandaca ¿imatata Jesusca nirca? (Callari dibujota ricupangui).

³ Jesushnami ñucanchipash cazarashca causaitaca respetana capanchi. Shuj punllaca, divorciarinamanda fariseocuna tapujpica, Jesusca Adanman, Evaman Jehová Dios ima nishcatami parlarca. Jesusca nircami : “Jarica, paipaj taitata, paipaj  mamata saquishpa, paipaj huarmihuan tandanajushpa, shujlla aicha tucushpa causanajunga” nishpa. Shinallata nircami: ‘Taita Dios tandachishcataca maijan runapash na shicanyachi ushanllu’ nishpa (Marcos 10:2-12, liingui; Gén. 2:24).

4. Cazarashcacunaca ¿mashna huatacunatata pacta causana carca?

⁴ Cazarashca causaita Taita Dios churashcatami Jesusca crirca. Chaimi paica nirca, cazarashcacunaca huañungacamanmi pacta causana can nishpa. Jehová Diosca Adanda, Evata ishcandi para siempre pacta causachunmi rurarca. Chaimandami Jehová Diosca paicunata divorciarinalla cashcataca na nircachu.

5. Apóstol Pabloca ¿imatata nirca?

⁵ Jehová Diosta Adán na cazuimandami cazarashca causaipica ashtaca cambiocuna tiashca. Huañuimi cazarashca causaita cambiashca. Apóstol Pabloca Jesusta ali catijcunataca Moisesman cushca leyta ñana catinatami intindichirca. Shinallata nircami, cusa o huarmi huañujpica cazarashca causaica chaipimi tucurin. Maijan causaj quedajca cutinmi cazaraita ushan nishpa (Rom. 7:1-3).

6. Moisesman cushca leypica ¿imatata Jehová Diosca mandarca?

⁶ Moisesman cushca leypica cazarashca causaimanda huaquin yuyaicunatami ricupanchi. Chai leypica israelitacunataca huaquin huarmicunahuan cazarachun saquinllami carca. Shinapash Moisesman leyta nara cushpallatami jaricunaca ña tauca huarmicunahuan cazaran carca. Chaimi huarmicunata ama llaquichichunmi Jehová Diosca chai leyta curca. Shuj israelita shuj esclava huarmihuan cazarashca cajpi, cutin shuj huarmihuan cazarashpaca punda huarmitaca mantinishpami catina carca. Jehová Diosca punda huarmita ayudachun, cuidachunmi mandarca (Éx. 21:9, 10). Ñucanchica israelitacunaman cushca leyta  pactachina obligaciondaca na charinchichu. Shinapash chai leypica cazarashca causaimanda Jehová Diospash respetashcatami yachajupanchi. Ñucanchipashmi cazarashca causaita respetana capanchi.

7, 8. a) Moisesman cushca leypi nishcashnaca ¿imatata cusacunaca rurai usharca? b) Jehová Diosca ¿imatata divorciarinamandaca pensan?

⁷ Israelitacunaman cushca leypica divorciarinamandaca ¿imatata nijurca? Jehová Diosca cazarashca causaita respetan carca (Deuteronomio 24:1, liingui). Jehová Diosca ¿imamandata divorciarichun saquin carca? Cusacunaca paipa huarmipi imapash nalita ricushpaca divorciarichun saquinllami carca. Shinaca ¿ima nalita ricushpata divorciarita ushana carca? Imamanda divorciarinataca Moisesman cushca leypica na ninllu. Shinapash imagumandapash paipa huarmimandaca, cusaca na divorciarinachu carca (Deut. 23:14). Jesuspa punllacunapica ashtaca judiocunaca yangamandami paicunapa huarmicunamanda divorciarin carca (Mat. 19:3). Ñucanchica chai judiocunashnaca na canachu capanchi.

