1, 2. Quiquinba causaipi imata ruranata agllagrijushpaca ¿imatata yarina capangui? (Callari fotocunata ricupangui).

JOVENGUNATACA paicunapa causaipi imata ruranatami ashtaca consejocunata cun. Chaimanda huaquin profesorcuna, shuj gentecunapashmi universidadta estudiashpaca shamuj punllacunapi ashtaca culquita ganangui nin. Shinapash Jehová Diosca quiquin cushilla causachun munaimandami ali estudiashpa, ali trabajota charichun munan (Col. 3:23, NM ). Quiquinba causaipi imata ruranata agllagrijushpaca Jehovapa consejocunatami cazuna capangui. Chai consejocunata cazunaca, tucurimui punllacunapi imata rurachun munashcata cuenta japichunmi ayudanga (Mat. 24:14).

² Shamuj punllacunapi imacunalla pasanataca Jehová Diosca alimi yachan. Shinallata cai mundopi nali ruraicuna  ñalla tucurinatapashmi ali yachan (Is. 46:10; Mat. 24:3, 36). Taita Diosca ñucanchita ali rijsimandami ñucanchipa ima ali cashcata ima nali cashcataca ali yachan. Gentecunamanda huaquin consejocuna alishnalla uyarijpipash na Bibliamanda cajpica nali consejocunami can (Prov. 19:21).

3, 4. Diablopa nishcata uyaimandaca Adanhuan, Evahuanbash, paipa huahuacunahuanbash ¿imata pasarca?

³ Diablomi Adanda, Evataca nalicunata nishpa umachirca. Chaimandami cunangaman shuj gentecunapash nali consejocunata shujcunaman cun. Diabloca Adanda, Evataca nircami, canguna munashcashna causaichilla. Shina causashpaca cangunaca cushillami causanguichi nishpa (Gén. 3:1-6). Adanda, Evata shina nishpaca Diabloca paipilla pensarijushcatami ricuchirca. Adanbash, Evapash paipa huahuacunapash Jehová Diosta cazunapa randica Diabloca paita adorachunmi munarca. Diabloca gentecunamandaca nimata na rurarcachu. Cutin Jehová Diosca shuj juyailla alpaguta, cusahuarmi pacta causanata, jucha illaj, sano causanatami Adanmanbash, Evamanbash curca.

⁴ Shinapash Adanbash, Evapash Jehová Diostaca na cazurcachu. Shina ruraimandami Jehovapa amigo canatapash saquirca. Cunanga caipi pensaripashun, shuj sisaguta cuchujpica anguyashpami huañun. Shinallatami Adanbash Evapash mayoriashpa huañurca. Paicunapa culpamandami paicunapa huahuacunapash juchayu nacirimanda sufrishpa causan (Rom. 5:12). Cunangamanmi ashtaca gentecunaca Jehová Diosta na cazushpa, paicunapa munashcata rurashpa causan (Efes. 2:1-3). Jehová Diosta na cazuj gentecunaca Jehovapa ‘ima yachaitapash’ na charinllu (Prov. 21:30).

5. Jehová Diosca gentecunamandaca ¿imatata ali yacharca?

⁵ Jehová Diosca alimi yacharca jovengunapash, mayorcunapash paita rijsishpa sirvinata (Sal. 103:17, 18; 110:3). Jehová Diosca tucui gentecunatami juyan. Chaimi paita sirvishpaca cushilla causangui. Quiquinga ¿chai gentecunapurapichu cangui? (Prov. 10:22; 1 Tim. 6:17). Cai temapica, Bibliamanda ashtahuan yachajunata, ali amigocunata charinata, Jehovata ashtahuan sirvinata, causaipi imata ruranata agllanatami yachajupashun.

6. a) Bibliamanda ashtahuan yachajunaca ¿imamandata minishtirishcapacha can? b) Bibliamanda ashtahuan yachajuchunga ¿imashinata Jehová Diosca ayudan?

⁶ Jehová Diosca Bibliamanda ashtahuan yachajuna munaihuanmi ñucanchitaca rurashca. Shuj animalgucuna cuendataca na rurashcachu (Mat. 4:4). Jehovapa consejocunata uyanaca ali yachaita charichun, ali intindichun, cushilla causachunmi ayudan. Jesusca nircami: “Diosmanda yachajungapaj, paicunapaj shungupi ninanda munajcunaca, ninandami cushijun” nishpa (Mat. 5:3). Jehová  Diosca paimanda ashtahuan yachajuchunga Bibliahuan, “aliguta cazushpa, aliguta yarishpa servij” esclavo llujchishca ashtaca publicaciongunahuanbashmi ayudan (Mat. 24:45; Is. 65:13, 14).

