DIANA paniguca 80 yali huatacunatami charin. Chai panigupa cusaca Alzheimer nishca ungüitami charirca. Rucugucunata cuidaj huasipimi paipa cusaca huañurca. Jipamanga paipa ishcai churicunapashmi huañurca. Shinallata chai paniguca cáncer ungüitami charirca. Shina llaquicunata charishpapash paica tandanajuicunaman rin, villachinamanbash llujshin. Huauquipanicunaca chai panigutaca siempre cushilla cajtami ricushca.

John huauquica 43 yali huatacunatami superintendente shinami sirvirca. Chai huauquica superintendente shina sirvinataca ninandami gushtan carca. Shinapash paipa familia ucupuramanda shuj irquiyajpimi superintendente canataca saquina tucurca. Shinapash John huauquita Jatun Tandanajuicunapi shuj huauquipanicuna tuparishpaca cushi cushi cajtami ricun. Chaimi paicunaca nin, nimata na cambianshcanguichu siempremi cushilla cajta ricunchi nishpa.

Diana panipash, John huauquipash ¿imashinata cushilla cashpa catita ushashca? Paicunaca llaquicunahuan, superintendente canata saquishca cashpapash ¿imashinata cushilla cashpa catita ushashca? Bibliapica ninmi: “Imatapash cashcatapacha ruraj runaca, Mandaj Dioshuan cushijushpami” causan nishpa (Sal. 64:10). Shinaca ciertopacha cushilla canata yachanami chaita ali intindichun ayudanga. Chaipaca cushilla causangapaj imata ruranata, imamanda llaquilla canatapashmi yachajupashun.

Huaquingunaca ¿imamandata cushilla caita ushan? Huaquingunaca cazaraimanda, huahuacunata charimanda, shuj privilegiota chasquimandami cushilla sintirin. Chaicunataca Jehová Diosmi cushca. Ñucanchicuna cushilla causachunmi Jehová Diosca munan. Paimi cazaranata, huahuacunata charinata, paipa organizacionbi imagutapash rurashpa cushilla cachun churashca (Gén. 2:18, 22; Sal. 127:3; 1 Tim. 3:1).

Siempre cushilla caitaca huaquinbica na usharinllu. Huaquinbica cusahuarmimanda shuj huañushpa chingarijpi, shuj cusa o paipa huarmi shujhuan japirijpimi cushilla caitaca na ushan (Ezeq. 24:18; Os. 3:1). Shinallata huahuacuna paicunapa taitamamata, Jehová Diosta na cazushpa  congregacionmanda expulsajpimi cushilla caitaca na ushan. Cunanga profeta Samuelpa churicunahuan ima pasashcata ricupashunchi. Paicunaca Jehová Diostaca na tucui shunguhuan sirvircachu. Shinallata rey Davidpashmi shuj jatun juchata rurarca. Chaimandami paipa familiapica ashtaca llaquicunata charirca (1 Sam. 8:1-3; 2 Sam. 12:11). Shina llaquicunami cushilla causachunga na ayudan.

Huaquinbica salud nali cajpi, familiata mantinina cajpi, Jehová Diospa organizacionbi imapash cambiocuna tiajpimi ashtaca huauquicunaca paicunapa privilegiota saquina tucushca. Paicunaca chai privilegiocunata yarishpaca cushillami sintirin.

Imashinami ricupashcanchi, siempre cushilla caitaca na usharinllu. Shinapash Samuelpa, Davidpa, shuj huauquipanicunapa causaipi ima cambiocuna tiajpi, ima problemacuna tiajpipash ciertopacha cushilla cai ushashcatami ricupashcanchi.

Jesusmi ciertopacha cushilla causarca. Paica cielopi causajushpaca cashnami nirca: ‘maimanbash na anchurishpami, [Jehovataca] punllandi cushichijurcani’ nishpa (Prov. 8:30). Ña cai alpapi cashpaca ashtaca llaquicunatami charirca. Shina llaquicunata charishpapash paipa Taitapa munaitami rurashpa causarca (Juan 4:34). Ña huañuna punlla chayajujpica llaquicunata aguantashpa catichunga Jesustaca ¿imata ayudarca? Bibliapica ninmi: “Cushijushpa causagrinata yachashpami, paica jatun racu caspipi huañunatapash” aguantarca nishpa (Heb. 12:2, NM ). Ciertopacha cushilla canamandaca Jesusca ishcai yuyaicunatami parlarca.

Shuj punllaca Jesusta 70 ali catijcunaca gentecunaman villachishpa, ayacunata llujchishcamandami paicunaca cushilla tigramunajurca. Chaita Jesús ricushpami cashna nirca: “Cangunaca, ayacunata cazuchishpa Ilujchishpalla, na cushijunachu canguichi. Ashtahuangarin cangunapaj shuticuna, jahua pachapi escribishca tiajujpimi, cushijuna canguichi” nishpa (Luc. 10:1-9, 17, 20). Jehová Diosta sirvijuimandaca cushillami sintirinchi. Shinapash Jehová Diospa ñaupajpi ali canami ashtahuan ali can. Chaimi ciertopacha cushilla cachun ayudan.