⁸ Profeta Malaquiaspa punllacunapipashmi ashtaca judiocunaca paicunapa huarmicunamanda yangata divorciarin carca. Tal vez paicunaca Diosta na adoraj joven huarmihuan cazarangapami shina ruran cashcanga. Chaimi Profeta Malaquiasca Jehová Dios imata pensajta ricuchirca. Paica nircami: “[“Divorciarinataca”, NM ] Taita Diosca fiñanmi” nishpa (Mal. 2:14-16). Bibliapica ninmi: “Paipaj huarmihuan tandanajushpa, shujlla aicha tucushpa causanajunga” nishpa. Imashinami ricupanchi, Jehová Diosca pundamandapachami cazarashca causaitaca respetashca (Gén. 2:24). Jesuspash Jehová Dioshna pensashcata ricuchingapami cashna nirca: “Taita Dios chashna tandachishca cajpimi, partitaca pipash napacha ushana” can nishpa (Mat. 19:6, MTQI ).

9. Marcos 10:11, 12​pi nishca shimicunamandaca ¿imatata yachajupanchi?

⁹ Jesusca divorciarinamanda imata pensajta ricuchingapami cashna nirca: “Maijan runapash, paipaj huarmita jichushpa shujhuan cazarashpaca, huainayashpami causajun. Shinallata maijan huarmipash, paipaj cusata jichushpa shujhuan cazarashpaca, huainayashpallatami causajun” nishpa (Mar. 10:11, 12; Luc. 16:18). Imashinami ricupanchi, cazarashca causaitaca Jesusca respetarcami. Shujcunapash cazarashca causaita respetachunmi paica munarca. Shinaca shuj cusa o shuj huarmi yangamanda divorciarishpa shujhuan cazarashpaca huainayana juchapimi urmanajunman. Yangata divorciarishpapash cazarashca causaica Jehovapa ñaupapica na tucurinllu. Paicunaca “shujlla aicha” cashpami catin. Shinallata Jesusca nircami, shuj jari paipa huarmimanda yangamanda divorciarishpaca paipa huarmi huainayana juchapi urmachi ushanman nishpa. Jesusca ¿imatata ningapaj munarca? Jesuspa punllacunapica divorciarishca huarmica pipash mantinichun munaimandami shuj jarihuan  cazaraita ushanman carca. Shina cazarashpapash chai huarmica huainayashpallatami causajunman carca.

10. Cazarashcacunaca ¿imamandata divorciarita ushan?

¹⁰ Jesusca cazarashcacuna imamanda divorciarita ushashcatami parlarca. Paica nircami: ‘Napash huainayajpita, paipaj huarmita shuj runa yangamanda [“divorciarishpaca”, NM ], shujhuan cazarashpaca, huainayashpami causajunman’ nishpa (Mat. 19:9). Chai shimicunataca Mateo 5-7​pipashmi ricupanchi (Mat. 5:31, 32, NM ). Shinaca chai textocunapica huainayana juchamandami Jesusca parlajurca. Bibliapica cazarashca jahua shuj jarihuan o huarmihuan puñushpa faltapi urmanata, culquipalla shuj jarihuan o huarmihuan pacta puñunata, jaripura o huarmipura puñushpa faltapi urmanata, animalcunahuan mapayashpa puñunatami huainayana jucha nin. Pensaripashunchi, shuj cusa huainayana juchapi urmajpica, paipa huarmica divorciarinata o na divorciarinataca paillatami ali ricuna can. Divorciarishpaca Jehovapa ñaupapica cazarashca causaica chaipimi tucurin.

11. Shuj cusa o huarmica ¿imamandata na divorciarinman?

¹¹ Cusa o huarmi huainayana juchapi urmajpica divorciarinallami canguichi nishpaca Jesusca na nircachu. Shuj cusa huainayana juchapi urmajpica, paipa huarmica na divorciarinatami agllai ushan. Paipa cusata juyaimanda, perdonashcamanda, aliguta causangapaj munaimandami na divorciarinman. Shinapash divorciarishpaca ¿ima problemacunatata chari ushanman? Pipash na mantininata, cusahuan pacta canata, huahuacunata Jehová Diosmanda yachachinatami na charinga (1 Cor. 7:14). Shinaca juchapi na urmashca cusa o huarmi divorciarishpaca problemacunatami charinga.