7. Bibliamanda ashtahuan yachajunaca ¿imashinata ayudan?

⁷ Bibliamanda ashtahuan yachajushpaca ali yachaita charichun, imacunatapash ali pensarishpa rurachun, imapash nalicunata ama rurachunbash ayudan (Proverbios 2:10-14, liingui). Bibliamanda ashtahuan yachajunaca ¿imacunatalla ali intindichunda ayudan? Taita Diosmanda llullacunata yachachishcamanda, ashtaca culquita charina munaimanda, ashtaca cosascunata charishpa cushilla causai ushangui nishcacunamanda intindichunmi ayudanga. Shinallata nali munaicunapi, nali viciocunapi ama urmachunmi ayudan. Chaimi Jehová Dioshna pensangapaj, paipa ali yachaita charingapapash esforzarina capangui. Shina rurashpaca quiquinllatami Jehová Dios juyashcata, cushilla causachun munashcata cuenta japingui (Sal. 34:8; Is. 48:17, 18).

8. Cunanmandallata Jehová Diosta ashtahuan rijsishpaca ¿imashinata shamuj punllacunapi causapangui?

⁸ Ñallapachami Diablopa nali mundoca tucuringa. Chaimi ñucanchicunaca Jehová Dios ayudanata shuyana capanchi. Paillami ñucanchitaca ayudanga. Shinallata Jehová Dios Bibliamanda ashtahuan yachachinatami tucui shunguhuan confiashpa catina capanchi (Hab. 3:2, 12-19). Cunanmandami Jehová Diosta ashtahuan rijsishpa, paipi ashtahuan confiashpa catina capangui (2 Ped. 2:9). Shina rurashpallami gentecuna imata cai mundopi ruranajujpipash rey David cuenda ni ushapangui. Paica nircami: “Ñuca tucui causaipica, Mandaj Diostami, ñuca yuyaipi charircani. Pai ñuca ali ladopi cajpimi, na cuyuchi tucusha” nishpa (Sal. 16:8).

9. a) Juan 6:44​pica ¿imatata yachajupanchi? b) Shuj testigo de Jehovata tuparishpaca ¿imashpata ñapash rijsipanchilla?

⁹ Pitapash primera vez tuparishpaca ¿paitaca alimi rijsini ni ushanguichu? Na. Tal vez shutitallami rijsi ushangui. Paimandaca na tucuita yachai ushanguichu. Cutin shuj testigo de Jehovata tuparishpaca shujpachami can. Jehová Dios paipa llactapi cachun paitapash agllashcata, Jehovata juyashcata, ali cashcatapashmi ñapash cuenta japingui (Juan 6:44, liingui). Ashtahuangarin shuj huauquita o panita shuj llactamanda cajpi, shuj costumbrecunata charijpipash paicunataca ña rijsishca cuendami sintirinchi. Paicunapashmi shinallata sintiringa.

10, 11. Tucuilla Testigocunaca ¿imashnata can? Caimandaca ¿imatata yachajupangui?

¹⁰ ¿Imashpata shujlla shimita parlaj cuenda capanchi? Tucuillata Testigocuna Bibliamanda chaitallata yachajushcamandami shujlla shimita parlaj cuenda capanchi (Sof. 3:9, NM ). Testigocunapura tuparishpaca Taita Diosmanda imata crishcata, paipa mandashcacunata, shamuj punllapi juyailla causanata, Bibliamanda yachajushcatami yachai ushapanchi. Shinami paicunapi ashtahuan confianzata charichun ayudan. Chaimi paicunahuan alipacha amigocuna cachunbash ayudan.

¹¹ Mundo enteropimi Jehová Diosta sirvijcunaca tian. Shinaca paicunata nara rijsishpapash paicunahuan alipacha amigocuna caita ushapangui. Cutin Jehová Diosta na rijsijcunaca na shina nita ushanllu.