Ashtaca gentecunapa ñaupajpi Jesús yachachijujpimi shuj huarmi cashna nishpa caparirca, canda ungushcamandaca, canba mamaca ninandami cushijunga nishpa. Chaita uyashpami Jesusca cashna nirca: “Taita Diospaj Shimita yachachijpi uyashpa pactachijcunaca, ashtahuan ninandami cushijun” nishpa (Luc. 11:27, 28). Huahuacuna, taitamamacunata cazujpica taitamamacunaca ninandami cushijun. Shinapash Jehová Diosta cazushpa,  paipa amigo cashpaca cushillami sintiringui. Shina rurashpaca ciertopacha cushilla causaita ushangui.

Shinaca, Jehová Diospa ñaupajpi ali canami ciertopacha cushilla cachun ayudan. Huaquinbica, imapash problemata charishpaca cushilla caitaca na usharinllu. Shinapash chai problemacuna mishachunga ama saquipaichu. Ashtahuangarin chai problemacunata aguantashpa, Jehová Diosta tucui shunguhuan sirvishpa catishpaca ciertopacha cushilla caita ushashun (Rom. 5:3-5). Jehová Diosca paipa espíritu santota cunataca tucui shunguhuanmi confiana capanchi. Chaimi cushilla causachunbash ayudanga (Gál. 5:22). Salmo 64:10​pica ninmi: ‘Imatapash cashcatapacha rurajca Mandaj Dioshuanmi cushijun’ nishpa.

Shinaca Diana panipash, John huauquipash problemacunata charishpapash imamanda cushilla cashcatami yachajupanchi. Diana paniguca ninmi: “Shuj uchilla huahuagu paipa taitamamacunapi tucui shunguhuan confian. Shinallatami Jehová Diospi tucui shunguhuan confiarcani” nishpa. Paillatami cashna nin: “Cushilla villachishpa catichunga Jehová Diosllatami ayudahuashca” nishpa. Cutin John huauquitaca ¿imata ayudarca? Paica ninmi: “1998 huatapica Escuela de Entrenamiento Ministerial nishcapi yachachichunmi cachahuarca. Chaipimi Bibliamanda ashtahuan prepararina carcani. Shina yachajunami villachichun, cushilla cachun ayudahuarca. Chai jipallami superintendente viajante canata saquina tucurcani” nishpa. John huauquipash paipa huarmiguhuan shina cambiocuna tiajpipash na yapata llaquirircachu. Paicunaca, Jehová Dios imata rurai nishcata rurashpaca cushillami sintirishca. Chashna rurashcamandaca nunca na arripintirishcachu.

Ashtaca huauquipanicunaca nishcami, Salmo 64:10​pi shimicunaca ciertopachami can nishpa. Cunanga shuj cusahuarmimanda ricupashun. Paicunaca 30 yali huatacunatami Estados Unidosmanda Betelpi sirvinajurca. Chai jipaca precursorado especial shina sirvichunmi cacharca. Paicunaca nircami: “Betelpi sirvinata saquishcamandaca llaquillami sintirircanchi. Llaquilla sintirishpapash ñaupamanmi catircanchi” nishpa. Chai cusahuarmica ñapashmi huauquipanicunahuan villachingapaj llujshirca. Paicunaca caitapashmi nirca: “Jehová Diosta mañashpami tucuita villan carcanchi. Jehová Dios ñucanchita uyashcata yachashpaca cushillami sintirin carcanchi. Chai congregacionman chayashca jipallami shuj huauquipanicunapash precursorcuna tucurca. Shinallata ñucanchi ishcai Bibliamanda yachajujcuna ñaupaman catijushcata ricushpaca ninandami cushijurcanchi” nishpa.

Cushilla siempre canaca na facilchu can. Huaquinbica llaquicunamandaca llaquillami sintirishun. Shinapash Jehová Diosca Salmo 64:10​pi shimicunahuanmi ñucanchitaca cushichin. Llaquilla sintirijushpaca caitami yarina capanchi, ‘imatapash cashcatapacha ruraj runaca Mandaj Dioshuanmi cushijunga’ nishcata. Shinaca ima llaquicunata charishpapash Jehová Diosta tucui shunguhuan sirvishpaca cushillami sintirishun. Jehová Diosca nircami: “Jahua pachatapash, cai pachatapash mushujta rurasha nishpa”. Chai shimicuna pactarichunmi tucuicunallata shuyanajupanchi. Chai shimicunata Jehová Dios pactachijpimi paipa sirvijcunaca jucha illaj tucushpa “causaita causaicaman cushijushpa” causanajunga (Is. 65:17, 18).

Chai shimicuna pactarijpimi sano, imatapash rurangapapash fuerzata charishun. Jehová Diosca ninmi: “Punda ima tucushcataca, cungashcami canga. Yuyaimanllapash na shamungachu” nishpa. Shinaca paraíso alpagupica punda ima llaquicunata charishcataca ñana yarishunllu. Huañushcacuna causarijpimi ñucanchi huañushca familiahuanga cutin tuparishun. Jesús cai alpapi cashpaca 12 huatacunata charij cuitsagutami causachirca. Chai milagrota ricushpaca chai cuitsagupa taitamamacunaca ninandami cushijurca. Shinallatami ashta ashtaca gentecunaca paipa huañushca familiata cutin causarijta ricushpaca ninanda cushijunga (Mar. 5:42). Shinallata chai punllacunapi nali gentecuna ñana tiaimandami ali gentecunaca para siempre ‘Mandaj Dioshuan cushijunga’.