12, 13. a) Profeta Oseashuanga ¿imata tucurca? b) Oseasca ¿imamandata paipa huarmitaca cutin pusharca? c) Cazarashca causaimandaca ¿imatata yachajui ushapanchi?

¹² Profeta Oseaspa causaimanda yachajushpami cazarashca causaimanda Jehová Dios imata pensajta ricupanchi. Oseastaca Gómer huarmihuan cazarachunmi Jehová Diosca mandarca. Jehová Diosca nircami: “Jaricunahuanlla causaj huarmihuan cazaragri. Chai huarmihuanga, jaricunahuanlla causaj huarmipaj huahuacunata charigri” nishpa. Gómer huarmica Oseas runahuanmi shuj churiguta charirca (Os. 1:2, 3). Shinapash jipamanga chai huarmica shuj jarihuanmi shuj ushita, shuj churita charirca. Gómer huarmica tauca viajemi shuj shuj jaricunahuan pacta puñushpa faltapi urmarca. Shina rurajpipash profeta Oseasca chai huarmimandaca na divorciarircachu. Tiempohuanga Gómer huarmica Oseastaca saquishpami rirca. Shinapash chai huarmica esclava cajpimi Oseasca paita randirca (Os. 3:1, 2). Israelitacunaca Jehová Diosta saquishpami yanga dioscunata sirvinajurca. Jehová Diosca Oseaspa huarmihuan ima tucushcata parlashpami israelitacunata cutin cutin perdonashcata ricuchirca. Caimandaca ¿imatata yachajupanchi?

¹³ Shinaca shuj huauqui o shuj pani huainayana juchapi urmajpica paipa cusa o huarmimi divorciarinata o na divorciarinataca ricuna can. Jesusca nircami, cusa o huarmi huainayana juchapi urmajpillami divorciarishpa, pihuanbash cazarangapaj libre quedan nishpa. Shinapash cusata o huarmita perdonashpaca imapash juchataca na ruranllu. Bibliapica profeta Oseas paipa huarmihuan  cutin tigrashcatami parlan. Shinaca chai punllamandapachami, Oseaspa huarmica shuj jaricunahuanga ñana pacta puñuna carca. Oseasca huaquin punllacunatami paipa huarmihuanga na pacta puñurca (Os. 3:3 nota, nwt-E). Tiempohuanmi Oseasca paipa huarmihuan cutin pacta puñurca. Chaica ricuchircami, Jehová Dios israelitacunata cutin perdonashcata (Os. 1:11; 3:3-5). Caimandaca ¿imatata yachajupanchi? Huainayana juchapi urmashca cusahuan o huarmihuan cutin pacta puñushpaca perdonashcatami ricuchin (1 Cor. 7:3, 5). Shinaca pacta puñushpaca ñana divorciarita ushanllu. Shina pasajpica cazarashca causaitami Jehová Dioshna respetana can.

14. 1 Corintios 7:10, 11​pi nishca shinaca ¿imatata huaquin cazarashcacunaca rurarca?

¹⁴ Jehová Diospash, Jesuspashmi cazarashca causaita respetan. Shinallatami Jehová Diosta sirvijcunaca cazarashca causaita respetangapaj esforzarina capanchi. Juchayucuna caimandaca cazarashca causaitaca na respetashpami huaquingunaca causan (Rom. 7:18-23). Punda tiempopi cazarashcacunaca problemacunata charircami. Chaimandami Apóstol Pabloca cashna nirca: “Huarmica, cusataca na jichunachu” o na separarinachu can nishpa. Shinapash huaquingunaca separarircami (1 Corintios 7:10, 11, liingui).

15, 16. a) Problemacunata charishpapash ¿imatata cusahuarmicunaca rurana can? b) Cusahuarmimanda shuj na Testigo cajpi, problemacunata charishpaca ¿separarinallachu carca?