12. Jehovata ashtahuan sirvingapaca ¿imatata rurajungui?

¹² (Eclesiastés 11:9-12:1, liingui). Jehovata ashtahuan sirvingapaca ¿imatata rurajungui? Bibliata liingapaj, tandanajuipi comentangapaj, ashtahuan ali villachingapachari esforzarijungui. Quiquinllata alita rurashcata ricushpaca ¿nachu cushilla sintirishcangui? Ari, cushillami sintiringui. Shinallata huauquipanicuna alitami rurangui nijpipashmi cushilla sintiringui. Shinaca quiquin munashcashna na causashpa, Jehová Diospa munaita pundapi churajushpaca Jesuspa chaquita catijushcatami ricuchingui (Sal. 40:8; Prov. 27:11).

13. Cai mundopi charij cana, rijsishca rijsishca canapa randica ¿imamandata Jehovata ashtahuan sirvina ashtahuan ali can?

¹³ Jehovata ashtahuan sirvingapaj esforzarishpaca quiquinba causaipipash cushillami sintiringui. Apóstol Pabloca nircami: “Imata rurachun pai mingashcatapash, ashtahuanmi rurashpa catina canguichi. Apunchi Jesusmanda imatalla ruranaca, na yanga cajta yachashpami, chashna rurana canguichi” nishpa (1 Cor. 15:58). Jehovata na rijsij gentecunaca cai mundopi charij cangapaj, rijsishca rijsishca cangapami munan. Shina cashpapash na cushilla causaita ushanllu (Luc. 9:25). Punda tiempopi causaj rey Salomonga charij charijmi carca. Cunanga paimanda yachajupashunchi (Rom. 15:4).

14. Salomón runamandaca ¿imatata yachajupangui?

 ¹⁴ Salomonga charijpacha charij, tucui tucuitami mandai ushan carca. Shina charij cashpapash shuj punllaca paica paipa munaita rurashpa causangapami munarca (Ecl. 2:1-10). Ashtaca huasicunata, juyailla parquecunata, shuj cosascunata, pai ima munashcatapashmi charirca. Chaicunata charishpapash Salomonga ¿cushillachu carca? Paillatami cashna nirca: “Tucui chaicunapash yangallami” can nishpa (Ecl. 2:11). Caimandaca ¿imatata yachajui ushapangui?

15. a) ¿Imamandata ashtahuan crishpa catinaca minishtirin? b) Salmo 32:8​ca ¿imashinata quiquindaca ayudan?

¹⁵ Huaquingunaca paicunallata imapash pasashpa o shujcunapa pandarishcata ricushpami llaquicunata charishcata yachai ushan. Shinapash Jehová Diosca llaquicunata charichunga na munanllu. Ashtahuangarin paita cazuchunmi munan. Jehovata cazungapaca paipi tucui shunguhuan crinami minishtirin. Jehovata sirvinata agllashcamandaca nunca na arripintiringuichu. Jehová Diosca paita juyaimanda imatapash rurashcataca nunca na cungangachu (Heb. 6:10). Chaimandami imata quiquin crishcatapash ashtahuan crishpa catingapaj esforzarina cangui. Shina rurashpaca Jehová Dios quiquin cushilla causachun munashcatami cuenta japingui (Salmo 32:8, liingui).

16. Quiquinba causaipi imata ruragrijushpapash ali decidishpaca ¿imashinata causangui?

¹⁶ Apóstol Pabloca nircami: “Jehová Diosca espiritumi can. Jehovapa espirituhuan causajpica huatashcashna cashcamandaca cacharichi tucungami” nishpa (2 Cor. 3:17, NM ). Jehová Diosca ñucanchi causaipi imata ruranata agllachunmi saquin. Shinapash quiquinba causaipi imata ruragrijushpapash ali decidichunmi munan. Shina rurashpami nali ruraicunamanda jarcaringui. Huaquin jovengunaca pornografía nishcata ricun, nara cazarashpallata shuj huarmihuan o shuj jarihuan pacta puñunlla. Shinallata huaquingunaca nali pugllaicunata pugllan, drogacunata chupan, yapata ufiashpami causan. Chaicunata rurana alishnalla ricurijpipash chai jovengunaca nali viciocunapimi urmashca. Shujcunacarin millai ungüicunata charishca, huañuitapashmi huañushca (Gál. 6:7, 8). Chai jovenguna cushilla causanchi nishpapash nalimi causan (Tito 3:3).

17, 18. a) Ñucanchi causaipi imata ruragrijushpapash ¿imatata yarina capanchi? b) ¿Cunanbi gentecunashnachu Adanbash, Evapash ashtaca leycunata charirca?

¹⁷ Jehová Diosta cazushpaca cushillami causashun. Shinallata sano alimi causangui (Sal. 19:7-11). Quiquimba causaipi imata ruragrijushpapash Jehovapa mandashcacunata, consejocunata cazushpa ali decidishpa causajujpica Jehovapash,  taitamamacunapashmi ashtahuan quiquinbi confianga. Paraíso alpagupi cashpaca jucha illaj caimandami Jehovata sirvishpa causajcunaca paicunapa munashcata ali rurashpa causanga. Shina causachunmi Jehová Diosca munan. Bibliapica cashnami nin: ‘Paipa huahuacuna punchapambapi causagrichun paillata cacharijpimi cachariringa’ nishpa (Rom. 8:21).

¹⁸ Callaripica shina causaitami Adanbash Evapash charirca. Jehová Diosca Jardín de Edenbica paicunataca ¿imacunatallata ama ruranguichichu nishpa mandarca? Shuj yuramanda ama micunguichichu nishpami mandarca (Gén. 2:9, 17). Jehová Dios shina mandashpaca ¿nali cashcatachu ricuchijurca? Na. Shinapash cunanbi gentecunaca ashtaca leycunatami llujchishca. Chai leycunata cazuchunbashmi paicunaca obligan.

19. Ñucanchi causaipi imata ruranata ali agllachunga ¿imashinata Jehovapash, Jesuspa yachachin?

¹⁹ Cunanbica ashtaca ashtaca leycunatami gentecunaca llujchishca. Cutin Jehová Diosca paipa mandashcacunaca ñucanchipallata alipa cashcatami ricuchin. Shinallata juyaihuan imagutapash yachachin. Chai mandashcacunata, consejocunata cazushpa nalicunata ama rurachunmi Jehová Diosca cushca (Rom. 12:9). Chaicunataca Mateo 5-7​pimi Jesusca alipacha yachachishpa saquirca. Shinallata juchacunapi ama urmachunbashmi yachachirca (Mat. 5:27, 28). Paraíso alpagupica, Jesusca Diospa Reinopi rey caimandami ñucanchicunataca ima ali cashcata, ima nali cashcata yachachishpa catinga (Heb. 1:9). Shinallata jucha illaj causanata, ali yuyaicunata charichunbashmi Jesusca ayudanga. Paraíso alpagupi ña causajushpaca nalita rurana munaita ñana charimandami llaquicunataca ñana charishun. Jehová Dios nishcashnami chai punllacunapica cushilla causashun.

20. a) Jehová Diosca ¿imamandata imagutapash ali ruran? b) Jehová Diosmandaca ¿imatata yachajupanchi?

²⁰ Paraíso alpagupica Jehová Diosta, gentecunata juyaimandami ñucanchi causaipi imata ruranata ali agllashun. Jehová Diosca paishnalla cachunmi munan. Jehová Diosca pai ima ruraita agllai ushashpapash gentecunata juyaimandami imagutapash ali ruran (1 Juan 4:7, 8). Shinaca Jehová Dioshna ñucanchi causaipi imata ruranata ali agllashpaca cushillami causashun.

21. a) Rey Davidca ¿imatata Jehovataca nirca? b) Cati temapica ¿imatata yachajupashun?

²¹ Cai temapica Bibliata ashtahuan yachajunata, ali amigocunata charinata, Jehovata ashtahuan sirvinata, shamuj punllacunapi ñucanchi causaipi imata ruranata ali agllashpa cushilla causanatami yachajupashcanchi. Jehová shina cushcamandaca ¿imashinata sintiripangui? (1 Tim. 6:17). Tal vez quiquinbash rey Davidshnami cushilla sintirishcangui. Paica Jehová Diostaca cashnami nirca: “Causaipaj ñandami ricuchihuangui. Cambaj ñaupajpimi, ninan jatun cushijuica tiapan. Cambaj ali ladopimi, causaita causaicaman juyailla cushijuica tiapan” nishpa (Sal. 16:11). Cati temapica Salmo 16mandami ashtahuan yachajupashun. Chai temapica ciertopacha cushilla causaita charingapaj imata rurana cashcatami yachajupashun.