¹⁵ Huarmicuna imamandata separarishcataca apóstol Pabloca na villarcachu. Cusacuna huainayana juchapi urmashcamanda chai huarmicunaca na separarishcangachu. Cusacuna huainayana juchapi urmashca cajpica huarmicunaca divorciarishpa shuj jarihuan cazaraita ushanmanmi carca. Chaimi apóstol Pabloca chai huarmicunataca ama shujcunahuan cazarashpa, paipa cusahuanllata tigrachun mandarca. Paicuna separarishca cashpapash Taita Diospa ñaupapica cazarashcarami catirca. Apóstol Pabloca consejarcami, cusahuan o huarmihuan imapash problemata charishpa, na huainayana juchapi urmashca cajpica ali tucunami canguichi nishpa. Shinallata anciano huauquicunapa ayudata mascachunmi mandarca. Shinapash anciano huauquicunaca imata ruranataca na ninachu carca. Chaipa randica Bibliahuanmi consejana carca.

¹⁶ Cusahuarmimanda shuj na Testigo cajpi, problemacunata charishpaca ¿separarinallachu carca? Na. Bibliapi nishca shinaca  cusa o huarmi huainayana juchapi urmashca cajpillami divorciarita ushan. Cutin imacunamandapash separarinataca Bibliapica na ninllu. Apóstol Pabloca nircami: “Maijan crij huarmipash na crij cusata charijpi, cusa ali causashunllami nijpica, ama jichuchun ninimi” nishpa (1 Cor. 7:12, 13). Chai consejotaca cunangamanmi cazuna capanchi.

17, 18. Na Testigo cusahuan o huarmihuan problemacunata charishpapash ¿imatata huauquipanicunaca na rurashca?

¹⁷ Huaquin na Testigo cusacunaca Testigo huarmihuanga na causangapaj munanllu. Huaquin jaricunaca paipa huarmita ninanda macaimandami paipa huarmipa causaitaca peligropi churashca. Shinallata huaquin jaricuna familiata na mantiningapaj munashpa, Jehovata sirvichunbash jarcashca. Shina tratajpimi huaquin panigucunaca separarishca. Cutin huaquin panigucunaca shina tratajpipash na separarishpami cusahuan ali causangapaj esforzarishca. ¿Imamandata chai panigucunaca shina rurashca?

¹⁸ Chai panigucunaca, cusamanda separarishpapash cazarashca catishcata, problemacunata charina cashcata ali yachaimandami paicunaca na separarishca. Cusahuarmicuna ama separarichunmi apóstol Pabloca cashna nirca: ‘Na crij cusaca, paipa huarmi crij cajpimi Diospajlla tucushca. Shinallata na crij huarmipash, paipa cusa crij cajpimi Diospajlla tucushca. Na shina cajpica, cangunapa huahuacunapash na crijcunapa huahuacunashna nalicunami canman. Ashtahuangarin cunanga, cangunapa huahuacunaca Diospajllami’ can nishpa (1 Cor. 7:14). Ashtaca Jehovata sirvijcunaca na testigo cusahuan o huarmihuan ashtaca problemacunata charishpapash na separarishcachu. Shina ruraimandami jipamanga na testigo cusa o huarmica Jehová Diosta sirvi callarishca (1 Corintios 7:16, liingui; 1 Ped. 3:1, 2).

19. Jehovata sirvij cusahuarmicunaca ¿imamandata cushilla causan?

¹⁹ Jesusca imamanda divorciarinata, apóstol Pabloca separarinamandami huaquin consejocunata parlarca. Paicunaca cazarashca causaita respetachunmi munarca. Cunanbi Jehovata sirvij cusahuarmicunaca cushillami causan. Paicunaca randimanda juyarishpa, respetarishpami causan. Shina causashpami chai cusahuarmicunaca cazarashca causaita respetashcata ricuchin. Bibliapica ninmi: “Jarica, paipaj taita mamata saquishpa, paipaj huarmihuan causangapaj tandanajunga. Shina tandanajushpaca ishcai cashpapash, shujlla cuerposhna tucushpami causanajunga” nishpa. Ashtaca cusahuarmicunaca cai shimicunata cierto cashcatami cuenta japishca (Efes. 5:31, 33).